Yɩɩ joŋwana
tʋ̀tʋ̀nán yoo
Yɩɩ joŋwana tʋ̀tʋ̀nán sagɩ tə yuu wa sʋgʋ
Yɩɩ joŋwana tʋ̀tʋ̀nán sagɩ tə bɩrɩ də Yɩɩ zɩgɩ ʋ jə́rə́ gansili tə wa, ʋ bon Moyizə, sə ʋ swɩ̀n ʋ con. Sagɩ tə bwálɩ́ mama wa, Yɩɩ bɩrɩ Moyizə ʋ nii yìə̀n kapʋpʋ, də yìə̀n tə Yɩzərayɛlə lɩ̀à tə nə mɛ, sə ba twá tə nə. Nikanɩ wulə swapitərə 18 vɛrəse 5 wa, kʋ nə bɩrɩ də lìù tə, ʋ nə twá tə nə, ʋ wá na mɩɩ. Yɩɩ bɩrɩ Yɩzərayɛlə lɩ̀à tə, yìə̀n tə nə wá cʋ̀gʋ̀, ba də ʋ mʋ̀ Yɩɩ duən nə. Ʋ bɩrɩ ba nətʋ, ba nə wá tanɩ gansili tə, sə kʋ wànɩ́ kʋ ya Yɩɩ jə́rə́ bwálɩ́. Swapitərə 1, kʋ va kʋ yí swapitərə 7 wa, lɩ̀à tə ba nə wá fwa joŋə tə mɛ, sə ba fwa tə, ndə tə nə mɛ, sə tə fwa nətʋ. Swapitərə 8, kʋ va kʋ yí swapitərə 10 wa, ba mɛ sə ba zìlí Yɩɩ joŋwana tə, Yɩɩ joŋwana tə də ga mɛ, sə ba zìlí ba tɩ̀àn. Swapitərə 11, kʋ va kʋ yí swapitərə 16 wa, Yɩzərayɛlə lìù mama mɛ, sə ʋ cɩ̀ ʋ tɩ̀àn nə, də durən mama. Swapitərə 17, kʋ va kʋ yí swapitərə 27 wa, ba mɛ, sə ba cɩ̀ ba tɩ̀àn nə, də tʋtʋnkʋkwɩnan mama. Swapitərə 19 vɛrəse 2 wa, kʋ swɩ̀n də Yɩɩ yɩ parɩ, ʋ yɩ sonu Yɩɩ, ʋ ga yɩ Yɩɩ tə, ʋ nə pɩn mɩɩ. Ʋ dàń pɩ̀á, sə ʋ lɩ̀à tə də ya parɩ, sə ba na mɩɩ, ba ga sóní lɩ̀à də.