Davidə pɩn ba gàlà Yɩzərayɛlə lɩ̀à tə
21
1 Dɩɩn don nə, Sɩtana zàn ʋ zɩgɩ Yɩzərayɛlə lɩ̀à tə nə, yá ʋ dàń yigu Davidə ʋ pa ʋ gàlà Yɩzərayɛlə lɩ̀à tə, sə ʋ lwarɩ ba nii. 2 Davidə swɩ̀n Zʋabə də kwatara yáá tɩ̀án tə duən tə con, ʋ wʋ́: «Naŋa á twá Yɩzərayɛlə dwíə́ tə mama wa, kʋ nə zɩgɩ Bɛrəsweba, kʋ va kʋ yí Dan, á gàlà lalʋʋ tə, sə à lwarɩ ba nii.» 3 Yá Zʋabə swɩ̀n pɩ̀ʋ́ Davidə con, ʋ wʋ́: «À lòrì sə Ba-Yígúrə́-Jə-Tiu pa ʋ lalʋʋ tə pùlì nɛɛ bíí! Ba mama tà n mʋ̀ à nyɩna pɩ̀ʋ́ tʋ̀tʋ̀nà naaa? Yá bɛ̀ɛ̀ dàń nə pɩn, n ma pɩ̀à sə n lwarɩ ba nii, à nyɩna pɩ̀ʋ́? N nə gàlɩ̀ ba, n wá kə Yɩzərayɛlə lɩ̀à cʋna wa.» 4 Yá pɩ̀ʋ́ Davidə sʋgʋ tə dàń yɩn kálʋ́, kʋ pa Zʋabə nə. Yá Zʋabə dàń nan pɩ̀ʋ́ Davidə yɩ́á yuu, ʋ va, ʋ gàlà Yɩzərayɛlə lalʋʋ tə mama, ʋ ga pìí ʋ bà Zwerizalɛmə. 5 Zʋabə swɩ̀n lɩ̀à tə nii, ʋ nə gàlɩ̀ ʋ na, ʋ bɩrɩ pɩ̀ʋ́ Davidə nə. Yɩzərayɛlə lɩ̀à tə yà yɩ bara 1 100 000, ba nə wàá kʋ̀ʋ̀ ba tɛ. Zwida dwíí tə ga yɩ bara 470 000, ba nə wàá kʋ̀ʋ̀ ba tɛ.6 Zʋabə yà wà Levi dwíí tə, də Bɛnzwamɛn dwíí tə gàlɩ̀, ʋ kə là. Cɩ́gá, Zʋabə yà wà kʋ tə pɩ̀ʋ́ Davidə nə swɩ̀n tə sóní.
Yɩɩ dɩga tɩan yayɩpwarʋ Yɩzərayɛlə lɩ̀à tə nə
7 Kʋ yoo təntə wà ywánɩ́ yɩn kʋ pa Yɩɩ nə, yá ʋ dàń ken càn Yɩzərayɛlə lɩ̀à tə nə kʋ yɩrɩ. 8 Davidə swɩ̀n Ba-Yígúrə́-Jə-Tiu con, ʋ wʋ́: «À tʋn yolwan nəfarʋ, à nə pɩn ba gàlà lalʋʋ tə yɩrɩ! À lwarɩ də kʋ yɩ ləyəri yoo, à tʋn. Ba-Yígúrə́-Jə-Tiu, à dàń lwɛ̀ n nə, sə n yá à mʋ̀ n tʋtʋnʋ tə yolwan tə, kʋ zwɛ̀.»
9 Ba-Yígúrə́-Jə-Tiu dàń swɩ̀n ʋ nii sʋ̀sʋ̀nʋ̀ Gadə con, ʋ nə yɩ Davidə kwenu, ʋ wʋ́: 10 «Vəli n swɩ̀n Davidə con də, à mʋ̀ Ba-Yígúrə́-Jə-Tiu nə tʋn mʋ́, sə n swɩ̀n ʋ con, də càn yirə yirə batwa nə wulə. Yá ʋ mʋ̀ dàń nə wá kúrí kʋ tə ʋ nə pɩ̀à, sə à pa kʋ yí wá.»
