Davidə pɩn ba gàlà Yɩzərayɛlə lɩ̀à tə
24
1 Dɩɩn don nə, Ba-Yígúrə́-Jə-Tiu lɩŋa kʋ́ʋ̀ zàn Yɩzərayɛlə lɩ̀à tə yuu wa. Yá ʋ dàń twá də Davidə, sə ʋ ma kə ba càn wa. Ʋ swɩ̀n Davidə con, ʋ wʋ́: «Vəli n pa nii, sə ba gàlà Yɩzərayɛlə də Zwida dwíí lɩ̀à tə, n na ba nii.» 2 Zʋabə, ʋ nə yɩ kwatara tə yuu tíú, yà wulə də Davidə. Yá pɩ̀ʋ́ Davidə dàń swɩ̀n Zʋabə con, ʋ wʋ́: «Nan n twá Yɩzərayɛlə dwíə́ tə mama wa, kʋ nə zɩgɩ Dan, kʋ va kʋ yí Bɛrəsweba, n gàlà lalʋʋ tə, sə à lwarɩ ba nii.» 3 Yá Zʋabə swɩ̀n pɩ̀ʋ́ Davidə con, ʋ wʋ́: «À lòrì sə Ba-Yígúrə́-Jə-Tiu, ʋ nə yɩ n Yɩɩ, pa lalʋʋ tə pùlì nɛɛ bíí, sə n tətə à nyɩna pɩ̀ʋ́ na kʋ nətʋ tə! Yá bɛ̀ɛ̀ dàń nə pɩn, n ma pɩ̀à sə n tʋn kʋ yoo təntə, à nyɩna pɩ̀ʋ́?» 4 Yá pɩ̀ʋ́ Davidə sʋgʋ tə dàń yɩn kálʋ́, kʋ pa Zʋabə də kwatara yáá tɩ̀án tə nə. Yá Zʋabə də kwatara yáá tɩ̀án tə dàń nan pɩ̀ʋ́ Davidə yɩ́á yuu, ba va, sə ba gàlà Yɩzərayɛlə lalʋʋ tə. 5 Ba bɩn Zʋrədɛn mʋnaa tə, ba va ba kə ba də̀ń Arɔwɛrə nə, tɩʋ tə kʋ nə wulə Gadə vara tə titəŋi wa, jɩzən vàn nə, ba dàń ja vələ Yazɛrə con. 6 Kʋ kwa nə, ba vəli Galadə nagwanaa tə wa, ba twá lá ba lɛ ba va Kadɛswə, Ɛtə dwíí tə lʋʋ nii wa. Ba nə nan lá, ba vəli Dan-Yaanə, də tɩan tə duən wa, tə nə daa Sidon con. 7 Ba zʋa Tirə tɩ̀án dɩ̀àn dəkuu tɩʋ tə wa, də Evi dwíí tɩan tə, də Kanaan tɩ̀án tɩan tə mama wa. Yá ba dàń vəli ba gúrí Bɛrəsweba nə, Zwida lʋʋ nii Negɛbə tə wa. 8 Yá máŋá tə, ba nə gurə Yɩzərayɛlə lʋʋ nii tə mama, ba zwɛ̀, ba pìí ba bà Zwerizalɛmə, cànɩ̀ nʋgʋ də dɩan sapʋa nii nə. 9 Zʋabə swɩ̀n lɩ̀à tə nii, ba nə gàlɩ̀ ba na, ʋ bɩrɩ pɩ̀ʋ́ Davidə nə. Yɩzərayɛlə lɩ̀à tə yà yɩ bara 800 000, ba nə wàá kʋ̀ʋ̀ ba tɛ. Zwida dwíí tə ga yɩ bara 500 000.Yɩɩ dɩga tɩan yayɩpwarʋ Yɩzərayɛlə lɩ̀à tə nə
