Zozuwe 22

Yɩzərayɛlə dwíə́ bələ də faan tə nə wulə Zʋrədɛn mʋnaa tə yɩɩ yipɩan con, pìí ba vìí

1 Zozuwe dàń bon Ribɛn dwíí tə, də Gadə dwíí tə, də Manase dwíí faan tə. 2 Ʋ swɩ̀n ba con, ʋ wʋ́: «Á sɛ̀ á zìlí kʋ tə mama nii, Ba-Yígúrə́-Jə-Tiu tʋtʋnʋ Moyizə nə pɩn nii, sə á tʋn. Yá á zìlí à də nii, kʋ tə mama yuu wa, à nə pɩn aba nii, sə á tʋn. 3 Yá kʋ nə zɩgɩ kʋ máŋá təntə mama, kʋ bà kʋ yí zə̀n, á wà á nubɩa tə vɩ á dʋgʋ. Yá á zìlí nii tə, Ba-Yígúrə́-Jə-Tiu, ʋ nə yɩ á Yɩɩ, nə pɩn aba. 4 Sɩ́ʋ́n nə, Ba-Yígúrə́-Jə-Tiu pɩn sìə́ á nubɩa tə nə, ndə ʋ nə kàn nii də ba nətʋ. Á dàń pìrə́ á va á sànɩ́, lʋʋ nii tə wa, Ba-Yígúrə́-Jə-Tiu tʋtʋnʋ Moyizə nə pɩn aba, Zʋrədɛn mʋnaa tə yɩɩ yipɩan con. 5 Á kənə dɩ̀àn, sə á twá Yɩɩ nii* yìə̀n tə nə, Ba-Yígúrə́-Jə-Tiu tʋtʋnʋ Moyizə nə pɩn aba nii tə yuu wa. Á swənə Ba-Yígúrə́-Jə-Tiu, ʋ nə yɩ á Yɩɩ. Á twaga kʋ tə mama nə, ʋ nə bɩrɩ aba, á ga zìlí ʋ yìə̀n tə, ʋ nə pɩn nii tə yuu wa. Á vwiə á tɩ̀àn ʋ yɩra, á ga tʋn á pa wá, də á bɩcanɩ mama, də á jə̀rə́ mama.

6 Yá Zozuwe dàń lòrì, sə Yɩɩ fwa zəni ba yɩra. Kʋ kwa nə, ʋ pɩn ba cwəŋə, yá ba dàń pìí ba va ba sànɩ́. 7 Moyizə yà pɩn tori, Manase dwíí tə faan nə, Baswan nə. Yá Zozuwe də pɩn tori, faan tə don tə nə, ba nubɩa tə səpuni nə, Zʋrədɛn mʋnaa tə yɩɩ yizwɩa con. Yá máŋá tə Zozuwe nə pɩn ba cwəŋə, sə ba pìí ba va ba sànɩ́, ʋ lòrì, sə Yɩɩ fwa zəni ba yɩra. 8 Ʋ swɩ̀n ba con, ʋ wʋ́: «Á pìrə́ á va á sànɩ́, də jɩjə kapʋpʋ, də vàná kapʋpʋ, də wárʋ́, də sɩ́án, də cɩnɩan, də lugu, də gànàn kapʋpʋ. Á də á nubɩa tə tara á dʋŋa tə wiən təntə, á nə ta á jon.»

9 Ribɛn dwíí tə, də Gadə dwíí tə, də Manase dwíí faan tə dàń nan Yɩzərayɛlə lɩ̀à tə duən tə con, Silo nə, Kanaan lʋʋ nii tə wa, ba va ba sànɩ́, Galadə lʋʋ nii tə wa, ba nə tarɩ ba pa ba, kʋ twá nii tə nə, Ba-Yígúrə́-Jə-Tiu nə pɩn Moyizə nə.

