Zozuwe 24

Yɩzərayɛlə lɩ̀à kúrí ba tì, sə ba tʋn ba pa Ba-Yígúrə́-Jə-Tiu nə

1 Zozuwe ken Yɩzərayɛlə dwíə́ tə mama duən yáá, Siswɛmə nə. Ʋ bon ba nəkwɩna, də ba yáá tɩ̀án, də ba lɩ̀à tə nə bʋ̀rɩ̀ bʋra, də ba tʋ̀tʋ̀nán yun tɩ̀án. Ba twi Yɩɩ yáá con. 2 Yá Zozuwe dàń swɩ̀n lalʋʋ tə mama con, ʋ wʋ́: «Á nəŋə kʋ tə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, nə swɩ̀n. Ʋ swɩ̀n də fuən nə, á nɩbɛɛ Tera, də ʋ bɩ̀á Abərahamə də Nahɔrə yà yɩ ba wulə Əfəratə mʋnaa tə kwa con, yá ba yà yɩ yɩa duən ba jʋnɩ. 3 Yá ʋ mʋ̀ Ba-Yígúrə́-Jə-Tiu nə lɩ á nɩbɛɛ Abərahamə, mʋnaa tə kwa con, ʋ pa ʋ bà, ʋ jírí Kanaan lʋʋ nii tə mama wa. Ʋ pɩn á nɩbɛɛ Abərahamə dwíí pùlì zənzən. Ʋ pɩn wá bìú, ʋ yɩrɩ nə yɩ Yɩzakə. 4 Ʋ pɩn bɩ̀á bələ Yɩzakə nə, ba yɩra nə yɩ Zwakɔbə də Ezayu. Ʋ pɩn Seyirə paan tə Ezayu nə, sə ka ya ʋ nyiən. Yá Zwakɔbə mʋ̀ də ʋ bɩ̀á tə vəli Ezwipətə lʋʋ nii. 5 Kʋ kwa nə, ʋ mʋ̀ Ba-Yígúrə́-Jə-Tiu tʋn Moyizə də Aron, ʋ ga kə càn Ezwipətə tɩ̀án nə, kʋ twá yìə̀n tə nə, ʋ nə tʋn ba titəŋi wa. Yá ʋ dàń lɩ aba, Ezwipətə lʋʋ nii tə wa. 6 Ʋ lɩ á nɩbara-ba tə, Ezwipətə lʋʋ nii tə wa, yá á dàń twi á yí Mɩncanɩ mʋʋ tə. Ezwipətə tɩ̀án dɩŋɩ á nɩbara tə kwa, ba va ba yí bwálɩ́ təntə wa, də səsen kòrə̀n, də səsədɩra. 7 Á nɩbara-ba bubwi ba kə Ba-Yígúrə́-Jə-Tiu nə, yá ʋ dàń ken yikunu á də Ezwipətə tɩ̀án tə pwə́rə́ wa. Ʋ pɩn mʋʋ tə nɩ́á tə pìí tə bà, tə pú Ezwipətə tɩ̀án tə yuu nə. Yá á yɩ́á dìgə̀ kʋ tə, ʋ nə ma tʋn Ezwipətə tɩ̀án tə. Yá á yɩn kasɔɔ lanworu tə wa, á dán lá zənzən. 8 Yá kʋ kwa nə, ʋ jɩn aba ʋ va Amɔrə dwíí tə lʋʋ nii wa. Ba yà yɩ ba wulə Zʋrədɛn mʋnaa tə yɩɩ yipɩan con. Ba ta kʋ̀ʋ̀ də aba, yá Ba-Yígúrə́-Jə-Tiu ken ba á jɩɩn wa, ʋ pa á jon ba lʋʋ nii tə, ʋ ga cʋ̀gʋ̀ ba, á yáá con. 9 Sipɔrə bìú Balakə, ʋ nə yɩ Mʋabə pɩ̀ʋ́, də ta kʋ̀ʋ̀ də Yɩzərayɛlə lɩ̀à tə. Balakə pɩn ba bon Bewɔrə bìú Balamə, sə ʋ zɩrɩ ʋ kə á nə. 10 Yá Ba-Yígúrə́-Jə-Tiu wà sɛ̀, ʋ pa cwəŋə Balamə nə. Yá kʋ dàń yɩn zəni nə, Balamə pìí ʋ lòrì, sə Yɩɩ fwa á yɩra. Yá Ba-Yígúrə́-Jə-Tiu dàń jon aba, Balakə jɩɩn wa. 11 Á bɩn Zʋrədɛn mʋnaa tə á nan, á va Zweriko. Yá Zweriko tɩ̀án ta kʋ̀ʋ̀ də aba, ndə Amɔrə dwíí tə, də Perizi dwíí tə, də Kanaan tɩ̀án, də Ɛtə dwíí tə, də Girəgasə tɩ̀án, də Evi dwíí, də Yebusə tɩ̀án nə ta kʋ̀ʋ̀ də aba nətʋ. Yá Ba-Yígúrə́-Jə-Tiu ken ba á jɩɩn wa. 12 Ʋ pɩn kələnloŋi ya á yáá, tə dɩŋa Amɔrə dwíí tə pɛ̀gá bələ tə, tə kə yiŋʋnɩ, á yáá con. Kʋ tà á sɩ̀án, nə à yə̀ə́ á twɛn nə pɩn á də́ dɩ̀àn. 13 Yá ʋ dàń pɩn aba lʋʋ nii, á nə wà càn dí kʋ yɩrɩ. Ʋ pɩn aba tɩan, á wulə tə wa, tə ga tà á mʋ̀ nə lwə̀. Ʋ pɩn aba divɛn tɩ̀án kárɩ́, də olivə* tɩ̀án kárɩ́, á də́ tə lənə, tə ga tà á mʋ̀ nə cwɛn.»

