Babɩlɔnə tɩ̀án ta Zwerizalɛmə ba də́
39
1 Zwida pɩ̀ʋ́ Sedekɩasə pàrɩ̀ tə bɩna nʋgʋ nii bɩnɩ tə, cànɩ̀ fugə nii cànà tə wa, Babɩlɔnə pɩ̀ʋ́ Nebukadənezarə ja ʋ kwatara tə mama ʋ bà ʋ pú Zwerizalɛmə ʋ kə də kʋ̀ʋ̀. 2 Sedekɩasə pàrɩ̀ tə bɩna fugə də nədʋ nii bɩnɩ tə wa, banɩa nii cànà tə wa, cànà tə dɩan nʋgʋ dɩɩn nə, dʋŋa tə tún luloo tɩʋ tə bírə́ tə yɩra. 3 Babɩlɔnə pɩ̀ʋ́ tʋ̀tʋ̀nán yun tɩ̀án tə mama dàń zʋa tɩʋ tə wa, ba kə ba dəkuu bwálɩ́ Titəŋi Mimii tə nə. Kʋ yà yɩ Nɛrəgalə-Sarɛsɛrə, ʋ nə yɩ kwatara yáá tɩ̀án tə mama yuu tíú, də Saməgarə-Nebu, də Sarə-Sekimə, ʋ nə yɩ pɩ̀ʋ́ tʋ̀tʋ̀nán yun tɩ̀án tə yuu tíú, də Babɩlɔnə pɩ̀ʋ́ tʋ̀tʋ̀nán yun tɩ̀án tə duən tə mama.4 Máŋá tə wa Zwida pɩ̀ʋ́ Sedekɩasə də ʋ kwatara tə mama nə nɩ ba, ba zàn tɩtɩn nə, ba səgə ba twá mimii tə nə wulə bírí bələ tə pwə́rə́ wa, ba tì pɩ̀ʋ́ tɩ̀án kárá cwəŋə tə, ba dəri ba nan tɩʋ tə wa, ba va ba jɩrɩ Araba* digə tə cwəŋə tə nə. 5 Yá Kaləde tɩ̀án kwatara tə púə́ ba kwa ba dɩŋa, yá ba jɩn Sedekɩasə Zweriko digə tə wa. Ba jɩn wá ba ja va Babɩlɔnə pɩ̀ʋ́ Nebukadənezarə con, Ribəla nə, Hamatə lʋʋ nii wa, yá ʋ dàń bʋ̀rɩ́ Sedekɩasə. 6 Mə Ribəla nə nə, Babɩlɔnə pɩ̀ʋ́ pɩn ba kə sɩ̀ʋ́ Sedekɩasə bɩ̀á tə bɩan nə, Sedekɩasə tətə yɩ́á yuu. Ʋ pɩn ba kə sɩ̀ʋ́ Zwida pàbɩ̀á tə də mama bɩan nə. 7 Kʋ kwa nə, ʋ pɩn ba zwa Sedekɩasə yɩ́á ba lá, ba ga vwa wá də cɩnɩan banzala bələ, ba ja va Babɩlɔnə.
8 Kaləde tɩ̀án tə sʋ̀rɩ́ padiə tə, də lalʋʋ tə dìì tə, ba ga mà Zwerizalɛmə biritaŋʋ tə ba dɩ. 9 Kʋ kwa nə, pɩ̀ʋ́ sàń nəcɩra yuu tíú Nebuzaradan jɩn lalʋʋ tə gɩganɩ* tə nə ga tɩʋ tə wa, də ba tə nə ja ba tɩ̀àn ba nan ba kə ʋ jɩɩn wa, ʋ ja va Babɩlɔnə. 10 Yá lalʋʋ tə wa labwana tə mʋ̀ ba nə ba won jə, pɩ̀ʋ́ sàń nəcɩra yuu tíú Nebuzaradan pɩn ba cwəŋə, sə ba mɛn Zwida lʋʋ nii tə wa, yá kʋ dɩɩn təntə nə, ʋ pɩn ba divɛn tɩ̀án də kárɩ́.
Zweremi tɩ ʋ tɩ̀àn
11 Babɩlɔnə pɩ̀ʋ́ Nebukadənezarə yà pɩn nii kʋ tə pɩ̀ʋ́ sàń nəcɩra yuu tíú Nebuzaradan nə, Zweremi yɩrɩ, ʋ wʋ́: 12 «Vəli n ja wá, n ywàń ʋ yuu, dàn ká tʋn yolwan mama ʋ yɩra, yá tʋn kʋ tə mama, ʋ nə wá swɩ̀n n con, n pa wá.» 13 Pɩ̀ʋ́ sàń nəcɩra yuu tíú Nebuzaradan, də Nebuswazəban, ʋ nə yɩ pɩ̀ʋ́ tʋ̀tʋ̀nán yun tɩ̀án tə yuu tíú, də Nɛrəgalə-Sarɛsɛrə, ʋ nə yɩ kwatara yáá tɩ̀án tə mama yuu tíú, də Babɩlɔnə pɩ̀ʋ́ tʋ̀tʋ̀nán yun tɩ̀án tə duən mama 14 dàń tʋn lɩ̀à, ba va ba ja Zweremi pɩ̀ʋ́ sàń nəcɩra dəwoo tə wa, ba pa Gedalɩa nə, ʋ nə yɩ Ahikamə bìú, ʋ ga yɩ Swafan nàʋ́, sə ʋ ja wá ʋ va ʋ sàń. Yá Zweremi dàń yɩn lalʋʋ tə titəŋi wa.
Ba-Yígúrə́-Jə-Tiu kàn nii ʋ pa Ebɛdə-Melɛkə nə
15 Ba-Yígúrə́-Jə-Tiu swɩ̀n sʋ̀ràn tə tə Zweremi con, də ʋ tə wulə bandiə tə wa, pɩ̀ʋ́ sàń nəcɩra dəwoo tə wa, ʋ wʋ́: 16 «Vəli n swɩ̀n Ebɛdə-Melɛkə con, ʋ nə yɩ Kuswəa tíú, n wʋ́: Nə̀ń kʋ tə Ba-Yígúrə́-Jə-Tiu, kwatara Yɩɩ tə, à nə yɩ Yɩzərayɛlə lɩ̀à Yɩɩ nə swɩ̀n: À wá tʋn yoo tə, à nə swɩ̀n də à wá tʋn tɩʋ kʋ tə yɩra. Kʋ tà kʋ zəni yɩrɩ, kʋ yɩ kʋ cʋna yɩrɩ, yá kʋ nətʋ wá tʋn kʋ dɩɩn nə, n yɩ́á yuu. 17 Yá kʋ dɩɩn nə, à wá jon mʋ́, à bá yá à pa n tʋ lɩ̀à tə jɩɩn wa, ba nə pɩn n vɩvaga. À mʋ̀ À mʋ̀ Ba-Yígúrə́-Jə-Tiu nii sʋgʋ nə! 18 Cɩ́gá mama, à wá jon mʋ́, kwatara sɩ̀ʋ́ bá gʋ mʋ́. N mɩɩ tə wá ya n tori ndə won nə, n nə ta n jon kʋ̀ʋ̀ wa, n nə ken waa à nə tə yɩrɩ. À mʋ̀ Ba-Yígúrə́-Jə-Tiu nii sʋgʋ nə!»