2 Samiyɛlə 18

Davidə kwatara tə dí dɩ̀àn, Abəsalomə kwatara tə yuu wa

1 Davidə gàlɩ̀ lɩ̀à tə mama, ba yà nə wulə də wá, ʋ ga tún kwatara mʋ̀rʋ̀ yáá tɩ̀án, də kwatara bíí yáá tɩ̀án, ba yuu wa. 2 Yá Davidə dàń pwɛ̀ lalʋʋ tə púlə́ batwa. Ʋ lɩ Zʋabə, ʋ tún púlí don yuu wa. Ʋ lɩ Seruya bìú Abiswayi, ʋ nə yɩ Zʋabə nubiu, ʋ tún kʋ don yuu wa. Ʋ lɩ Yitayi, ʋ nə yɩ Gatə tíú, ʋ tún kʋ don də yuu wa. Yá pɩ̀ʋ́ Davidə dàń swɩ̀n lalʋʋ tə con, ʋ wʋ́: «À də tətə wá va də aba.» 3 Yá lalʋʋ tə swɩ̀n, ba wʋ́: «N wà mɛ, sə n twá, n va kʋ̀ʋ̀ tə! Cɩ́gá, nə mʋ̀ nə dəri, sə nə jɛ́n kʋ̀ʋ̀ tə wa, dʋŋa tə ba jələ kʋ, ndə yoo nə. Ba nə kʋ́ʋ̀ gʋa nə faan də tətə, ba tə bá jələ kʋ, ndə yoo nə. Yá n mʋ̀ yoo cà dʋŋa tə yáá con, n doni nə mʋ̀ lɩ̀à mʋ̀rʋ̀ fugə. Kʋ mʋ̀ yɩrɩ, kʋ ziən, sə n mɛn sàń nə, n ga tʋŋa sáŋʋ́, n pɩn nəba, kʋ̀ʋ̀ tə bwálɩ́ nə. 4 Pɩ̀ʋ́ Davidə pìí ʋ le ba, ʋ wʋ́: «À wá fwa kʋ tə nə ywán də aba.» Ʋ dàń nan ʋ zɩga tɩʋ tə mimii nə, kwatara tə ga naŋa mʋ̀rʋ̀ mʋ̀rʋ̀, də bíí bíí. 5 Pɩ̀ʋ́ Davidə pɩn nii kʋ tə Zʋabə, də Abiswayi, də Yitayi nə, ʋ wʋ́: «Á tàá à yuu yɩrɩ, á dàn ká tʋn yolwan, à bìú Abəsalomə yɩra!» Lalʋʋ tə mama nì nii təntə, pɩ̀ʋ́ Davidə nə pɩn yáá tɩ̀án tə nə.

6 Davidə kwatara tə dàń nan, ba va, sə ba ta Yɩzərayɛlə lɩ̀à tə, ba nə wulə Abəsalomə kwa, kasɔɔ con. Yá kʋ̀ʋ̀ tə yɩn Efərayimə pún tə wa. 7 Kʋ mʋ̀ pún təntə wa nə, Davidə tʋ̀tʋ̀nà tə ta Yɩzərayɛlə lɩ̀à tə, ba nə wulə Abəsalomə kwa, ba də́. Ba dí dɩ̀àn Abəsalomə kwatara tə yuu wa zənzən, kʋ dɩɩn tə nə. Ba gʋa ba wa lɩ̀à mʋ̀rʋ̀ sapʋa. 8 Kʋ̀ʋ̀ tə zʋa lʋʋ nii tə mama wa. Yá lɩ̀à tə nə tɩga pún tə wa, kʋ dɩɩn tə nə, doni lɩ̀à tə, ba nə gʋa də kwatara sɩ̀ʋ́.

