Davidə tún Salʋmʋn sə ʋ də́ pàrɩ̀ tə ʋ kwa nə
28
1 Pɩ̀ʋ́ Davidə ken Yɩzərayɛlə lɩ̀à yáá tɩ̀án tə mama duən yáá nə, Zwerizalɛmə wa. Ba mʋ̀ nə yɩ dwíə́ yáá tɩ̀án tə, də kwatara púlə́ yáá tɩ̀án tə yà nə tʋŋa ba pɩn pɩ̀ʋ́ tə nə, də kwatara mʋ̀rʋ̀ yáá tɩ̀án tə, də kwatara bíí yáá tɩ̀án tə, də lɩ̀à tə nə ywàŋá ʋ də ʋ bɩ̀á jɩjə, də ba vàná tə mama yuu nə, də lɩ̀à tə, ʋ nə jələ ba yuu wa, də kwatara babɩran tə, də dun tɩ̀án tə mama. 2 Pɩ̀ʋ́ Davidə zàn yɩɩ nə, ʋ swɩ̀n, ʋ wʋ́: «À nubɩa ba, à lʋʋ lɩ̀à ba, á cʋga à con! À yà bʋŋa à bɩcan wa, sə à lwà dìə̀, à nə wá tún Ba-Yígúrə́-Jə-Tiu nimarʋ culu daka tə, ka nə yɩ nə Yɩɩ tə naa tuŋu bwálɩ́, dìə̀ təntə wa. Yá à dàń yà tanɩ won mama. 3 Yá Yɩɩ swɩ̀n à con, ʋ wʋ́: “N mʋ̀ nə bá lwà dìə̀, sə ba bon à yɩrɩ ka wa. Cɩ́gá, n yɩn kwatarʋ, yá n lwá jana zənzən.” 4 Ba-Yígúrə́-Jə-Tiu, ʋ nə Yɩzərayɛlə lɩ̀à Yɩɩ kúrí nə, à nyɩna dìə̀ tə mama wa, sə à ya Yɩzərayɛlə lɩ̀à pɩ̀ʋ́, máŋá mama wuuu. Cɩ́gá, ʋ kúrí Zwida dwíí tə, ʋ kúrí à nyɩna dìə̀ tə Zwida dwíí tə wa, yá ʋ dàń kúrí nə à nyɩna bɩ̀á tə wa, sə à də́ pàrɩ̀ Yɩzərayɛlə lɩ̀à tə mama yuu wa. 5 Bɩ̀á kapʋpʋ tə wa Ba-Yígúrə́-Jə-Tiu nə pɩn nə, ʋ kúrí Salʋmʋn, sə ʋ jə̀ń Ba-Yígúrə́-Jə-Tiu payuu tə padaʋ tə yuu wa, ʋ də́ pàrɩ̀ Yɩzərayɛlə lɩ̀à yuu wa. 6 Ʋ swɩ̀n à con, ʋ wʋ́: “Kʋ yɩ n bìú Salʋmʋn nə wá lwà à dìə̀ tə, də ka napakolən tə. Cɩ́gá, à kúrí wá, sə ʋ ya à bìú, yá à wá ya ʋ nyɩna. 7 À wá pa ʋ pàrɩ̀ tə ya lá máŋá mama, də ʋ nə zìlí yìə̀n tə, à nə pɩn nii tə yuu wa, ʋ ga twá à yìə̀n tə nə, à nə bɩrɩ sə tə tʋn, ndə ʋ nə tʋŋa kʋ nətʋ zə̀n.”8 Sɩ́ʋ́n nə, Yɩzərayɛlə lɩ̀à tə mama yáá con, ba nə yɩ Ba-Yígúrə́-Jə-Tiu lalʋʋ, də nə tíú Yɩɩ tə ʋ nə cʋga nəba yáá con, á dàń twaga yìə̀n tə mama nə zəni, Ba-Yígúrə́-Jə-Tiu, á tíú Yɩɩ nə pɩn nii tə yuu wa. Kʋ wá pa á tɩnɩ lʋʋ nii nəzəŋu kʋ tə, máŋá mama wuuu, á ga á yá á pa á bɩ̀á nə, á tɩan kwa nə.»
9 Yá Davidə swɩ̀n Salʋmʋn də con, ʋ wʋ́: «N mʋ̀ à bìú Salʋmʋn, kə dɩ̀àn n lwarɩ Yɩɩ tə nə yɩ à mʋ̀ n nyɩna tə Yɩɩ, n ga tʋn n pa wá, də n bɩcan mama, də n jə̀rə́ mama. Cɩ́gá, Ba-Yígúrə́-Jə-Tiu na ləzwənə bɩcan yoo mama, ʋ ga yə̀ə́ pubʋŋa yiri mama, ka nə wulə lá. N nə pɩ̀à wá, ʋ wá pa n na wá. Yá n dàń nə vɩga wá, ʋ wá vɩ mʋ́ ʋ dʋgʋ mɩ́ámɩ́án. 10 Sɩ́ʋ́n nə, n na də kʋ yɩ n mʋ̀ nə Ba-Yígúrə́-Jə-Tiu kúrí, sə n lwà dìə̀ tə, ka nə wá ya ʋ wúlú bwálɩ́. Pa n jɩɩn dàn, n ga tʋn kʋ!»
