Zìlə́ wiən tə ba nə pɩn, sə ba ma lwà Yɩɩ dìə̀ tə
29
1 Pɩ̀ʋ́ Davidə swɩ̀n lalʋʋ tə mama con, ʋ wʋ́: «À bìú Salʋmʋn Yɩɩ nə kúrí yɩ ləzwəndʋn, ʋ ga ba tʋ̀tʋ̀nán yənu jə, yá tʋ̀tʋ̀nán tə dáá zənzən. Cɩ́gá, padiə təntə tà ləzwənə dìə̀, ka yɩ Ba-Yígúrə́-Jə-Tiu, ʋ nə yɩ Yɩɩ dìə̀. 2 À ken à dɩ̀àn mama, à tanɩ wiən tə, tə nə mɛ sə ba ma lwà à tíú Yɩɩ dìə̀ tə. À tún sɩ́án wiən tə yɩrɩ, tə nə mɛ sə tə fwa də sɩ́án. À tún wárʋ́ wiən tə yɩrɩ, tə nə mɛ sə tə fwa də wárʋ́. À tún cɩnɩan wiən tə yɩrɩ, tə nə mɛ sə tə fwa də cɩnɩan. À tún lugu wiən tə yɩrɩ, tə nə mɛ sə tə fwa də lugu. À tún daran wiən tə yɩrɩ, tə nə mɛ sə tə fwa də daran. À tún kapan cɩ́nán cɩcɩlan nəsɩnan, də kapana ba nə ma nàŋà wiən, də kapana pʋpʋnan, də kapana yiri mama, tə nə jə funə, kʋ súrí kapana nəponə kapʋpʋ nə, ba nə boŋə alɩbatɩrɩ. 3 Kʋ tə nə súrí lá, à nə swə à tíú Yɩɩ dìə̀ tə zənzən yɩrɩ, à pɩn sɩ́án də wárʋ́, tə nə yɩ à tətə jɩjə wiən, sə tə súrí wiən tə mama nə, à nə tanɩ dìə̀ təntən yɩrɩ, ka nə yɩ parɩ. 4 À pɩn Ofirə tɩ̀án sɩ́án tɔnə bíí, də wárʋ́, kʋ nə ba durən jə tɔnə 240, sə ba ma mwàlɩ̀ Yɩɩ dìə̀ tə bírí tə yɩra tə. 5 Sɩ́ʋ́n nə, wàà nə swə sə ʋ kàn nii ʋ tɩ̀àn nə, də ʋ wá pa sɩ́án də wárʋ́ Ba-Yígúrə́-Jə-Tiu nə, sə tʋ̀tʋ̀nà tə ma fwa wiən tə mama nə mɛ sə tə fwa də sɩ́án, də tə tə nə mɛ sə tə fwa də wárʋ́?»6 Yɩzərayɛlə dìì tɩ̀án tə, də Yɩzərayɛlə dwíə́ yáá tɩ̀án tə, də kwatara mʋ̀rʋ̀ yáá tɩ̀án tə, də kwatara bíí yáá tɩ̀án tə, də pɩ̀ʋ́ tʋ̀tʋ̀nán yáá tɩ̀án tə, dàń kàn nii ba tɩ̀àn nə. 7 Ba pɩn sɩ́án tɔnə 170, də sɩ́án səbilurən 10 000, də wárʋ́ kʋ dun nə dwə tɔnə 300, də cɩnɩan kʋ dun nə bwə́lə́ tɔnə 600, də lugu tɔnə 3 000, sə ba ma tʋn Yɩɩ dìə̀ tə tʋ̀tʋ̀nán tə. 8 Lɩ̀à tə ba nə jə kapana tə nə jə funə, pɩn tə Yehiyɛlə nə, ʋ nə yɩ Gɛrəswon dwíí lìù, sə tə ya Ba-Yígúrə́-Jə-Tiu dìə̀ tə jɩjə wiən. 9 Yá lalʋʋ tə dàń fwa pupwən, ba tətə fɩra zìlə́ wiən tə yɩrɩ, ba nə pɩn Ba-Yígúrə́-Jə-Tiu nə, də ba bɩcanɩ mama. Pɩ̀ʋ́ Davidə də súə́ də pupwən nəfarʋ.
