<<    <     Zozuwe     21     >    >> 
Ba pɩn tɩan Levi dwíí tə nə
21
1 Levi dwíí tə dìì tɩ̀án twi ba yí Yɩɩ joŋwanʋ Eleyazarə, də Nun bìú Zozuwe, də Yɩzərayɛlə dwíə́ yáá tɩ̀án tə, 2 Silo nə, Kanaan lʋʋ nii tə wa, ba swɩ̀n ba con, ba wʋ́: «Ba-Yígúrə́-Jə-Tiu twá də Moyizə, ʋ pa nii sə á pa nəba tɩan, sə nə ya tə wa, də tə kasɔɔ níə́ tə, sə nə vàná də́ lá.» 3 Yɩzərayɛlə lɩ̀à tə ma kúrí tɩan, də tə kasɔɔ níə́, ba tori tə wa, ba nə pɩn ba lʋʋ nii tə wa, ba pa Levi dwíí tə nə, ndə Ba-Yígúrə́-Jə-Tiu nə pɩn nii, sə kʋ tʋn nətʋ.
4 Ba pwárɩ́, yá Kehatə sàń tə nə pwárʋ́ tə lɩ, Levi dwíí tə wa. Yá Kehatə sàń tə wa, ba pɩn tɩan fugə də batwa, Yɩɩ joŋwanʋ Aron bɩ̀á tə nə. Tɩan təntə yà wulə Zwida dwíí tə, də Simeyon dwíí tə, də Bɛnzwamɛn dwíí tə nagwanɛɛ wa. 5 Pwárʋ́ tə wa, Kehatə dwíí lɩ̀à tə duən tə də nɩ tɩan fugə. Tɩan təntə yà wulə Efərayimə dwíí tə, də Dan dwíí tə, də Manase dwíí faan tə nagwanɛɛ wa. 6 Pwárʋ́ tə wa, Gɛrəswon bɩ̀á tə nɩ tɩan fugə də batwa. Tɩan təntə yà wulə Yɩsakarə dwíí tə, də Aswɛrə dwíí tə, də Nɛfətali dwíí tə, də Manase dwíí faan tə don tə, kʋ nə wulə Baswan nə, nagwanɛɛ wa. 7 Merari bɩ̀á tə, də ba sànɩ́ nɩ tɩan fugə də bələ. Tɩan təntə yà wulə Ribɛn dwíí tə, də Gadə dwíí tə, də Zabulon dwíí tə nagwanɛɛ wa. 8 Yɩzərayɛlə lɩ̀à tə pwárɩ́, ba ma pa tɩan təntə, də tə kasɔɔ níə́ tə, Levi dwíí tə nə, ndə Ba-Yígúrə́-Jə-Tiu nə twá də Moyizə, ʋ ma pa nii, sə kʋ tʋn nətʋ.
9 Zwida dwíí tə, də Simeyon dwíí tə nagwanɛɛ tə wa, tɩan tə tə yɩra nə, ba bon, ba pa. 10 Ba pɩn tə Aron bɩ̀á tə nə. Ba yɩ Kehatə sàń tə wa lɩ̀à, ba ga yɩ Levi dwíí. Cɩ́gá, ba mʋ̀ nə, pwárʋ́ tə təntən kʋ bɩrɩ. 11 Yɩzərayɛlə lɩ̀à tə pɩn ba Kiriyatə-Arəba, kʋ yɩrɩ don nə yɩ Ebəron, də kʋ kasɔɔ níə́ tə. Tɩʋ təntə yɩ kʋ wulə Zwida dwíí nagwanaa pɛɛn nagwanaa tə wa. Arəba yà yɩ Anakə dwíí tə nɩbɛɛ. 12 Yá tɩʋ tə nii kárɩ́ tə, də kʋ nii tɩbii tə mʋ̀ yà yɩ ba pɩn Yefunə bìú Kalɛbə nə. 13 Nə̀ń tɩan tə, ba nə pɩn Yɩɩ joŋwanʋ Aron bɩ̀á tə nə. Ba pɩn ba Ebəron, kʋ nə yɩ yuu yikwala tɩʋ, də kʋ kasɔɔ níə́ tə. Kʋ dàń súrí Libəna də kʋ kasɔɔ níə́ tə, 14 də Yatirə də kʋ kasɔɔ níə́ tə, də Ɛswətemʋa də kʋ kasɔɔ níə́ tə, 15 də Holon də kʋ kasɔɔ níə́ tə, də Debirə də kʋ kasɔɔ níə́ tə, 16 də Ayin də kʋ kasɔɔ níə́ tə, də Yuta də kʋ kasɔɔ níə́ tə, də Bɛtə-Swemɛswə də kʋ kasɔɔ níə́ tə nə. Tə fwa tɩan nʋgʋ, dwíə́ bələ təntə nagwanɛɛ tə wa.
