Lìù tə nə kàn nii, sə ʋ ya Yɩɩ nyiən yoo
6
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Swɩ̀n Yɩzərayɛlə lɩ̀à tə con, də bɛɛ nə à yə̀ə́ kan nə pwɛ̀ ʋ tɩ̀àn də ʋ duən, ʋ ga poli nii sə ʋ ya à mʋ̀ Ba-Yígúrə́-Jə-Tiu cɩcɩ nyiən, 3 ʋ mɛ sə ʋ cɩ̀ ʋ tɩ̀àn nə də divɛn, nə à yə̀ə́ də sana tə nə dà. Ʋ wà mɛ sə ʋ nyʋn nanyʋna, ba nə fwa də divɛn tɩ̀án bɩ̀á, nə à yə̀ə́ nanyʋna, ba nə fwa də sana tə nə dà. Ʋ wà mɛ sə ʋ nyʋn wonywɩʋn yiri mama, ba nə fwa də divɛn tɩ̀án bɩ̀á. Ʋ wà mɛ sə ʋ də́ divɛn tɩ̀án bɩ̀á nəlɩran, nə à yə̀ə́ nəkʋran. 4 Ʋ nipoli tə máŋá tə mama wa, ʋ wà mɛ sə ʋ də́ won mama, kʋ nə naŋa divɛn tɩ̀ʋ́ lənə wa, kʋ nə yɩ divɛn tɩ̀án bɩ̀á waa bɩ̀á tə, nə à yə̀ə́ tə pʋran tə. 5 Ʋ nipoli tə máŋá tə mama wa, ʋ wà mɛ sə ʋ gan ʋ yuu, kʋ ja va kʋ yí máŋá tə, ʋ nə poli nii, sə ʋ ya Ba-Yígúrə́-Jə-Tiu cɩcɩ nyiən tə, nii nə wá sú. Ʋ wá ya parɩ. Ʋ mɛ sə ʋ yá ʋ yukʋran tə, ʋ pa tə nan, kʋ ja va kʋ yí ʋ nipoli tə yígúrə́. 6 Ʋ nipoli tə máŋá tə mama wa, ʋ wà mɛ sə ʋ bólí tɩgɩ yɩra. 7 Ʋ nyɩna, nə à yə̀ə́ ʋ nuu, nə à yə̀ə́ ʋ nubiu, nə à yə̀ə́ ʋ nakʋa nə tɩga, ʋ wà mɛ sə ʋ dwen ba lìù mama yɩra, ʋ ma kə ʋ tɩ̀àn durən wa. Cɩ́gá, ʋ yukʋran tə nə ba ganɩ tə bɩrɩ, də ʋ poli nii, sə ʋ ya Ba-Yígúrə́-Jə-Tiu cɩcɩ nyiən.8 Ʋ nipoli tə máŋá tə mama wa, ʋ wá ya parɩ, ʋ pa Ba-Yígúrə́-Jə-Tiu nə. 9 Lìù nə tɩga ʋ bɩan nə, kʋ dɩ̀ ʋ yuu, máŋá tə ʋ nə poli nii, sə ʋ ya Ba-Yígúrə́-Jə-Tiu cɩcɩ nyiən tə wá cən ka zɩgɩ, ʋ nə dwen tɩgɩ yɩra yɩrɩ. Yá barpɛ nii dɩɩn tə nə, ʋ wá kwɛn ʋ tɩ̀àn ʋ lɩ durən wa, ʋ ga pàrɩ́ ʋ yuu. 10 Nana nii dɩɩn tə nə, ʋ wá ja gunponi bələ, nə à yə̀ə́ nasara gunponi bələ, ʋ ja bà ʋ pa Yɩɩ joŋwanʋ tə nə, Yɩɩ jə́rə́ gansili tə mimii nə. 11 Yɩɩ joŋwanʋ tə wá ja zuŋə tə don, ʋ ma fwa cʋna kwɩan joŋi*, ʋ ga ja ka don tə, ʋ ma fwa joŋi, ba nə sʋ̀rɩ́*. Yá ʋ dàń wá fwa kʋ tíú tə cʋna kwɩan joŋi, ʋ pa wá, ʋ nə dwen tɩgɩ yɩra yɩrɩ. Kʋ dɩɩn təntə nə, kʋ tíú tə kʋ́ʋ̀ wá pìí ʋ jì Yɩɩ nyiən. 12 Ʋ kʋ́ʋ̀ wá pìí ʋ sinti, ʋ ya Yɩɩ nyiən, ndə ʋ yà nə poli nii nətʋ. Ʋ wá ja pəbiə, ka nə jə bɩnɩ nədʋ, ʋ ma fwa lwɩa joŋi. Máŋá tə nə kɛ̀ń tə yà kʋ́ʋ̀ ba lá də́, ka nə cən ka zɩgɩ tə yɩrɩ.»