14 Zozuwe dàń swɩ̀n, ʋ súrí lá, ʋ wʋ́: «Kʋ mʋ̀ yɩrɩ, Sɩ́ʋ́n nə, á zìlə́ Ba-Yígúrə́-Jə-Tiu nii, á ga tʋn á pa wá də pùə́ nədʋ, kʋ twá cɩ́gá nə, ndə kʋ nə mɛ nətʋ. Á dʋga yɩa tə, á nɩbara-ba yà nə jʋnɩ Əfəratə mʋnaa tə kwa con, də Ezwipətə lʋʋ nii tə wa, sə á ga tʋn á pa Ba-Yígúrə́-Jə-Tiu nə. 15 Yá á nə bʋŋa də, á wà mɛ, sə á tʋn á pa Ba-Yígúrə́-Jə-Tiu nə, sə á dàń kúrí yɩɩ tə, á nə pɩ̀à sə á tʋn á pa wá, zə̀n kʋ tə. Á nə swə, sə á tʋn á pa yɩa tə nə, á nɩbara-ba yà nə jʋnɩ, mʋnaa tə kwa con, nə à yə̀ə́ sə á tʋn á pa Amɔrə dwíí yɩa tə nə, á nə wulə ba lʋʋ nii wa. À mʋ̀ də à dìə̀ lɩ̀à wá tʋn nə pa Ba-Yígúrə́-Jə-Tiu nə.»

16 Yá lalʋʋ tə le, ba wʋ́: «Yɩɩ wá cɩ̀ sə nə vɩ Ba-Yígúrə́-Jə-Tiu nə dʋgʋ, nə ga tʋn nə pa yɩa duən nə! 17 Cɩ́gá, Ba-Yígúrə́-Jə-Tiu nə yɩ nə Yɩɩ. Ʋ mʋ̀ nə lɩ nə də nə nɩbara-ba yongaʋ tə wa, Ezwipətə lʋʋ nii tə wa. Ʋ mʋ̀ nə tʋn yomɩlan nəfaran tə tə, nə yɩ́á yuu. Ʋ ywàń nə yuu, máŋá tə mama, nə nə yɩn cwəŋə tə wa, də dwíə́ nəkaran* tə mama wa, nə nə twá nə kɛ̀ń. 18 Ba-Yígúrə́-Jə-Tiu nə dɩŋɩ dwíə́ nəkaran tə, də Amɔrə dwíí tə, nə yáá con, ba yà nə wulə lʋʋ nii kʋ tə wa. Kʋ mʋ̀ nə pɩn, nə də wá tʋn nə pa Ba-Yígúrə́-Jə-Tiu nə, ʋ nə yɩ nə Yɩɩ tə yɩrɩ.»

19 Zozuwe ma swɩ̀n lalʋʋ tə con, ʋ wʋ́: «Á wàrɩ̀ á tʋŋa á pɩn Ba-Yígúrə́-Jə-Tiu nə. Cɩ́gá, ʋ yɩ Yɩɩ tə, ʋ nə yɩ parɩ, ʋ ga pɩ̀à sə ʋ cɩcɩ nə ya á Yɩɩ. Ʋ bá sɛ̀ sə á vɩ ʋ nii, ʋ ma bá sɛ̀ sə á tʋn cʋna, á zɩgɩ ʋ nə. 20 Á nə vɩga Ba-Yígúrə́-Jə-Tiu, á ga pìí á tʋŋa á pɩn yɩa nəkaran nə, ʋ wá vəvəri ʋ kə càn á nə. Ʋ wá gʋ á mama ʋ zwɛ̀, yá ʋ yà dí yáá ʋ fwa zəni á yɩra.»

