5
1 Salʋmʋn yà dí dɩ̀àn payun tə mama yuu wa, kʋ nə zɩgɩ Əfəratə mʋnaa tə nə, kʋ va kʋ yí Filisi tɩ̀án lʋʋ nii tə, kʋ kɛ̀ń kʋ va, kʋ yí Ezwipətə lʋʋ nii sɩswɩan nə. Máŋá tə mama Salʋmʋn nə yɩn lʋʋ wa, ba mʋ̀ lɩ̀à təntə yà ŋwɩ́n lanpoo, də ba tʋŋa ba pɩn wá.2 Dɩɩn mama wa, Salʋmʋn də ʋ dìə̀ lɩ̀à nii wodiu yɩ munyelə kilo 9 000, də munbwana kilo 18 000, 3 də nɩan fugə ba nə kʋ̀nɩ̀ tə tún nʋga, də najɩrɩ wa nɩan sapʋa, də vanmɩnɩ bíí, kʋ súrí vàná duən nə, ndə bɩnɩ mama ka pɛ́n nyʋran, də feli, də panan, kʋ tə súrí vanpərə nə, ba nə kʋ̀nɩ̀ tə tún nʋga.
4 Ʋ yà dí dɩ̀àn lʋʋ nii tə mama yuu wa, kʋ nə wulə mʋnaa tə kwa con. Kʋ nə zɩgɩ Tifəsa nə, kʋ va kʋ yí Gaza. Ʋ dí dɩ̀àn pɛ̀gá tə mama yuu wa, ba nə wulə mʋnaa tə kwa con. Yá sìə́ dàń yà wulə, ʋ də lʋʋ níə́ tə duən mama pwə́rə́ wa. 5 Zwida lʋʋ lɩ̀à, də Yɩzərayɛlə lʋʋ lɩ̀à, dàń yà wulə sìə́ wa, kʋ nə zɩgɩ Dan nagwanaa tə nə, kʋ va kʋ yí Bɛrəsweba. Ba lìù mama yà wulə ʋ divɛn tɩ̀ʋ́ də̀ń nə, də ʋ kapɩrʋ də̀ń nə, máŋá tə mama wa Salʋmʋn nə yɩn lá.
6 Salʋmʋn yà jə səsen dìì 40 000, səsen tə nə vaŋa ʋ səsen kòrə̀n tə nə wulə tə wa. Ʋ yà jə səsendɩra 12 000. 7 Tʋ̀tʋ̀nán yun tɩ̀án tə yà nə pɩ̀à won mama ba pɩn, pɩ̀ʋ́ Salʋmʋn nə, də ba tə mama nə, ba nə də́ wodiu ʋ con. Bɩnɩ wa, ba lìù mama yà jə cànpə́rɩ́, ʋ nə yàá kə dɩ̀àn, sə won mama dàn ká mùrì. 8 Tʋ̀tʋ̀nán yun tɩ̀án tə yà pɩn ba ja mɩna, də gaʋ ba ja vəli ba pɩn bwálɩ́ tə nə, pɩ̀ʋ́ tə nə wulə, sə tə ya səsen tə, də səsen tə nə vaŋa kòrə̀n tə wodirən, ndə ba nə pɩn ba nii, sə ba tʋn nətʋ.