13 «Nə̀ń nii tə ba nə pɩn lìù tə yuu wa, ʋ nə poli nii, sə ʋ ya Ba-Yígúrə́-Jə-Tiu cɩcɩ nyiən. Máŋá tə ʋ nipoli tə dɩan nə cé, ba wá ja wá, ba bà Yɩɩ jə́rə́ gansili tə mimii nə. 14 Ʋ wá ja vàná batwa, tə yɩra nə zurə, tə ga cé, ʋ ja bà Ba-Yígúrə́-Jə-Tiu yáá con. Ʋ wá ja pəbiə, ka nə jə bɩnɩ nədʋ, ka yɩra nə zurə, ka ga cé, ʋ ma fwa joŋi, ba nə sʋ̀rɩ́. Ʋ wá ja bɩnɩ nədʋ pəbikan, ka yɩra nə zurə, ka ga cé, ʋ ma fwa cʋna kwɩan joŋi. Ʋ wá ja pabɩʋ, kʋ yɩra nə zurə, kʋ ga cé, ʋ ma fwa nimarʋ joŋi*. 15 Ʋ wá ja dipɛn, kʋ nə wà sabwarɩ ken, kəpurə yii, də gàtó ba nə fwa də munbʋa, ba nə ywɛ́ də nʋga, kʋ ga wà sabwarɩ ken, də ŋʋ̀nán tə nə wà sabwarɩ ken, ba nə gàrɩ̀ nʋga tə yuu wa, də zìlə́ wiən tə nə yɩ mun də divɛn, ʋ ja bà, sə ba ma fwa jwəŋə tə. 16 Yɩɩ joŋwanʋ tə wá bɩrɩ tə mʋ̀ zìlə́ wiən təntə Ba-Yígúrə́-Jə-Tiu yáá con, ʋ ga fwa cʋna kwɩan joŋi tə, də joŋi tə ba nə sʋ̀rɩ́. 17 Yá ʋ wá ja pabɩʋ tə, ʋ ma fwa nimarʋ joŋi, kʋ súrí dipɛn, kʋ nə wà sabwarɩ ken kəpurə yii nə. Kʋ kwa nə, Yɩɩ joŋwanʋ tə wá bɩrɩ zìlə́ won tə, kʋ nə yɩ mun də divɛn, Ba-Yígúrə́-Jə-Tiu yáá con. 18 Kʋ máŋá təntə wa, lìù tə nə poli nii, sə ʋ ya Yɩɩ nyiən tə wá pàrɩ́ ʋ yukʋran tə, Yɩɩ jə́rə́ gansili tə mimii nə, ʋ ga dɩ tə, nimarʋ joŋi tə mən tə wa. 19 Yɩɩ joŋwanʋ tə wá tì pabɩʋ tə vapaʋ tə kʋ nə bɩga, ʋ lɩ gàtó tə nə wà sabwarɩ ken nədʋ, də ŋʋ̀nʋ́ tə nə wà sabwarɩ ken bìú nədʋ, kəpurə tə wa. Ʋ wá kə tə lìù tə jɩ̀àn wa, ʋ nə kàn nii, sə ʋ yà Yɩɩ nyiən tə, ʋ yuu tə pàrʋ́ kwa nə. 20 Yɩɩ joŋwanʋ tə wá yɩyarɩ tə Ba-Yígúrə́-Jə-Tiu yáá con, ʋ bɩrɩ wá. Zìlə́ wiən təntə yɩ parɩ, tə də nyʋnɩ tə, də ciin tə mɛ ga yɩ Yɩɩ joŋwanʋ tə nə tɩ. Kʋ kwa nə, lìù tə nə poli nii, sə ʋ yà Yɩɩ nyiən tə dàń wàá divɛn ʋ nywɩn.
21 Mə nii nə à mʋ̀ Yɩɩ nə pɩn, lìù tə yuu wa, ʋ nə poli nii, sə ʋ yà Yɩɩ nyiən. Mə wiən nə, kʋ tíú nə mɛ sə ʋ pa Ba-Yígúrə́-Jə-Tiu nə, kʋ máŋá təntə wa. Ʋ nə jə zìlə́ wiən duən də, ʋ pɩ̀à sə ʋ súrí lá, ʋ wàá ʋ súrí. Ʋ mɛ sə ʋ zìlí nii tə, Yɩɩ nə pɩn lìù tə yuu wa, ʋ nə poli nii, sə ʋ ya Yɩɩ nyiən, kʋ twá ʋ nipoli tə nə.»
Nətʋ ba nə lòrì Yɩɩ, sə ʋ fwa zəni
22 Ba-Yígúrə́-Jə-Tiu swɩ̀n Moyizə con, ʋ wʋ́: 23 «Swɩ̀n sʋ̀ràn tə, Aron də ʋ bɩ̀á tə nə mɛ sə ba swɩ̀n ba ma lòrì, sə Yɩɩ fwa zəni Yɩzərayɛlə lɩ̀à tə yɩra. Ba mɛ sə ba swɩ̀n, ba wʋ́:
24 “Ba-Yígúrə́-Jə-Tiu wá fwa zəni á yɩra, ʋ ga cɩ̀ á nə!
25 Ba-Yígúrə́-Jə-Tiu wá poli ʋ yáá á yuu wa,
ʋ ga fwa pubwanʋ á yɩra!
26 Ba-Yígúrə́-Jə-Tiu wá súrí ʋ yɩ́á á yuu wa,
ʋ ga pa aba sìə́!”
27 Mə nətʋ nə, Yɩɩ joŋwana tə wá bon à yɩrɩ, ba ma lòrì nə, sə à fwa zəni Yɩzərayɛlə lɩ̀à tə yɩra, yá à wá fwa zəni ba yɩra.»