Yɩzərayɛlə dwíə́ bələ də faan tə lwə̀ Yɩɩ joŋi bwálí, Zʋrədɛn mʋnaa tə nii nə

10 Ribɛn dwíí tə, də Gadə dwíí tə, də Manase dwíí faan tə vəli ba yí Zʋrədɛn mʋnaa tə nii nagwanaa tə nə wulə Kanaan lʋʋ nii tə wa. Yá ba dàń lwə̀ Yɩɩ joŋi bwálɩ́ nəfarʋ, mʋnaa tə nii nə. 11 Yá Yɩzərayɛlə lɩ̀à tə duən tə nì də Ribɛn dwíí tə, də Gadə dwíí tə, də Manase dwíí faan tə lwə̀ Yɩɩ joŋi bwálɩ́, Zʋrədɛn mʋnaa tə nii nagwanaa tə wa, ka nə daa Kanaan lʋʋ nii tə nə, Yɩzərayɛlə lɩ̀à tə vàn con. 12 Yá Yɩzərayɛlə lɩ̀à tə duən tə nə nì kʋ, ba lalʋʋ tə mama twi ba kun duən nə, Silo nə, sə ba va ba ta kʋ̀ʋ̀ də dwíə́ bələ də faan tə. 13 Yɩzərayɛlə lɩ̀à tə tʋn Yɩɩ joŋwanʋ Eleyazarə bìú Fineyasə, Ribɛn dwíí tə, də Gadə dwíí tə, də Manase dwíí faan tə con, Galadə lʋʋ nii tə wa. 14 Yɩzərayɛlə dwíə́ tə yáá tɩ̀án fugə nə kwé wá, ba ja va. Ba lɩ yáá tíú nədʋ, dwíí mama wa. Yáá tɩ̀án təntə lìù mama yà yɩ sàń tíú, ʋ dwíí tə wa, Yɩzərayɛlə lalʋʋ tə wa. 15 Ba vəli ba yí Ribɛn dwíí tə, də Gadə dwíí tə, də Manase dwíí faan tə, Galadə lʋʋ nii tə wa, ba swɩ̀n, ba wʋ́: 16 «Á nəŋə kʋ tə, Ba-Yígúrə́-Jə-Tiu lalʋʋ tə mama nə swɩ̀n á con. Cʋna tə tə də̀ń nə yɩ bɛ̀ɛ̀ á nə tʋn, á zɩgɩ Yɩzərayɛlə lɩ̀à Yɩɩ tə nə, zə̀n kʋ tə? Yɩɩ joŋi bwálɩ́ tə, á nə lwə̀ bɩrɩ də, á vəvəri á kwa á ma sà Ba-Yígúrə́-Jə-Tiu, á ga vɩ ʋ nii, zə̀n kʋ tə. 17 Cʋna tə, nə nə dí yáá nə tʋn Pewɔrə nə tə, wà nəba mɛ naaa? Tə mʋ̀ yɩrɩ nə càn yí Ba-Yígúrə́-Jə-Tiu lalʋʋ tə mama. Yá də zə̀n mama, nə tə wà nə tɩ̀àn kwɛn, nə lɩ tə wa mɩ́ámɩ́án! 18 Yá á zə̀n dàń vəvəri á kwa, á ma sà Ba-Yígúrə́-Jə-Tiu! Á nə vɩga Ba-Yígúrə́-Jə-Tiu nii zə̀n kʋ tə, jwɩan nə, ʋ lɩŋa wá zàn Yɩzərayɛlə lalʋʋ tə mama yuu wa. 19 Yá á nə kʋ́ʋ̀ na də, á lʋʋ nii tə tà parɩ Yɩɩ yáá con, sə á pìí á bà lʋʋ nii tə wa, kʋ nə yɩ Ba-Yígúrə́-Jə-Tiu nyiən, bwálɩ́ tə nə, ʋ wúlú gansili tə nə wulə, á tì tori nə titəŋi wa. Á dàń nə dànà ká vɩ Ba-Yígúrə́-Jə-Tiu nii. Á nə lwə̀ Yɩɩ joŋi bwálɩ́ don, á súrí Ba-Yígúrə́-Jə-Tiu, ʋ nə yɩ nə Yɩɩ, joŋi bwálɩ́ tə nə, kʋ yɩ Ba-Yígúrə́-Jə-Tiu nii nə á vɩ. Yá á dàń wá pa, nə də twá nə jì lɩ̀à ba nə vɩ nii. 20 Máŋá tə, Zera bìú Akan nə vɩga nii, ʋ ga tì culu wiən tə, kʋ yɩn Yɩzərayɛlə lalʋʋ tə mama yuu wa nə, Ba-Yígúrə́-Jə-Tiu lɩŋa zàn. Yá kʋ tà ʋ cɩcɩ nə tɩga, ʋ cʋna tə yɩrɩ.»