Salʋmʋn wʋbʋŋa nəfarʋ tə yoo
9 Yɩɩ pɩn wʋbʋŋa də yənu Salʋmʋn nə. Ʋ pɩn wá pubʋŋa yìə̀n kapʋpʋ yuu wa, tə nə dáá ndə mʋʋ nii kasɩlʋ nə. 10 Salʋmʋn wʋbʋŋa tə yà dwə Arabi tɩ̀án, də Ezwipətə tɩ̀án wʋbʋŋa tə mama. 11 Ʋ wʋbʋŋa tə yà dwə ləzoni tə mama wʋbʋŋa. Ʋ wʋbʋŋa tə yà dwə Etan, ʋ nə yɩ Zera dwíí wʋbʋŋa tə. Ʋ wʋbʋŋa tə yà dwə Eman, də Kaləkɔlə, də Darəda, ba nə yɩ Maholə bɩ̀á tə wʋbʋŋa tə. Yá ʋ yɩrɩ yà nan lʋʋ níə́ tə mama wa, tə nə kɩkarɩ wá. 12 Ʋ dɩga zwansɩsarɩ mʋ̀rʋ̀ batwa, ʋ dɩ nuŋi mʋ̀rʋ̀, də bonu. 13 Ʋ swɩ̀n tɩ̀án yɩra yìə̀n, kʋ nə zɩgɩ Liban sɩsaban tɩ̀án tə nə, kʋ va kʋ yí yizɔpə vʋʋ tə, kʋ nə pɛ́n bírí yuu wa. Ʋ tə swɩ̀n vàná də yoo, də zənbii yoo, də wiən tə nə vəli tə pwìí baan yoo, də filə yoo. 14 Tɩa yuu pɛ̀gá tə mama, ba nə nì də ba swɩ̀n ʋ wʋbʋŋa tə yoo, yà tʋŋa lɩ̀à ba naŋa lʋʋ níə́ tə mama wa, ba twi, sə ba nì Salʋmʋn wʋbʋŋa sʋ̀ràn tə.
Salʋmʋn tún nimarʋ də Tirə pɩ̀ʋ́ Hiramə
15 Tirə pɩ̀ʋ́ Hiramə yà yɩ Davidə dabɛɛ. Ʋ nə nì də ba twɛ́n dun nʋga* Salʋmʋn yuu wa, sə ʋ yà pɩ̀ʋ́ ʋ nyɩna Davidə bwálɩ́ nə, ʋ tʋn ʋ tʋ̀tʋ̀nà Salʋmʋn con.
16 Salʋmʋn də tʋn lɩ̀à Hiramə con, sə ba swɩ̀n ʋ con, ba wʋ́:
17 «N yə̀ə́ də à nyɩna Davidə wà wànɩ́ ʋ lwà dìə̀ ʋ pa Ba-Yígúrə́-Jə-Tiu nə, ʋ nə yɩ ʋ Yɩɩ, lɩ̀à tə nə naŋa bwálɩ́ mama, ba tɛ kʋ̀ʋ̀ də wá yɩrɩ. Yá Ba-Yígúrə́-Jə-Tiu dàń pɩn ʋ də́ dɩ̀àn ʋ dʋŋa tə yuu wa. 18 Sɩ́ʋ́n nə, Ba-Yígúrə́-Jə-Tiu, ʋ nə yɩ à tíú Yɩɩ pɩn nə sìə́, bwálɩ́ mama wa. Dʋŋa kʋ́ʋ̀ tə̀lə́, yolwan mama tə̀lə́! 19 À dàń swə sə à lwà dìə̀ Ba-Yígúrə́-Jə-Tiu yɩrɩ, ʋ nə yɩ à tíú Yɩɩ. Cɩ́gá, Ba-Yígúrə́-Jə-Tiu yà swɩ̀n kʋ nətʋ tə, à nyɩna Davidə con, ʋ wʋ́: «Kʋ yɩ n bìú tə, à nə wá tún n bwálɩ́ nə, n padaʋ tə yuu wa, nə wá lwà dìə̀ ʋ pa nə. 20 Sɩ́ʋ́n nə, pa nii sə ba goŋə Liban sɩsaban dɛɛ tə, ba pa nə. À tʋ̀tʋ̀nà tə wá san n tʋ̀tʋ̀nà tə nə, à wá pa mʋ́ n tʋ̀tʋ̀nà tə ŋwɩ́rán, ndə nətʋ tə nə, n nə wá swɩ̀n. Cɩ́gá, n yə̀ə́ də lìù tə̀lə́ nə wa, ʋ nə yə̀ə́ tɩ̀án goŋu, ndə Sidon tɩ̀án nə.»
