Davidə kwi ʋ bìú Abəsalomə nə
19
1 Pucʋnɩ zʋa pɩ̀ʋ́ Davidə, ʋ ga dɩ̀ mimii tə dəyuu dìə̀ tə wa, ʋ wulə ʋ kwi. Ʋ yà vəli də ʋ kwi, ʋ ga swɩ̀n, ʋ wʋ́: «À bìú Abəsalomə! À bìú, à bìú Abəsalomə! À yà nə tɩga n yuu nə, kʋ kʋkwa. À bìú Abəsalomə, à bìú, à bìú!»2 Ba swɩ̀n Zʋabə con, də pɩ̀ʋ́ Davidə wulə ʋ kwi yinəgə kwirə, ʋ bìú Abəsalomə tɩan tə yɩrɩ. 3 Yá lalʋʋ tə mama pupwən tə lwàń, ka jì pucʋnɩ, kʋ dɩɩn nə. Cɩ́gá, ba nì də pɩ̀ʋ́ Davidə pùə́ cʋ̀gʋ̀ zənzən, ʋ bìú tə tɩan tə yɩrɩ. 4 Kʋ dɩɩn tə nə, Davidə kwatara tə yɩ ba səgə, ba zʋ tɩʋ tə wa, ndə kwatara nə, cavɩra nə jə ba, ba nə dəri ba dʋŋa yáá nə, kʋ̀ʋ̀ wa yɩrɩ. 5 Pɩ̀ʋ́ Davidə yà púə́ ʋ yáá nə, ʋ ga bubwi, ʋ wʋ́: «À bìú Abəsalomə, Abəsalomə, à bìú, à bìú!»
6 Yá Zʋabə dàń twi, ʋ zʋ, ʋ yí pɩ̀ʋ́ Davidə, ʋ swɩ̀n ʋ con, ʋ wʋ́: «Kʋ tə yɩ cavɩra nə, n kəni n tʋ̀tʋ̀nà tə mama nə, zə̀n kʋ tə. Yá ba mʋ̀ nə jon n də n bɩ̀á tə, də n bwɩ̀ɩ́ tə, də n kana tə, də n kabii tə mɩɩ, ba kə lʋʋ wa. 7 Kʋ bɩrɩ də, n swə lɩ̀à tə, ba nə culi mʋ́, n ga culi lɩ̀à tə, ba nə swə mʋ́. N bɩrɩ nəba, zə̀n kʋ tə, də n kwatara yáá tɩ̀án tə, də n tʋ̀tʋ̀nà tə mama yɩ tʋtʋ, n yáá con. Zə̀n kʋ tə, à lwarɩ də, Abəsalomə yà nə wulə lʋʋ, yá nə mama ga tɩ, n na də, kʋ mʋ̀ nə mɛ. 8 Sɩ́ʋ́n nə, n dàń ja n bɩcan, n ga zàn, n nan, n swɩ̀n sʋgʋ, kʋ nə wá dàn n tʋ̀tʋ̀nà tə jɩɩn. N nə wà nan, à dùə̀ də Ba-Yígúrə́-Jə-Tiu, də lìù mama bá ya də mʋ́, tɩtɩn kʋ tə nə. Yá kʋ lɛɛ dàń wá doni càn tə mama, tə nə dí yáá, tə yí mʋ́, kʋ nə zɩgɩ n zandʋan, kʋ bà, kʋ yí zə̀n.» 9 Pɩ̀ʋ́ Davidə dàń zàn, ʋ va ʋ jə̀ə́ tɩʋ tə mimii nə. Ba bòrì ba swɩ̀n lalʋʋ tə con, ba wʋ́: «Á nəŋə, pɩ̀ʋ́ nan, ʋ jə̀ə́ mimii nə.» Yá lalʋʋ tə mama dàń twi, ba kun duən nə, pɩ̀ʋ́ Davidə yáá con.
Kʋ máŋá təntə wa, də Yɩzərayɛlə lɩ̀à tə duən tə mʋ̀, ba yà nə wulə Abəsalomə kwa, lìù mama dəri, ʋ va ʋ sàń.