11 Gadə dàń vəli, ʋ swɩ̀n kʋ nətʋ tə, ʋ bɩrɩ Davidə nə, ʋ wʋ́: 12 «N swə sə niən ya n lʋʋ nii tə wa, bɩna batwa, nə à yə̀ə́ n swə sə n dʋŋa kə mʋ́ ba yáá ba dɩŋɩ, cànɩ̀ batwa, nə à yə̀ə́ n swə sə Ba-Yígúrə́-Jə-Tiu pa ʋ malɩka ja tɩan yayɩpwarʋ ka bà, ka dɩ̀ Yɩzərayɛlə lʋʋ nii tə mama nə, dɩan batwa? Sɩ́ʋ́n nə, n dàń ywàń tə wa, n bɩrɩ nə kʋ tə n nə kúrí, sə à pìí à pa kori lìù tə nə, ʋ nə tʋn nə.» 13 Davidə le Gadə, ʋ wʋ́: «À wulə pucʋnɩ nəfarʋ wa! À nə tʋa Ba-Yígúrə́-Jə-Tiu jɩɩn wa, kʋ kʋ́kwà à nə tʋa ləzoni jɩɩn wa. Cɩ́gá, Ba-Yígúrə́-Jə-Tiu dəri ləzoni yinəgə zənzən.»
14 Ba-Yígúrə́-Jə-Tiu dàń pɩn tɩan yayɩpwarʋ zʋ Yɩzərayɛlə lɩ̀à tə, yá lalʋʋ tə wa bara 70 000 tɩga. 15 Yɩɩ tʋn ʋ malɩka Zwerizalɛmə nə, sə ka cʋ̀gʋ̀ kʋ. Yá máŋá tə, Ba-Yígúrə́-Jə-Tiu nə nɩ malɩka tə, də ka wulə ka gwɩ lɩ̀à tə, ʋ dəri lalʋʋ tə yinəgə, ʋ ga swɩ̀n malɩka tə con, ʋ wʋ́: «Kʋ mɛ nətʋ! Pìí n kʋ̀rɩ́ n jɩɩn, n kə n con.» Kʋ máŋá tə wa, də Ba-Yígúrə́-Jə-Tiu malɩka tə yà wulə Ɔrənan, ʋ nə yɩ Yebusə tíú, tʋa tə nii nə. 16 Davidə zɩ̀n ʋ yáá, ʋ na malɩka tə nə gwɩ lɩ̀à tə, də ka zɩga lanworu də tɩa pwə́rə́ wa, də ka kwatara sɩ̀ʋ́ ka jɩɩn wa, ka ga te kʋ Zwerizalɛmə con. Davidə də nəkwɩna tə dàń zʋa pucʋnɩ gànàn, ba ga tʋ ba pú ba yáá tɩa. 17 Davidə swɩ̀n Yɩɩ con, ʋ wʋ́: «À mʋ̀ nə pɩn ba gàlà lɩ̀à tə! Cʋna tə yɩ à mʋ̀ nə tʋn! À mʋ̀ nə tʋn yolwan! Bɛ̀ɛ̀ nə lalʋʋ tə də cʋ̀gʋ̀? Ba-Yígúrə́-Jə-Tiu, à tíú Yɩɩ, à mʋ̀ də à dìə̀ lɩ̀à nə n mɛ, sə n kə càn wa, kʋ tà lalʋʋ tə.»