17 Yá Bɛnzwamɛn dwíí nagwanaa tə wa, ba pɩn ba Gabawon də kʋ kasɔɔ níə́ tə, də Geba də kʋ kasɔɔ níə́ tə, 18 də Anatɔtə də kʋ kasɔɔ níə́ tə, də Aləmon də kʋ kasɔɔ níə́ tə. Tə fwa tɩan banɩa, də tə kasɔɔ níə́.
19 Tɩan tə mama Yɩɩ joŋwana tə, ba nə yɩ Aron bɩ̀á tə nə nɩ, yɩn tɩan fugə də batwa, də tə kasɔɔ níə́. 20 Pwárʋ́ tə wa, Kehatə bɩ̀á tə duən tə, ba də nə yɩ Levi dwíí tə wa lɩ̀à, nɩ tɩan Efərayimə nagwanaa tə wa. 21 Ba pɩn Siswɛmə, kʋ nə yɩ yuu yikwala tɩʋ, kʋ ga wulə Efərayimə pɛɛn nagwanaa tə wa, də kʋ kasɔɔ níə́ tə. Kʋ dàń súrí Gezɛrə də kʋ kasɔɔ níə́ tə, 22 də Kibəsayimə də kʋ kasɔɔ níə́ tə, də Bɛtə-Horon də kʋ kasɔɔ níə́ tə nə. Tə fwa tɩan banɩa.
23 Yá Dan dwíí nagwanaa tə wa, ba pɩn ba Ɛləteke də kʋ kasɔɔ níə́ tə, də Gibeton də kʋ kasɔɔ níə́ tə, 24 də Ayalon də kʋ kasɔɔ níə́ tə, də Gatə-Rimon də kʋ kasɔɔ níə́ tə. Tə fwa tɩan banɩa.
25 Yá Manase dwíí faan tə nagwanaa tə wa, ba pɩn ba Tanakə də kʋ kasɔɔ níə́ tə, də Gatə-Rimon də kʋ kasɔɔ níə́ tə. Tə fwa tɩan bələ. 26 Tɩan tə mama Kehatə bɩ̀á tə duən tə sànɩ́ tə nə nɩ, yɩn tɩan fugə, də tə kasɔɔ níə́.
27 Manase dwíí faan tə don tə nagwanaa tə wa, nə̀ń tɩan tə, ba nə pɩn Gɛrəswon bɩ̀á tə nə, ba də nə yɩ Levi dwíí tə wa lɩ̀à. Ba pɩn ba Golan, kʋ nə yɩ yuu yikwala tɩʋ, kʋ ga wulə Baswan nə, də kʋ kasɔɔ níə́ tə. Kʋ dàń súrí Beyɛswətəra də kʋ kasɔɔ níə́ tə nə. Tə fwa tɩan bələ.
28 Yá Yɩsakarə nagwanaa tə wa, ba pɩn ba Kiswiyon də kʋ kasɔɔ níə́ tə, də Dabəratə də kʋ kasɔɔ níə́ tə, 29 də Yarəmutə də kʋ kasɔɔ níə́ tə, də Eyin-Ganimə də kʋ kasɔɔ níə́ tə. Tə fwa tɩan banɩa.
