MOYIZƏ TALƖKWA SƲRAN DƏ Ʋ TƖAN YOO
31—34
Yɩɩ lɩ Zozuwe sə ʋ ya Moyizə yuu lɩlarʋ
31
1 Moyizə vəli ʋ swɩ̀n sʋ̀ràn tə tə Yɩzərayɛlə lɩ̀à tə mama con, 2 ʋ wʋ́: «À jə bɩna bíí də sapʋa zə̀n kʋ tə, à kʋ́ʋ̀ wàrɩ̀ á yáá à yanɩ, à janɩ aba à vəli kʋ̀ʋ̀, də à pìí à twi. Yá Ba-Yígúrə́-Jə-Tiu swɩ̀n à con də, à bá bɩn Zʋrədɛn mʋnaa ka tə. 3 Ba-Yígúrə́-Jə-Tiu, á tíú Yɩɩ tətə wá ya á yáá. Ʋ mʋ̀ nə wá cʋ̀gʋ̀ dwíə́ nəkaran* tə tə á yáá con, sə á wànɩ́ á jon ba lʋʋ níə́ tə á tɩnɩ. Zozuwe dàń nə wá ya á yáá, ndə Ba-Yígúrə́-Jə-Tiu nə swɩ̀n kʋ nətʋ. 4 Ba-Yígúrə́-Jə-Tiu wá cʋ̀gʋ̀ dwíə́ nəkaran tə tə də, ndə ʋ nə cʋ̀gʋ̀ Amɔrə dwíí pɛ̀gá Sihon də Ogə, də ba lʋʋ nii tə nətʋ. 5 Ba-Yígúrə́-Jə-Tiu wá kə ba á jɩɩn wa, yá yoo tə á nə wá tʋn ba yɩra mɛ sə kʋ twá yìə̀n tə mama nə, à nə pɩn aba nii tə yuu wa. 6 Á yana babɩran, á ga ja wʋdɩʋ! Á dànà ká pa fən ja aba, à dànà ká pa ba fugu aba. Cɩ́gá, Ba-Yígúrə́-Jə-Tiu, á tíú Yɩɩ tətə vəli də aba, ʋ bá pìí ʋ yá aba, ʋ bá vɩ aba ʋ dʋgʋ.»7 Moyizə bon Zozuwe Yɩzərayɛlə lɩ̀à tə mama yáá con, ʋ swɩ̀n ʋ con, ʋ wʋ́: «Ya babɩa, n ga ja wʋdɩʋ! Cɩ́gá, n mʋ̀ nə wá ja lalʋʋ kʋ tə n zʋ lʋʋ nii tə wa, Ba-Yígúrə́-Jə-Tiu nə kàn nii də ba nyɩna-ba, sə ʋ pa ba. N mʋ̀ nə wá pa kʋ ba, sə kʋ ya ba tori. 8 Ba-Yígúrə́-Jə-Tiu tətə wulə n yáá ʋ vəli, ʋ tətə wá ya də mʋ́, ʋ bá pìí ʋ yá mʋ́, ʋ bá vɩ mʋ́ ʋ dʋgʋ. Dàn ká pa fən ja mʋ́, dàn ká pa n jɩ̀àn gwàrɩ̀.
