Galʋ
Galʋ sagɩ tə yuu wa sʋgʋ
Galʋ sagɩ tə yɩ kʋ maŋa Yɩzərayɛlə lɩ̀à tə nə yɩn kasɔɔ lanworu tə wa ba ywan bɩna sapwɩlə nətʋ, kʋ nə zɩgɩ Sinayi paan tə nə, kʋ va kʋ yí Kanaan lʋʋ nii wa, kʋ nə yɩ nikanɩ lʋʋ nii tə. Yɩrɩ tə ba nə pɩn sagɩ tə, yɩ kʋ twá də ba nə gàlɩ̀ Yɩzərayɛlə lɩ̀à tə nɛɛ kapʋpʋ, kasɔɔ lanworu tə wa. Sagɩ kʋ tə pwɛ̀ dəkurən batwa:
Təntən bwálɩ́ tə zɩgɩ swapitərə 1 kʋ va swapitərə 10:10. Bwálɩ́ təntə wa, Ba-Yígúrə́-Jə-Tiu swɩ̀n Moyizə con, sə ʋ gàlà lalʋʋ tə. Ba gwìń Levi dwíí tə tʋtʋŋɩ də̀ń ba bɩrɩ lá nə. Ba dí Pakə cànà tə, yá bakwan nəpon cúə́ kʋ pú Yɩɩ wúlú gansili tə yuu nə.
Sagɩ tə bələ nii bwálɩ́ tə zɩgɩ swapitərə 10:11, kʋ va swapitərə 21:20. Bwálɩ́ təntə wa, lalʋʋ tə nan Sinayi, ba zʋ cwəŋə, ba vələ nikanɩ lʋʋ nii tə wa. Ba jəri yojanan kapʋpʋ, yá ba jɩ̀àn yàá gwàrɩ̀ máŋá don wa. Ba yàá ŋʋŋwɩn ba zɩga Yɩɩ də ʋ tʋtʋnʋ Moyizə nə.
Ba tʋn lɩ̀à, sə ba va ba mɩ̀àn Kanaan lʋʋ nii tə, kʋ nə yɩ lʋʋ nii «nayɩla də tʋ̀ràn nə súə́ lá, tə pàlɩ̀». Kʋ yà yɩ lʋʋ nii kʋ nə ziən, yá kʋ waa lɩ̀à tə ga jə dɩ̀àn zənzən. Ba yà lwə̀ ba tɩan tə ba kɩkarɩ də biritaŋʋ. Fən jɩn lalʋʋ tə, yá ba vɩga sə ba zʋ lʋʋ nii tə wa. Yɩɩ dàń ken ba càn wa, ʋ pa ba ywan bɩna sapwɩlə, kasɔɔ lanworu tə wa.
Sagɩ tə batwa nii bwálɩ́ tə zɩgɩ swapitərə 21:21, kʋ va swapitərə 36. Bwálɩ́ təntə swɩ̀n Yɩzərayɛlə lɩ̀à tə nə wulə Zʋrədɛn mʋnaa tə yɩɩ yipɩan con yoo. Ba nə yí Amon dwíí tə lʋʋ nii wa, ba ta ba yá ba wànɩ́ ba də́ dɩ̀àn pɛ̀gá Sihon də Ogə yuu wa.
Mʋabə pɩ̀ʋ́ tì Yɩɩ nii sʋ̀sʋ̀nʋ̀ Balaamə sə ʋ zɩrɩ ʋ kə Yɩzərayɛlə tə lɩ̀à nə. Yá Balaamə cʋgʋ Yɩɩ, yá ʋ lòrì sə Yɩɩ fwa zəni lalʋʋ tə yɩra. Ba gàlɩ̀ lalʋʋ tə nɛɛ bələ nii, də ba tə wulə Zʋrədɛn mʋnaa tə yɩɩ yipɩan con.
Yɩɩ lɩ Zozuwe sə ʋ jon Moyizə yuu nə. Yá Yɩɩ kʋ́ʋ̀ pɩn nii Moyizə nə, sə ʋ bɩrɩ nii tə Yɩɩ nə pɩn cànɩ̀ diŋə də jwəŋə fwaŋʋ yuu wa, Yɩzərayɛlə lɩ̀à tə nə, sə ʋ ga bɩrɩ ba, ba lʋʋ nii tə ʋ nə wá pa ba, máŋá wa ka nə bɩ̀àn sɩswɩan.
Galʋ sagɩ tə yɩ lalʋʋ ba jɩ̀àn nə gwàrɩ̀, fən ga jə ba, kʋ pa ba zàn ba zɩga Yɩɩ də Moyizə nə, ʋ nə yɩ bɛɛ tə Yɩɩ nə kúrí, sə ʋ kə ba cwəŋə nə, yoo nə kʋ swɩ̀n. Yá Yɩɩ yɩ pùə́ nədʋ tíú də ʋ lalʋʋ tə. Ʋ púə́ ba yuu nə máŋá tə wa ba nə yɩn kasɔɔ lanworu tə wa. Ʋ fwa zəni ʋ lalʋʋ tə yɩra, yá ʋ pɩn ba də́ dɩ̀àn ba dʋŋa yuu wa. Yɩɩ nii sʋ̀sʋ̀nʋ̀ Balaamə yà swɩ̀n kʋ nətʋ tə, ʋ wʋ́
«Nətə nə à wá zɩrɩ à kə lìù tə nə,
Yɩɩ nə wà zɩrɩ ʋ kə ʋ nə?
Nətə nə à wá cʋ̀gʋ̀ lìù də lɩŋa,
də Ba-Yígúrə́-Jə-Tiu lɩŋa nə wà ʋ yuu wa zàn?
Wàà nə wàá Zwakɔbə dwíí kapʋpʋ tə ʋ gàlɩ̀,
sə ʋ ga man Yɩzərayɛlə lalʋʋ tə nii?» (23:8, 10a).
Sagɩ tə sʋyun nəfaran
Lalʋʋ tə təntəm galʋ yoo: 1-4
Yɩɩ nii yìə̀n kapʋpʋ, də Levi dwíí tə ka kə vàn nə ka pa Yɩɩ cɩcɩ nə yoo: 5-8
Pakə cànà tə diŋə yoo: 9:1-10:10
Lalʋʋ tə vələ nikanɩ lʋʋ nii tə con: 10:11-21:35
Yɩzərayɛlə lɩ̀à tə wulə Mʋabə digə tə wa: 22-32
Bwálá tə Yɩzərayɛlə lɩ̀à tə nə twá lá ba lɛ, ba nə nan Ezwipətə lʋʋ nii tə wa kwa nə: 33:1-49.
Yɩɩ pɩn nii Yɩzərayɛlə lɩ̀à tə nə, yìə̀n duən yuu wa: 33:50-36:13.