Nebukadənezarə púə́ Zwerizalɛmə nə də kʋ̀ʋ̀
25
1 Sedekɩasə pàrɩ̀ tə bɩna nʋgʋ nii bɩnɩ tə, cànɩ̀ fugə nii cànà tə, dɩan fugə dɩɩn nə, Babɩlɔnə pɩ̀ʋ́ Nebukadənezarə ja ʋ kwatara tə mama ʋ bà, sə ʋ ta Zwerizalɛmə. Babɩlɔnə tɩ̀án ken tɩʋ tə ba titəŋi wa, ba ga lwà yisəgə bwálá, ba ja kɩkarɩ kʋ. 2 Ba púə́ tɩʋ tə nə də kʋ̀ʋ̀, yá kʋ zɩgɩ dɩ̀àn, kʋ va kʋ yí Sedekɩasə pàrɩ̀ tə bɩna fugə də nədʋ nii bɩnɩ tə.3 Niən tə dàń yà jìgə̀ fìú tɩʋ tə wa. Wodiu yà kʋ́ʋ̀ tə̀lə́ sə lalʋʋ tə də́. Yá cànà tə dɩan nʋgʋ dɩɩn nə, 4 Babɩlɔnə kwatara tə pórí bʋʋ tɩʋ tə biritaŋʋ tə yɩra. Tɩtɩn nə, Pɩ̀ʋ́ Sedekɩasə də ʋ kwatara tə mama twá biritaŋan bələ mimii tə, kʋ nə bwə́lə́ pɩ̀ʋ́ tɩ̀án kárá tə, ba nan ba dəri, ba tì Araba* digə cwəŋə tə. Yá Kaləde tɩ̀án tə yà kɩkarɩ tɩʋ tə. 5 Kaləde tɩ̀án kwatara tə dɩŋɩ pɩ̀ʋ́ Sedekɩasə ba ja Zweriko digə tə wa, yá ʋ kwatara tə mama dəri ba yá wá. 6 Kaləde tɩ̀án tə jɩn wá ba ja va Babɩlɔnə pɩ̀ʋ́ tə con, Ribəla nə, yá ba bʋ̀rɩ̀ ʋ bʋra. 7 Ba ken sɩ̀ʋ́ Sedekɩasə bɩ̀á tə bɩan nə, ʋ yɩ́á yuu. Kʋ kwa nə, Babɩlɔnə pɩ̀ʋ́ tə pɩn ba zwa Sedekɩasə yɩ́á ba lá, ʋ ga pa ba vwa wá də cɩnɩan banzala, ba ja va Babɩlɔnə.
Nebukadənezarə ta Zwerizalɛmə ʋ də́
8 Babɩlɔnə pɩ̀ʋ́ Nebukadənezarə pàrɩ̀ tə bɩna fugə nʋgʋ nii bɩnɩ tə, bonu nii cànà tə, barpɛ nii dɩɩn tə nə, Nebuzaradan, ʋ nə yɩ Babɩlɔnə pɩ̀ʋ́ sàń nəcɩra yuu tíú, ʋ ga yɩ ʋ tʋtʋnʋ də, twi Zwerizalɛmə wa. 9 Ʋ sʋ̀rɩ́ Ba-Yígúrə́-Jə-Tiu dìə̀ tə, də pɩ̀ʋ́ dìə̀ tə, də dìì tə mama Zwerizalɛmə wa. Ʋ sʋ̀rɩ́ dìì tə mama tə nə jə funə. 10 Kaləde tɩ̀án kwatara tə mama, ba yà nə wulə də kwatara yáá tíú tə gwɛrɩ biritaŋan tə yà nə kɩkarɩ Zwerizalɛmə tɩʋ tə. 11 Pɩ̀ʋ́ sàń nəcɩra yuu tíú Nebuzaradan jɩn lɩ̀à tə yà nə wulə tɩʋ tə wa, ba tə yà nə pɩn ba tɩ̀àn Babɩlɔnə pɩ̀ʋ́ nə, də lalʋʋ tə gɩganɩ* tə, ʋ ja va Babɩlɔnə. 12 Yá ʋ yá lʋʋ nii tə yinənyɩna duən, sə ba ya lá, ba cwɛn divɛn tɩ̀án, ba ga vàrà kárɩ́.
