Təntən Pɛ̀gá Ŋwɛn
Pɛ̀gá ŋwɛn təntən sagɩ tə yuu wa sʋgʋ
Pɛ̀gá ŋwɛn saga tə yà yɩ sagɩ nədʋ, ba ma pwɛ̀ kʋ təntən sagɩ, də bələ nii sagɩ, kʋ mɛ nə wàrɩ̀ sagɩ nədʋ wa yɩrɩ. Kʋ təntən sagɩ tə də kʋ bələ nii sagɩ tə yɩ tə swɩ̀n yìə̀n tə yoo, tə nə wulə Samiyɛlə saga tə də pɛ̀gá saga tə wa. Yá sagɩ kʋ tə mʋ̀ yɩ kʋ pʋ́pʋ́nɩ́ Zwifə-ba yɩrɩ, ba nə nan yongaʋ tə ba bà Zwerizalɛmə. Sagɩ tə yɩ Zwida payuu tə yoo nə kʋ swɩ̀n zənzən.
Lɩ̀à duən bʋŋa də Ɛsədərasə nə pʋ́pʋ́nɩ́ Pɛ̀gá ŋwɛn saga tə, yá kʋ cɩ́gá wa, lìù mama wàrɩ̀ lìù tə nə pʋ́pʋ́nɩ́ saga təntə ʋ bɩrɩ. Ba pʋ́pʋ́nɩ́ saga təntə bɩna 600 də bɩna 500 bɩna tə pwə́rə́ wa (də Zwezi Kərisə tə wà twi).
Pɛ̀gá ŋwɛn təntən sagɩ tə wa, pɩ̀ʋ́ Davidə yɩ lìù tə ʋ nə twá Yɩɩ nə, ʋ ga jʋnɩ Yɩɩ, ndə kʋ nə mɛ nətʋ. Ʋ yə̀ə́ də Yɩɩ cɩ́gá nə yɩ pɩ̀ʋ́. Swapitərə 29:11 wa, Davidə swɩ̀n, ʋ wʋ́: «N mʋ̀ Ba-Yígúrə́-Jə-Tiu nə wulə tə mɛ yuu wa, n mʋ̀ nə jə dɩ̀àn, n mʋ̀ nə jə dun, n mʋ̀ nə yɩ pɩ̀ʋ́ máŋá mama, n mʋ̀ nə jə poni. Cɩ́gá, won tə mama nə wulə lanworu wa, də tɩa yuu wa, yɩ n mʋ̀ Ba-Yígúrə́-Jə-Tiu nə tɩ. N mʋ̀ nə yɩ pɩ̀ʋ́, n wulə tə mɛ yuu wa!»
Pɛ̀gá ŋwɛn təntən sagɩ tə swapitərə 1-9 bɩrɩ dwíə́ tə nə púə́ duən kwa nətʋ, kʋ nə zɩgɩ Adamə, kʋ va kʋ yí pɩ̀ʋ́ Sayulə
Kʋ swapitərə 10 bɩrɩ Sayulə də ʋ bɩ̀á tə nə tɩga nətʋ, yá kʋ gɩganɩ tə ga yɩ Davidə yoo kʋ swɩ̀n
Swapitərə 11:1-9 bɩrɩ nətʋ tə Davidə nə jìgə̀ pɩ̀ʋ́, ʋ ga ja Zwerizalɛmə ʋ ma fwa ʋ patɩʋ
Swapitərə 11:10-12:40 swɩ̀n Davidə kwatara babɩran tə yoo
Swapitərə 13-16 bɩrɩ nətʋ tə Davidə nə pɩn ba ja Yɩɩ nimarʋ culu daka tə ba bà Zwerizalɛmə wa
Swapitərə 17 bɩrɩ də Davidə swə sə ʋ lwà dìə̀ ʋ pa Yɩɩ nə
Swapitərə 18-20 swɩ̀n kʋ̀ʋ̀ tə yoo Davidə nə ta, ʋ pàrɩ̀ tə máŋá wa, də nətʋ tə ʋ nə dí dɩ̀àn ʋ dʋŋa yuu wa
Swapitərə 21-26 bɩrɩ nətʋ tə Davidə nə tanɩ, sə ʋ lwà Yɩɩ dìə̀ tə. Yá ʋ bìú Salʋmʋn nə wá lwà ka, ʋ tɩan kwa nə
Swapitərə 27 swɩ̀n Davidə kwatara yáá tɩ̀án tə, də Yɩzərayɛlə dwíə́ yáá tɩ̀án tə, də payuu tə tʋ̀tʋ̀nán yun tɩ̀án tə yoo
Swapitərə 28 bɩrɩ nətʋ tə Davidə nə pɩn kwìə̀ lalʋʋ tə də ʋ bìú Salʋmʋn nə
Swapitərə 29 swɩ̀n zìlə́ wiən tə yoo lalʋʋ tə nə pɩn, sə ba ma lwà Yɩɩ dìə̀ tə, də nətʋ tə Salʋmʋn nə jìgə̀ pɩ̀ʋ́, ʋ nyɩna Davidə yuu nə, də Davidə tɩan yoo