Zozɩasə pìí ʋ ja Zwida dwíí tə ʋ bà Yɩɩ nimarʋ tə wa
23
1 Pɩ̀ʋ́ tə tʋn ʋ pa ba bon Zwida payuu tə tɩʋ tɩ̀án tə mama, də Zwerizalɛmə tɩʋ tɩ̀án tə mama, ʋ pa ba bà ba kun duən nə, ʋ con. 2 Ʋ zàn ʋ va Ba-Yígúrə́-Jə-Tiu dìə̀ tə wa, ʋ də Zwida payuu bara tə mama, də Zwerizalɛmə tɩ̀án mama, də Yɩɩ joŋwana tə, də Yɩɩ nii sʋ̀sʋ̀nà tə, də lalʋʋ tə mama, kʋ nə zɩgɩ bisɩmaa nə, kʋ va kʋ yí nəkwɩa. Ʋ kàrɩ̀ Yɩɩ nimarʋ* sagɩ tə wa sʋ̀ràn tə mama, ba nə nɩ Ba-Yígúrə́-Jə-Tiu dìə̀ tə wa, ʋ pa ba mama cʋgʋ. 3 Pɩ̀ʋ́ tə zɩgɩ gárɩ́ tə yuu, Ba-Yígúrə́-Jə-Tiu yáá con, ʋ pìí ʋ kwɛn ʋ tún nimarʋ tə, ʋ ga bɩrɩ də ba mɛ sə ba twá Ba-Yígúrə́-Jə-Tiu nə, də ba wá tʋn yìə̀n tə Yɩɩ nə pɩn nii tə yuu wa, ba twá ʋ coŋi tə, də ʋ yìə̀n tə nə, ʋ nə pɩn tə pʋ́pʋ́nɩ́ tə tún sə tə tʋn, də ba waa mama, də ba pubʋŋa mama, sə ba ma zìlí sʋ̀ràn tə mama nii, tə nə pʋ́pʋ́nɩ́ nimarʋ sagɩ kʋ tə wa. Lalʋʋ tə mama sɛ̀ ba zʋ kʋ nimarʋ təntə wa.Zwida lʋʋ lɩ̀à pìí ba bà Yɩɩ nimarʋ tə wa
4 Kʋ kwa nə, pɩ̀ʋ́ tə pɩn nii Yɩɩ joŋwana yun tɩ̀án nəkwɩa Hiləkiya, də Yɩɩ joŋwana tə nə, ba nə daa ʋ nə, də Yɩɩ dìə̀ mimii nəcɩra tə nə, sə ba lɩ wiən tə mama Yɩɩ dìə̀ tə wa, ba yà nə ma jʋnɩ woŋwanan Baalə*, də Aswera*, də lanworu tə wa wiən* tə mama. Ba sʋ̀rɩ́ tə Zwerizalɛmə tɩʋ tə kwa con, Sedəron vara tə wa, ba ga pɛ̀ tə tʋnan tə, ba ja va Betɛlə. 5 Ʋ dʋgʋ woŋwanan joŋwana tə, Zwida pɛ̀gá tə yà nə tún, sə ba fwa jwəŋə, jwəŋə dədwələn* tə yuu, Zwida payuu tɩan tə wa, də Zwerizalɛmə nii tɩan tə wa, ʋ pa ba vìí. Ʋ tə dʋgʋ ba tə də yà nə sʋ̀rɩ́ wusinə ba pɩn woŋwanʋ Baalə nə, də yɩcaʋ tə nə, də cànà tə nə, də kacɩlacɛɛ tə nə, də lanworu tə wa wiən tə mama nə. 6 Ʋ pɩn ba lɩ woŋwanʋ Aswera dacelə tə, Ba-Yígúrə́-Jə-Tiu dìə̀ tə wa, ba ja nan Zwerizalɛmə wa, ba sʋ̀rɩ́ Sedəron vara tə wa, ba pa ka jì tʋnan. Ʋ pɛ̀ tʋnan tə ʋ lwá lalʋʋ tə bɩ̀á libəri tə yuu wa. 7 Zozɩasə pɩn ba gwɛrɩ dìì tə, bacwaran də kacwaran yà nə cwàrɩ̀ tə wa, ba ma pɩn dun woŋwanan nə, Ba-Yígúrə́-Jə-Tiu dìə̀ tə wa. Kana yà