Təntən sagɩ tə
Samiyɛlə
nə pʋ́pʋ́nɩ́
Samiyɛlə təntən sagɩ tə yuu wa sʋgʋ
Yɩɩ nii sʋ̀sʋ̀nʋ̀ Samiyɛlə yɩrɩ wulə saga bələ yuu wa, ba nə boŋə Samiyɛlə təntən sagɩ, də Samiyɛlə bələ nii sagɩ. Saga bələ təntə yà yɩ sagɩ nəfarʋ nədʋ, yá ba dàń pwɛ̀ kʋ wa bələ, kʋ nə dáá zənzən yɩrɩ. Samiyɛlə yà yɩ Yɩɩ nii sʋ̀sʋ̀nʋ̀, də Yɩɩ joŋwanʋ, də bʋra lìù.
Samiyɛlə təntən sagɩ tə bɩrɩ yìə̀n tə nə tʋn Yɩzərayɛlə lɩ̀à kwatara yáá tɩ̀án máŋá tə, də Yɩzərayɛlə lɩ̀à pɛ̀gá máŋá tə pwə́rə́ wa. Kʋ nə zɩgɩ sagɩ tə swapitərə 1, kʋ ja va kʋ swapitərə 7, nə na də Samiyɛlə yà nə lɩ Yɩzərayɛlə lɩ̀à yìə̀n yáá, ʋ ga tʋŋa Yɩɩ tʋtʋŋɩ tə, yá ʋ pɩn ba kwìə̀, sə ba ma ta kʋ̀ʋ̀ ba zɩgɩ ba dʋŋa nə. Kʋ nə zɩgɩ swapitərə 8, kʋ ja va swapitərə 10, Yɩzərayɛlə lɩ̀à yà kʋ́ʋ̀ ba kwatara yáá tɩ̀án tə Yɩɩ nə pɩn ba yuu wa jələ. Yá ba dàń lòrì Samiyɛlə sə ʋ tún pɩ̀ʋ́ ʋ pa ba, ʋ nə wá ya ba yáá máŋá mama, ʋ lɩ ba yìə̀n yáá, ʋ ga janɩ ba ʋ vəli kʋ̀ʋ̀, də ʋ pìí ʋ twi.
Kʋ nə zɩgɩ swapitərə 11, kʋ ja va swapitərə 15, Yɩɩ pɩn Samiyɛlə tún Sayulə, sə ʋ ya Yɩzərayɛlə lɩ̀à təntən pɩ̀ʋ́. Sayulə dí dɩ̀àn dʋŋa kapʋpʋ yuu wa, yá kʋ yígúrə́ wa, ʋ wà cɩ́gá nə twá ndə kʋ nə mɛ nətʋ, Yɩɩ yáá con, kʋ pa Yɩɩ vɩ wá ʋ dʋgʋ, ʋ ga kúrí Davidə sə ʋ jon Sayulə yuu nə. Davidə yà tʋŋa ʋ pɩn Sayulə nə, də ʋ waa mama, yá Sayulə mʋ̀ yà pɩ̀à sə ʋ gʋ Davidə.
Kʋ nə zɩgɩ swapitərə 16, kʋ ja va swapitərə 31, Sayulə dɩ̀àn yà muŋə wuuu, yá Davidə dɩ̀àn ga súrí wuuu. Sagɩ tə yígúrə́ wa, nə na nətʋ tə Sayulə də ʋ bɩ̀á tə nə tɩga kʋ̀ʋ̀ wa.
Samiyɛlə təntən sagɩ yɩ kʋ lìí nəba, də Yɩɩ cɩcɩ nə yɩ ʋ lɩ̀à tə pɩ̀ʋ́. Lìù wàrɩ̀ pàrɩ̀ ʋ də́ Yɩɩ lɩ̀à tə yuu wa, də kʋ tíú tətə nə wà sɛ̀, sə Yɩɩ də́ pàrɩ̀ ʋ yuu wa.