24
1 Mə ʋ mʋ̀ Yehoyakimə máŋá tə wa nə, Babɩlɔnə pɩ̀ʋ́ Nebukadənezarə ta kʋ̀ʋ̀ də Zwida payuu tə. Ʋ dí dɩ̀àn Yehoyakimə yuu wa bɩna batwa. Yá bɩna batwa tə kwa nə, Yehoyakimə zàn ʋ vɩ Nebukadənezarə nii. 2 Ba-Yígúrə́-Jə-Tiu dàń ma tʋn Kaləde tɩ̀án kwatara púlə́, də Siiri tɩ̀án kwatara púlə́, də Mʋabə tɩ̀án kwatara púlə́, də Amon dwíí tə kwatara púlə́, sə ba ta Yehoyakimə. Ʋ tʋn ba, sə ba ta Zwida payuu tə, ba pa kʋ jɛ́n tɩa yuu wa, ndə ʋ nə twá ʋ nii sʋ̀sʋ̀nà tə nə, ba nə yɩ ʋ tʋ̀tʋ̀nà, ʋ ma swɩ̀n kʋ nətʋ.3 Kʋ twá də Ba-Yígúrə́-Jə-Tiu, càn təntə ma yí Zwida payuu tə, ʋ nə pɩ̀à sə ʋ lɩ ba ʋ yáá con, Manase cʋna tə mama yɩrɩ ʋ nə tʋn. 4 Kʋ tə súrí Manase nə gʋa lɩ̀à tə nə wà yoo cʋ̀gʋ̀, ʋ pa ba jana sú Zwerizalɛmə yɩrɩ. Kʋ mʋ̀ nə pɩn Ba-Yígúrə́-Jə-Tiu yà kʋ́ʋ̀ ba pɩ̀à sə ʋ sɛ̀ lwɩa.
5 Ba pʋ́pʋ́nɩ́ Yehoyakimə tʋ̀tʋ̀nán tə gɩganɩ, də kʋ tə mama ʋ nə fwa, ba tún Zwida pɛ̀gá yìə̀n sagɩ tə wa. 6 Yehoyakimə tɩga, yá ba gùrì wá ʋ nyɩna-ba con, ba nə dí yáá ba tɩ. Ʋ bìú Yehoyakinə nə dí pàrɩ̀ tə ʋ yuu nə.
7 Ezwipətə pɩ̀ʋ́ kʋ́ʋ̀ wà pìí ʋ nan Ezwipətə lʋʋ nii tə wa, ʋ va bwálɩ́ don. Cɩ́gá, Babɩlɔnə pɩ̀ʋ́ yà jon kʋ tə mama yà nə yɩ Ezwipətə pɩ̀ʋ́ nə tɩ, kʋ nə zɩgɩ Ezwipətə nacoru tə nə, kʋ va kʋ yí Əfəratə mʋnaa tə.
Yehoyakinə jìgə̀ Zwida payuu tə pɩ̀ʋ́
8 Yehoyakinə yà jə bɩna fugə də nana, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ cànɩ̀ batwa Zwerizalɛmə nə. Ʋ nuu yɩrɩ nə Nehuswəta. Nehuswəta yɩ Ɛlənatan ʋ nə yɩ Zwerizalɛmə tíú bʋ̀á. 9 Ʋ tʋn kʋ tə nə lwara Ba-Yígúrə́-Jə-Tiu yáá con, yoo mama wa, ndə ʋ nyɩna nə tʋn nətʋ.
