Nətʋ ba nə tanɩ Yɩzərayɛlə kwatara púlə́ tə, ba tún
27
1 Nə̀ń Yɩzərayɛlə lɩ̀à dìì tɩ̀án tə, ba nə yɩn kwatara mʋ̀rʋ̀ yáá tɩ̀án, də kwatara bíí yáá tɩ̀án, də tʋ̀tʋ̀nán yun tɩ̀án, ba nə tʋŋa ba pɩn pɩ̀ʋ́ tə nə. Ba mʋ̀ mama yà nə ywàŋá kwatara púlə́ tə yuu nə, tə nə joŋə duən yuu nə cànà mama, bɩnɩ wa. Kwatara púlí mama yà jə kwatara 24 000.2 Təntən púlí tə, kʋ nə tʋŋa təntən cànà tə wa yáá tíú nə yɩ Zabədiyɛlə bìú Yaswobeyamə. Ʋ púlí tə yà jə kwatara 24 000. 3 Ʋ yà yɩ Perɛsə sàń tə wa lìù. Ʋ yɩn kwatara yáá tɩ̀án tə mama yáá tíú, təntən cànà tə wa. 4 Dodayi, ʋ nə yɩ Ahʋa tíú yà nə wulə púlí tə nə tʋŋa bələ nii cànà tə wa yuu wa. Yá Mikəlɔtə yà nə yɩ púlí təntə yáá tíú. Ʋ púlí tə yà jə kwatara 24 000.
5 Batwa nii púlí tə nə tʋŋa batwa nii cànà tə wa yáá tíú nə yɩ Benaya, ʋ nə yɩ Yɩɩ joŋwana yuu tíú Yehoyada bìú. Ʋ púlí tə yà jə kwatara 24 000. 6 Ʋ mʋ̀ Benaya təntə yɩn kwatara babɩran fɩtwa tə wa, ʋ ga ya ba fɩtwa tə yáá tíú. Ʋ bìú Amizabadə yà wulə ʋ púlí tə wa.
7 Banɩa nii púlí tə nə tʋŋa banɩa nii cànà tə wa yáá tíú nə yɩ Zʋabə nubiu Azayɛlə. Ʋ bìú Zebadɩa nə jon ʋ yuu nə. Ʋ púlí tə yà jə kwatara 24 000.
8 Bonu nii púlí tə nə tʋŋa bonu nii cànà tə wa yáá tíú nə yɩ Swamehutə, ʋ nə yɩ Yɩzəra tíú. Ʋ púlí tə yà jə kwatara 24 000.
9 Bardʋ nii púlí tə nə tʋŋa bardʋ nii cànà tə wa yáá tíú nə yɩ Yikɛswə bìú Yɩra, ʋ nə yɩ Tekʋa tíú. Ʋ púlí tə yà jə kwatara 24 000.
10 Barpɛ nii púlí tə nə tʋŋa barpɛ nii cànà tə wa yáá tíú nə yɩ Elɛsə, ʋ nə yɩ Palon tíú, ʋ ga yɩ Efərayimə bìú don. Ʋ púlí tə yà jə kwatara 24 000.
11 Nana nii púlí tə nə tʋŋa nana nii cànà tə wa yáá tíú nə yɩ Sibekayi, ʋ nə yɩ Huswa tíú, Zera dwíí tə wa. Ʋ púlí tə yà jə kwatara 24 000.
12 Nʋgʋ nii púlí tə nə tʋŋa nʋgʋ nii cànà tə wa yáá tíú nə yɩ Abiyezɛrə, ʋ nə yɩ Anatɔtə tíú, Bɛnzwamɛn dwíí tə wa. Ʋ púlí tə yà jə kwatara 24 000.
13 Fugə nii púlí tə nə tʋŋa fugə nii cànà tə wa yáá tíú nə yɩ Maharayi, ʋ nə yɩ Netofa tíú, Zera dwíí tə wa. Ʋ púlí tə yà jə kwatara 24 000.
14 Fugə də nədʋ nii púlí tə nə tʋŋa fugə nədʋ nii cànà tə wa yáá tíú nə yɩ Benaya, ʋ nə yɩ Piraton tíú, Efərayimə dwíí tə wa. Ʋ púlí tə yà jə kwatara 24 000.
15 Fugə də bələ nii púlí tə nə tʋŋa fugə bələ nii cànà tə wa yáá tíú nə yɩ Ɛlədayi, ʋ nə yɩ Netofa tíú, Otəniyɛlə dwíí tə wa. Ʋ púlí tə yà jə kwatara 24 000.
Yɩzərayɛlə dwíə́ yáá tɩ̀án tə yoo
16 Yɩzərayɛlə dwíə́ yáá tɩ̀án tə nə nətən:
Ribɛn dwíí tə wa, kʋ yɩ Zikəri bìú Eliyezɛrə.
Simeyon dwíí tə wa, kʋ yɩ Maaka bìú Swefatɩa.
17 Levi dwíí tə wa, kʋ yɩ Kemuwɛlə bìú Haswabɩa.
Aron dwíí tə wa, kʋ yɩ Sadɔkə.