21 Yá lalʋʋ tə le Zozuwe, ba wʋ́: «Ɔn ɔn! Cɩ́gá, nə wá tʋn nə pa Ba-Yígúrə́-Jə-Tiu nə.» 22 Yá Zozuwe dàń swɩ̀n lalʋʋ tə con, ʋ wʋ́: «Á yɩ á tətə dansɩa lɩ̀à, də á mʋ̀ nə kúrí Ba-Yígúrə́-Jə-Tiu, á tɩ̀àn nə, sə á tʋn á pa wá.» Lalʋʋ tə ma le, ba wʋ́: «Nə yɩ nə tətə dansɩa lɩ̀à!» 23 Zozuwe ma swɩ̀n ba con, ʋ wʋ́: «Kʋ nə yɩ nətʋ, sɩ́ʋ́n nə, á dàń lɩa yɩa nəkaran tə nə wulə á titəŋi wa, á dʋgʋ, á ga vəvəri á bɩcanɩ, á kə Ba-Yígúrə́-Jə-Tiu con, ʋ nə yɩ Yɩzərayɛlə lɩ̀à Yɩɩ.» 24 Lalʋʋ tə le Zozuwe, ba wʋ́: «Nə wá tʋn nə pa Ba-Yígúrə́-Jə-Tiu nə, ʋ nə yɩ nə Yɩɩ, nə ga wá zìlí ʋ nii.

25 Zozuwe tún nimarʋ də lalʋʋ tə, Siswɛmə nə, kʋ dɩɩn tə nə. Ʋ bɩrɩ ba yìə̀n tə, Yɩɩ nə bɩrɩ, sə tə tʋn, ʋ ga tún coŋi, ʋ pa ba, sə ba twá tə nə. 26 Zozuwe dàń pʋ́pʋ́nɩ́ yìə̀n təntə, Yɩɩ nii sagɩ tə wa. Kʋ kwa nə, ʋ zɩ̀n kapan nəfarʋ, ʋ zɩgɩ yɩɩ nə, sɩsanʋ tə də̀ń nə, kʋ yà nə wulə Ba-Yígúrə́-Jə-Tiu jə́rə́ bwálɩ́* tə wa. 27 Yá Zozuwe swɩ̀n lalʋʋ tə mama con, ʋ wʋ́: «Á ywàŋá! Kapan kʋ tə nə wá ya mɩmɩnʋ, kʋ pa nəba. Cɩ́gá, kʋ nì sʋ̀ràn tə mama, Ba-Yígúrə́-Jə-Tiu nə swɩ̀n nə con. Yá kʋ dàń wá ya mɩmɩnʋ, kʋ lìí aba, sə á dàn ká vɩ á Yɩɩ tə.» 28 Kʋ kwa nə, Zozuwe pɩn cwəŋə lalʋʋ tə nə, ba lìù mama pìí ʋ va ʋ sàń.

Zozuwe tɩan yoo

29 Yìə̀n təntə kwa nə, Nun bìú Zozuwe, ʋ nə yɩ Ba-Yígúrə́-Jə-Tiu tʋtʋnʋ, tɩga. Ʋ tɩga də ʋ jə bɩna bíí də fugə. 30 Ba gùrì wá lʋʋ nii tə wa, ba nə tarɩ ba pa wá, Timənatə-Sera nə, Efərayimə pɛɛn nagwanaa tə wa, Gaswə paan tə jɩzən saparʋ con. 31 Yɩzərayɛlə lɩ̀à tʋn ba pa Ba-Yígúrə́-Jə-Tiu nə, Zozuwe lʋʋ wúlú tə mama wa. Yá ba tə tʋn ba pa Ba-Yígúrə́-Jə-Tiu nə, Zozuwe tɩan kwa nəkwɩna tə də lʋʋ wúlú tə mama wa. Nəkwɩna təntə yà yə̀ə́ tʋ̀tʋ̀nán tə mama, Ba-Yígúrə́-Jə-Tiu nə tʋn, ʋ pa Yɩzərayɛlə lɩ̀à tə nə.

32 Yɩzərayɛlə lɩ̀à tə gùrì Zʋzɛfə kurən tə, ba nə ja nan Ezwipətə tə, Siswɛmə nə, tɩa tə wa Zwakɔbə nə jon ʋ yə̀, Siswɛmə nyɩna Hamɔrə bɩ̀á tə con, səbilurən bíí. Bwálɩ́ təntə yà yɩ kʋ wulə Zʋzɛfə dwíí tə nagwanaa wa. 33 Aron bìú Eleyazarə də tɩga, yá ba gùrì wá Efərayimə pɛɛn nagwanaa paan tə don yuu wa, ba yà nə pɩn ʋ bìú Fineyasə nə.