Davidə fwa Yɩɩ dìə̀ tə nyɩnyɩga ʋ pa Salʋmʋn nə
11 Davidə fwa Yɩɩ wúlú bwálɩ́ tə nyɩnyɩga, ʋ pa ʋ bìú Salʋmʋn nə, də kʋ waa dibɩa tə, də cʋna kwɩan* bwálɩ́ dibiu tə, də kʋ yɩra dìì tə, də dibɩa tə, ba nə wá tún jɩjə wiən tə wa, də dəyuu dìì tə. 12 Ʋ tə pɩn wá Yɩɩ dìə̀ tə napakolən tə nyɩnyɩga, ʋ yà nə tanɩ sə ʋ lwà, də dibɩa tə nə kɩkarɩ napakolən tə, də dibɩa tə mama, Yɩɩ dìə̀ jɩjə wiən tə, də wiən tə, ba nə tún vàn nə, ba pa Yɩɩ cɩcɩ nə, nə wá ya tə wa. 13 Ʋ tə bɩrɩ wá Yɩɩ joŋwana púlə́ tə, də Levi dwíí púlə́ tə, də Ba-Yígúrə́-Jə-Tiu dìə̀ tə tʋ̀tʋ̀nán yiri mama, də tʋtʋnzɩla tə mama, ba nə wá ma tʋn Ba-Yígúrə́-Jə-Tiu dìə̀ tə wa. 14 Ʋ tə bɩrɩ wá sɩ́án tə, ʋ nə wá ma fwa sɩ́án tʋtʋnzɩlɩ mama, dun nə mɛ sə tə ya nətʋ, də wárʋ́ tə, ʋ nə wá ma fwa wárʋ́ tʋtʋnzɩlɩ mama, dun nə mɛ sə kʋ ya nətʋ. 15 Ʋ tə bɩrɩ wá sɩ́án tə, ʋ nə wá ma fwa canzɩlan tə, də tə sɩ́án tʋntʋnɩ tə dun nə mɛ sə tə ya nətʋ, ʋ ga bɩrɩ wá wárʋ́ tə, ʋ nə wá ma fwa wárʋ́ canzɩlan tə, də tə wárʋ́ tʋntʋnɩ tə dun nə mɛ sə kʋ ya nətʋ. Kʋ nədʋ mama də kʋ tʋtʋŋɩ. 16 Ʋ tə bɩrɩ wá sɩ́án tə, ʋ nə wá ma fwa sɩ́án tabɩlʋ tə nədʋ mama, ba nə tuŋə dipɛn kʋ yuu wa, ba pɩn Yɩɩ nə, dun nə mɛ sə tə ya nətʋ, ʋ ga bɩrɩ wá wárʋ́ tə, ʋ nə wá ma fwa wárʋ́ tabɩlʋ tə nədʋ mama, dun nə mɛ sə kʋ ya nətʋ. 17 Ʋ tə bɩrɩ wá sɩ́án danyunzɩan tə, də sɩ́án zwɩɩn tə, ba nə ma lòní vàná jana, də sɩ́án wùrú zwɩɩn tə nədʋ mama nyɩnyɩga, də sɩ́án tə, ʋ nə wá ma fwa kʋ nədʋ mama dun nə mɛ sə tə ya nətʋ. Ʋ bɩrɩ wá wárʋ́ wùrú zwɩ̀ɩ́ tə nə nyɩnyɩga, də wárʋ́ tə, ʋ nə wá ma fwa ka nədʋ mama dun nə sə mɛ sə tə ya nətʋ. 18 Ʋ tə bɩrɩ wá Yɩɩ joŋi bwálɩ́ tə, ba nə wá ma sʋ̀rɩ́ wusinə nyɩnyɩga, ʋ nə mɛ sə ʋ fwa də sɩ́án tə nə ba durən jə, də sɩ́án tə, ʋ nə wá ma fwa kʋ, dun nə mɛ sə tə ya nətʋ. Kʋ kwa nə, Davidə pɩn wá kòrù tə nyɩnyɩga, də sɩ́án Yɩɩ sàń wonəŋə* tə nə zɩ̀n tə vànà, tə ma pú Ba-Yígúrə́-Jə-Tiu nimarʋ culu daka tə yuu nə nyɩnyɩga. 19 Davidə dàń swɩ̀n, ʋ wʋ́: «Wiən təntə mama yɩ Ba-Yígúrə́-Jə-Tiu nə pʋ́pʋ́nɩ́ tə, ʋ pa nə, sə à yəni won tə mama, kʋ nə mɛ sə kʋ fwa nyɩnyɩga nə yɩ nətʋ.»
20 Ʋ tə swɩ̀n ʋ bìú Salʋmʋn con ʋ súrí lá, ʋ wʋ́: «Ja wʋdɩʋ, sə n pa n jɩɩn dàn, n ga tʋn kʋ! Dàn ká pa fən ja mʋ́, dàn ká vɩvaga. Cɩ́gá, Ba-Yígúrə́-Jə-Tiu, ʋ nə yɩ à tíú Yɩɩ wá ya də mʋ́, ʋ bá pìí ʋ yá mʋ́, ʋ bá vɩ mʋ́ ʋ dʋgʋ, kʋ va kʋ yí n nə wá tʋn ʋ dìə̀ tə lwiu tʋ̀tʋ̀nán tə mama, n zwɛ̀. 21 Nə̀ń Yɩɩ joŋwana púlə́ tə, də Levi dwíí púlə́ tə nə, ba wulə də mʋ́, sə ba tʋn Yɩɩ dìə̀ tə tʋ̀tʋ̀nán tə mama. N tə wàá yáá tɩ̀án tə, də lalʋʋ tə mama yuu wa n jələ, ba nə ken sírí, sə ba tʋn tʋtʋnyiri mama, ba ga jə tə yənu də. Yá ba wá tʋn kʋ tə mama, n nə wá pa nii sə kʋ tʋn.