Mimii nəcɩra púlə́ tə yoo
26
1 Mimii nəcɩra púlə́ tə wa, Kore dwíí tə wa, kʋ yɩ Kore bìú Meswelemɩa, ʋ nə yɩ Asafə nàʋ́. 2 Meswelemɩa bɩ̀á nə yɩ ʋ bikwɩa Zakari, ʋ bələ nii bìú nə yɩ Yediyayɛlə, ʋ batwa nii bìú nə yɩ Zebadɩa, ʋ banɩa nii bìú nə yɩ Yatənɩyɛlə, 3 ʋ bonu nii bìú nə yɩ Elamə, ʋ bardʋ nii bìú nə yɩ Yohanan, ʋ barpɛ nii bìú nə yɩ Eliyowenayi.4 Obɛdə-Edomə bɩ̀á nə yɩ ʋ bikwɩa Swemaya, ʋ bələ nii bìú nə yɩ Yehozabadə, ʋ batwa nii bìú nə yɩ Yʋa, ʋ banɩa nii bìú nə yɩ Sakarə, ʋ bonu nii bìú nə yɩ Netaneyɛlə, 5 ʋ bardʋ nii bìú nə yɩ Amɩyɛlə, ʋ barpɛ nii bìú nə yɩ Yɩsakarə, ʋ nana nii bìú nə yɩ Pewulətayi. Cɩ́gá, Yɩɩ yà fwa zəni Obɛdə-Edomə yɩra. 6 Ʋ bikwɩa Swemaya bɩ̀á tə yɩn dun tɩ̀án ba dìì tə wa. Cɩ́gá, ba yɩn babɩran. 7 Swemaya bɩ̀á nə yɩn Otəni, də Refayɛlə, də Obɛdə, də Ɛləzabadə, kʋ súrí ʋ nubɩa Elihu, də Samakɩa nə, ba nə yɩn babɩran. 8 Ba mʋ̀ lɩ̀à təntə mama yà yɩ Obɛdə-Edomə bɩ̀á. Ba də ba bɩ̀á tə, də ba nubɩa tə yà yɩ babɩran, ba nə jə dɩ̀àn ba ma tʋŋa. Ba yà yɩ lɩ̀à sapwɩtwa də bələ, ba nə yɩ Obɛdə-Edomə bɩ̀á.
9 Meswelemɩa bɩ̀á tə, də ʋ nubɩa tə yà yɩ babɩran fugə də nana. 10 Hoza, ʋ nə yɩ Merari dwíí tə wa lìù bɩ̀á nə yɩ Swiməri, ʋ nə yɩ ba yáá tíú, ba nyɩna nə lɩ ʋ tún, yá ʋ mʋ̀ nə tà ʋ bikwɩa. 11 Ʋ bələ nii bìú nə yɩ Hiləkiya, ʋ batwa nii bìú nə yɩ Tebalɩa, ʋ banɩa nii bìú nə yɩ Zakari. Hoza bɩ̀á tə, də ʋ nubɩa tə yɩn bara fugə də batwa.
12 Mimii nəcɩra púlə́ təntə, də ba kwa lɩ̀à tə yà nə saŋa duən nə, ba tʋŋa Ba-Yígúrə́-Jə-Tiu dìə̀ tə wa, ndə ba nubɩa tə duən tə nə. 13 Ba pwárɩ́ ba ma tara mimien tə yuu ywàŋʋ́, ba pa ba nəkwɩna də ba ləzwəndʋn nə, kʋ twá ba dìì nə.
14 Pwárʋ́ tə tʋa Swelemɩya yuu wa, yɩɩ yipɩan con mimii tə yɩrɩ. Ba pwárɩ́ jɩzən saparʋ con mimii tə yɩrɩ, yá pwárʋ́ tə tʋa ʋ bìú Zakari yuu wa, ʋ nə yɩ kwenu nəzəŋu. 15 Obɛdə-Edomə nə cɩ̀ jɩgwiə saparʋ con mimii tə nə, yá ʋ bɩ̀á tə ga ywàŋá zɩla dìì tə yuu nə. 16 Swupimə də Hoza yà nə cɩ̀ yɩɩ yizwɩa con mimii tə, də Swalekɛtə mimii tə nə, kʋ nə daa cwəŋə tə con, ka nə kwɩ̀nɩ́. Mimii nəcɩra púlí mama yáá yà te kʋ don con. 17 Levi dwíí tə lɩ̀à bardʋ yà wulə Yɩɩ dìə̀ tə yɩɩ yipɩan, dɩɩn mama. Ba lɩ̀à banɩa duən yà wulə ka jɩzən saparʋ yuu, dɩɩn mama, ba lɩ̀à banɩa duən ga wulə ka jɩgwiə saparʋ yuu, dɩɩn mama. Ba lɩ̀à banɩa duən də pwɛ̀ ba wulə zɩla dìì tə nii nə, bwálá bələ wa. 18 Lɩ̀à bələ yà nə cɩ̀ Yɩɩ dìə̀ tə yɩra dìə̀ tə nə wulə yɩɩ yizwɩa con tə nə, lɩ̀à banɩa ga wulə cwəŋə tə con.