Davidə ken Yɩɩ lɛ̀ɛ̀
10 Davidə ken Ba-Yígúrə́-Jə-Tiu lɛ̀ɛ̀ lalʋʋ tə mama yáá con, ʋ wʋ́: «N mʋ̀ Ba-Yígúrə́-Jə-Tiu, n nə yɩ nə nɩbɛɛ Yɩzərayɛlə Yɩɩ mɛ də dun máŋá də máŋá mama wuuu! 11 N mʋ̀ Ba-Yígúrə́-Jə-Tiu nə wulə tə mɛ yuu wa, n mʋ̀ nə jə dɩ̀àn, n mʋ̀ nə jə dun, n mʋ̀ nə yɩ pɩ̀ʋ́ máŋá mama, n mʋ̀ nə jə poni. Cɩ́gá, won tə mama nə wulə lanworu wa, də tɩa yuu wa, yɩ n mʋ̀ Ba-Yígúrə́-Jə-Tiu nə tɩ. N mʋ̀ nə yɩ pɩ̀ʋ́, n wulə tə mɛ yuu wa! 12 Jɩjə də dun yɩ n mʋ̀ nə pɩn. N mʋ̀ nə wulə tə mɛ yuu wa. Dɩ̀àn nəfarʋ, də wanʋ yɩ tə wulə n mʋ̀ jɩɩn wa. N mʋ̀ nə wàá n pɩn lìù jì ləzwənfarʋ, ʋ ga yanɩ dɩ̀àn tíú.
13 Yá sɩ́ʋ́n nə, nə tíú Yɩɩ, nə kəni n lɛ̀ɛ̀, nə ga bwɩ n yɩrɩ nəzəŋu tə nə. 14 À mʋ̀ nə yɩ wàà, à lʋʋ lɩ̀à tə mʋ̀ nə yɩ bə̀rə́, nə ma wànɩ́ nə pa nə fɩra zìlə́ wiən, ndə tə tə nə nətən? Tə mama yɩ tə nan n mʋ̀ con. Wiən təntə mama nə nə pɩn mʋ́, yɩ n mʋ̀ nə pɩn tə nəba. 15 Nə yɩ vərə n yáá con, nə yɩ lɩ̀à tə, nə nə wá kɛ̀ń, ndə nə nɩbara-ba mama nə. Nə mɩɩ tə tɩa yuu wa wá kɛ̀ń, ndə yɩywara nə, nə yala ga zwɛ̀ mɩ́ámɩ́án. 16 Ba-Yígúrə́-Jə-Tiu, nə tíú Yɩɩ, n mʋ̀ nə pɩn nəba wiən kapʋpʋ tə tə mama, nə nə tanɩ nə tún, sə nə ma lwà dìə̀ nə pa mʋ́, sə ba bon n yɩrɩ nəzəŋu tə ka wa. Tə mama yɩ n mʋ̀ nə tɩ.
17 À tíú Yɩɩ, à yə̀ə́ də n balɩ kʋ tə nə wulə ləzwənə bɩcan wa, n ga swə yoo tə nə twá cɩ́gá cwəŋə nə. À də yɩ də bɩcan tə nə twá cɩ́gá cwəŋə nə, à ma tʋn zìlə́ wiən təntə mama, à pa mʋ́. Yá zə̀n kʋ tə, à dàń na n lalʋʋ tə mama də pupwən yəbə, ba wulə ba pɩn mʋ́ pupwən zìlə́ wiən. 18 Ba-Yígúrə́-Jə-Tiu tə, n nə yɩ nə nɩbara Abərahamə, də Yɩzakə, də Yɩzərayɛləa Yɩɩ, pa n lalʋʋ tə ja pubʋŋa ka tə yiri ba bɩcanɩ wa, n ga pa ba bʋ́n n cɩcɩ yoo máŋá mama. 19 Pa pubʋnzəŋu à bìú Salʋmʋn nə, ka nə wá pa ʋ twá n yìə̀n tə nə, n nə pɩn nii tə yuu wa, də tə tə nə, n nə tún sə ba twá nə, də tə tə nə, n nə pɩn tə pʋ́pʋ́nɩ́, sə tə ba twá tə nə. Pa sə ʋ zìlí tə mama nii, ʋ ga lwà n mʋ̀ Yɩɩ wúlú bwálɩ́ tə, à nə tanɩ kʋ wiən mama à tún.»
