Sweba zàn, ʋ zɩga Davidə nə
20
1 Bakʋkwanyiən don yà wulə Giləgalə nə, ʋ yɩrɩ nə yɩ Sweba. Ʋ yɩ Bikəri bìú, ʋ ga yɩ Bɛnzwamɛn dwíí tə wa lìù. Sweba wúrú nabwanʋ, ʋ ga swɩ̀n, ʋ wʋ́:«Nə ba tori jə Davidə con!
Nə də Yɩzayi bìú tə ba tara jə də duən!
Yɩzərayɛlə lɩ̀à-ba, á lìù mama vəli ʋ sàń!
2 Yá Yɩzərayɛlə lɩ̀à tə mama dàń pìí, ba va Bikəri bìú Sweba con, ba ga yá Davidə. Yá Zwida dwíí tə cɩcɩ dàń nə yɩn ba pɩ̀ʋ́ tə kwa, ba kwé wá, ba ja nan Zʋrədɛn mʋnaa tə nii nə, ba va Zwerizalɛmə.
3 Pɩ̀ʋ́ Davidə nə yí Zwerizalɛmə, ʋ lɩ ʋ kabii fugə tə, ʋ yà nə yá, sə ba ywàń ʋ sàń tə yuu, ʋ kə bwálɩ́ don nə, ʋ pɩn lɩ̀à ywàŋá ba yuu. Davidə yà pɩn ba won tə mama, ba nə pɩ̀à. Yá ʋ dàń nə kʋ́ʋ̀ wà pìí, ʋ pə̀ń də ba mɩ́ámɩ́án. Ʋ kabii tə dàń yɩn bwálɩ́ təntə wa wuuu, kʋ va kʋ yí ba tɩan. Ba yà yɩ ndə kadənə nə, yá ba barɩ yà ga wà tɩ.
Zʋabə gʋa Amasa
4 Kʋ kwa nə, pɩ̀ʋ́ Davidə swɩ̀n Amasa con, ʋ wʋ́: «À pɩn mʋ́ dɩan batwa, sə n ma bon Zwida dwíí kwatara tə, n kə duən yáá, n ja bà à yáá con.» 5 Amasa dàń nan, ʋ va, sə ʋ bon Zwida dwíí kwatara tə, ʋ kə duən yáá. Yá ʋ dán, ʋ doni dɩan batwa tə, pɩ̀ʋ́ Davidə yà nə pɩn wá. 6 Pɩ̀ʋ́ Davidə ma swɩ̀n Abiswayi con, ʋ wʋ́: «Sɩ́ʋ́n nə, Bikəri bìú Sweba wá tʋn yolwan nə yɩra, ʋ doni Abəsalomə. N tətə dàń lɩ à kwatara tə, n ja nan, n pú Sweba kwa, n dɩŋa wá, n ja. Kʋ nə tà nətʋ, ʋ wá zʋ tɩan wa, ba nə lwə̀, ba kɩkarɩ də biritaŋʋ, yá ʋ wá jɛ̀ń nə yáá nə.» 7 Zʋabə kwatara tə, də Kərɛtə tɩ̀án tə, də Pelɛtə tɩ̀án, də kwatara babɩran tə mama dàń púə́ Abiswayi kwa, ba nan Zwerizalɛmə wa, sə ba dɩŋa Bikəri bìú Sweba, ba ja. 8 Máŋá tə, ba nə yí kapan nəfarʋ tə, kʋ nə wulə Gabawon nə, Amasa twi, ʋ jəri ba. Zʋabə yà zʋa ʋ kwatara gànàn, ʋ vwa voru tə yuu wa, ʋ ga sà kwatara sɩ̀ʋ́, kʋ nə wulə kʋ lɔ́ɔ́ wa, voru tə nə, ʋ tàŋá nə. Máŋá tə, Zʋabə nə vəli ʋ bɩ̀àn, kwatara sɩ̀ʋ́ tə nan kʋ tʋ. 9 Zʋabə swɩ̀n Amasa con, ʋ wʋ́: «Kʋ zurə n yɩra, à nubiu?» Yá Zʋabə dàń jɩn Amasa twaŋa nə, də ʋ jɩzən, ndə ʋ pɩ̀à, ʋ pùrì wá, ʋ kə ʋ nyʋnɩ nə. 10 Amasa kʋ́ʋ̀ wà ʋ tɩ̀àn nə cɩ̀, də kwatara sɩ̀ʋ́ tə, Zʋabə jɩgwiə tə wa. Yá Zʋabə dàń zuə kwatara sɩ̀ʋ́ tə, ʋ dɩ Amasa pùə́ wa, ʋ lʋran ga nan tə lwá tɩa. Amasa tʋa, ʋ tɩ, yá Zʋabə kʋ́ʋ̀ wà pìí, ʋ bwɛ́, ʋ zwa wá. Kʋ kwa nə, Zʋabə də ʋ nubiu Abiswayi kɛ̀ń, ba dɩŋɩ Bikəri bìú Sweba kwa. 11 Zʋabə kwatara tə wa balandʋrʋ don yà mɛ Amasa yuu con, ʋ zɩga, ʋ ga swɩ̀n, ʋ wʋ́: «Lìù tə mama, ʋ nə yɩ pɩ̀ʋ́ Davidə kwa lìù, kʋ tíú mɛ, sə ʋ zìlí Zʋabə nii, ʋ twá ʋ nə!» 12 Amasa yà bibili ʋ jana tə wa, cwəŋə tə titəŋi wa. Yá balandʋrʋ tə nɩ də, lalʋʋ tə mama yà twi, ba zɩga Amasa yuu con. Ʋ ma tùrì wá, ʋ lɩ cwəŋə tə wa, ʋ tún kárá don wa, ʋ pú gànʋ̀ ʋ yuu nə. 13 Balandʋrʋ tə nə tì Amasa, cwəŋə tə wa, kwa nə, kwatara tə mama dàń kɛ̀ń, ba pú Zʋabə kwa, ba dɩŋɩ Bikəri bìú Sweba.