Yɩzərayɛlə dwíə́ bələ də faan tə, də Yɩzərayɛlə dwíə́ tə duən tə pìí ba kə duən yuu

21 Ribɛn dwíí tə, də Gadə dwíí tə, də Manase dwíí faan tə le Yɩzərayɛlə dwíə́ tə duən tə sàń tɩ̀án tə, ba wʋ́: 22 «Ba-Yígúrə́-Jə-Tiu yɩ Yɩɩ tə, ʋ nə wulə tə mɛ yuu wa! Ba-Yígúrə́-Jə-Tiu yɩ Yɩɩ tə, ʋ nə wulə tə mɛ yuu wa! Ʋ mʋ̀ yə̀ə́ won tə nə pɩn, nə ma tʋn nətʋ. Yá Yɩzərayɛlə lɩ̀à tə də wá yəni kʋ! Də nə cɩ́gá nə vɩga Ba-Yígúrə́-Jə-Tiu nii, nə ga tʋn cʋna nə zɩgɩ ʋ nə, sə ʋ dàn ká yá nəba, ʋ pa nə ya lʋʋ wa, zə̀n kʋ tə! 23 Də Yɩɩ joŋi bwálɩ́ tə nə yɩ nə lwə̀, sə nə ma viviri nə kwa, nə ma sà Ba-Yígúrə́-Jə-Tiu, nə à yə̀ə́, sə nə ma fwa jwəŋə, ba nə sʋ̀rɩ́*, də pupoli jwəŋə*, də nimarʋ jwəŋə, sə Ba-Yígúrə́-Jə-Tiu bwe nəba. 24 Yá kʋ tà nətʋ! Nə tʋn kʋ nətʋ tə, twara yà nə jə nəba yɩrɩ. Nə bʋ́n nə waa con də, máŋá don wa, á bɩ̀á wá bwe nə bɩ̀á, ba wʋ́: “Bɛ̀ɛ̀ nimarʋ nə wulə nə mʋ̀ də Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, pwə́rə́ wa? 25 Ba-Yígúrə́-Jə-Tiu tún Zʋrədɛn mʋnaa tə, sə ka ya sɩswɩan, nə mʋ̀ də á mʋ̀ Ribɛn dwíí tə, də Gadə dwíí tə pwə́rə́ wa. Á ba tori jə Ba-Yígúrə́-Jə-Tiu con.” Yá á bɩ̀á tə sʋ̀ràn təntə wàá tə pɩn, nə bɩ̀á tə vɩ sə ba pa dun Ba-Yígúrə́-Jə-Tiu nə. 26 Kʋ mʋ̀ nə pɩn, nə ma lwà Yɩɩ joŋi bwálɩ́ tə. Kʋ tà nə pɩ̀à, nə ma fwa jwəŋə, ba nə sʋ̀rɩ́, nə à yə̀ə́ jwəŋə duən. 27 Yá kʋ dàń nə yɩ nə pɩ̀à, sə Yɩɩ joŋi bwálɩ́ kʋ tə ya mɩmɩnʋ, nə mʋ̀ də á mʋ̀ pwə́rə́ wa, də nə bɩ̀á tə, ba nə wá ya lʋʋ wa, nə tɩan kwa nə, pwə́rə́ wa. Kʋ wá bɩrɩ də, nə nə fwa jwəŋə, ba nə sʋ̀rɩ́, də jwəŋə duən, də nimarʋ jwəŋə, kʋ yɩ Ba-Yígúrə́-Jə-Tiu tʋtʋŋɩ tə nə, nə tʋŋa ʋ yáá con. Yá kʋ nətʋ dàń wá pa, á bɩ̀á kʋ́ʋ̀ bá wànɩ́ ba swɩ̀n nə bɩ̀á con, máŋá don