Yɩɩ pɩn nii sə ba kàrɩ̀ ʋ nii yìə̀n sagɩ tə
9 Moyizə pʋ́pʋ́nɩ́ Yɩɩ nii yìə̀n sagɩ kʋ tə, ʋ pa Levi bɩ̀á Yɩɩ joŋwana tə nə, ba ya nə zɩŋa Ba-Yígúrə́-Jə-Tiu nimarʋ culu daka tə, də Yɩzərayɛlə dwíə́ yáá tɩ̀án tə mama nə. 10 Moyizə pɩn ba nii kʋ tə, ʋ wʋ́: «Bɩna barpɛ mama nii nə, bɩnɩ tə wa á nə wá yá jɩŋa á pa lɩ̀à tə nə, ba nə dí jɩŋa á con, Vunən cànà tə diŋə máŋá wa, 11 máŋá tə wa Yɩzərayɛlə lɩ̀à tə mama nə wá bà Ba-Yígúrə́-Jə-Tiu, á tíú Yɩɩ yáá con, bwálɩ́ tə wa ʋ nə wá kúrí, á wá kàrɩ̀ Yɩɩ nii sagɩ kʋ tə Yɩzərayɛlə lɩ̀à tə mama yáá con. 12 Á wá kə lalʋʋ tə mama duən yáá, bara, də kana, də bìsɩ́ná, də vərə tə də tətə ba nə twá ba jə̀ə́ á tɩan tə wa, sə ba nì Yɩɩ nii sagɩ tə kàrà tə, ba ga kwè ka dəri Ba-Yígúrə́-Jə-Tiu, á tíú Yɩɩ fən, ba ga kə dɩ̀àn ba twá Yɩɩ nii sagɩ kʋ tə sʋ̀ràn tə mama nə. 13 Mə kʋ wá twá nətʋ, sə ba bɩ̀á tə, ba tə nə yəri Yɩɩ nii tə, wànɩ́ ba nì kʋ sʋ̀ràn tə, yá ba wá kwè ka dəri Ba-Yígúrə́-Jə-Tiu, á tíú Yɩɩ fən, máŋá tə mama á nə wá ya lʋʋ nii tə wa, á nə wá bɩn Zʋrədɛn mʋnaa tə, á nan á jon á tɩnɩ.»
Yɩzərayɛlə lɩ̀à wá ya pwìí bələ tɩ̀án, Yɩɩ yáá con
14 Ba-Yígúrə́-Jə-Tiu swɩ̀n Moyizə con, ʋ wʋ́: «Nə̀ń, n tɩan máŋá bwə́lə́. Bon Zozuwe, sə n də wá bà, á zɩgɩ jə́rə́ gansili tə wa, sə à pa wá à nii yìə̀n.»
Moyizə də Zozuwe dàń vəli ba zʋ, ba zɩga jə́rə́ gansili tə wa. 15 Ba-Yígúrə́-Jə-Tiu bɩrɩ ʋ tɩ̀àn ba, jə́rə́ gansili tə wa, bakwan kùlì wa. Bakwan kùlì tə yà zɩga jə́rə́ gansili tə mimii wa. 16 Ba-Yígúrə́-Jə-Tiu swɩ̀n Moyizə con, ʋ wʋ́: «Nə̀ń, n wá tɩ, ba gùrì mʋ́ n nyɩna-ba con, ba nə dí yáá ba tɩ. Yá lalʋʋ kʋ tə mʋ̀ wá pa dun dwíə́ nəkaran* tə yɩa tə nə, tə nə wulə lʋʋ nii tə wa, ba nə zwɩ. Ba wá vɩ nə ba dʋgʋ, ba ga kwa à nimarʋ tə à nə tún də ba. 17 Kʋ máŋá tə wá, à lɩŋa wá zàn ba yuu wa, yá à wá vɩ ba à dʋgʋ, à ga viviri à kwa à ma sà ba. Dwíə́ nəkaran tə wá də́ ba, lɛɛ kapʋpʋ də jɩgwarʋ wá yí ba, yá ba wá swɩ̀n, ba wʋ́: Kʋ tà nə tíú Yɩɩ nə tə̀lə́ də nəba tə nə pɩn lɛɛ tə tə ma yí nəba? 18 Yá kʋ máŋá təntə wa, à mʋ̀ wá viviri à kwa à ma sà ba, lwanɩ tə mama yɩrɩ ba nə wá tʋn, ba nə viviri ba yáá ba kə yɩa duən con yɩrɩ. 19 Sɩ́ʋ́n nə, á dàń pʋ́pʋ́ná nuŋə ka tə. N mʋ̀ Moyizə pa Yɩzərayɛlə lɩ̀à tə kwè ka, kə ka ba nii wa, yá nuŋə təntə dàń wá ya à dansɩa won, à ma zɩgɩ Yɩzərayɛlə lɩ̀à nə. 20 Cɩ́gá, à wá pa lalʋʋ kʋ tə zʋ lʋʋ nii tə wa, à nə dùə̀ à ma kàn nii, də à wá pa ba nyɩna-ba nə. Kʋ yɩ lʋʋ nii nayɩla də tʋ̀ràn nə súə́ lá, tə pàlɩ̀. Ba wá də́ ba sú, ba ga wá nì ba ywánɩ́. Yá ba dàń wá viviri ba yáá ba kə yɩa duən con, ba pa tə dun. Ba wá fʋfʋlɩ nə, ba ga kwa à nimarʋ tə. 21 Máŋá tə lɛɛ kapʋpʋ də jɩgwarʋ nə wá yí ba, nuŋə ka tə wá ya dansɩa won ba yáá con, ka le ba. Cɩ́gá, ba dwíí tə ba nə wá kə lʋʋ wa, bá swɛ̀ɛ́ ka. Cɩ́gá, à yə̀ə́ ba pubʋŋɩ, tə manwarɩ tə bɩrɩ tə tɩ̀àn zə̀n kʋ tə, də à tə wà pɩn ba zʋ lʋʋ nii tə wa, à nə dùə̀ à ma kàn nii, sə à pa ba.»