19 Mə mimii nəcɩra púlə́ tə, ba nə kúrí Kore dwíí tə wa, də Merari dwíí tə wa, yɩn nətʋ.
Tʋ̀tʋ̀nán yirə duən, ba nə pɩn Levi dwíí tə lɩ̀à duən nə
20 Ahɩya, ʋ nə yɩ Levi dwíí tə wa lìù don yà nə ywàŋá Yɩɩ dìə̀ tə jɩjə wiən tə, də Yɩɩ dìə̀ tʋtʋnzɩla tə yuu nə. 21 Ladan dìə̀ lɩ̀à tə ba nə yɩ Gɛrəswomə dwíí, ba ga yɩ ba dìì tə yáá tɩ̀án, yà yɩ Yehiyeli, 22 də ʋ bɩ̀á tə: Ba mʋ̀ nə yɩ Zetamə də ʋ nubiu Zʋwɛlə. Ba mʋ̀ yà nə ywàŋá Ba-Yígúrə́-Jə-Tiu dìə̀ tə jɩjə wiən tə yuu nə. 23 Aməramə, də Yɩsarə, də Ebəron, də Uziyɛlə dwíə́ tə wa, 24 kʋ yɩ Gɛrəswomə bìú Swebuwɛlə, ʋ nə yɩ Moyizə nàʋ́. Ʋ mʋ̀ yà nə yɩ lɩ̀à tə nə ywàŋá jɩjə wiən tə yuu nə yáá tíú. 25 Ʋ nubɩa tə wa, ba nə yɩ Eliyezɛrə bɩ̀á, kʋ yà yɩ Eliyezɛrə bìú Rehabɩa, də Ezayi bìú Yoramə, də Yoramə bìú Zikəri, də Zikəri bìú Swelomitə. 26 Swelomitə təntə, də ʋ nubɩa yà nə ywàŋá Yɩɩ dìə̀ tʋtʋnzɩla tə mama yuu nə, tə nə yɩ wiən pɩ̀ʋ́ Davidə, də dìì tɩ̀án, də kwatara mʋ̀rʋ̀ yáá tɩ̀án, də kwatara bíí yáá tɩ̀án, də kwatara yáá tɩ̀án nə tún ba pa Yɩɩ nə. 27 Wiən təntə yɩ ba lɩ wiən tə wa, ba nə ta ba jon kʋ̀ʋ̀ wa, ba tún ba pa Yɩɩ nə, sə ba ma tanɩ Ba-Yígúrə́-Jə-Tiu dìə̀ tə. 28 Wiən tə mama Yɩɩ nii sʋ̀sʋ̀nʋ̀ Samiyɛlə, də Kiswə bìú Sayulə, də Nɛrə bìú Abənɛrə, də Davidə nakʋa Seruya bìú Zʋabə yà nə tún ba pa Yɩɩ nə, də wiən tə lɩ̀à tə mama yà nə tún ba pa Yɩɩ nə, tə mama yà yɩ Swelomitə, də ʋ nubɩa tə nə ywàŋá tə yuu nə.
29 Yɩsarə dwíí tə wa, kʋ yɩ Kenanɩa də ʋ bɩ̀á tə yà nə ywàŋá Yɩzərayɛlə lalʋʋ tə yìə̀n yuu nə, yá ba bʋ̀rɩ̀ bʋra.
30 Ebəron dwíí tə wa, Aswabɩa də ʋ nubɩa tə yà yɩ babɩran 1 700. Ba mʋ̀ yà nə ywàŋá Yɩzərayɛlə lɩ̀à tə yuu nə, ba nə wulə Zʋrədɛn mʋnaa tə kwa, yɩɩ yizwɩa con. Ba mʋ̀ yà nə tʋŋa Ba-Yígúrə́-Jə-Tiu tʋ̀tʋ̀nán tə mama, ba ga tʋŋa ba pɩn pɩ̀ʋ́ tə də nə. 31 Yeriya yà nə yɩ Ebəron dwíí tə yáá tíú. Pɩ̀ʋ́ Davidə pàrɩ̀ tə bɩna sapwɩlə nii nə, ba twarɩ Ebəron dwíí tə dəkuu, yá ba nɩ kwatara babɩran ba wa, Yazɛrə nə, Galadə nagwanaa tə wa. 32 Yeriya nubɩa tə yɩn babɩran 2 700, ba nə yɩ dìì tɩ̀án. Pɩ̀ʋ́ Davidə tún ba, sə ba ya Ribɛn dwíí tə, də Gadə dwíí tə, də manase dwíí faan tə yáá tɩ̀án, ba tʋn Ba-Yígúrə́-Jə-Tiu tʋ̀tʋ̀nán tə mama, ba ga tʋn ba pa pɩ̀ʋ́ tə də nə.