Zozuwe talɩkwa sʋ̀ràn
23
1 Bɩna kapʋpʋ yà kə̀ń, Ba-Yígúrə́-Jə-Tiu nə pɩn Yɩzərayɛlə lɩ̀à tə na sìə́, ba dʋŋa tə mama jɩɩn wa, ba nə kɩkarɩ ba. Yá Zozuwe dàń yà kwɩn zənzən, ʋ jì bazʋnʋ. 2 Yá ʋ dàń bon Yɩzərayɛlə lɩ̀à tə mama, ba nəkwɩna, də ba yáá tɩ̀án, də ba lɩ̀à tə nə bʋ̀rɩ̀ bʋra, də ba tʋ̀tʋ̀nán yun tɩ̀án, ʋ kun duən yáá. Yá ʋ dàń swɩ̀n ba con, ʋ wʋ́: «À kwɩn zənzən! À jìgə̀ bazʋnʋ! 3 Yá á mʋ̀ nɩ won tə mama, Ba-Yígúrə́-Jə-Tiu, ʋ nə yɩ á Yɩɩ, nə tʋn dwíə́ nəkaran* tə mama wa, á mʋ̀ yɩrɩ. Cɩ́gá, kʋ yɩ Ba-Yígúrə́-Jə-Tiu, ʋ nə yɩ á Yɩɩ, nə ta ʋ pa aba. 4 Dwíə́ nəkaran tə lʋʋ nii tə kʋ nə ga, sə á ta á jon, zɩgɩ Zʋrədɛn mʋnaa tə nə, də dwíə́ nəkaran tə mama, à nə ta, kʋ va kʋ yí mʋʋ nəfarʋ tə, kʋ nə wulə yɩɩ yizwɩa con. Á nɩ də, à pwárɩ́ à ma tara kʋ, à pa aba. Yá á dwíə́ tə mama dàń jə ba tori. 5 Ba-Yígúrə́-Jə-Tiu, ʋ nə yɩ á Yɩɩ, wá dɩŋa dwíə́ nəkaran təntə, ʋ kə yiŋʋnɩ də aba. Yá á dàń wá tɩnɩ lʋʋ nii tə, ndə Ba-Yígúrə́-Jə-Tiu, ʋ nə yɩ á Yɩɩ, nə kàn nii də aba nətʋ. 6 Á dàń kənə dɩ̀àn, á zìlí kʋ tə mama nii, kʋ nə pʋ́pʋ́nɩ́ Yɩɩ nii sagɩ tə wa, ʋ nə pɩn Moyizə nə, á ga twá kʋ nə. Á dànà ká yori, á kə á jɩzən, nə à yə̀ə́ á jɩgwiə, á ga yá kʋ. 7 Á dànà ká guli á tɩ̀àn dwíə́ nəkaran tə wa, ba nə wulə də aba. Á wà mɛ sə á bon ba yɩa tə yɩrɩ. Á wà mɛ sə á bon ba yɩa tə yɩrɩ, á ma dù durə. Á wà mɛ sə á jʋn tə. Á wà mɛ sə á tʋ á nadwana yuu tə yáá con, á pa tə dun. 8 Yá á dàń mɛ sə á vwa á tɩ̀àn Ba-Yígúrə́-Jə-Tiu cɩcɩ yɩra, ʋ nə yɩ á Yɩɩ, ndə á nə dí yáá á tʋn nətʋ, kʋ bà kʋ yí zə̀n. 9 Ba-Yígúrə́-Jə-Tiu dɩŋɩ dwíə́ nəkaran ba nə jə dun, ba ga jə dɩ̀àn, á yáá con. Yá də zə̀n mama, lìù mama wà wànɩ́, ʋ ta ʋ zɩgɩ á nə. 10 Á wa ladʋa cɩcɩ yàá dɩŋa ba lɩ̀à mʋ̀rʋ̀, Ba-Yígúrə́-Jə-Tiu, ʋ nə yɩ á Yɩɩ, yà nə tɛ ʋ pɩn aba yɩrɩ. Cɩ́gá, ʋ yà dí yáá ʋ kàn nii də aba, də ʋ wá tʋn kʋ nətʋ. 11 Á dàń cɩa á tɩ̀àn nə zəni, sə á ga sóní Ba-Yígúrə́-Jə-Tiu, ʋ nə yɩ á Yɩɩ. 12 Á nə viviri á kwa á ma sà wá, á ga vwa á tɩ̀àn dwíə́ nəkaran ba tə yɩra, ba nə wulə də aba, á də ba nə swe duən, á ga guli á tɩ̀àn ba wa, 13 á yənə də, Ba-Yígúrə́-Jə-Tiu, ʋ nə yɩ á Yɩɩ, kʋ́ʋ̀ bá dɩŋa ba, ʋ lɩ lʋʋ nii tə wa, á yáá con. Yá ba dàń wá jì ndə gəgəlu nə, nə à yə̀ə́ ndə nyalɩ nə, nə à yə̀ə́ ndə kafɩʋ nə, kʋ nə fɩrɩ á tàŋá wa, nə à yə̀ə́ ndə casʋran nə, tə nə zwe á yɩ́á nə. Yá kʋ dàń wá ya nətʋ, á kori á tɩ á zwɛ̀, lʋʋ nii nəzəŋu kʋ tə wa, Ba-Yígúrə́-Jə-Tiu, ʋ nə yɩ á Yɩɩ, nə pɩn aba.14 Sɩ́ʋ́n nə, à mʋ̀ dàń yɩ à vələ bwálɩ́ tə, tɩa yuu ləzwənə mama nə vəli. Á yə̀ə́ də á bɩcan mama, də á jə̀rə́ mama wa, də sʋywáŋá tə mama wa, Ba-Yígúrə́-Jə-Tiu, ʋ nə yɩ á Yɩɩ, nə swɩ̀n á yuu wa, sʋgʋ nədʋ tətə tə̀lə́, kʋ nii nə wà swí. Tə mama nii súə́, tə pa aba, nədʋ tətə wà gɛ. 15 Yá kʋ nə zɩgɩ nətʋ, Ba-Yígúrə́-Jə-Tiu, ʋ nə yɩ á Yɩɩ, sʋywáŋá tə mama, ʋ nə swɩ̀n á con, nii ma sú tə pa aba, mə kʋ wá zɩgɩ nətʋ, ʋ ma pa càn yí aba, ʋ kori ʋ cʋ̀gʋ̀ á mama ʋ zwɛ̀, lʋʋ nii nəzəŋu kʋ tə wa, ʋ tətə Ba-Yígúrə́-Jə-Tiu, ʋ nə yɩ á Yɩɩ, nə pɩn aba. 16 Á nə cʋ̀gʋ̀ nimarʋ* tə, Ba-Yígúrə́-Jə-Tiu, ʋ nə yɩ á Yɩɩ nə tún ʋ pa aba, á ga va á jʋn yɩa duən, á tʋ á nadwana yuu tə yáá con, á pa tə dun, Ba-Yígúrə́-Jə-Tiu lɩŋa wá zàn á yuu wa. Yá ʋ wá pa á tɩ á zwɛ̀ lala, lʋʋ nii nəzəŋu kʋ tə wa, ʋ nə pɩn aba.