Yɩɩ nii yìə̀n
Yɩɩ nii yìə̀n sagɩ tə yuu wa sʋgʋ
Galʋ sagɩ tə yígúrə́ bɩrɩ nəba Yɩzərayɛlə lɩ̀à tə nə yí Mʋabə lʋʋ nii, yá ba dàń kəni ba sírí, sə ba zʋ Kanaan lʋʋ nii wa, Yɩɩ nə kàn nii, sə ʋ pa ba. Yɩɩ nii yìə̀n sagɩ tə nə púə́ Galʋ sagɩ tə kwa. Yɩɩ nii yìə̀n sagɩ tə bɩrɩ də kʋ nɛɛ bələ nə, Yɩɩ nə pɩn ʋ nii yìə̀n Yɩzərayɛlə lɩ̀à nə, ba nə yɩ ʋ mʋ̀ lɩ̀à. Moyizə swɩ̀n sʋ̀ràn dəkurən batwa, Yɩzərayɛlə lɩ̀à tə con, Yɩɩ nii yìə̀n sagɩ tə wa (1.1—4.43; 4.44—28.68; 28.69—30.20), ʋ ma pìí ʋ lìí tʋ̀tʋ̀nán tə, Yɩɩ nə twá də ʋ sonu tə, kʋ nə ba zwɛ̀, ʋ ma tʋn ʋ pa Yɩzərayɛlə lɩ̀à nə. Yɩɩ tún nimarʋ də ba, ʋ ywàń ba yuu kasɔɔ lanworu tə wa, bɩna sapwɩlə, ʋ ta ʋ jon ba, ba dʋŋa jɩɩn wa, ʋ ga pa ba ʋ nii yìə̀n tə də ʋ nikanɩ tə.
Moyizə bon ʋ kə Yɩzərayɛlə lɩ̀à tə nə, ba nə cʋga ʋ sʋ̀ràn tə, sə ba lìí ba tɩ̀àn Ba-Yígúrə́-Jə-Tiu nə yɩ pùə́ nədʋ tíú tə yoo, ba ga kúrí ba tì, sə ba ja nimarʋ də ʋ mʋ̀ cɩ́gá Yɩɩ tə, máŋá mama. Ʋ swɩ̀n ba con, ʋ wʋ́:
«Á cʋga, Yɩzərayɛlə lɩ̀à-ba!
Ba-Yígúrə́-Jə-Tiu, nə tíú Yɩɩ tə,
Ba-Yígúrə́-Jə-Tiu yɩ nədʋ.
Á mɛ sə á sóní Ba-Yígúrə́-Jə-Tiu,
á tíú Yɩɩ tə, də á waa mama,
də á jə̀rə́ mama, də á dɩ̀àn mama» (6.4-5. Kʋ wulə Mat 22.37 də wa).
Sʋ̀ràn təntə nə, Yɩzərayɛlə lɩ̀à tə nə ken ba waa Yɩɩ nə, yàá swɩ̀n, ba ma sinti ba yɩjʋnɩ dɩɩn mama. Ba boŋə tə Swəma. Kʋ də̀ń nə yɩ Cʋgʋ.
Sagɩ tə talɩkwa swapitərə banɩa tə wa, Moyizə kəni ʋ sírí sə ʋ tɩ. Cɩ́gá, Yɩɩ yà swɩ̀n ʋ con, də ʋ wá tɩ, ʋ bá twá ʋ zʋ nikanɩ lʋʋ nii tə wa. Yá ʋ dàń kúrí Zozuwe, sə ʋ jon ʋ yuu nə, ʋ tɩan kwa nə (swapitərə 31). Moyizə dɩga gwaran, ʋ ma bʋ Yɩɩ nə (swapitərə 32), yá kʋ kwa nə, ʋ lòrì Yɩɩ, sə ʋ fwa zəni Yɩzərayɛlə lɩ̀à dwíə́ 12 tə yɩra. Swapitərə 34 tə swɩ̀n Moyizə tɩan yoo. Sagɩ tə swapitərə 34, vɛrəse 10 bɩrɩ də, Yɩɩ nii sʋ̀sʋ̀nʋ̀ don wà pìí ʋ ya Yɩzərayɛlə lʋʋ nii tə mama wa, ʋ nə nyən ndə Moyizə nə: Yɩɩ yà ve də wá nəpon nəpon.
Pɩ̀ʋ́ Zozɩasə máŋá tə wa, Yɩɩ joŋwana tə nɩ Yɩɩ nii sagɩ Yɩɩ dìə̀ tə wa, Zwerizalɛmə nə. Sagɩ təntə san lá, kʋ pa Yɩɩ lɩ̀à tə pìí ba bà Yɩɩ con. Yənu tɩ̀án kapʋpʋ bʋŋa də, sagɩ təntə yɩ Yɩɩ nii yìə̀n sagɩ kʋ tə vàn don.
Yɩɩ nii yìə̀n sagɩ tə lìí zə̀n lɩ̀à tə nə kàrɩ̀ kʋ, ndə kʋ nə lìí ba tə nə kàrɩ̀ kʋ fuən nə nətʋ, də ywánɩ́ tə ləzoni nə pɩ̀à, tə̀lə́ bwálɩ́ don nə, də kʋ nə tà ka zìlí Yɩɩ tə, ʋ nə yɩ jonu nii zəni, bwálɩ́ mama nə, də yoo mama wa.
Sagɩ tə sʋyun
Moyizə təntən sʋ̀ràn: Ʋ pìí ʋ lìí Yɩzərayɛlə lɩ̀à, ba mɩɩ yìə̀n nə yɩn nətʋ (1.1—4.43)
Moyizə bələ nii sʋ̀ràn: Ʋ pìí ʋ lìí Yɩzərayɛlə lɩ̀à, Yɩɩ nii yìə̀n tə (4.44—28.68)
Moyizə batwa nii sʋ̀ràn: Ʋ fwi Yɩzərayɛlə lɩ̀à zɩan wa, sə ba zìlí Yɩɩ nimarʋ tə nii (29—30)
Moyizə talɩkwa sʋ̀ràn də ʋ tɩan yoo (31—34)