Abɛlə-Bɛtə-Maka tɩ̀án gʋa Sweba
14 Sweba twá Yɩzərayɛlə dwíə́ tə mama wa, ʋ kɛ̀ń, ʋ va Abɛlə-Bɛtə-Maka, Bikəri dwíí lɩ̀à tə mama con. Yá Bikəri dwíí lɩ̀à tə mama dàń twi duən yáá, ba twá Sweba nə, ba zʋ tɩʋ tə wa. 15 Zʋabə də ʋ kwatara tə dàń twi, ba pú Sweba, ba kə Abɛlə-Bɛtə-Maka tɩʋ tə wa. Ba lwə̀ kukurə nacanɩ, kʋ dɩ̀, kʋ ja tɩʋ tə bírə́ tə yɩra. Lalʋʋ tə mama, ba yà nə wulə də Zʋabə, dàń yà zwɩn bírə́ tə, sə ba dɩ.
16 Kan don, ʋ nə jə wʋbʋŋa, dàń zɩgɩ tɩʋ tə wa, ʋ bubwi, ʋ kə Zʋabə lɩ̀à tə nə, ʋ wʋ́: «Á cʋga! Á cʋga! Á swɩ̀án Zʋabə con, sə ʋ bólí yəbə. À jə yoo, sə à swɩ̀n ʋ con.» 17 Zʋabə twi, ʋ bólí kan tə, yá kan tə bwe wá, ʋ wʋ́: «N mʋ̀ nə yɩ Zʋabə naaa?» Ʋ le, ʋ wʋ́: «Awo, à mʋ̀ nə!» Kan tə ma swɩ̀n ʋ con, ʋ wʋ́: «À lòrì mʋ́, sə n cʋgʋ à mʋ̀ n tʋtʋnbʋa tə sʋ̀ràn tə.» Zʋabə le, ʋ wʋ́: «À cʋga!» 18 Yá Kan tə dàń swɩ̀n, ʋ wʋ́: «Máŋá don yɩn lá, yoo nə twi, ba yàá swɩ̀n, sə ba pɩ̀à kwìə̀ Abɛlə-Bɛtə-Maka tɩ̀án con. Yá kʋ yoo tə yàá kwɛn! 19 Yɩzərayɛlə lɩ̀à tə mama wa, nə mʋ̀ nə yɩ sìə́ lɩ̀à, nə ga twá cɩ́gá nə, ndə kʋ nə mɛ nətʋ. Yá n mʋ̀ dàń pɩ̀à, sə n cʋ̀gʋ̀ tɩʋ tə, kʋ nə yɩ ndə bɩ̀á nuu nə, Yɩzərayɛlə lʋʋ nii tə wa! Bɛ̀ɛ̀ nə pɩn, n ma pɩ̀à, sə n cʋ̀gʋ̀ kʋ tə, Ba-Yígúrə́-Jə-Tiu nə tɩ?» 20 Zʋabə ma le ʋ wʋ́: «Kʋ pubʋŋa təntə tə̀lə́ à waa də mama! À wà twi, sə à cʋ̀gʋ̀ tɩʋ tə, à lwá duən yuu! 21 Kʋ tà nətʋ. Kʋ yɩ Efərayimə pɛɛn nagwanaa tə wa bɛɛ don nə, à pɩ̀à tɩʋ tə wa. Ʋ yɩrɩ nə yɩ Sweba, ʋ ga yɩ Bikəri bìú. Ʋ mʋ̀ bɛɛ təntə zàn, ʋ zɩga pɩ̀ʋ́ Davidə nə. Á dàń lɩa ʋ cɩcɩ, á pa nə, yá à wá yá tɩʋ tə.» Kan tə swɩ̀n Zʋabə con, ʋ wʋ́: «Kʋ ziən! Nə wá twá bírə́ tə, nə dɩlɩ ʋ yuu, n nə.» 22 Kan tə dàń ja ʋ wʋbʋŋa təntə, ʋ pìí ʋ va, ʋ swɩ̀n tɩʋ tə tɩ̀án mama con. Ba dàń goŋi Bikəri bìú Sweba yuu, ba twá bírə́ tə, ba dɩlɩ Zʋabə nə. Yá Zʋabə dàń wúrú nabwanʋ, kwatara tə mama ga pìí, ba yá tɩʋ tə, ba lìù mama va ʋ sàń. Yá Zʋabə mʋ̀ pìí, ʋ va pɩ̀ʋ́ Davidə con, Zwerizalɛmə nə.
23 Zʋabə yà nə yɩ Yɩzərayɛlə kwatara tə mama yáá tíú. Yehoyada bìú Benaya yà nə yɩ Kərɛtə, də Pelɛtə tɩ̀án tə yáá tíú. 24 Hadoramə yà nə ywàŋá dɩ̀àn tʋ̀tʋ̀nán tə yuu. Ahiludə bìú Zozafatə yà nə yɩ pɩ̀ʋ́ nanzoo. 25 Sweva yà nə pʋ́pʋ́nɩ́ pɩ̀ʋ́ yìə̀n. Sadɔkə də Abɩyatarə yà yɩ Yɩɩ joŋwana. 26 Yá Yira, ʋ nə yɩ Yayirə tíú, də yà yɩ pɩ̀ʋ́ Davidə Yɩɩ joŋwanʋ.