13 Kaləde tɩ̀án tə nyʋnyʋgʋ cɩnɩan ywəŋə tə yà nə wulə Ba-Yígúrə́-Jə-Tiu dìə̀ tə wa, də tə də̀ń zɩlan tə, də cɩnɩan kwarɩ nəfarʋ tə yà nə wulə Ba-Yígúrə́-Jə-Tiu dìə̀ tə wa, ba ga pɛ̀ cɩnɩan tə, ba ja va Babɩlɔnə. 14 Ba pɛ̀ nəkəni tə, də pɛlə tə, də sɩ̀án tə, də wùrú zwɩɩn tə, də cɩnɩan zɩla tə mama, ba yà nə ma tʋŋa Yɩɩ dìə̀ tə wa. 15 Babɩlɔnə kwatara yáá tíú tə tə pɛ̀ wiən tə, ba nə ma tùŋə̀ mən, də nagwalan tə, də won tə mama, kʋ nə yɩ sɩ́án won, nə à yə̀ə́ wárʋ́ won.
16 Lìù yà yəri cɩnɩan ywəŋə bələ tə, də cɩnɩan kwarɩ nəfarʋ tə, də tə də̀ń cɩnɩan zɩlan tə, Salʋmʋn nə fwa ʋ kə Ba-Yígúrə́-Jə-Tiu dìə̀ tə wa, dun nə mɛn nətʋ. 17 Yoŋi nədʋ mama yuu tɩa zɩgʋ yà yɩ jɩvaŋɩ yiə fugə də nana. Kʋ yuu con yà jə cɩnɩan kiru, kʋ danɩ nə yɩ jɩvaŋɩ yiə batwa. Ba yà nàn kiru tə də cɩnɩan, ba ja kɩkarɩ, ba ga fwa gərenadə bɩ̀á nyɩnyɩga də cɩnɩan, ba ja kɩkarɩ kʋ. Mə bələ nii yoŋi tə də yɩn nətʋ.
18 Babɩlɔnə pɩ̀ʋ́ sàń nəcɩra yuu tíú tə jɩn Yɩɩ joŋwana yun tɩ̀án nəkwɩa Seraya, də Sofoni ʋ nə daa Seraya nə, də mimii nəcɩra batwa tə. 19 Tɩʋ tə wa, ʋ jɩn pɩ̀ʋ́ sàń tʋtʋnʋ nədʋ, ʋ yà nə yɩ kwatara yáá tíú, də pɩ̀ʋ́ kàrá tə wa bara bonu, ba yà tə nə wulə tɩʋ tə wa. Ʋ tə jɩn lìù tə, ʋ nə pʋ́pʋ́nɩ́ Zwida kwatara yáá tíú tə saga, ʋ ga kúrí kwatara lalʋʋ tə wa. Ʋ tə jɩn bara sapwɩtwa, ba yà tə nə wulə tɩʋ tə wa. 20 Pɩ̀ʋ́ sàń nəcɩra yuu tíú Nebuzaradan ja ba, ʋ va ʋ pa Babɩlɔnə pɩ̀ʋ́ tə nə, Ribəla nə. 21 Babɩlɔnə pɩ̀ʋ́ tə dàń mà ba ʋ gʋ Ribəla nə, Hamatə lʋʋ nii tə wa.
Mə kʋ zɩgɩ nətʋ, ba ma ja Zwida lʋʋ lɩ̀à tə ba va yiŋʋnɩ, ba yá ba lʋʋ nii tə nə.