Davidə pìí ʋ va Zwerizalɛmə
10 Yɩzərayɛlə dwíə́ tə mama wa, lalʋʋ tə mama yà swɩ̀n, ba wʋ́: «Pɩ̀ʋ́ Davidə nə ta nəba ʋ jon, nə dʋŋa jɩɩn wa. Ʋ mʋ̀ nə jon nəba, Filisi tɩ̀án tə jɩɩn wa. Yá zə̀n kʋ tə, ʋ dàń dəri, Abəsalomə yáá nə, ʋ nan lʋʋ nii tə wa. 11 Nə lwá nʋga Abəsalomə də yuu wa*, nə tún wá, sə ʋ ya nə pɩ̀ʋ́. Yá ʋ də nə, ʋ tɩga kʋ̀ʋ̀ tə wa. Bɛ̀ɛ̀ dàń nə pɩn, á ba yoo mama swɩ̀n, sə pɩ̀ʋ́ Davidə pìí, ʋ bà nə con?»
12 Yá lɩ̀à dàń twi, ba swɩ̀n sʋ̀ràn təntə, Yɩzərayɛlə lɩ̀à tə mama yà nə swɩ̀n, ba bɩrɩ pɩ̀ʋ́ Davidə nə, bwálɩ́ tə nə, ʋ yà nə wulə. Pɩ̀ʋ́ Davidə dàń ma tʋn, ʋ pa ba swɩ̀n Yɩɩ joŋwana Sadɔkə də Abɩyatarə con, ʋ wʋ́: «Á bwiə Zwida dwíí nəkwɩna tə, á jə́n, bɛ̀ɛ̀ nə pɩn, ba pɩ̀à, sə ba ya talɩkwa lɩ̀à, ba nə wá swɩ̀n, sə pɩ̀ʋ́ tə pìí, ʋ bà ʋ dìə̀ tə wa?» 13 Ba yɩ à nubɩa, ba ga yɩ à dwíí tɩ̀án cɩ́gá cɩ́gá. Bɛ̀ɛ̀ dàń nə pɩn, ba ma pɩ̀à, sə ba ya talɩkwa lɩ̀à, ba nə wá swɩ̀n, sə pɩ̀ʋ́ tə pìí ʋ bà? 14 Á tə wá swɩ̀n Amasa də con də, ʋ yɩ à dwíí tíú cɩ́gá cɩ́gá. À dùə̀, sə Yɩɩ cʋ̀gʋ̀ à yáá də à kwa*, də à nə wà wá ken Zʋabə bwálɩ́ nə, sə ʋ mʋ̀ nə ya à kwatara tə yáá tíú, máŋá mama!» 15 Davidə sʋ̀ràn təntə pɩn, Zwida dwíí tə mama pubʋŋa pìí, ka bà ʋ con. Yá ba mama dàń ken nii nədʋ, ba tʋn, ba swɩ̀n pɩ̀ʋ́ Davidə con, sə ʋ də ʋ tʋ̀tʋ̀nà tə mama pìí ba bà.
16 Pɩ̀ʋ́ Davidə dàń pìí ʋ bà, ʋ yí Zʋrədɛn mʋnaa tə nii nə. Yá Zwida dwíí tə də nan, ba va Giləgalə, sə ba jəri wá, ba ga san wá, sə ʋ bɩn Zʋrədɛn mʋnaa tə.
