Rutə i

Rutə

Rutə sagɩ tə yuu wa sʋgʋ

Rutə sagɩ tə wa yìə̀n tə yɩ tə tʋn, máŋá tə wa, pɛ̀gá nə ywàŋá Yɩzərayɛlə lɩ̀à yuu nə. Yá yìə̀n təntə nə tʋn tə kɛ̀ń kwa nə, ba dàń pʋ́pʋ́nɩ́ tə, ba tún máŋá don wa, lìù nə kʋ́ʋ̀ yəri máŋá təntə. Sagɩ tə bɩrɩ nətʋ tə, kavee nə wànɩ́, ʋ zʋ Yɩɩ lɩ̀à tə púlí tə wa. Kʋ swɩ̀n Rutə yoo, ʋ nə yɩ Mʋabə tɩ̀án bʋ̀á. Kʋ bɩrɩ nətʋ Rutə nə soni ʋ barɩ dwíí tə, də Yɩzərayɛlə lɩ̀à Yɩɩ tə. Kʋ tə bɩrɩ nətʋ Yɩɩ nə ŋwɩ́n wá, ʋ sonu tə yɩrɩ. Yolwan tə kʋ nə yí Rutə də ʋ barɩ nuu Nowemi pìí kʋ jì ywánɩ́ máŋá don wa, kʋ pa ba. Sagɩ tə pɩ̀à kʋ bɩrɩ, ləzwənə də ʋ don nə wàá duən ba sóní nətʋ, də ləzwənə nə wàá Yɩɩ ʋ sóní nətʋ.

Sagɩ tə yoo tə, kʋ nə wulə tə mɛ yuu wa, kʋ yɩ Rutə bìú tə lʋrʋ yoo. Mə bìú təntə nə jigə pɩ̀ʋ́ Davidə nɩbɛɛ. Kʋ dàń pɩn, Rutə ʋ nə yɩ Mʋabə tɩ̀án bʋ̀á, də twá ʋ zʋ Davidə nɩbara-ba wa, yá ʋ dàń wulə Zwezi nɩbara-ba wa. (Ywàń Matiə 1.5 wa.)