18 Zwida dwíí tə wa, kʋ yɩ Elihu, ʋ nə yɩ Davidə nubɩa tə wa lìù.
Yɩsakarə dwíí tə wa, kʋ yɩ Mikayɛlə bìú Oməri.
19 Zabulon dwíí tə wa, kʋ yɩ Abədɩasə bìú Yiswəmaya.
Nɛfətali dwíí tə wa, kʋ yɩ Azəriyɛlə bìú Yerimɔtə.
20 Efərayimə dwíí tə wa, kʋ yɩ Azazɩa bìú Oze.
Manase dwíí faan tə wa, kʋ yɩ Pedaya bìú Zʋwɛlə.
21 Manase dwíí faan tə don wa, kʋ nə wulə Galadə nagwanaa tə wa, kʋ yɩ Zakari bìú Yido.
Bɛnzwamɛn dwíí tə wa, kʋ yɩ Abənɛrə bìú Yasɩyɛlə.
22 Dan dwíí tə wa, kʋ yɩ Yerohamə bìú Azarəyɛlə.
Mə Yɩzərayɛlə dwíə́ yáá tɩ̀án tə nə nətʋ.
23 Davidə wà pɩn ba gàlà lɩ̀à tə nə jə bɩna sapʋa, də ba tə nə wà nətʋ yí. Cɩ́gá, Ba-Yígúrə́-Jə-Tiu yà swɩ̀n də, ʋ wá pa Yɩzərayɛlə dwíí tə pùlì, ndə lanworu kacɩlacɛɛ tə nə. 24 Davidə nakʋa Seruya bìú Zʋabə yà təntən ʋ gàlà lalʋʋ tə, yá ʋ dàń nə wà zwɛ̀. Cɩ́gá, Yɩɩ lɩŋa zàn Yɩzərayɛlə lɩ̀à yuu wa, kʋ yoo təntə yɩrɩ. Kʋ mʋ̀ nə pɩn ba wà wànɩ́ ba lwarɩ lalʋʋ tə mama nii, sə ba pʋ́pʋ́nɩ́ ba tún pɩ̀ʋ́ Davidə tʋ̀tʋ̀nán sagɩ tə wa.
Lɩ̀à tə nə ywàŋá pɩ̀ʋ́ jɩjə tə yuu nə yoo
25 Adɩyɛlə bìú Azəmavɛtə yà nə ywàŋá pɩ̀ʋ́ jɩjə tə yuu nə. Ozɩasə bìú Zonatan ga ywàŋá jɩjə tə yuu nə, ba nə tún lʋʋ nii tə tɩan tə wa, də kʋ tɩbii tə wa, də kʋ dɩ̀àn dəkuu bwálá tə wa.
26 Kelubə bìú Ezəri yà nə ywàŋá vala tə yuu nə, lʋʋ nii tə wa.
27 Swimeyi, ʋ nə yɩ Rama tíú yà nə ywàŋá divɛn tɩ̀án kárɩ́ tə yuu nə. Zabədi, ʋ nə yɩ Swefamə tíú yà nə ywàŋá divɛn tə yuu nə, kʋ nə naŋa divɛn tɩ̀án kárɩ́ tə wa.
28 Baalə-Hanan, ʋ nə yɩ Bɛtə-Gedɛrə tíú yà nə ywàŋá olivə* tɩ̀án kárɩ́ tə, də kapɩrɩtərən kárɩ́ tə yuu nə, Swefela* nagwanaa tə wa. Yʋaswə yà nə ywàŋá nʋga tə yuu nə, ba nə tanɩ ba tún.
29 Switərayi, ʋ nə yɩ Swaronə tíú yà nə ywàŋá vanfaran tə yuu nə, tə nə də́ Swaronə vara tə wa. Adəlayi bìú Swafatə yà nə ywàŋá vanfaran tə yuu nə, tə nə də́ varɩ tə duən tə wa.
30 Obilə, ʋ nə yɩ Yɩsəmayɛlə dwíí lìù yà nə ywàŋá nyʋgʋmɛ tə yuu nə. Yedeya, ʋ nə yɩ Meronɔtə tíú yà nə ywàŋá bɩnakana tə yuu nə.
31 Yazizə, ʋ nə yɩ Hagarə dwíí lìù yà nə ywàŋá vanmɩnɩ tə yuu nə. Mə lɩ̀à tə nə ywàŋá pɩ̀ʋ́ Davidə jɩjə tə yuu nə, nə nətʋ.
Davidə yɩra lɩ̀à yoo
32 Davidə nɩbarɩ Zonatan yà yɩ kwenu. Ʋ yà yɩ bɛɛ tə, ʋ nə jə pubʋŋa, ʋ ga pʋ́pʋ́nɩ́ saga. Hakəmoni bìú Yehiyɛlə yà nə ywàŋá pɩ̀ʋ́ bɩ̀á tə yuu nə. 33 Ahitofɛlə yà nə yɩ pɩ̀ʋ́ kwenu. Huswayi, ʋ nə yɩ Arəka tíú yà nə yɩ pɩ̀ʋ́ tə dabɛɛ. 34 Ahitofɛlə kwa nə, kʋ yɩn Benaya bìú Yehoyada, də Abɩyatarə. Zʋabə yà nə yɩ pɩ̀ʋ́ tə kwatara yáá tíú.