10 Davidə pùə́ dàń yà pìí ka cʋ̀gʋ̀, ʋ nə pɩn ba gàlà lalʋʋ tə yɩrɩ. Ʋ swɩ̀n Ba-Yígúrə́-Jə-Tiu con, ʋ wʋ́: «À tʋn yolwan nəfarʋ, à nə pɩn ba gàlà lalʋʋ tə yɩrɩ! À lwarɩ də kʋ yɩ ləyəri yoo, à tʋn. Ba-Yígúrə́-Jə-Tiu, à dàń lwɛ̀ n nə, sə n yá à mʋ̀ n tʋtʋnʋ tə yolwan tə, kʋ zwɛ̀.» 11 Davidə nə zàn kʋ tɩpʋrɩ jɩjʋ nə, Ba-Yígúrə́-Jə-Tiu yà swɩ̀n ʋ nii sʋ̀sʋ̀nʋ̀ Gadə con, ʋ nə yɩ Davidə kwenu, ʋ wʋ́: 12 «Vəli n swɩ̀n Davidə con də, à mʋ̀ Ba-Yígúrə́-Jə-Tiu nə tʋn mʋ́, sə n swɩ̀n ʋ con, də càn yirə yirə batwa nə wulə. Yá ʋ mʋ̀ dàń nə wá kúrí kʋ tə ʋ nə pɩ̀à, sə à pa kʋ yí wá.» 13 Gadə dàń vəli, ʋ swɩ̀n kʋ nətʋ tə, ʋ bɩrɩ Davidə nə, ʋ wʋ́: «N swə sə niən ya n lʋʋ nii tə wa, bɩna barpɛ, nə à yə̀ə́ n swə sə n dʋŋa kə mʋ́ ba yáá ba dɩŋɩ, cànɩ̀ batwa, nə à yə̀ə́ n swə sə tɩan yayɩpwarʋ zʋ n lʋʋ lɩ̀à tə, dɩan batwa? Sɩ́ʋ́n nə, n dàń ywàń tə wa, n bɩrɩ nə kʋ tə n nə kúrí, sə à pìí à pa kori lìù tə nə, ʋ nə tʋn nə.» 14 Davidə le Gadə, ʋ wʋ́: «À wulə pucʋnɩ nəfarʋ wa! Yá sə nə tʋ Ba-Yígúrə́-Jə-Tiu jɩɩn wa. Kʋ mʋ̀ nə kʋ́kwà nə nə wá tʋ ləzoni jɩɩn wa. Cɩ́gá, Ba-Yígúrə́-Jə-Tiu dəri ləzoni yinəgə zənzən.»
15 Ba-Yígúrə́-Jə-Tiu dàń pɩn tɩan yayɩpwarʋ zʋ Yɩzərayɛlə lɩ̀à tə, kʋ nə zɩgɩ kʋ jɩjʋ təntə nə, kʋ ja va dɩan tə nii, ʋ nə swɩ̀n. Yá kʋ nə zɩgɩ Dan, kʋ va kʋ yí Bɛrəsweba, lalʋʋ tə wa bara 70 000 tɩga. 16 Yá máŋá tə, malɩka tə nə te ka jɩɩn Zwerizalɛmə con, sə ka cʋ̀gʋ̀ kʋ, Ba-Yígúrə́-Jə-Tiu pìí ʋ dəri lalʋʋ tə yinəgə, ʋ ga swɩ̀n malɩka tə con, ka yà nə wulə lɩ̀à tə ka gwɩ, ʋ wʋ́: «Kʋ mɛ nətʋ! Pìí n kʋ̀rɩ́ n jɩɩn, n kə n con.» Kʋ máŋá tə wa, də Ba-Yígúrə́-Jə-Tiu malɩka tə yà wulə Aravəna, ʋ nə yɩ Yebusə tíú, tʋa tə nii nə. 17 Davidə nə nɩ malɩka tə, ka nə gwɩ lɩ̀à tə, ʋ swɩ̀n Ba-Yígúrə́-Jə-Tiu con, ʋ wʋ́: Cʋna tə yɩ à mʋ̀ nə tʋn. À mʋ̀ nə tʋn yolwan tə. Bɛ̀ɛ̀ nə lalʋʋ tə də cʋ̀gʋ̀? Kʋ yɩ à mʋ̀ də à dìə̀ lɩ̀à nə n mɛ, sə n kə càn wa.»