Davidə wà sɛ̀, sə ba gʋ Swimeyi
17 Gera bìú Swimeyi, ʋ nə yɩ Bɛnzwamɛn dwíí lìù, ʋ ga yɩ Bahurimə tíú, də bɩbarɩ, ʋ twá Zwida dwíí lɩ̀à tə nə, ʋ va, sə ʋ jəri pɩ̀ʋ́ Davidə. 18 Bɛnzwamɛn dwíí lɩ̀à mʋ̀rʋ̀, də Siba, ʋ yà nə tʋŋa, ʋ pɩn Sayulə dìə̀ tə nə, ʋ də ʋ bɩ̀á fugə də bonu, də ʋ tʋ̀tʋ̀nà sapʋa, yà wulə də Swimeyi. Ba mʋ̀ lɩ̀à təntə dí yáá, ba dəri ba va, sə ba jəri pɩ̀ʋ́ Davidə, 19 máŋá tə wa, nɩ́á yuu bori tə, nə wá ja ʋ də ʋ dìə̀ lɩ̀à tə, kʋ bɩn mʋnaa tə. Ba yà pɩ̀à, sə ba tʋn kʋ tə mama, pɩ̀ʋ́ tə nə wá pa nii, sə ba tʋn. Máŋá tə wa, pɩ̀ʋ́ Davidə nə bɩn mʋnaa tə, Gera bìú Swimeyi twi, ʋ tʋ ʋ yáá con, 20 ʋ ga lòrì wá, ʋ wʋ́: «À yuu-tiu, à lòrì mʋ́, dàn ká jələ à yolwan tə. Dàn ká lìí yolwan tə yoo, à mʋ̀ n tʋtʋnʋ tə nə tʋn, dɩɩn tə nə, n mʋ̀ à nyɩna pɩ̀ʋ́ nə nan Zwerizalɛmə wa. À lòrì mʋ́, dàn ká ja pubʋla də nə, kʋ yɩrɩ. 21 À tətə yə̀ə́ zəni, də à tʋn yolwan. Yá zə̀n kʋ tə, à mʋ̀ nə yɩ təntən lìù Zʋzɛfə dwíí tə wa, à nə twi, sə à jəri n mʋ̀, à nyɩna pɩ̀ʋ́.» 22 Seruya bìú Abiswayi ma swɩ̀n ʋ wʋ́: «Kʋ nətʋ tə dàń wàá Swimeyi gʋrɩ yáá nə kʋ cɩ̀ naaa? Ʋ zɩrɩ, ʋ kə pɩ̀ʋ́ tə nə, Ba-Yígúrə́-Jə-Tiu nə kúrí*.» 23 Yá Davidə dàń swɩ̀n, ʋ wʋ́: «Kʋ ba á mʋ̀ Seruya bɩ̀á tə ywàŋá. Bɛ̀ɛ̀ nə pɩn, á ma zɩga à nə, sɩ́ʋ́n nə? Zə̀n kʋ tə, à lwarɩ də, à mʋ̀ cɩ́gá nə yɩ Yɩzərayɛlə pɩ̀ʋ́. Kʋ mʋ̀ yɩrɩ, à bá sɛ̀, à pa ba gʋ lìù Yɩzərayɛlə wa, zə̀n kʋ tə.» 24 Yá pɩ̀ʋ́ Davidə swɩ̀n Swimeyi con, ʋ wʋ́: «À dùə̀, ba bá gʋ mʋ́!»