20 Davidə swɩ̀n lalʋʋ tə mama con, ʋ wʋ́: «Á kənə Ba-Yígúrə́-Jə-Tiu, ʋ nə yɩ á Yɩɩ lɛ̀ɛ̀.» Yá lalʋʋ tə mama dàń ken Ba-Yígúrə́-Jə-Tiu, ʋ nə yɩ ba nɩbara-ba Yɩɩ lɛ̀ɛ̀. Ba tʋa ba nadwana yuu Ba-Yígúrə́-Jə-Tiu yáá con, də pɩ̀ʋ́ tə yáá con.
Ba tún Salʋmʋn sə ʋ ya pɩ̀ʋ́
21 Kʋ tɩpʋrɩ nə, ba fwa nimarʋ* jwəŋə, də jwəŋə ba nə sʋ̀rɩ́*, ba pa Ba-Yígúrə́-Jə-Tiu nə. Ba gʋa nabɩran mʋ̀rʋ̀, də pabɩran mʋ̀rʋ̀, də pəbii mʋ̀rʋ̀, ba ma fwa jwəŋə, kʋ súrí divɛn, də jwəŋə kapʋpʋ duən nə, Yɩzərayɛlə lɩ̀à tə mama yuu yɩrɩ. 22 Kʋ dɩɩn tə nə, ba dí ba ga nyʋn Ba-Yígúrə́-Jə-Tiu yáá con, də pupwən nəfarʋ. Yá ba dàń tún Davidə bìú Salʋmʋn nɛɛ bələ nii nə, sə ʋ ya pɩ̀ʋ́. Ba twɛn dun nʋga* ʋ yuu wa Ba-Yígúrə́-Jə-Tiu yáá con, sə ʋ yà lalʋʋ tə yáá tíú. Ba twɛn dun nʋga tə Sadɔkə də yuu wa, sə ʋ ya Yɩɩ joŋwanʋ*. 23 Salʋmʋn jə̀ń padaʋ tə yuu, Ba-Yígúrə́-Jə-Tiu nə pɩn Yɩzərayɛlə lɩ̀à nə, yá ʋ dàń dí pàrɩ̀ tə ʋ nyɩna Davidə yuu nə. Ʋ yoo mama yɩn zəni, kʋ pa Yɩzərayɛlə lɩ̀à tə mama zìlí ʋ nii. 24 Yáá tɩ̀án tə mama, də kwatara tə, də pɩ̀ʋ́ Davidə bɩ̀á tə tətə sɛ̀, ba zìlí pɩ̀ʋ́ Salʋmʋn nii. 25 Ba-Yígúrə́-Jə-Tiu pɩn Salʋmʋn jì dun nəfarʋ tíú, Yɩzərayɛlə lɩ̀à tə mama yɩ́á yuu. Ʋ pɩn ʋ pàrɩ̀ tə ja dun zənzən, kʋ doni Yɩzərayɛlə lɩ̀à pɛ̀gá tə mama, ba nə yɩn ʋ yáá.
Davidə tɩan yoo
26 Yɩzayi bìú Davidə dí pàrɩ̀ Yɩzərayɛlə mama yuu wa. 27 Ʋ dí pàrɩ̀ bɩna sapwɩlə. Ʋ dí pàrɩ̀ Ebəron wa bɩna barpɛ, ʋ ga də́ pàrɩ̀ Zwerizalɛmə wa bɩna fɩtwa də batwa. 28 Ʋ tɩga də ʋ kwɩn zənzən, ʋ ga də́ lʋʋ ywánɩ́, jɩjə də dun wa. Ʋ bìú Salʋmʋn nə dí pàrɩ̀ tə ʋ yuu nə.
29 Ba pʋ́pʋ́nɩ́ pɩ̀ʋ́ Davidə tʋ̀tʋ̀nán tə mama nə sinti nətʋ, tə va tə yí tə yígúrə́, ba tún Yɩɩ yinarʋ Samiyɛlə sagɩ tə wa, də Yɩɩ nii sʋ̀sʋ̀nʋ̀ Natan sagɩ tə wa, də Yɩɩ nii yinarʋ Gadə sagɩ tə wa. 30 Saga təntə bɩrɩ ʋ pàrɩ̀ tə nə yɩn nətʋ, də ʋ wʋdɩʋ nə yɩn nətʋ, də yìə̀n tə nə tʋn Yɩzərayɛlə wa, nə à yə̀ə́ lʋʋ níə́ tə duən payun tə wa, ʋ lʋʋ wúlú máŋá wa.