nə swɩ gànàn dìì təntə wa, ba pɩn woŋwanʋ Aswera nə. 8 Ʋ pɩn Yɩɩ joŋwana tə mama nan Zwida payuu tɩan tə wa ba bà. Ʋ cʋ̀gʋ̀ jwəŋə dədwələn tə, tə jowŋana yà nə sʋ̀rɩ́ wusinə tə yuu wa, kʋ nə zɩgɩ Geba, kʋ va kʋ yí Bɛrəsweba. Ʋ cʋ̀gʋ̀ jwəŋə dədwələn tə yà nə wulə Zwerizalɛmə mimien tə nii nə, ndə kʋ tə nə kʋ yà nə wulə tɩʋ pɩ̀ʋ́ Zozuwe mimii tə yáá, tɩʋ tə mimii tə jɩgwiə vàn yuu. 9 Yá kʋ nətʋ dàń pɩn jwəŋə dədwələn yuu joŋwana tə kʋ́ʋ̀ ba nii jə, sə ba dɩ̀ Ba-Yígúrə́-Jə-Tiu joŋi bwálɩ́ tə yuu, Zwerizalɛmə nə. Yá ba dàń nə də́ dipɛn tə mʋ̀, kʋ nə wà sabwarɩ ken, ndə ba nubɩa tə nə. 10 Pɩ̀ʋ́ tə cʋ̀gʋ̀ Tofɛtə* mən bwálɩ́ tə, Bɛn-Hinomə vara tə wa, sə lìù mama kʋ́ʋ̀ dàn ká sʋ̀rɩ́ ʋ bìú, nə à yə̀ə́ ʋ bʋ̀á lá nə, ʋ ma fwa joŋi ʋ pa woŋwanʋ Molɔkə nə. 11 Ʋ lɩ səsen tə Zwida pɛ̀gá tə yà nə zɩgɩ ba pa woŋwanʋ yɩcaʋ tə nə, Ba-Yígúrə́-Jə-Tiu dìə̀ tə mimii tə yáá, ʋ ga sʋ̀rɩ́ woŋwanʋ yɩcaʋ tə səsen kòrə̀n tə. Səsen təntə yà wulə pɩ̀ʋ́ tʋtʋnʋ Netan-Melɛkə dìə̀ tə yɩra dìì tə wa. 12 Ʋ gwɛrɩ joŋi bwálá tə, Zwida pɛ̀gá tə yà nə lwə̀, Ahazə dəyuu dìə̀ tə yuu wa, kʋ súrí joŋi bwálá tə nə, Manase yà nə lwə̀ Ba-Yígúrə́-Jə-Tiu dìə̀ dəwee bələ tə wa. Ʋ nə mà tə ʋ lwa kwa nə, ʋ pɛ̀ tə pùrə́n tə ʋ lwá Sedəron vara tə wa. 13 Pɩ̀ʋ́ tə cʋ̀gʋ̀ jwəŋə dədwələn tə yà nə wulə Zwerizalɛmə yáá con, Cʋna paan tə jɩzən vàn con. Jwəŋə dədwələn təntə yà yɩ Yɩzərayɛlə pɩ̀ʋ́ Salʋmʋn nə lwə̀ tə ʋ pa Sidon tɩ̀án wolwan Asətarəte nə, də Mʋabə tɩ̀án wolwan Kemɔswə nə, də Amon dwíí wolwan Mɔlɔkə nə. 14 Zozɩasə pɩn ba lwa kapana tə ba nə zɩ̀n ba zɩgɩ yɩɩ nə, ʋ goŋi woŋwanʋ Aswera daceli tə, ʋ ga kə ləzoni kurən ʋ sú bwálɩ́ tə, tə yà nə wulə.
Pɩ̀ʋ́ Zozɩasə pìí ʋ ja Yɩzərayɛlə lɩ̀à, ʋ bà Yɩɩ nimarʋ tə wa
15 Zozɩasə tə pɩn ba gwɛrɩ joŋi bwálɩ́ tə nə wulə Betɛlə nə, də jwəŋə dədolu tə Nebatə bìú Zwerobʋamə nə fwa, ʋ ma pa Yɩzərayɛlə lɩ̀à tʋn cʋna tə. Ʋ pɩn ba gwɛrɩ joŋi bwálɩ́ təntə, də kʋ jwəŋə dədolu tə, ʋ sʋ̀rɩ́ ʋ pa tə jì tʋnan, ʋ ga sʋ̀rɩ́ Aswera woŋwanʋ dacelə tə.