Mefiboswɛtə tún ʋ nii pɩ̀ʋ́ Davidə con
25 Sayulə nàʋ́ Mefiboswɛtə də vəli, sə ʋ jəri pɩ̀ʋ́ Davidə. Mefiboswɛtə yà wà ʋ twaŋa kwɛn, ʋ wà ʋ nɛɛ tə ywarɩ, ʋ wà ʋ gànàn sɩ̀n, kʋ nə zɩgɩ dɩɩn tə nə, pɩ̀ʋ́ Davidə nə nan Zwerizalɛmə wa, kʋ va kʋ yí dɩɩn tə, ʋ nə pìí ʋ bɩ̀àn də yazurə. 26 Máŋá tə, Mefiboswɛtə nə twi Zwerizalɛmə, sə ʋ jəri pɩ̀ʋ́ Davidə, pɩ̀ʋ́ Davidə bwe wá, ʋ wʋ́: «Mefiboswɛtə, bɛ̀ɛ̀ nə pɩn, n ma wà à nə twá, n vìí?» 27 Ʋ le, ʋ wʋ́: «À nyɩna pɩ̀ʋ́, kʋ yɩ à tʋtʋnʋ tə nə dwá nə. À mʋ̀ n tʋtʋnʋ tə də yà swɩ̀n à waa con də, à nə yɩ gwànʋ́ tə yɩrɩ, à wá pa ba tún ganpurə à bɩ̀nà yuu, ba pa nə, à dɩ̀, à twá pɩ̀ʋ́ nə, à vìí. 28 À tʋtʋnʋ tə yɩ kʋ̀nkʋ̀n nə, ʋ twi ʋ kʋ̀nɩ̀ n mʋ̀ à nyɩna pɩ̀ʋ́ con, ʋ kə à nii nə. Yá n mʋ̀ à nyɩna pɩ̀ʋ́ yɩ ndə Yɩɩ malɩka nə. Kʋ mʋ̀ yɩrɩ, fwa kʋ tə nə ywán də mʋ́. 29 Cɩ́gá, n mʋ̀ à nyɩna pɩ̀ʋ́ yáá con, à nyɩna dìə̀ lɩ̀à tə mama yà mɛ tɩan. Yá də kʋ mɛ, n tə jɩn nə, n kə lɩ̀à tə wa, ba nə də́ n con. À kʋ́ʋ̀ ba cwəŋə jə, à lòrì yuywaŋʋ don n mʋ̀ à nyɩna pɩ̀ʋ́ con.» 30 Yá pɩ̀ʋ́ Davidə swɩ̀n ʋ con, ʋ wʋ́: «N sʋgʋ tə kʋ́ʋ̀ ba də̀ń jə! À pɩn nii də, n mʋ̀ də Siba dàń nə wá tara Sayulə kárɩ́ tə.» 31 Mefiboswɛtə ma swɩ̀n pɩ̀ʋ́ Davidə con, ʋ wʋ́: «Siba nə swə, sə ʋ jon kárɩ́ tə tətə mama. N mʋ̀ à nyɩna pɩ̀ʋ́ nə pìí, n bà n dìə̀ tə wa, də yazurə, kʋ mʋ̀ nə yɩ cɩ́gá cɩ́gá yoo.»
Pɩ̀ʋ́ Davidə fwa Zìlə́ Barəzilayi yɩra
32 Barəzilayi də yà nan Rogelimə, Galadə lʋʋ nii tə wa, ʋ bà, ʋ kwé pɩ̀ʋ́ Davidə, ʋ ja bɩn Zʋrədɛn mʋnaa tə. 33 Barəzilayi yà kwɩn zənzən. Ʋ yà jə bɩna sapwɩnɩa. Ʋ yà yɩ jɩjə nəfarʋ tíú. Yá máŋá tə wa, pɩ̀ʋ́ Davidə nə yɩn Mahanayimə nə, Barəzilayi san wá, də won tə mama, ʋ nə pɩ̀à. 34 Pɩ̀ʋ́ Davidə dàń swɩ̀n Barəzilayi con ʋ wʋ́: «Bà, sə nə va Zwerizalɛmə! N wá ya à con, yá à wá pa mʋ́ won tə mama, n nə pɩ̀à.» 35 Yá Barəzilayi swɩ̀n pɩ̀ʋ́ Davidə con, ʋ wʋ́: «Bɩna bagalɩ tətə nə, à kʋ́ʋ̀ wá fwa lʋʋ wa, à ma twá n mʋ̀ pɩ̀ʋ́ nə, à vəli Zwerizalɛmə? 