10 Kʋ máŋá təntə wa, Babɩlɔnə pɩ̀ʋ́ Nebukadənezarə tʋ̀tʋ̀nà tə vəli ba pú Zwerizalɛmə nə də kʋ̀ʋ̀. 11 Babɩlɔnə pɩ̀ʋ́ Nebukadənezarə tətə twi kʋ̀ʋ̀ tə wa, də ʋ tʋ̀tʋ̀nà tə púə́ tɩʋ tə nə də kʋ̀ʋ̀. 12 Zwida payuu pɩ̀ʋ́ Yehoyakinə, də ʋ nuu, də ʋ tʋ̀tʋ̀nà, də ʋ tʋ̀tʋ̀nán yun tɩ̀án, də lɩ̀à tə ʋ nə jələ ba yuu wa dàń nan ba pa ba tɩ̀àn Babɩlɔnə pɩ̀ʋ́ tə nə. Yá Babɩlɔnə pɩ̀ʋ́ tə jɩn ba, ʋ ma fwa bandiə lɩ̀à, ʋ pàrɩ̀ tə bɩna nana nii bɩnɩ tə nə. 13 Ʋ lɩ jɩjə wiən tə mama Ba-Yígúrə́-Jə-Tiu dìə̀ tə wa, də pɩ̀ʋ́ dìə̀ tə wa, ʋ ga lwa sɩ́án tʋtʋnzɩla tə mama, Yɩzərayɛlə pɩ̀ʋ́ Salʋmʋn yà nə fwa Ba-Yígúrə́-Jə-Tiu dìə̀ tə wa, ndə Ba-Yígúrə́-Jə-Tiu nə dí yáá ʋ swɩ̀n kʋ nətʋ. 14 Nebukadənezarə jɩn Zwerizalɛmə tɩ̀án mama ʋ ja vìí. Ʋ jɩn ba tʋ̀tʋ̀nán yun tɩ̀án tə mama, də bara tə mama ba nə swə ba tɩ̀àn, ʋ ja vìí. Ba mama yɩn lɩ̀à mʋ̀rʋ̀ fugə, kʋ súrí ba wa yàrá tə nə, də ba tə nə fwa boruswaran nə. Yinənyɩna cɩcɩ dàń yà nə ga lʋʋ nii tə wa. 15 Ʋ jɩn Yehoyakinə ʋ ja va Babɩlɔnə. Ʋ jɩn pɩ̀ʋ́ Yehoyakinə nuu tə, də ʋ kana tə, də lɩ̀à tə ʋ nə jələ ba yuu wa, də ʋ lʋʋ ladɩra tə, ʋ ja nan Zwerizalɛmə, ʋ va Babɩlɔnə. 16 Babɩlɔnə pɩ̀ʋ́ tə jɩn ladɩra tə mama, ba nə yɩ lɩ̀à mʋ̀rʋ̀ barpɛ, də yàrá tə, də ba tə nə fwa boruswaran, ba də nə yɩ lɩ̀à mʋ̀rʋ̀, də kwatara babɩran tə mama, ʋ ja va Babɩlɔnə.
17 Babɩlɔnə pɩ̀ʋ́ tə tún Yehoyakinə nyɩna nyánʋ́ Matanɩa, sə ʋ ya pɩ̀ʋ́ Yehoyakinə yuu nə, ʋ ga lwàń Matanɩa yɩrɩ tə ʋ kə Sedekɩasə.
Sedekɩasə jìgə̀ Zwida payuu tə pɩ̀ʋ́
18 Sedekɩasə yà jə bɩna sapʋa də nədʋ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna fugə də nədʋ Zwerizalɛmə nə. Ʋ nuu yɩrɩ yà nə yɩ Hamutalə. Hamutalə yɩ Zweremi ʋ nə yɩ Libəna tíú bʋ̀á. 19 Sedekɩasə tʋn kʋ tə nə lwara Ba-Yígúrə́-Jə-Tiu yáá con, yoo mama wa, ndə ʋ nyɩna Yehoyakimə nə tʋn nətʋ. 20 Yìə̀n təntə mama twi tə tʋn, Ba-Yígúrə́-Jə-Tiu nə fwi ʋ lɩŋa tə, Zwerizalɛmə tɩ̀án, də Zwida lʋʋ nii tə yuu wa, ʋ pa ba jɛ́n ʋ yáá con yɩrɩ.
Sedekɩasə zàn ʋ vɩ Babɩlɔnə pɩ̀ʋ́ tə nii.