Zʋabə gʋa Abəsalomə

9 Abəsalomə yà dɩ̀gà bɩnasəsən, ʋ ja wulə kʋ̀ʋ̀ tə wa. Máŋá don wa, ʋ zə́n ʋ nan, ʋ jəri Davidə tʋ̀tʋ̀nà tə yáá wa də bɩnasəsən tə. Ka ja wá, ka pàrɩ̀, ka zʋ sɩsanʋ don nɛɛ wa. Yá Abəsalomə yuu dàń cən tɩʋ tə nɛɛ wa, bɩnasəsən tə ga lɛ, ka yá wá, ʋ guə yɩɩ nə. 10 Davidə kwatara tə lìù don nɩ kʋ nətʋ tə, yá ʋ vəli, ʋ swɩ̀n kʋ Zʋabə con, ʋ wʋ́: «À nɩ Abəsalomə də ʋ yuu cən tɩʋ nɛɛ wa.» 11 Yá Zʋabə le wá, ʋ wʋ́: «N nə nɩ wá, bɛ̀ɛ̀ nə pɩn, n wà wá mà, n gʋ kʋ bwálɩ́ tə wa lá? N yà nə gʋa wá, à yà wá pa mʋ́ wárʋ́ səbilurən fugə, də voru!» 12 Kwatarʋ tə pìí ʋ le Zʋabə, ʋ wʋ́: «Kʋ nə swə, kʋ yɩ wárʋ́ səbilurən mʋ̀rʋ̀ də tətə nə, n wá lwá à jɩɩn wa, à tə bá sɛ̀, à tʋn yolwan pɩ̀ʋ́ bìú tə yɩra. Nə mama nì kʋ tə, pɩ̀ʋ́ tə nə swɩ̀n n də Abiswayi, də Yitayi con. Ʋ swɩ̀n, sə á cɩ̀, sə lìù mama dàn ká tʋn yolwan, ʋ bìú Abəsalomə yɩra.» 13 Yá də kʋ mɛ, à yà tə nə sɩnɩ, à gʋ Abəsalomə, ba yà wá gʋ à də. Cɩ́gá, pɩ̀ʋ́ Davidə, yɩ lìù tə, yoo nə wàrɩ̀ ʋ yáá nə, kʋ səgə. Yá n də tətə yà wá nan à kwa.» 14 Zʋabə baa, ʋ wʋ́: «À bá zɩgɩ yəbə, à cʋ̀gʋ̀ à máŋá də mʋ́!» Yá ʋ dàń tì párá batwa, ʋ ja va, ʋ pa ʋ dɩ Abəsalomə bɩcan wa, də ʋ yà tə guə tɩ̀ʋ́ tə nə, ʋ tə wà tɩ. 15 Balandʋra fugə tə, ba yà nə zɩŋa Zʋabə kwatarɩ zɩla tə, dàń púə́ Abəsalomə yuu nə, ba mà, ba gʋ. 16 Kʋ kwa nə, Zʋabə pɩn, ba wúrú nabwanʋ, sə ba yá kʋ̀ʋ̀ tə tɛgʋ nə. Yá Davidə kwatara tə dàń pìí, ba yá Yɩzərayɛlə kwatara tə, ba yà nə wulə Abəsalomə kwa. 17 Ba tì Abəsalomə tɩgɩ tə, ba dɩlɩ bʋʋ nəfarʋ wa, pún tə wa, ba ga pɛ̀ kapana, ba ma pú ʋ yuu nə, kʋ zàn púlí. Kʋ máŋá təntə wa, Yɩzərayɛlə kwatara tə, ba yà nə wulə Abəsalomə kwa, lìù mama dəri, ʋ va ʋ sàń. 18 Máŋá tə, Abəsalomə yà nə wulə lʋʋ wa, ʋ pɩn ba lwà birizu nəfarʋ, pɩ̀ʋ́ vara tə wa. Cɩ́gá, ʋ yà swɩ̀n, ʋ wʋ́: «À ba bìú jə, ba nə wá ma bon à yɩrɩ lʋʋ wa, máŋá mama.» Yá ʋ dàń yà dɩga ʋ tətə yɩrɩ tə, birizu təntə nə, ba ga boŋə kʋ Abəsalomə birizu, də zə̀n mama.

