Galʋ 5

Nii tə Yɩɩ nə pɩn durən* lɩ̀à yuu wa yoo

1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Pa nii Yɩzərayɛlə lɩ̀à tə nə, sə ba lɩ durən lɩ̀à tə mama yijaa bwálɩ́ tə wa, ba tə dayaan nə jə, nə à yə̀ə́ babasʋ nə jə, nə à yə̀ə́ ba tə nə dwen tɩgɩ yɩra. 3 Á mɛ sə á lɩ bɛɛ, nə à yə̀ə́ kan tə nə yɩ durən lìù, yijaa bwálɩ́ tə wa, sə ba dàn ká kə durən Yɩzərayɛlə lɩ̀à yijaa bwálɩ́ tə wa, à nə wulə.» 4 Yɩzərayɛlə lɩ̀à tə dàń tʋn kʋ nətʋ tə. Ba lɩ durən lɩ̀à tə mama yijaa bwálɩ́ tə wa. Ba tʋn kʋ tə, Ba-Yígúrə́-Jə-Tiu yà nə swɩ̀n Moyizə con.

Cʋna kwɩan yoo

5 Ba-Yígúrə́-Jə-Tiu swɩ̀n Moyizə con, ʋ wʋ́: 6 «Swɩ̀n Yɩzərayɛlə lɩ̀à tə con, də bɛɛ, nə à yə̀ə́ kan nə tʋn yolwan ʋ don yɩra, kʋ yɩ cʋna nəfarʋ ʋ tʋn, ʋ zɩgɩ à mʋ̀ Ba-Yígúrə́-Jə-Tiu nə, tə yoo ga wulə ʋ yuu wa. 7 Ʋ mɛ sə ʋ swɩ̀n cʋna tə ʋ nə tʋn, ʋ bɩrɩ, yá ʋ ga pa won tə ʋ nə ŋʋan, kʋ tíú nə, ʋ tə ga súrí won təntə pwɩ̀ʋ̀ bonu nii nyiən kʋ nə, ʋ pa wá. 8 Də lìù tə ba nə tʋn yolwan tə ʋ yɩra nə tɩga, yá ʋ ga ba nubiu jə, sə ba kwɩ̀án won tə ba pa wá, kʋ yɩ ba wá pa kʋ à mʋ̀ Ba-Yígúrə́-Jə-Tiu joŋwanʋ nə, sə kʋ ya à mʋ̀ nyiən. Lìù tə nə tʋn yolwan tə, tə wá pa cʋna kwɩan joŋi pabɩʋ, sə Yɩɩ joŋwanʋ tə ma fwa cʋna kwɩan joŋi, ʋ pa wá. 9 Zìlə́ won tə mama Yɩzərayɛlə lɩ̀à tə nə wá ja bà, ba pa Yɩɩ nə, yɩ Yɩɩ joŋwanʋ tə nə tɩ. 10 Won tə mama lìù nə tún vàn nə, ʋ pa Yɩɩ nə, yɩ Yɩɩ joŋwanʋ tə nə tɩ. Lìù nə pɩn won Yɩɩ jaŋwanʋ nə, kʋ yɩ Yɩɩ jaŋwanʋ tə nə tɩ.»