16 Zozɩasə viviri ʋ na libərə tə paan tə yuu wa. Ʋ pɩn lɩ̀à va ba lɩ kurən tə libərə tə wa, ba ja bà ba pa wá, ʋ sʋ̀rɩ́ joŋi bwálɩ́ tə yuu wa. Ʋ cʋ̀gʋ̀ kʋ bwálɩ́ tə, kʋ twá ndə Ba-Yígúrə́-Jə-Tiu sʋgʋ tə nə, Yɩɩ tʋtʋnʋ tə nə swɩ̀n ʋ bɩrɩ. Mə ʋ sʋ̀ràn tə ʋ nə swɩ̀n cɩ́gá yɩn nətʋ. 17 Ʋ swɩ̀n, ʋ wʋ́: «Bɛ̀ɛ̀ nə à na ba lwə̀ ba zɩgɩ nətə?» Tɩʋ tə tɩ̀án ma le wá, ba wʋ́: «Kʋ yɩ Yɩɩ tʋtʋnʋ tə ʋ nə nan Zwida payuu tə wa ʋ bà ləbəri. Mə ʋ mʋ̀ nə dí yáá ʋ swɩ̀n yìə̀n tə tə, n nə tʋn Betɛlə joŋi bwálɩ́ tə yɩra, n pa tə nii sú.» 18 Zozɩasə ma swɩ̀n, ʋ wʋ́: «Á yaga libəri təntə! Lìù mama dàn ká dwen ʋ kurən tə yɩra!» Ba dàń yá ʋ mʋ̀ kurən tə, kʋ súrí Yɩɩ nii sʋ̀sʋ̀nʋ̀ tə nə nan Samari kurən tə nə.
19 Zozɩasə tə pɩn ba gwɛrɩ jwəŋə dədwələn dìì tə mama mɩ́ámɩ́án, tə yà nə wulə Samari tɩan tə wa, tə nə yɩ Yɩzərayɛlə pɛ̀gá tə nə lwə̀, sə ba ma zɩ̀n Ba-Yígúrə́-Jə-Tiu lɩŋa. Ʋ cʋ̀gʋ̀ tə də, ndə ʋ nə cʋ̀gʋ̀ Betɛlə nyiən tə nətʋ. 20 Ʋ gʋa jwəŋə dədwələn joŋwana tə mama, ba yà nə wulə lá, joŋi bwálá tə yuu wa, ʋ ga sʋ̀rɩ́ ləzoni kurən lá. Kʋ kwa nə, ʋ pìí ʋ va Zwerizalɛmə.
Pakə cànà tə diŋə yoo
21 Pɩ̀ʋ́ Zozɩasə pɩn nii kʋ tə lalʋʋ tə mama nə, ʋ wʋ́: «Á díə́ Pakə cànà tə, á ma pa dun Ba-Yígúrə́-Jə-Tiu nə, ndə kʋ nə pʋ́pʋ́nɩ́ nimarʋ sagɩ kʋ tə wa nətʋ. 22 Ba yà tə wà Pakə cànà dí ndə Pakə cànà təntə nə, kʋ nə zɩgɩ máŋá tə mama pɛ̀gá tə nə bʋ̀rɩ̀ bʋra nə dí Yɩzərayɛlə pàrɩ̀, də máŋá tə mama pɛ̀gá nə dí Yɩzərayɛlə payuu tə, də Zwida payuu tə pàrɩ̀. 23 Yá kʋ dàń yɩn pɩ̀ʋ́ Zozɩasə pàrɩ̀ tə bɩna fugə də nana nii bɩnɩ tə nə nə, ba dí Pakə cànà təntə Zwerizalɛmə nə, ba ma pa dun Ba-Yígúrə́-Jə-Tiu nə.
Zozɩasə pàrɩ̀ tə yígúrə́
24 Kʋ nə súrí lá, Zozɩasə tə pɩn lɩ̀à tə mama ba nə boŋə tɩga nii, də ba tə nə swɩ̀n jwɩan yìə̀n nyʋn Zwida lʋʋ nii tə wa, də Zwerizalɛmə wa. Ʋ cʋ̀gʋ̀ dɛ̀ɛ̀ ciciri tə ba nə fwa, də wokʋkwɩnan tə mama, tə yà nə wulə Zwida lʋʋ nii tə wa, də Zwerizalɛmə wa. Ʋ tʋn kʋ nətʋ tə, sə ʋ ma zìlí Yɩɩ nii sagɩ tə, Yɩɩ joŋwanʋ Hiləkiya nə nɩ Ba-Yígúrə́-Jə-Tiu dìə̀ tə wa, sʋ̀ràn tə nii.
