Bɩna batwa niən tə yoo
21
1 Pɩ̀ʋ́ Davidə pàrɩ̀ tə máŋá wa, niən yɩn lʋʋ nii tə wa, bɩna batwa. Davidə bon, ʋ kə Ba-Yígúrə́-Jə-Tiu nə, niən tə yoo yɩrɩ. Yá Ba-Yígúrə́-Jə-Tiu le, ʋ wʋ́: «Kʋ yɩ Sayulə, də ʋ dìə̀ lɩ̀à tə lagʋrɩ tə nə pɩn, niən tə ma wulə. Kʋ yɩ Sayulə nə gʋa Gabawon tɩ̀án tə yɩrɩ.» 2 Pɩ̀ʋ́ Davidə dàń bon Gabawon tɩ̀án tə, ʋ swɩ̀n ba con. Gabawon tɩ̀án tə yà twá, ba tə̀lə́ Yɩzərayɛlə dwíí tə wa. Ba yà yɩ Amɔrə dwíí tɩ̀án duən, ba nə dəri, ba jɛ́n, kʋ̀ʋ̀ tə wa. Yɩzərayɛlə lɩ̀à yà dùə̀ də, ba bá ta Gabawon tɩ̀án tə. Yá də kʋ nətʋ mɛ, Sayulə yà dídə́n sə ʋ gʋ ba dwíí tə, ʋ zwɛ̀, sə ʋ ma poli Yɩzərayɛlə lɩ̀à, də Zwida dwíí tə pùə́. 3 Davidə dàń bwe Gabawon tɩ̀án tə, ʋ wʋ́: «Bɛ̀ɛ̀ nə à mɛ, sə à fwa, à pa aba? Nətə nə à wá fwa, à ma kwɛn cʋna tə, à lɩ, nə pwə́rə́ wa, sə kʋ pa, á lòrì Yɩɩ, sə ʋ fwa zəni, ʋ lɩ̀à tə yɩra?» 4 Gabawon tɩ̀án tə le wá, ba wʋ́: «Kʋ tà wárʋ́, nə à yə̀ə́ sɩ́án nə wàá cʋna tə kʋ kwɛn, kʋ lɩ nə də Sayulə də ʋ dìə̀ tə pwə́rə́ wa. Yá nə ga ba cwəŋə jə, sə nə gʋ lìù Yɩzərayɛlə wa.» Davidə swɩ̀n ba con, ʋ wʋ́: «Won tə mama, á nə pɩ̀à, à wá tʋn kʋ, à pa aba.» 5 Yá ba dàń le pɩ̀ʋ́ Davidə, ba wʋ́: «Sayulə yà pɩ̀à, sə ʋ gʋ nə dwíí tə mama, ʋ zwɛ̀. Ʋ yà dídə́n sə ʋ pa nə nyʋn tɩa, Yɩzərayɛlə lʋʋ nii tə mama wa. 6 Kʋ mʋ̀ yɩrɩ, ba pɩan nəba, ʋ bɩ̀á tə wa bara barpɛ, sə nə kùrí, nə gʋ Ba-Yígúrə́-Jə-Tiu yáá con, Gibeya nə. Mə Sayulə, ʋ nə yɩn pɩ̀ʋ́ tə, Ba-Yígúrə́-Jə-Tiu nə kúrí*, tɩʋ nə.» Pɩ̀ʋ́ Davidə ma swɩ̀n, ʋ wʋ́: «À wá ja ba, à pa aba!» 7 Pɩ̀ʋ́ Davidə lɩ Zonatan bìú Mefiboswɛtə, ʋ nə yɩ Sayulə nɔɔ, ʋ yá vàn nə, ʋ mʋ̀ Davidə, də Sayulə bìú Zonatan nipoli tə yɩrɩ, ba nə poli ba pa duən nə, Ba-Yígúrə́-Jə-Tiu yáá con. 8-9 Yá pɩ̀ʋ́ Davidə dàń jɩn Arəmoni, də Mefiboswɛtə, Aya bʋ̀á Risəpa bɩ̀á bələ təntə, ʋ də Sayulə nə lɩrɩ, də Sayulə bʋ̀á Mikalə bɩ̀á bonu tə, ʋ də Barəzilayi bìú Adəriyɛlə nə lɩrɩa, ʋ pa Gabawon tɩ̀án tə nə. Barəzilayi təntə yà yɩ Mehola tíú. Yá Gabawon tɩ̀án tə dàń kùrí ba, ba gʋ paan tə yuu wa, Ba-Yígúrə́-Jə-Tiu yáá con. Ba lɩ̀à barpɛ tə mɛ twá duən, ba tɩ. Ba gʋa ba woceri təntən dɩan tə wa. Kʋ yɩn dipɛn mɩna yiri don dəru ka sinti máŋá wa. 10 Aya bʋ̀á Risəpa tì ganlɔɔ, ʋ larɩ pɩ̀ʋ̀ tə yuu wa, ʋ jə̀ə́ kʋ wa. Ʋ yɩn kʋ bwálɩ́ təntə wa wuuu, kʋ nə zɩgɩ woceri nə sinti máŋá, kʋ va kʋ yí máŋá tə, dwà nə nɩŋa tɩga barpɛ təntə yuu wa. Risəpa yà cɩ̀ tɩga tə nə yɩcaʋ wa, sə lanworu zuŋi dàn ká jə̀ń ba yuu, ʋ ga cɩ̀ ba nə tɩtɩn nə, sə