21 Máŋá tə, Hiramə nə nì Salʋmʋn kori tə, ʋ pùə́ poli zəni, ʋ dàń ga swɩ̀n, ʋ wʋ́: «À bwɩ Ba-Yígúrə́-Jə-Tiu nə zə̀n kʋ tə, ʋ nə pɩn bìú, Davidə nə, ʋ nə jə wʋbʋŋa, sə ʋ ma kə lalʋʋ nəfarʋ kʋ tə cwəŋə nə!» 22 Hiramə tʋn lɩ̀à sə ba swɩ̀n Salʋmʋn con, ʋ wʋ́: «À nì n kori tə. À wá tʋn kʋ tə mama, n nə pɩ̀à, kʋ nə yɩ sɩsaban dɛɛ tə, də nyənbori dɛɛ tə yoo wa. 23 À tʋ̀tʋ̀nà tə wá zɩn dɛɛ tə, ba ja nan Liban ba bà mʋʋ tə nii nə. À wá pa tə twá mʋʋ, tə bà bwálɩ́ tə nə, n nə wá pa ba ja tʋ̀tʋ̀nà tə ŋwɩ́rán tə ba bà. À dàń wá pa ba kʋ̀rɩ̀ tə lá nə, sə n tʋ̀tʋ̀nà tə pɛ̀. Kʋ tə à mʋ̀ nə pɩ̀à, n wá pa wodiu à də à dìə̀ tə nə.
24 Hiramə dàń pɩn sɩsaban dɛɛ, də nyənbori dɛɛ Salʋmʋn nə, ndə Salʋmʋn nə pɩ̀à nətʋ. 25 Bɩnɩ mama, Salʋmʋn də yàá pa mɩna tonə 6 000, də Olivə nʋga litərə 8 000, sə Hiramə ma lɩ ʋ dìə̀ tə nii nə.
26 Ba-Yígúrə́-Jə-Tiu pɩn wʋbʋŋa Salʋmʋn nə, ndə nətʋ tə nə, ʋ nə swɩ̀n ʋ con. Sìə́ yɩn Hiramə də Salʋmʋn pwə́rə́ wa, yá ba dàń tún nimarʋ də duən.
27 Pɩ̀ʋ́ Salʋmʋn dàń kúrí Yɩzərayɛlə lʋʋ tə mama wa bara 30 000, ʋ kə dɩ̀àn tʋ̀tʋ̀nán wa. 28 Cànà mama wa, ʋ yàá tʋn ba lɩ̀à 10 000 Liban nə, sə ba jon ba duən yuu nə. Púlí mama yàá fwa cànà nədʋ Liban nə, ba ga bà ba fwa cànɩ̀ bələ ba sàń nə. Adoniramə yà nə ywàŋá dɩ̀àn tʋ̀tʋ̀nán tə yuu nə. 29 Salʋmʋn yà tə jə tʋ̀tʋ̀nà 70 000, ba nə zɩŋa zɩla, də lɩ̀à 80 000, ba nə se kapana paan tə wa. 30 Bara 3 300 tə, Salʋmʋn tʋ̀tʋ̀nà yáá tə nə tún, sə ba ywàń tʋ̀tʋ̀nán tə yuu nə, nii ba lá də́. 31 Pɩ̀ʋ́ tə pɩn nii, sə ba sà kapana nəzəŋə nəfaran ba lɩ, sə ba ma tún Yɩɩ dìə̀ tə dəkuu. 32 Salʋmʋn tʋ̀tʋ̀nà tə, də Hiramə tʋ̀tʋ̀nà tə, də Gebalə tɩ̀án tə dàń san duən nə, ba sà kapana tə, ba tanɩ dɛɛ tə, sə ba ma lwà Yɩɩ dìə̀ tə.