wa, də nə ba tori jə Ba-Yígúrə́-Jə-Tiu con. 28 Nə dàń swɩ̀n duən con də, máŋá don wa, á bɩ̀á nə swɩ̀n kʋ yoo təntə nə con, nə à yə̀ə́ nə bɩ̀á con, nə wá bɩrɩ ba Ba-Yígúrə́-Jə-Tiu joŋi bwálɩ́ tə nyɩnyɩga, nə nɩbara-ba nə lwà. Kʋ dàń nə tà ba lwə̀ kʋ, sə ba ma fwa jwəŋə, ba nə sʋ̀rɩ́, nə à yə̀ə́ jwəŋə duən. Yá kʋ dàń nə yɩ ba pɩ̀à, sə kʋ ya mɩmɩnʋ, nə mʋ̀ də á mʋ̀ pwə́rə́ wa. 29 Yɩɩ wá cɩ̀, sə nə vɩ Ba-Yígúrə́-Jə-Tiu nii, nə ga vəvəri nə kwa nə ma sà wá, zə̀n kʋ tə! Nə bá sɛ̀ nə lwà Yɩɩ joŋi bwálɩ́ don, nə ma fwa jwəŋə, ba nə sʋ̀rɩ́, də pupoli jwəŋə, də jwəŋə duən, nə súrí Ba-Yígúrə́-Jə-Tiu, ʋ nə yɩ nə Yɩɩ, joŋi bwálɩ́ tə nə, kʋ nə wulə ʋ wúlú gansili tə yáá con.» 30 Máŋá tə, Yɩɩ joŋwanʋ Fineyasə, də Yɩzərayɛlə lalʋʋ tə yáá tɩ̀án tə, də ba dwíə́ tə sàń tɩ̀án tə nə nì sʋ̀ràn təntə, Ribɛn dwíí tə, də Gadə dwíí tə, də Manase dwíí tə nə swɩ̀n, ba yɩra zuri. 31 Yá Fineyasə dàń swɩ̀n Ribɛn dwíí tə, də Gadə dwíí tə, də Manase dwíí tə con, ʋ wʋ́: «Zə̀n kʋ tə, nə dàń yə̀ə́ də, Ba-Yígúrə́-Jə-Tiu wulə nə titəŋi wa, á nə wà cʋna təntə tʋn, á zɩgɩ ʋ nə yɩrɩ. Yá kʋ nətʋ wá pa, Ba-Yígúrə́-Jə-Tiu bá kə Yɩzərayɛlə lɩ̀à tə càn wa.» 32 Fineyasə də Yɩzərayɛlə lɩ̀à yáá tɩ̀án tə dàń pìí ba nan Galadə, ba bà Yɩzərayɛlə lɩ̀à tə con, Kanaan lʋʋ nii tə wa. Ba twi ba tún ba nii, ba bɩrɩ Yɩzərayɛlə lɩ̀à tə nə. 33 Yá Yɩzərayɛlə lɩ̀à tə yɩra dàń zuri, sʋ̀ràn təntə yɩrɩ, ba nə nì. Ba ken Yɩɩ lɛ̀ɛ̀, ba ga kʋ́ʋ̀ wà Ribɛn dwíí tə, də Gadə dwíí tə tɛgʋ yoo swɩ̀n, sə ba cʋ̀gʋ̀ ba lʋʋ nii tə. 34 Ribɛn dwíí tə, də Gadə dwíí tə, dɩga Yɩɩ joŋi bwálɩ́ tə yɩrɩ “Mɩmɩnʋ!” Cɩ́gá, ba yà swɩ̀n də, kʋ yɩ mɩmɩnʋ ba də Yɩzərayɛlə dwíə́ tə duən tə pwə́rə́ wa, kʋ bɩrɩ də Ba-Yígúrə́-Jə-Tiu yɩ Yɩɩ.