Davidə dí dɩ̀àn Amon dwíí tə yuu wa
20
1 Bɩnɩ tə wa kʋ nə dánɩ́ lá, máŋá tə pɛ̀gá nə vəli ba tɛ kʋ̀ʋ̀ nə yí, Zʋabə də Yɩzərayɛlə kwatara tə vəli ba gʋ Amon dwíí tə, ba larɩ, ba ga pú Raba tɩʋ tə ba kə. Yá Davidə mʋ̀ ga mɛn Zwerizalɛmə nə. Zʋabə ta Raba tɩʋ tə ʋ də́, ʋ ga cʋ̀gʋ̀ kʋ. 2 Davidə súrí Raba tɩ̀án woŋwanʋ sɩ́án payupuu tə, kʋ yuu nə. Payupuu təntə dun yà dwə kilo fɩtwa, kʋ yɩra ga jə kapan yiri don, kʋ nə jə funə. Ba lɩ kapan tə, ba kə Davidə payupuu tə yɩra. Davidə tə pɛ̀ wiən kapʋpʋ, ba nə ta ba jon tɩʋ tə wa, ʋ ja vìí. 3 Davidə lɩ Raba tɩ̀án, ʋ ja va ʋ kə dɩ̀àn tʋ̀tʋ̀nán wa. Ʋ pɩn ba duən goŋi dɛ̀ɛ̀, ba duən sə̀ kapana, ba duən də ga goŋi tɩ̀án. Mə nətʋ nə Davidə fwa, Amon dwíí tə tɩan tə mama wa. Yá kʋ kwa nə, ʋ də ʋ kwatara tə mama pìí ba va Zwerizalɛmə.Yɩzərayɛlə lɩ̀à kʋ́ʋ̀ ta kʋ̀ʋ̀ də Filisi tɩ̀án tə
4 Kʋ kwa nə, kʋ̀ʋ̀ don kʋ́ʋ̀ zàn Gezɛrə nə, Filisi tɩ̀án tə də Yɩzərayɛlə lɩ̀à pwə́rə́ wa. Yá kʋ̀ʋ̀ təntə wa nə, Sibekayi, ʋ nə yɩ Uswa tíú, gʋa Sipayi, ʋ nə yɩ Rafa dwíí tə wa lìù don. Yá Filisi tɩ̀án tə dí cavɩra.
5 Kʋ̀ʋ̀ tə don kʋ́ʋ̀ pìí kʋ zàn Filisi tɩ̀án tə də Yɩzərayɛlə lɩ̀à pwə́rə́ wa. Yá kʋ̀ʋ̀ təntə wa nə, Yayirə bìú Ɛləhanan gʋa Lami. Lami yà yɩ Goliyatə, ʋ nə yɩ Gatə tíú nubiu. Lami yà jə cwiin, kʋ dàʋ̀ tə cuni nə yí gantwansʋra kʋnkwalɩ.
6 Kʋ̀ʋ̀ don də kʋ́ʋ̀ zàn Gatə nə. Bɛɛ nədarʋ don yà wulə Filisi tɩ̀án kwatara tə wa, ʋ jɩ̀àn tə yà jə jɩfwɩ bardʋ bardʋ, ʋ nɛɛ tə də ga jə nafwɩ bardʋ bardʋ. Ʋ jɩfwɩ tə də ʋ nafwɩ tə mɛ nə ken duən nə, tə yɩ sapʋa də banɩa. Ʋ də yà yɩ Rafa dwíí lìù. 7 Bɛɛ təntə nan ʋ man babarɩ Yɩzərayɛlə lɩ̀à tə yáá con. Yá Zonatan, ʋ nə yɩ Davidə nubiu Swimeya bìú, dàń gʋa wá.
8 Filisi tɩ̀án kwatara təntə yà yɩ Rafa, ʋ nə yɩ Gatə tíú, dwíí tə wa lɩ̀à. Yá Davidə də ʋ kwatara tə nə gʋa ba.