Bələ Nii Pɛ̀gá Ŋwɛn
Pɛ̀gá ŋwɛn bələ nii sagɩ tə yuu wa sʋgʋ
Pɛ̀gá ŋwɛn bələ nii sagɩ tə wa yìə̀n tə yɩ tə swɩ̀n tə təni yìə̀n tə nii nə, tə nə sinti Pɛ̀gá ŋwɛn təntən sagɩ tə wa. Kʋ pìí kʋ bwɛ́ yìə̀n kapʋpʋ tə nə tʋn təntən Pɛ̀gá sagɩ tə, də bələ nii Pɛ̀gá sagɩ tə wa. Yá sagɩ kʋ tə dàń nə yɩ kʋ pʋ́pʋ́nɩ́ Zwifə-ba yɩrɩ, ba nə pìí ba nan yongaʋ tə, ba bà Zwerizalɛmə. Kʋ mʋ̀ nə pɩn, sagɩ tə swɩ̀n Zwida payuu tə yoo zənzən.
Pɛ̀gá ŋwɛn bələ nii sagɩ tə swapitərə 1-9 wa, kʋ swɩ̀n pɩ̀ʋ́ Salʋmʋn pàrɩ̀ tə yoo, kʋ va kʋ yí ʋ tɩan. Kʋ bɩrɩ Salʋmʋn, ndə pɩ̀ʋ́ nə mɛ sə ʋ ya nətʋ. Ʋ lwà Yɩɩ dìə̀ tə Zwerizalɛmə wa, ʋ ga pa lɩ̀à jʋnɩ Yɩɩ kʋ bwálɩ́ təntə wa.
Sagɩ tə swapitərə 10-36 bɩrɩ də payuu tə jɩzən saparʋ yuu dwíə́ tə zàn ba vɩ nii, kʋ pa payuu tə pwɛ̀ bələ. Yɩzərayɛlə payuu tə wulə jɩzən saparʋ yuu, Zwida payuu tə ga wulə jɩgwiə saparʋ yuu. Yɩzərayɛlə payuu lɩ̀à tə viviri ba kwa ba ma sà Yuu-Tiu, kʋ pa sagɩ tə kʋ́ʋ̀ ba ba mʋ̀ yoo swɩ̀n. Yá sagɩ tə bɩrɩ Zwida payuu tə mʋ̀ yoo mama. Pɛ̀gá duən, ndə Ezekɩasə də Zozɩasə nə, twá Yuu-Tiu nə, ba ga pa lalʋʋ tə jʋn wá.
Sagɩ tə yígúrə́ wa, kʋ bɩrɩ də dʋŋa cʋ̀gʋ̀ Zwerizalɛmə tɩʋ tə, bɩna 586 bɩnɩ tə wa (də Zwezi-Kərisə tə wà twi), ba ga ja Zwida payuu lɩ̀à tə, ba va yongaʋ. Yá yala mancɩn yà tə ga lá. Cɩ́gá, kʋ yígúrə́ wa, Pɛrəsə pɩ̀ʋ́ Sirusə nə ta Babɩlɔnə payuu tə ʋ də́ bɩna 539 bɩnɩ tə wa (də Zwezi-Kərisə tə wà twi), ʋ pɩn nii də Zwida dwíí tə wàá ba pìrí ba vəli Zwerizalɛmə. Kʋ yoo təntə wulə Ɛsədərasə sagɩ tə təntən swapitərə tə wa.
Sagɩ tə sʋyun
Swapitərə 1 bɩrɩ də pɩ̀ʋ́ Salʋmʋn jìgə̀ wubʋnyiən
Swapitərə 2-7 bɩrɩ də Salʋmʋn lwə̀ Yɩɩ dìə̀ tə
Swapitərə 8-9 bɩrɩ də Salʋmʋn yɩrɩ nan
Swapitərə 10 bɩrɩ də jɩzən saparʋ yuu dwíə́ tə zàn ba vɩ nii
Swapitərə 11-36:16 swɩ̀n Zwida pɛ̀gá tə yoo
Swapitərə 36:17-21 bɩrɩ də dʋŋa cʋ̀gʋ̀ Zwerizalɛmə tɩʋ tə
Swapitərə 36:22-23 swɩ̀n də Sirusə dʋgʋ Zwifə-ba, ʋ pa ba vìí.