30 Yá Aswɛrə nagwanaa tə wa, ba pɩn ba Miswalə də kʋ kasɔɔ níə́ tə, də Abədon də kʋ kasɔɔ níə́ tə, 31 də Hɛləkatə də kʋ kasɔɔ níə́ tə, də Rehɔbə də kʋ kasɔɔ níə́ tə. Tə fwa tɩan banɩa.
32 Yá Nɛfətali nagwanaa tə wa, ba pɩn ba Kedɛswə, kʋ yɩ yuu yikwala tɩʋ, kʋ ga wulə Galile nə, də kʋ kasɔɔ níə́ tə. Kʋ dàń súrí Hamɔtə-Dɔrə də kʋ kasɔɔ níə́ tə, də Karətan də kʋ kasɔɔ níə́ tə nə. Tə fwa tɩan batwa. 33 Tɩan tə mama Gɛrəswon sànɩ́ tə nə nɩ, yɩn tɩan fugə də batwa, də tə kasɔɔ níə́.
34 Levi dwíí tə wa lɩ̀à tə nə ga, nə yɩ Merari bɩ̀á tə sànɩ́ tə. Zabulon nagwanaa tə wa, ba pɩn ba Yokəneyamə də kʋ kasɔɔ níə́ tə, də Karəta də kʋ kasɔɔ níə́ tə, 35 də Diməna də kʋ kasɔɔ níə́ tə, də Nahalalə də kʋ kasɔɔ níə́ tə. Tə fwa tɩan banɩa.
36 Yá Ribɛn nagwanaa tə wa, ba pɩn ba Besɛrə də kʋ kasɔɔ níə́ tə, də Yahasə də kʋ kasɔɔ níə́ tə, 37 də Kedemɔtə də kʋ kasɔɔ níə́ tə, də Mefatə də kʋ kasɔɔ níə́ tə. Tə fwa tɩan banɩa.
38 Yá Gadə nagwanaa tə wa, ba pɩn ba Ramɔtə, kʋ nə yɩ yuu yikwala tɩʋ, kʋ ga wulə Galadə nə, də kʋ kasɔɔ níə́ tə. Kʋ dàń súrí Mahanayimə də kʋ kasɔɔ níə́ tə, 39 də Ɛswəbon də kʋ kasɔɔ níə́ tə, də Yazɛrə də kʋ kasɔɔ níə́ tə nə. Tə mama fwa tɩan banɩa. 40 Tɩan tə mama Merari dwíí tə sànɩ́ tə, ba nə yɩ Levi dwíí tə gɩganɩ, nə nɩ pwárʋ́ tə wa, yɩn tɩan fugə də bələ.
41 Tɩan tə mama ba nə pɩn Levi dwíí tə nə, Yɩzərayɛlə lɩ̀à lʋʋ nii tə wa, yɩn tɩan sapwɩlə də nana, də tə kasɔɔ níə́. 42 Tɩʋ mama yà jə kʋ kasɔɔ níə́, tə nə kɩkarɩ kʋ. Yá kʋ yà yɩ nətʋ, tɩan tə mama wa.
43 Mə kʋ zɩgɩ nətʋ, Ba-Yígúrə́-Jə-Tiu ma pa lʋʋ nii tə mama, Yɩzərayɛlə lɩ̀à tə nə. Ʋ yà dí yáá ʋ kàn nii, də ʋ wá pa kʋ ba nɩbara-ba nə. Yá ba dàń jon lʋʋ nii tə, ba jə̀ə́ kʋ wa. 44 Ba-Yígúrə́-Jə-Tiu pɩn ba sìə́ tɩa mama, ndə ʋ nə kàn nii də ba nɩbara-ba nətʋ. Ba dʋŋa tə lìù mama wà wànɩ́ ʋ ta ʋ zɩgɩ ba nə. Yá Ba-Yígúrə́-Jə-Tiu dàń ken ba dʋŋa tə mama, ba jɩɩn wa. 45 Sʋywáŋá tə mama Ba-Yígúrə́-Jə-Tiu nə swɩ̀n Yɩzərayɛlə lɩ̀à tə con, nədʋ tətə wà kwɛ̀. Tə mama nii súə́.