22 Kʋ dɩɩn tə nə, Moyizə pʋ́pʋ́nɩ́ nuŋə təntə, yá ʋ pɩn Yɩzərayɛlə lɩ̀à tə kwè ka.
23 Ba-Yígúrə́-Jə-Tiu dàń pɩn ʋ nii yìə̀n Nun bìú Zozuwe nə, ʋ wʋ́: «Ya babɩa, n ga ja wʋdɩʋ! Cɩ́gá, n mʋ̀ nə wá ja Yɩzərayɛlə lɩ̀à tə n zʋ lʋʋ nii tə wa, à nə dùə̀ à ma kàn nii, sə à pa ba, yá à tətə wá ya də mʋ́.»
24 Máŋá tə wa Moyizə nə pʋ́pʋ́nɩ́ Yɩɩ nii yìə̀n təntə mama sagɩ wa, ʋ va ʋ zwɛ̀, 25 ʋ pɩn nii Levi dwíí tə nə, ba nə zɩŋa Ba-Yígúrə́-Jə-Tiu nimarʋ culu daka tə, ʋ wʋ́: 26 «Á tíə́ Yɩɩ nii sagɩ kʋ tə, á tún Ba-Yígúrə́-Jə-Tiu, á tíú Yɩɩ nimarʋ culu daka tə səpuni nə. Kʋ wá ya lá, ndə dansɩa won nə, kʋ zɩgɩ á nə. 27 Cɩ́gá, à yə̀ə́ nətʋ tə á nə vɩ nii, á ga yɩ zɩbanənyɩna. Á dàń taa nə vɩ Ba-Yígúrə́-Jə-Tiu nii, də à tə wulə də aba, kʋ dàń wá ya nətə à tɩan kwa nə! 28 Á kənə á dwíə́ yáá tɩ̀án tə mama, də tʋ̀tʋ̀nán yáá tɩ̀án tə mama duən yáá, à yáá con. À wá swɩ̀n sʋ̀ràn tə tə ba con, yá à wá ja lanworu də tɩa à ma fwa dansɩa, à zɩgɩ ba nə. 29 Cɩ́gá, à yə̀ə́ də à tɩan kwa nə, á wá kə á tɩ̀àn durən yìə̀n wa. Á wá vɩ cwəŋə tə, à nə pʋ́pʋ́nɩ́ à tún à pa aba, á dʋgʋ. Yá lɛɛ wá yí aba, máŋá tə wa ka nə bɩ̀àn, á nə wá tʋn kʋ tə nə lwara Ba-Yígúrə́-Jə-Tiu yáá con, á jɩ̀àn tʋ̀tʋ̀nán tə ga zɩ̀n ʋ lɩŋa yɩrɩ.
Moyizə nuŋə
30 Moyizə baa nuŋə tə sʋ̀ràn tə mama, ʋ va zwɛ̀, ʋ pa Yɩzərayɛlə lalʋʋ tə mama cʋgʋ.