Təntən Pɛ̀gá
Təntən Pɛ̀gá sagɩ tə yuu wa sʋgʋ
Fuən nə, Pɛ̀gá saga bələ tə yà yɩ sagɩ nədʋ. Kʋ sagɩ təntə wa yìə̀n tə nə púə́ Samiyɛlə saga bələ tə wa yìə̀n tə kwa. Ba pwɛ̀ pɛ̀gá sagɩ tə bwálá bələ, kʋ pʋ́pʋ́ná tə nə wàrɩ̀ tànʋ̀ nədʋ wa yɩrɩ.
Sagɩ kʋ tə yɩ kʋ pɩ̀à kʋ bɩrɩ, kʋ nə ziən zənzən, sə pɩ̀ʋ́ zìlí Yɩɩ nii nətʋ. Pɩ̀ʋ́ nə zìlí Yɩɩ nii zənzən, kʋ yàá pa ʋ lʋʋ nii tə súrí wuuu. Yá pɩ̀ʋ́ nə vɩga Yɩɩ nii, ʋ ga jʋnɩ woŋwanan, kʋ yàá cʋ̀gʋ̀ ʋ lʋʋ nii tə mɩ́ámɩ́án. Yɩɩ yàá tʋn Yɩɩ nii sʋ̀sʋ̀nà kapʋpʋ, ba nə yàá lìí pɛ̀gá ba yìə̀n tə Yɩɩ nə culi. Yɩɩ nii sʋ̀sʋ̀nʋ̀ Eli nə yɩn ba yuu wa. Ba pwɛ̀ təntən Pɛ̀gá sagɩ tə bwálá banɩa.
Təntən bwálɩ́ tə swapitərə nədʋ kʋ va kʋ yí swapitərə bələ, bɩrɩ də Davidə nə kwɩn zənzən, ʋ kʋ́ʋ̀ wàrɩ̀ pàrɩ̀ tə yuu ʋ ywàŋá, ʋ bɩ̀á bələ zàn, ba pɩ̀à pàrɩ̀ tə. Yá kʋ dàń yɩn Salʋmʋn nə jìgə̀ pɩ̀ʋ́.
Bələ nii bwálɩ́ tə swapitərə bələ, kʋ va kʋ yí swapitərə fugə nədʋ, bɩrɩ də ʋ pàrɩ̀ tə yɩ ʋ ma lwà Yɩɩ dìə̀ tə, də padiə tə. Yá Salʋmʋn mɩɩ tə yígúrə́ wa, ʋ vɩga Yɩɩ nii, ʋ ga jì lìù tə, ʋ nə jʋnɩ woŋwanan.
Batwa nii bwálɩ́ tə Swapitərə fugə bələ, kʋ va kʋ yí swapitərə fugə banɩa, kʋ swɩ̀n də kʋ mʋ̀ nə pɩn, Yɩɩ ma yá sə ba payuu tə pwɛ̀ bələ. Púlə́ tə ba nə wulə jɩzən saparʋ con vɩga sə Salʋmʋn bìú tə də́ pàrɩ̀ ba yuu wa. Ba də dàń lɩ ba pɩ̀ʋ́ ba tún.
Banɩa nii bwálɩ́ tə swapitərə fugə banɩa kʋ va kʋ yí swapitərə sapʋa də bələ, kʋ bɩrɩ də kʋ yí ndə bɩna biələ nə, payun bələ təntə nə wulə duən səpuni nə. Tə mʋ̀ nə yɩ Zwida dwíí payuu tə, də Yɩzərayɛlə lɩ̀à payuu tə. Máŋá don wa, ba yàá san duən nə, máŋá don də wa, ba yàá zɩgɩ duən nə.