Kwatara yáá tɩ̀án
tʋ̀tʋ̀nán yoo
Kwatara yáá tɩ̀án sagɩ tə yuu wa sʋgʋ
Sagɩ tə bɩrɩ yìə̀n tə nə yí Yɩzərayɛlə lɩ̀à tə, máŋá tə wa, ba nə jə̀ə́ Kanaan lʋʋ nii tə wa, kʋ va kʋ yí máŋá tə, ba nə tún ba pàrɩ̀ tə. Kwatara yáá tɩ̀án tə yɩ lɩ̀à, Yɩɩ nə yàá pa ba dɩ̀àn, sə ba ywàń lalʋʋ tə yuu nə, nə à yə̀ə́, sə ba jon ba púlə́ tə duən, ba nə wulə càn wa.
Kwatara yáá tɩ̀án sagɩ tə pwɛ̀ bwálá batwa. Kʋ təntən bwálɩ́ tə zɩgɩ swapitərə 1 vɛrəse 1, kʋ va kʋ yí swapitərə 2 vɛrəse 10. Kʋ bwálɩ́ təntə bɩrɩ yìə̀n tə nə yí Yɩzərayɛlə lɩ̀à tə, máŋá tə wa, ba nə jə̀ə́ Kanaan lʋʋ nii tə wa, kʋ va kʋ yí Zozuwe tɩan. Bələ nii bwálɩ́ tə zɩgɩ swapitərə 2 vɛrəse 11, kʋ va kʋ yí swapitərə 16 vɛrəse 31 wa. Kʋ bwálɩ́ tə bɩrɩ nətʋ, Yɩɩ nə kúrí lɩ̀à, ʋ ma joŋə Yɩzərayɛlə lɩ̀à tə, máŋá tə wa, ba nə wulə càn wa. Batwa nii bwálɩ́ tə zɩgɩ swapitərə 17, kʋ va yí swapitərə 21. Kʋ bwálɩ́ tə bɩrɩ nətʋ yìə̀n gurəgurə nə yɩn Yɩzərayɛlə lɩ̀à púlə́ tə wa, də ba tə wà ba pàrɩ̀ tə tún. Sagɩ kʋ tə bɩrɩ də yìə̀n tə nə yí Yɩzərayɛlə lɩ̀à tə yɩ tə pɩ̀à tə bɩrɩ, ba nə yɩ nətʋ, də Yɩɩ nimarʋ tə. Máŋá tə ba nə ba Yɩɩ nii zìlí, dwíə́ nəkaran tə yàá fɩfɩn ba. Yá máŋá tə, ba nə pìí ba bà Yɩɩ con, ba lòrì ʋ sáŋʋ́, Yɩɩ yàá jon ba. Mə kʋ yɩ nətʋ máŋá mama, yá Yɩzərayɛlə lɩ̀à tə ga pɩ̀à, ba tʋn ba pa Kanaan tɩ̀án yɩa tə nə. Swapitərə 19, kʋ va kʋ yí swapitərə 21 wa, kʋ bɩrɩ də Yɩzərayɛlə lɩ̀à tə yàá swɛ̀ɛ́ yìə̀n tə Yɩɩ nə culi. Sagɩ tə batwa nii bwálɩ́ təntə bɩrɩ kʋ tə, Yɩzərayɛlə lɩ̀à tə yà nə wá jì, də Yɩɩ nə yá ba, sə ba tɩnɩ ba tɩ̀àn. Kʋ bɩrɩ ba, sə ba kúrí Yɩɩ tə ba nə swə, sə ʋ tɩnɩ ba. Kʋ tə bɩrɩ ba, də ba lìù mama kʋ́ʋ̀ wà mɛ, sə ʋ ya ndə ʋ nə swə nətʋ.