Bələ nii sagɩ tə
Samiyɛlə
nə pʋ́pʋ́nɩ́
Samiyɛlə bələ nii sagɩ tə yuu wa sʋgʋ
Fuən nə, Samiyɛlə bələ nii sagɩ tə, də təntən sagɩ tə mɛ yà yɩ sagɩ nədʋ. Ba pwɛ̀ kʋ saga bələ, kʋ yà nə dáá zənzən yɩrɩ. Samiyɛlə bələ nii sagɩ tə yɩ Davidə pàrɩ̀ diŋə yoo nə kʋ swɩ̀n.
Kʋ nə zɩgɩ sagɩ tə swapitərə 1, kʋ ja va swapitərə 4, nə na nətʋ tə Davidə nə dɩga lúə́ pucʋnɩ gwaran, máŋá tə wa ʋ nə nì Sayulə də ʋ bìú Zonatan tɩan tə. Zonatan yà yɩ Davidə babɛɛ tə ʋ nə swə zənzən. Kʋ bɩrɩ nətʋ, Davidə nə sinti ʋ də́ pàrɩ̀ ʋ nubɩa Zwida dwíí tə yuu wa.
Kʋ nə zɩgɩ swapitərə 5, kʋ ja va swapitərə 20, kʋ bɩrɩ də Sayulə bìú Yiswəbalə dí pàrɩ̀ máŋá mancɩn wa, jɩzən saparʋ con dwíə́ tə yuu wa. Yá Yiswəbalə tɩan kwa nə, dwíə́ təntə pɩn ba tɩ̀àn Davidə nə, sə ʋ də́ pàrɩ̀ ba də yuu wa. Kʋ nətʋ dàń pɩn, Davidə jì Yɩzərayɛlə lɩ̀à dwíə́ fugə bələ tə mama pɩ̀ʋ́.
Kʋ nə zɩgɩ swapitərə 21, kʋ ja va kʋ yí sagɩ tə yígúrə́ (swapitərə 24), kʋ bɩrɩ yìə̀n duən, tə nə tʋn Davidə pàrɩ̀ tə máŋá wa. Samiyɛlə bələ nii sagɩ tə bɩrɩ nəba pɩ̀ʋ́ Davidə dun, də ʋ dɩ̀àn, də ʋ bwànɩ̀ nə mɛ nətʋ. Sagɩ tə bɩrɩ yokʋkwɩnan tə Davidə nə tʋn, kʋ pa ʋ dìə̀ tə pìí ka bwànɩ̀. Yá nə na də Davidə nə lwarɩ də ʋ tʋn cʋna, ʋ yàá lòrì sə Yɩɩ kwɛn tə ʋ lɩ.
Yɩzərayɛlə lɩ̀à twá ba càn máŋá wa, ba ma lwarɩ də Davidə yɩ ndə jonu tə nə, Yɩɩ nə kàn nii də ʋ wá pa ba. Swapitərə 7 tə wa, ba lìí Yɩɩ nikanɩ tə yoo, ʋ nə twá ʋ nii sʋ̀sʋ̀nʋ̀ Natan nə, ʋ ma swɩ̀n Davidə con, də máŋá mama, lìù wá nan ʋ dwíí tə wa, ʋ də́ pàrɩ̀ Yɩzərayɛlə lɩ̀à tə yuu wa, ʋ tɩan kwa nə. Nə dàń lwarɩ də kʋ mʋ̀ nə pɩn, Yɩɩ sagɩ nədʋn tə wa, ba boŋə Zwezi bwálá duən wa, «Davidə bìú» (Matiə 20.29-34; 21.9).