Davidə fwa joŋi ba nə sʋ̀rɩ́* ʋ pa Yɩɩ nə
18 Ba-Yígúrə́-Jə-Tiu malɩka tə swɩ̀n Gadə con, sə ʋ swɩ̀n Davidə con, ʋ wʋ́: «Vəli Ɔrənan, ʋ nə yɩ Yebusə tíú tʋa tə wa, n lwà Yɩɩ joŋi bwálɩ́ lá, n pa Ba-Yígúrə́-Jə-Tiu nə.» 19 Yá Davidə dàń sɛ̀, ʋ nan ʋ va tʋa tə wa, ndə Ba-Yígúrə́-Jə-Tiu nə pɩn nii Gadə nə, sə ʋ swɩ̀n ʋ con nətʋ. 20 Ɔrənan yà wulə ʋ mà ʋ dipɛn mɩna. Ʋ pìí ʋ ywàń ʋ kwa, də nə̀ń malɩka tə nə. Yá ʋ bɩ̀á banɩa tə yà nə wulə də wá dàń dəri ba səgə. 21 Máŋá tə Davidə nə vəli ʋ yí Ɔrənan con, Ɔrənan nɩ wá, ʋ ga nan tʋa tə wa, ʋ tʋ Davidə yáá con, ʋ pú ʋ yáá tɩa. 22 Davidə swɩ̀n ʋ con, ʋ wʋ́: «Pa nə tʋa tə bwálɩ́ tə, sə à lwà Yɩɩ joŋi bwálɩ́ lá, à pa Ba-Yígúrə́-Jə-Tiu nə, sə tɩan yayɩpwarʋ tə yá lalʋʋ tə. Pa kʋ nə sə à yə̀, ndə kʋ kwənə nə mɛ nətʋ.» 23 Ɔrənan le Davidə, ʋ wʋ́: «À nyɩna pɩ̀ʋ́, nə̀ń tʋa tə nə! Ja ka n ma fwa won tə mama n nə pɩ̀à. Nə̀ń nɩan də nə, à pɩn tə mʋ́ sə n ma fwa joŋi ba nə sʋ̀rɩ́. N wá tì màlá tə n ma kə mən, n ga tí dipɛn mɩna tə n ma fwa varʋ calɩ* joŋi. À pɩn mʋ́ tə mama.» 24 Yá pɩ̀ʋ́ Davidə swɩ̀n Ɔrənan con, ʋ wʋ́: «Ɔn ɔn! N wiən tə mama yɩ à wá yə̀, à ŋwɩ́n tə səbiu, à pa mʋ́, ndə tə kwənə nə mɛ nətʋ. À bá jon n won tʋtʋ, à ma fwa joŋi, à pa Ba-Yígúrə́-Jə-Tiu nə!»
25 Yá Davidə dàń pɩn sɩ́án səbilurən biəyardʋ Ɔrənan nə tʋa tə yɩrɩ. 26 Davidə dàń lwə̀ Yɩɩ joŋi bwálɩ́ lá nə, ʋ ga fwa jwəŋə, ba nə sʋ̀rɩ́, də nimarʋ* jwəŋə, ʋ pa Ba-Yígúrə́-Jə-Tiu nə. Ʋ bon ʋ kə Ba-Yígúrə́-Jə-Tiu nə, Ba-Yígúrə́-Jə-Tiu ga pa mən nan yɩɩ nə, tə bà tə sʋ̀rɩ́ jwəŋə tə, Yɩɩ joŋi bwálɩ́ tə yuu wa, sə ʋ ma le Davidə.
27 Ba-Yígúrə́-Jə-Tiu dàń pɩn nii malɩka tə nə, sə ka kə ka sɩ̀ʋ́ tə kʋ lɔ́ɔ́ wa.
28 Kʋ máŋá təntə wa, Davidə nə lwarɩ də Ba-Yígúrə́-Jə-Tiu le wá, Ɔrənan, ʋ nə yɩ Yebusə tíú tʋa tə wa, ʋ dàń yàá fwa jwəŋə lá nə, ʋ pɩn Ba-Yígúrə́-Jə-Tiu nə. 29 Kʋ máŋá tə wa, də Ba-Yígúrə́-Jə-Tiu wúlú bwálɩ́ tə Moyizə nə fwa kasɔɔ lanworu tə wa, də Yɩɩ joŋi bwálɩ́ tə, ba nə ma sʋ̀rɩ́ jwəŋə tə, yà wulə Gabawon joŋi dədolu* tə yuu wa. 30 Yá Davidə yà wàrɩ̀ lá nə ʋ vəli, ʋ boŋə ʋ kəni Yɩɩ nə, Ba-Yígúrə́-Jə-Tiu malɩka tə sɩ̀ʋ́ tə fən nə zʋa wá zənzən yɩrɩ.