Davidə nì Abəsalomə tɩan tə

19 Sadɔkə bìú Ahimasə swɩ̀n Zʋabə con, ʋ wʋ́: «À lòrì cwəŋə, sə à va, à pa ŋwɛn pɩ̀ʋ́ Davidə nə, də Ba-Yígúrə́-Jə-Tiu jon wá, ʋ dʋŋa tə jɩɩn wa.» 20 Zʋabə swɩ̀n ʋ con, ʋ wʋ́: «N bá ja ŋwɛn, n va, zə̀n kʋ tə. Dɩɩn don nə nə, n wá ja ŋwɛn, n va. Yá zə̀n kʋ tə mʋ̀, n bá ja ŋwɛn, n va, pɩ̀ʋ́ bìú tə nə tɩga yɩrɩ.» 21 Yá Zʋabə dàń swɩ̀n yoŋu don con, ʋ nə yɩ Kuswə tíú, ʋ wʋ́: «Vəli n swɩ̀n kʋ tə mama, n nə nɩ, n bɩrɩ pɩ̀ʋ́ Davidə nə.» Yoŋu tə tʋa ʋ nadwana yuu, Zʋabə yáá con, ʋ pa wá dun*, ʋ ga zàn, ʋ dəri, ʋ vələ tʋŋa tə. 22 Yá Sadɔkə bìú Ahimasə kʋ́ʋ̀ swɩ̀n Zʋabə con, ʋ wʋ́: «À lòrì cwəŋə, sə à də dəri, à pú Kuswə tíú tə kwa. Yoo tə mama kʋ nə wá ya, sə kʋ ya!» Zʋabə ma swɩ̀n, ʋ wʋ́: «Bɛ̀ɛ̀ nə pɩn, n də tə pɩ̀à, sə n va lá, à bìú? Kʋ tà ŋwɛn tə, n nə wá na ŋwɩ́rán tə yɩrɩ.» 23 Ahimasə tə bwɛ́, ʋ swɩ̀n Zʋabə con, ʋ wʋ́: «Yoo tə mama kʋ nə wá ya, sə kʋ ya! À mʋ̀ wá dəri, à va lá.» Zʋabə ma swɩ̀n ʋ con, ʋ wʋ́: «Kʋ ziən, dəri n va!» Ahimasə dàń tì digə cwəŋə tə, yá ʋ dəri, ʋ kɛ̀ń Kuswə tíú tə. 24 Kʋ máŋá təntə wa, də Davidə yà jə̀ə́ tɩʋ tə birinaa tə waa con mimii, də ka kàrá con mimii tə pwə́rə́ wa. Kwatarʋ tə, ʋ yà nə ywàŋá tɩʋ tə nə, kʋ dɩɩn tə nə, dɩ̀gà birinaa tə mimii dìə̀ dəyuu wa, ʋ zɩ̀n ʋ yáá, ʋ ywàń, də nə̀ń bɛɛ don nə, ʋ dəri ʋ bɩ̀àn, ʋ cɩcɩ. 25 Kwatarʋ tə, ʋ yà nə ywàŋá tɩʋ tə nə, ma bon, ʋ kə pɩ̀ʋ́ Davidə nə. Pɩ̀ʋ́ Davidə le ʋ wʋ́: «Ʋ nə yɩ ʋ cɩcɩ, kʋ yɩ ŋwɛn nə, ʋ ja bɩ̀àn, sə ʋ swɩ̀n.» Bɛɛ tə ga dəri ʋ bɩ̀àn wuuu. 26 Kʋ kwa nə, kwatarʋ tə, ʋ yà nə ywàŋá tɩʋ tə