Bələ Nii Pɛ̀gá Ŋwɛn
SALƲMƲN PÀRƖ̀ TƏ DIŊƏ YOO
Yɩɩ pɩn wʋbʋŋa Salʋmʋn nə
1
1 Davidə bìú Salʋmʋn pàrɩ̀ tə nɩ dɩ̀àn zənzən. Ba-Yígúrə́-Jə-Tiu, ʋ nə yɩ ʋ Yɩɩ tə yà wulə də wá, yá ʋ pɩn ʋ jì pɩ̀ʋ́ nəfarʋ.2 Salʋmʋn bon Yɩzərayɛlə lalʋʋ tə mama, də kwatara mʋ̀rʋ̀ yáá tɩ̀án tə, də kwatara bíí yáá tɩ̀án tə, də lɩ̀à tə nə bʋ̀rɩ̀ bʋra tə, də Yɩzərayɛlə yáá tɩ̀án tə mama, də dìì tɩ̀án tə mama, ʋ kə duən yáá nə. 3 Salʋmʋn də lalʋʋ tə mama vəli Yɩɩ joŋi bwálɩ́ tə nə, kʋ nə wulə Gabawon nə. Cɩ́gá, mə Yɩɩ jə́rə́ gansili tə Ba-Yígúrə́-Tiu tʋtʋnʋ Moyizə nə fwa kasɔɔ lanworu tə wa, yà wulə kʋ bwálɩ́ təntə wa.
4 Yá Davidə yà tì Yɩɩ nimarʋ culu daka tə mʋ̀, ʋ ja nan Kiriyatə-Yarimə, ʋ va bwálɩ́ tə wa, ʋ nə tanɩ ʋ tún ka yɩrɩ. Cɩ́gá, ʋ yà tanɩ gansili ʋ tún ka yɩrɩ, Zwerizalɛmə wa. 5 Yɩɩ joŋi bwálɩ́ tə də, Uri bìú Bɛsalɛlə, ʋ nə yɩ Urə nàʋ́ nə fwa də cɩnɩan, yà wulə Yɩɩ jə́rə́ gansili tə yáá con. Salʋmʋn də lalʋʋ tə bon ba kə Ba-Yígúrə́-Jə-Tiu nə. 6 Mə kʋ bwálɩ́ tə wa nə, Salʋmʋn dɩ̀gà Yɩɩ joŋi bwálɩ́ tə yuu wa, ba nə fwa də cɩnɩan, Ba-Yígúrə́-Jə-Tiu yáá con, ʋ nə wulə Yɩɩ jə́rə́ gansili tə wa, yá ʋ fwa jwəŋə mʋ̀rʋ̀, ba nə sʋ̀rɩ́*.
7 Kʋ tɩtɩn təntə nə, Yɩɩ twi Salʋmʋn con, ʋ swɩ̀n ʋ con, ʋ cwʋ́: «Lòrì won tə, n nə pɩ̀à, yá à wá pa kʋ mʋ́.» 8 Salʋmʋn le Yɩɩ, ʋ wʋ́: «N tʋn wʋywaŋʋ* nəfarʋ à nyɩna Davidə yɩra, yá n pɩn à də́ pàrɩ̀ tə, ʋ yuu nə. 9 Sɩ́ʋ́n nə, Ba-Yígúrə́-Jə-Tiu, n nə yɩ Yɩɩ, n dàń pa n sʋgʋ tə, n nə swɩ̀n à nyɩna Davidə con nii sú. Cɩ́gá, n tún nə, sə à də́ pàrɩ̀ dwíí kʋ tə yuu wa, kʋ nə dáá ndə tɩa pùrú nə. 10 N dàń pa nə wʋbʋŋa də yənu, sə à ma wànɩ́ à kə lalʋʋ təntə cwəŋə nə. Cɩ́gá, wàà nə wàá n lalʋʋ təntə, kʋ nə dáá nətən, ʋ kəni cwəŋə nə?» 11 Yɩɩ swɩ̀n Salʋmʋn con, ʋ wʋ́: «N wà jɩjə lòrì, n wà lòrì sə à fwa zəni n yɩra, n wà dun lòrì, n wà lòrì sə n dʋŋa tɩ, n wà mɩdarɩ lòrì. Yá n bɩcan yoo nə yɩ, sə n na wʋbʋŋa də yənu, n ma kə à lalʋʋ tə, à nə tún mʋ́, sə n ya pɩ̀ʋ́ kʋ yuu wa, cwəŋə nə. 12 Kʋ mʋ̀ yɩrɩ, à pɩn mʋ́ wʋbʋŋa də yənu. À tə wá pa mʋ́ jɩjə zənzən də dun, pɩ̀ʋ́ don mama nə wà dí yáá ʋ na, pɩ̀ʋ́ don də ma kʋ́ʋ̀ bá na, n tɩan kwa nə.»
13 Salʋmʋn pìí ʋ nan joŋi dədolu tə yuu Gabawon nə, kʋ nə wulə Yɩɩ jə́rə́ gansili tə yáá con, ʋ bà ʋ də́ pàrɩ̀ tə, Zwerizalɛmə nə.
Salʋmʋn dun də ʋ jɩjə yoo
14 Salʋmʋn ken səsen korən, də səsədɩra duən yáá nə. Ʋ nɩ səsen kòrə̀n 1 400, də səsədɩra 12 000 ʋ kə kwatara sànɩ́ duən wa, tɩan tə wa ʋ nə tanɩ kʋ yɩrɩ, də Zwerizalɛmə wa, ʋ tətə con. 15 Pɩ̀ʋ́ Salʋmʋn pɩn wárʋ́ də sɩ́án sú tɩa mama, ndə kafɩna nə, ʋ ga pa sɩsaban sú tɩa mama, ndə kapɩrɩtərən tə nə, Swefela* nagwanaa tə wa. 16 Salʋmʋn səsen yà yɩ ba ja naŋa Ezwipətə də Silisi. Pɩ̀ʋ́ tə baywələ púlí don yà nə vəli ba yə̀ tə ba ja twi. 17 Ba yà vəli Ezwipətə ba yə̀ səsen kòrù nədʋ mama səbilurən 600, ba ga yə̀ səsən nədʋ mama səbilurən 150. Ba yàá yə̀ tə ba pɩn Ɛtə dwíí pɛ̀gá tə nə, də Siiri tɩ̀án tə nə.
Salʋmʋn tanɩ sə ʋ lwà Yɩɩ dìə̀ tə
18 Salʋmʋn pɩn nii, sə ba lwà dìə̀ ba pa Ba-Yígúrə́-Jə-Tiu nə, sə ba ga lwà ka don, ba pa ʋ tətə nə.