25 Pɩ̀ʋ́ wà Zozɩasə yáá yɩn, ʋ nə pìí ʋ twá Ba-Yígúrə́-Tiu nə, də ʋ bɩcan mama, də ʋ pubʋŋa mama, də ʋ dɩ̀àn mama, ndə Yɩɩ nii tə ʋ nə pɩn Moyizə nə, nə pɩ̀à nətʋ. Yá Zozɩasə kwa nə, pɩ̀ʋ́ wà lá yɩn ndə ʋ nə.
26 Də kʋ nətʋ mɛ, Ba-Yígúrə́-Jə-Tiu lɩŋa nəfarʋ tə tə wà twɩ, yìə̀n tə mama yɩrɩ Manase nə tʋn, ʋ ma zɩ̀n Ba-Yígúrə́-Jə-Tiu lɩŋa Zwida payuu tə yuu wa. 27 Ba-Yígúrə́-Jə-Tiu swɩ̀n, ʋ wʋ́: «À wá dʋgʋ Zwida payuu tə də vàn nə, ndə à nə dʋgʋ Yɩzərayɛlə payuu tə vàn nə nətʋ. À wá vɩ Zwerizalɛmə tɩʋ kʋ tə, à yà nə kúrí, à dʋgʋ, kʋ súrí dìə̀ tə nə, à yà nə swɩ̀n də à wá bɩrɩ à tɩ̀àn ka wa.
28 Ba pʋ́pʋ́nɩ́ Zozɩasə tʋ̀tʋ̀nán tə gɩganɩ, də kʋ tə mama ʋ nə fwa, ba tún Zwida pɛ̀gá yìə̀n sagɩ tə wa.
29 Pɩ̀ʋ́ Zozɩasə pàrɩ̀ tə máŋá wa nə, Ezwipətə pɩ̀ʋ́ Farawon Neko vəli Asiiri pɩ̀ʋ́ tə con, Əfəratə mʋnaa tə con. Pɩ̀ʋ́ Zozɩasə zàn sə ʋ ta kʋ̀ʋ̀ də pɩ̀ʋ́ Neko, yá Farawon gʋa wá Megido nə, máŋá tə wa ʋ nə zə́n ʋ na wá. 30 Ʋ tʋ̀tʋ̀nà tə zɩn ʋ tɩgɩ tə də səsen kòrù, ba ja nan Megido, ba va Zwerizalɛmə, ba gùrì ʋ libəri wa. Lʋʋ nii tə lalʋʋ tə jɩn Zozɩasə bìú Yʋahazə, ba twɛ́n dun nʋga* ʋ yuu wa, ba ga tún wá sə ʋ ya pɩ̀ʋ́, ʋ nyɩna tə yuu nə.
Yʋahazə jìgə̀ Zwida payuu tə pɩ̀ʋ́
31 Yʋahazə yà jə bɩna sapʋa də batwa, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ cànɩ̀ batwa Zwerizalɛmə nə. Ʋ nuu yɩrɩ yɩ Hamutalə. Hamutalə yà yɩ Zweremi ʋ nə yɩ Libəna tíú bʋ̀á. 32 Yʋahazə tʋn kʋ tə nə lwara Ba-Yígúrə́-Jə-Tiu yáá con yoo mama wa, ndə ʋ nɩbara-ba nə tʋn nətʋ. 33 Farawon Neko vwə wá də banzala Ribəla nə, Hamatə lʋʋ nii tə wa, sə ʋ kʋ́ʋ̀ dàn ká də́ pàrɩ̀ Zwerizalɛmə wa. Neko dɩga bwaan Zwida payuu tə yuu wa, ʋ pa ba ŋwɩ́n wárʋ́ tɔnə batwa, də sɩ́án kilo fɩtwa. 34 Farawon Neko tún Zozɩasə bìú Eliyakimə, sə ʋ də́ pàrɩ̀ tə ʋ nyɩna Zozɩasə yuu nə. Ʋ lwàń Eliyakimə yɩrɩ tə ʋ kə Yehoyakimə. Ʋ jɩn Yʋahazə mʋ̀ ʋ ja va Ezwipətə, yá mə lá nə ʋ tɩga. 35 Yehoyakimə dàń kalɩ ʋ lʋʋ nii lɩ̀à tə, ʋ pa ba ŋwɩ́n wárʋ́ də sɩ́án, kʋ twá ba lìù mama nə jə nətʋ, sə ʋ ma wànɩ́ ʋ ŋwɩ́n bwaan təntə, ʋ pa Farawon Neko nə.
Yehoyakimə jìgə̀ Zwida payuu tə pɩ̀ʋ́