36 Sɩ́ʋ́n nə, à jə bɩna sapwɩnɩa. À máŋá ka tə wa, à kʋ́ʋ̀ wàá kʋ tə nə ziən, də kʋ tə nə lwara swɩ́án, à lwarɩ naaa? À mʋ̀ n tʋtʋnʋ tə kʋ́ʋ̀ wàá kʋ tə, à nə də́, də kʋ tə, à nə nywɩn ywánɩ́, à lwarɩ naaa? À kʋ́ʋ̀ wàá gwàgá tə, nə à yə̀ə́, kagwaga tə kori, à nì naaa? Ɔn ɔn, à nyɩna pɩ̀ʋ́, à mʋ̀ n tʋtʋnʋ tə kʋ́ʋ̀ wà mɛ, sə à ya n yuu zɩlɩ. 37 À mʋ̀ n tʋtʋnʋ tə yɩ, à pɩ̀à, sə à kwé mʋ́, à ja kɛ̀ń Zʋrədɛn mʋnaa tə mancɩn. À dàń nə wà mɛ də zìlə́ tə tə mʋ̀. 38 À nyɩna pɩ̀ʋ́, à lòrì, sə n yá, sə à mʋ̀ n tʋtʋnʋ tə pìí, à va à sàń. Yá à nə tɩga, ba wá gùrì nə, à nyɩna də à nuu libəri tə bɩan nə. N dàń nə̀ń à bìú Kiməhamə nə. Ʋ yɩ n tʋtʋnʋ. Ʋ mʋ̀ nə wá twá n nə, ʋ vìí. Fwa kʋ tə mama n nə swə, n pa wá.» 39 Pɩ̀ʋ́ Davidə dàń swɩ̀n ʋ wʋ́: «Mə Kiməhamə bà, sə nə vìí. À wá fwa kʋ tə mama, kʋ nə ywán də mʋ́, à pa wá. Yá won tə mama, n tətə nə pɩ̀à à con, à wá pa kʋ mʋ́.» 40 Pɩ̀ʋ́ Davidə də lalʋʋ tə mama nə bɩn Zʋrədɛn mʋnaa tə, ba zwɛ̀, ʋ pùrì Barəzilayi, ʋ kə ʋ nyʋnɩ nə, ʋ ga lòrì, sə Yɩɩ fwa zəni Barəzilayi yɩra. Yá Barəzilayi dàń pìí, ʋ va ʋ sàń.
Zwida dwíí tə də Yɩzərayɛlə lɩ̀à tə dɩga jara
41 Pɩ̀ʋ́ Davidə kɛ̀ń, ʋ te Giləgalə con, yá Kiməhamə dàń púə́ ʋ kwa. Zwida dwíí tə mama, də Yɩzərayɛlə lɩ̀à tə faan yà kwé pɩ̀ʋ́ Davidə. 42 Yá Yɩzərayɛlə lɩ̀à tə mama dàń twi, ba yí pɩ̀ʋ́ Davidə, ba bwe wá, ba wʋ́: «Bɛ̀ɛ̀ nə pɩn Zwida dwíí tə, ba nə yɩ nə nubɩa, ma səgə, ba ja n də, n dìə̀ lɩ̀à tə, də n kwa lɩ̀à tə mama, ba bɩn Zʋrədɛn mʋnaa tə?» 43 Zwida dwíí tə mama ma le Yɩzərayɛlə lɩ̀à tə, ba wʋ́: «Kʋ yɩ nə mʋ̀ də pɩ̀ʋ́ Davidə nə yɩ dwíí, nə doni aba tə yɩrɩ. Yá bɛ̀ɛ̀ dàń nə zɩ̀n á lɩŋa, kʋ yoo tə wa? Á bʋŋa də pɩ̀ʋ́ Davidə lɩ nə nii nə naaa? Nə à yə̀ə́, á bʋŋa də, ʋ pɩn nəba zìlə́ wiən?» 44 Yɩzərayɛlə lɩ̀à tə le Zwida dwíí tə, ba wʋ́: «Nə tɩ pɩ̀ʋ́ tə, nə doni aba, nɛɛ fugə. Nə ga tɩ Davidə də tətə, nə doni aba. Bɛ̀ɛ̀ nə pɩn, á ma wà nəba jələ, ndə lɩ̀à nə? Á tətə yə̀ə́ də, nə mʋ̀ nə dí yáá, nə swɩ̀n, sə pɩ̀ʋ́ tə pìí ʋ bà.» Yá Zwida dwíí tə nii yɩn dɩ̀àn, kʋ doni Yɩzərayɛlə lɩ̀à tə.