ganaŋa dàn ká yí ba yɩra. 11 Lɩ̀à twi ba swɩ̀n, ba bɩrɩ Davidə nə, kʋ tə Aya bʋ̀á Risəpa, ʋ yà nə yɩ Sayulə kabiə, nə fwa. 12 Yá Davidə dàń vəli, ʋ jon Sayulə də ʋ bìú Zonatan kurən tə, Yabɛswə tɩ̀án con, Galadə nə. Cɩ́gá, máŋá tə, Filisi tɩ̀án tə nə ta Sayulə, ba də́ Giləbʋa paan tə yuu wa, ba yà goli, ʋ də Zonatan tɩga tə, Bɛtə-Swan bírə́ tə nə. Yá mə bwálɩ́ təntə wa nə, Yabɛswə tɩ̀án twi ba tì ba. 13 Davidə dàń vəli, ʋ jon Sayulə də ʋ bìú Zonatan kurən tə, Yabɛswə nə, ʋ ja bà. Ba pɛ̀ lɩ̀à tə, ba nə kùrí, ba gʋ, kurən tə də, ba kə duən nə. 14 Ba gùrì Sayulə də ʋ bìú Zonatan kurən tə, Sayulə nyɩna Kiswə libəri tə wa, Sela nə, Bɛnzwamɛn lʋʋ nii tə wa. Ba tʋn kʋ tə mama, pɩ̀ʋ́ Davidə nə pɩn nii, sə kʋ tʋn. Yá kʋ kwa nə, Yɩɩ lɩŋa dàń tʋa, ʋ ga san lʋʋ nii tə nə.Yɩzərayɛlə lɩ̀à kʋ́ʋ̀ ta kʋ̀ʋ̀ də Filisi tɩ̀án tə
15 Kʋ̀ʋ̀ kʋ́ʋ̀ nyɩ́n kʋ zàn Filisi tɩ̀án, də Yɩzərayɛlə lɩ̀à pwə́rə́ wa. Yá Davidə də ʋ kwatara tə dàń vəli, sə ba ta Filisi tɩ̀án tə. Kʋ twi kʋ yí máŋá don wa, də Davidə gwàrɩ̀. 16 Rafa dwíí tə wa lìù don, ʋ yɩrɩ nə yɩ Yiswəbi-Benodə, yà jə cwiin, kʋ nii lugu tə dun nə dwə kilo batwa. Ʋ yà vwə kwatara sɩ̀ʋ́ nədʋn, ʋ tàŋá nə. Ʋ mʋ̀ bɛɛ təntə yà maŋa babarɩ də, ʋ wá gʋ Davidə. 17 Yá Seruya bìú Abiswayi dàń twi, ʋ san Davidə nə, ʋ mà Filisi tíú təntə, ʋ gʋ. Davidə kwatara tə dàń dùə̀, ba ga swɩ̀n Davidə con, ba wʋ́: «N kʋ́ʋ̀ bá pìí, n twá nə nə, ʋ va kʋ̀ʋ̀. N yɩ ndə Yɩzərayɛlə lɩ̀à cànʋ́ nə, yá nə bá sɛ̀, nə pa cànʋ́ təntə dəŋə!»
18 Kʋ kwa nə, kʋ̀ʋ̀ don kʋ́ʋ̀ zàn Gɔbə nə, Filisi tɩ̀án tə də Yɩzərayɛlə lɩ̀à pwə́rə́ wa. Yá kʋ̀ʋ̀ təntə wa nə, Sibekayi, ʋ nə yɩ Uswa tíú, gʋa Safə, ʋ nə yɩ Rafa dwíí tə wa lìù don. 19 Kʋ̀ʋ̀ tə don kʋ́ʋ̀ pìí kʋ zàn Gɔbə nə, Filisi tɩ̀án tə də Yɩzərayɛlə lɩ̀à pwə́rə́ wa. Yá kʋ̀ʋ̀ təntə wa nə, Yaare-Oregimə bìú Ɛləhanan gʋa Goliyatə, ʋ nə yɩ Gatə tíú. Yaare-Oregimə yà yɩ Bɛtəleyɛmə tíú. Goliyatə yà jə cwiin, kʋ dàʋ̀ tə cuni nə yí gantwansʋra kʋnkwalɩ. 20 Kʋ̀ʋ̀ don də kʋ́ʋ̀ zàn Gatə nə. Bɛɛ nədarʋ don yà wulə Filisi tɩ̀án kwatara tə wa, ʋ jɩ̀àn tə yà jə jɩfwɩ bardʋ bardʋ, ʋ nɛɛ tə də ga jə nafwɩ bardʋ bardʋ. Ʋ jɩfwɩ tə də ʋ nafwɩ tə mɛ nə ken duən nə, tə yɩ sapʋa də banɩa. Ʋ də yà yɩ Rafa dwíí lìù. 21 Bɛɛ təntə nan ʋ man babarɩ Yɩzərayɛlə lɩ̀à tə yáá con. Yá Zonatan, ʋ nə yɩ Davidə nubiu Swimeya bìú, dàń gʋa wá. 22 Filisi tɩ̀án kwatara banɩa təntə yà yɩ Rafa, ʋ nə yɩ Gatə tíú, dwíí tə wa lɩ̀à. Yá Davidə də ʋ kwatara tə nə gʋa ba.