Nii tə Yɩɩ nə pɩn badoli yuu wa

11 Ba-Yígúrə́-Jə-Tiu swɩ̀n Moyizə con, ʋ wʋ́: 12 «Swɩ̀n Yɩzərayɛlə lɩ̀à tə con, də bɛɛ wàá kan ʋ janɩ, yá kan tə viviri ʋ kwa ʋ ma sà wá, ʋ ga nan ʋ cwàrɩ̀. 13 Bɛɛ don wàá ʋ pə̀ní də kan təntə, ʋ barɩ ga yəri də ʋ səgə, ʋ kə ʋ tɩ̀àn durən yìə̀n wa. Kʋ wàá də lìù wà wá nɩ, ba ga wà wá jɩn kʋ dəkuu tə wa. 14 Kanbarɩ tə wàá badoli ʋ fwa, ʋ bʋŋa də ʋ kan tə tʋŋa durən yìə̀n, yá kʋ nətʋ tə yɩ cɩ́gá. Kanbarɩ tə ma wàá badoli ʋ fwa, ʋ bʋŋa də ʋ kan tə tʋŋa durən yìə̀n, yá kʋ tà cɩ́gá. 15 Kʋ yɛɛ bələ tə mama wa, bɛɛ təntə mɛ sə ʋ ja ʋ kan tə, ʋ ja va Yɩɩ joŋwanʋ tə con. Yá ʋ wá ja zìlə́ won, kʋ nə mɛ də ʋ yojanʋ tə, ʋ ja va. Kʋ mʋ̀ nə yɩ dipɛn mɩna yiri don mun kilo batwa. Ʋ bá lwá nʋga tə yuu wa, ʋ ga bá kə wusinə də tə yuu wa. Cɩ́gá kʋ yɩ badoli zìlə́ won, kʋ yɩ zìlə́ won kanbarɩ nə yàá fwa, də ʋ nə pɩ̀à sə ʋ lwarɩ, də ʋ kan nə tʋn cʋna. 16 Yɩɩ joŋwanʋ tə wá pa kan tə twən ʋ yí, ʋ ga pa ʋ zɩgɩ yɩɩ nə, Ba-Yígúrə́-Jə-Tiu yáá con. 17 Yɩɩ joŋwanʋ tə wá kwan nɩ́á tə nə yɩ parɩ də daʋ zʋŋa, ʋ fwa Yɩɩ wúlú gansili tə waa pùrú, ʋ kə nɩ́á tə wa. 18 Yɩɩ joŋwanʋ tə wá pa kan tə nan ʋ zɩgɩ yɩɩ nə, Ba-Yígúrə́-Jə-Tiu yáá con. Ʋ wá pa kan tə kʋ̀rɩ̀ ʋ yukʋran tə, ʋ nə jɩn ʋ kə duən nə, yá ʋ dàń wá kə badoli zìlə́ won tə, kan tə jɩ̀àn wa, kʋ nə wá bɩrɩ də ʋ tʋn cʋna. Yɩɩ joŋwanʋ tə tətə wá ja nacɩcaʋ tə nə ja zɩra kʋ twi, ʋ jɩɩn wa. 19 Yɩɩ joŋwanʋ tə wá pa kan tə kàn nii, ʋ ga pa ʋ swɩ̀n, ʋ wʋ́: “Də kʋ nə yɩ cɩ́gá, bɛɛ don wà mʋ́ pə̀ń, yá n nə wulə n barɩ dìə̀ tə wa, n wà n kwa viviri n ma sà wá, n ga wà nan n tʋn durən yìə̀n, sə nacɩcaʋ kʋ tə zɩra tə dàn ká tʋ n yuu wa. 20 Yá də n nə wulə n barɩ tə con, n nə viviri n kwa n ma sà wá, n ga nan n tʋn durən yìə̀n, n pa bɛɛ don pə̀ń mʋ́, 21 sə Ba-Yígúrə́-Jə-Tiu pa n jì kadɩŋʋ, ʋ ga pa n pùə́ ŋʋ̀nɩ̀. Yá n dàń wá jì nyɩnyɩga, n lʋʋ lɩ̀à nə wá tì ba ma zɩrɩ zɩra. 22 Yá nacɩcaʋ tə nə ja zɩra kʋ twi, wá zʋ n yatana wa, kʋ pa n pùə́ ŋʋ̀nɩ̀, kʋ ga pa n jì kadɩŋʋ.” Yá kan tə wá swɩ̀n, ʋ wʋ́: “Amɩɩna, sə kʋ ya nətʋ.”

23 Yɩɩ joŋwanʋ tə wá pʋ́pʋ́nɩ́ tə mʋ̀ zɩra təntə sagɩ wa, yá ʋ ga sɩ̀n tə də nacɩcaʋ tə. 24 Ʋ wá pa kan tə nyʋn nacɩcaʋ tə nə ja zɩra kʋ twi, yá kʋ wá zʋ ʋ waa, kʋ kə wá pucʋnɩ. 25 Yɩɩ joŋwanʋ tə wá pìí ʋ jon badoli zìlə́ won tə kan tə jɩ̀àn wa. Ʋ wá yɩyarɩ kʋ Ba-Yígúrə́-Jə-Tiu yáá con, ʋ ga tún kʋ Yɩɩ joŋi bwálɩ́ tə yuu wa. 26 Yɩɩ joŋwanʋ tə wá fwa zìlə́ won mun tə jɩguli yii, ndə won nə kʋ nə lìí, yá ʋ wá sʋ̀rɩ́ tə, Yɩɩ joŋi bwálɩ́ tə yuu wa. Kʋ kwa nə, ʋ wá pa kan tə nyʋn nɩ́á tə. 27 Máŋá tə wa, ʋ nə pɩn ʋ nyʋn nacɩcaʋ tə, də ʋ nə viviri ʋ kwa ʋ ma sà ʋ barɩ tə, ʋ ga nan ʋ tʋn durən yìə̀n, nacɩcaʋ tə nə ja zɩra kʋ twi, wá zʋ ʋ waa, kʋ kə wá pucʋnɩ. Ʋ pùə́ wá ŋʋ̀nɩ̀, ʋ ga jì kadɩŋʋ. Yá kan tə dàń wá jì nyɩnyɩga, ʋ lʋʋ lɩ̀à nə wá tì ba ma zɩrɩ zɩra. 28 Yá kan tə dàń nə wà durən yìə̀n tʋn, ʋ nə yɩ parɩ, ba wá lwarɩ də ʋ wà yoo cʋ̀gʋ̀, yá ʋ wá ja dwíí.»

29 Mə nii nə Yɩɩ nə pɩn badoli yuu wa, də kan nə wulə ʋ barɩ dìə̀ wa, ʋ ga viviri ʋ kwa ʋ ma sà wá, ʋ ga nan ʋ tʋŋa durən yìə̀n. 30 Yá kanbarɩ tə nə fwa badoli də ʋ kan tə, ʋ ga bʋŋa də ʋ kan tə tʋŋa durən yìə̀n, ʋ wá ja kan tə ʋ va Ba-Yígúrə́-Jə-Tiu yáá con. Yá Yɩɩ joŋwanʋ tə dàń wá tʋn kʋ tə mama, Yɩɩ nə pɩn nii kʋ yuu wa. 31 Ba wá lwarɩ də kanbarɩ tə wà yoo cʋ̀gʋ̀, yá kan tə mʋ̀ cʋna tə wá pìí tə zɩn ʋ tətə.