Gedalɩa jìgə̀ Zwida payuu tə yáá tíú
22 Babɩlɔnə pɩ̀ʋ́ Nebukadənezarə yá lɩ̀à tə duən, sə ba ya Zwida lʋʋ nii tə wa. Ʋ tún Ahikamə bìú Gedalɩa, ʋ nə yɩ Swafan nàʋ́, sə ʋ ya pɩ̀ʋ́ ba yuu wa.
23 Máŋá tə kwatara yáá tɩ̀án tə, də ba kwa lɩ̀à tə nə nì də Babɩlɔnə pɩ̀ʋ́ tə tún Gedalɩa, sə ʋ ya pɩ̀ʋ́, ba vəli Gedalɩa con, Misəpa nə. Kwatara yáá tɩ̀án təntə yà nə yɩ Netanɩa bìú Yɩsəmayɛlə, də Kareya bìú Yohanan, də Tanhumɛtə ʋ nə yɩ Netofa tíú bìú Seraya, də Yazanɩa ʋ nə yɩ Maaka tíú bìú. 24 Gedalɩa kàn nii ʋ pa kwatara yáá tɩ̀án təntə də ba kwatara tə nə, ʋ wʋ́: «Á dànà ká pa fən ja aba Kaləde tɩ̀án tə yɩrɩ. Á yana lʋʋ nii tə wa, á tʋn á pa Babɩlɔnə pɩ̀ʋ́ nə, yá kʋ wá kwɛn aba.» 25 Yá kʋ bɩnɩ təntə barpɛ nii cànà tə wa, Netanɩa bìú Yɩsəmayɛlə, ʋ nə yɩ Eliswama nàʋ́, ʋ ga yɩ pɛ̀gá dwíí tə wa lìù, twi Misəpa də bara fugə. Ba mà Gedalɩa, də Zwida payuu lɩ̀à tə, də Babɩlɔnə tɩ̀án tə ba nə wulə də wá, ba gʋ. 26 Lalʋʋ tə mama, kʋ nə zɩgɩ bisɩmaa, kʋ va kʋ yí nəkwɩa, kʋ súrí kwatara yáá tɩ̀án tə nə, dàń zàn ba dəri ba va Ezwipətə. Cɩ́gá, ba yà dəri Babɩlɔnə tɩ̀án fən.
Babɩlɔnə pɩ̀ʋ́ tə tʋn pubwanʋ Yehoyakinə yɩra
27 Ba nə jɩn Zwida pɩ̀ʋ́ Yehoyakinə ba ja va Babɩlɔnə bɩna fɩtwa də barpɛ nii bɩnɩ tə nə, Evilə-Merodakə jìgə̀ Babɩlɔnə pɩ̀ʋ́. Ʋ pàrɩ̀ tə təntən bɩnɩ tə, fugə bələ nii cànà tə, dɩan sapʋa də barpɛ dɩɩn nə, ʋ fwa pubwanʋ Zwida pɩ̀ʋ́ Yehoyakinə yɩra, ʋ pa ba lɩ wá bandiə tə wa. 28 Ʋ swɩ̀n Yehoyakinə con də pubwanʋ, ʋ ga tún wá, sə ʋ ya pɩ̀ʋ́ pɛ̀gá tə yuu wa, ba nə wulə də wá, Babɩlɔnə nə. 29 Evilə-Merodakə pɩn ba lɩ Yehoyakinə bandiə gànàn tə, yá ʋ dàń dí wodiu Babɩlɔnə pɩ̀ʋ́ tə con, ʋ lʋʋ wúlú tə mama wa. 30 Mə kʋ zɩgɩ nətʋ, Yehoyakinə ma na kʋ tə nə wá san wa, kʋ tə nə mɛ wá dɩɩn mama, Babɩlɔnə pɩ̀ʋ́ tə con, ʋ lʋʋ wúlú tə mama wa.