nə, kʋ́ʋ̀ nɩ bɛɛ don də, ʋ dəri ʋ bɩ̀àn. Yá ʋ dàń bon ʋ kə lìù tə nə, ʋ nə cɩ̀ mimii tə nə, ʋ wʋ́: «Nə̀ń bɛɛ don də nə, ʋ dəri ʋ bɩ̀àn, ʋ cɩcɩ.» Pɩ̀ʋ́ Davidə kʋ́ʋ̀ swɩ̀n, ʋ wʋ́: «Ʋ də yɩ ŋwɛn nə, ʋ ja bɩ̀àn.» 27 Kwatarʋ tə, ʋ yà nə ywàŋá tɩʋ tə nə, swɩ̀n, ʋ wʋ́: «À nə na təntən lìù tə dəru tə, kʋ yɩ ndə Sadɔkə bìú Ahimasə nə.» Pɩ̀ʋ́ Davidə swɩ̀n, ʋ wʋ́: «Ʋ yɩ ləzwənzəŋu. Kʋ yɩ sʋywáŋʋ́ nə, ʋ ja bɩ̀àn.» 28 Ahimasə nə twi, ʋ bwə́lə́ lá, ʋ bubwi, ʋ swɩ̀n pɩ̀ʋ́ Davidə con, ʋ wʋ́: «À jʋnɩ mʋ́, à nyɩna pɩ̀ʋ́!» Ʋ tʋa ʋ nadwana yuu, ʋ pú ʋ yáá tɩa, pɩ̀ʋ́ Davidə yáá con, ʋ pa wá dun, ʋ ga swɩ̀n, ʋ wʋ́: «À bwɩ Ba-Yígúrə́-Jə-Tiu nə, ʋ nə yɩ n Yɩɩ. Ʋ mʋ̀ nə ken lɩ̀à tə, ba nə zàn ba zɩga n mʋ̀ à nyɩna pɩ̀ʋ́ nə tə, n jɩɩn wa!» 29 Pɩ̀ʋ́ Davidə bwe, ʋ wʋ́: «À bìú Abəsalomə yɩra zurə naaa?» Yá Ahimasə le, ʋ wʋ́: «Máŋá tə, Zʋabə nə tʋn à də n tʋtʋnʋ tə don tə, à nɩ də, kwatara tə yà tʋ́tʋ̀nɩ́ duən, zənzən. Yá à dàń nə wà kʋ də̀ń lwarɩ.» 30 Pɩ̀ʋ́ Davidə swɩ̀n, ʋ wʋ́: «Zàn, n zɩgɩ jɩ̀ŋà nə, yəbə.» Ahimasə ma zàn, ʋ zɩga jɩ̀ŋà nə. 31 Kʋ máŋá tə wa, də nə̀ń Kuswə tíú tə nə, ʋ yí. Ʋ swɩ̀n pɩ̀ʋ́ Davidə con, ʋ wʋ́: «À nyɩna pɩ̀ʋ́, nə̀ń sʋywáŋʋ́ tə, à nə ja bà, sə à pa mʋ́! Zə̀n kʋ tə, Ba-Yígúrə́-Jə-Tiu bʋ̀rɩ̀ n bʋra, kʋ twá cɩ́gá nə, ndə kʋ nə mɛ nətʋ. Ʋ jon mʋ́ lɩ̀à tə mama jɩɩn wa, ba yà nə zɩga n nə!» 32 Yá pɩ̀ʋ́ Davidə bwe Kuswə tíú tə, ʋ wʋ́: «À bìú Abəsalomə yɩra zurə naaa?» Kuswə tíú tə ma le, ʋ wʋ́: «Yɩɩ wá pa yoo tə, kʋ nə yí ʋ mʋ̀ balandʋrʋ təntə, yí n mʋ̀ à nyɩna pɩ̀ʋ́ dʋŋa tə, də lɩ̀à tə mama, ba nə zɩga n nə.»