Davidə fwa joŋi ba nə sʋ̀rɩ́*, ʋ pa Yɩɩ nə
18 Kʋ dɩɩn tə tətə nə, Gadə twi ʋ swɩ̀n Davidə con, ʋ wʋ́: «Vəli Aravəna, ʋ nə yɩ Yebusə tíú tʋa tə wa, n lwà Yɩɩ joŋi bwálɩ́ lá, n pa Ba-Yígúrə́-Jə-Tiu nə.» 19 Yá Davidə dàń sɛ̀, ʋ nan ʋ va tʋa tə wa, ndə Ba-Yígúrə́-Jə-Tiu nə pɩn nii Gadə nə, sə ʋ swɩ̀n ʋ con nətʋ. 20 Aravəna zɩgɩ dədolu tə baan, ʋ na pɩ̀ʋ́ Davidə də ʋ tʋ̀tʋ̀nà tə, də ba bɩ̀àn ʋ con. Aravəna ma va, ʋ tʋ ʋ nadwana yuu, pɩ̀ʋ́ Davidə yáá con, ʋ pú ʋ yáá tɩa, ʋ pa wá dun*. 21 Ʋ bwe Davidə, ʋ wʋ́: «Kʋ yɩ nətə, à nyɩna pɩ̀ʋ́ ma bɩ̀àn à mʋ̀ ʋ tʋtʋnʋ tə con?» Davidə ma le wá, ʋ wʋ́: «À yɩ à twi, sə à jon n tʋa tə à yə̀, à lwà Yɩɩ joŋi bwálɩ́ lá, à pa Ba-Yígúrə́-Jə-Tiu nə, sə tɩan yayɩpwarʋ tə yá lalʋʋ tə.» 22 Yá Aravəna dàń swɩ̀n Davidə con, ʋ wʋ́: «À nyɩna pɩ̀ʋ́, nə̀ń tʋa tə nə! Ja ka n ma fwa won tə mama n nə pɩ̀à. Nə̀ń nɩan də nə! Ja tə n ma fwa joŋi ba nə sʋ̀rɩ́*. N wá tì màlá tə, də nɩan tə bɩan daran tə, n ma kə mən. 23 À nyɩna pɩ̀ʋ́, à mʋ̀ Aravəna pɩn mʋ̀, tə mama.» Aravəna tə swɩ̀n pɩ̀ʋ́ Davidə con, ʋ wʋ́: «À lòrì sə Ba-Yígúrə́-Jə-Tiu, ʋ nə yɩ n Yɩɩ, sɛ̀ ʋ jon n joŋi tə!» 24 Yá pɩ̀ʋ́ Davidə swɩ̀n Aravəna con, ʋ wʋ́: «Ɔn ɔn! N wiən tə mama yɩ à wá yə̀, à ŋwɩ́n tə səbiu, à pa mʋ́. À bá jon won tʋtʋ, à ma fwa joŋi, à pa Ba-Yígúrə́-Jə-Tiu nə, ʋ nə yɩ à tíú Yɩɩ.» Yá Davidə dàń jon tʋa tə də nɩan tə, ʋ yə̀ wárʋ́ səbilurən* finu. 25 Davidə dàń lwə̀ Yɩɩ joŋi bwálɩ́ lá nə, ʋ ga fwa jwəŋə ba nə sʋ̀rɩ́, də nimarʋ* jwəŋə, ʋ pa Ba-Yígúrə́-Jə-Tiu nə. Yá Ba-Yígúrə́-Jə-Tiu sɛ̀ Davidə yɩlori tə, tɩan yayɩpwarʋ tə ga yá Yɩzərayɛlə lɩ̀à tə.