Zaŋʋ
Zaŋʋ sagɩ tə yuu wa sʋgʋ
Yɩɩ sagɩ tə bələ nii sagɩ tə yɩrɩ nə yɩ Zaŋʋ sagɩ. «À mʋ̀ nə yɩ Ba-Yígúrə́-Jə-Tiu, á Yɩɩ tə, à nə lɩ aba, yongaʋ tə wa, Ezwipətə lʋʋ nii tə wa.» Swapitərə 20 vɛrəse 2 tə wa sʋ̀ràn təntə bɩrɩ də sagɩ tə də̀ń nə yɩ zaŋʋ. Kʋ wa sʋ̀ràn tə bɩrɩ də Yɩɩ yɩ ʋ lɩ̀à tə jonu. Mə swapitərə 20 vɛrəse 2 tə wa sʋ̀ràn təntə nə dɩga Yɩɩ nii tə, ʋ nə pɩn yìə̀n fugə yuu wa tə də̀ń. Yɩɩ twá də sonu, ʋ ma jon Yɩzərayɛlə lɩ̀à tə. Ʋ dàń pɩ̀à, sə ba də zìlí ʋ nii tə, ba ma bɩrɩ də ba swə wá.
Zaŋʋ sagɩ tə swapitərə 1 vɛrəse 1, kʋ va kʋ yí swapitərə 15 vɛrəse 21 wa, kʋ bɩrɩ də Yɩzərayɛlə lɩ̀à yà vəli ba twá ba jə̀ń Ezwipətə nə. Ba dwíí tə pùlì zənzən, ba ga na də Ezwipətə pɩ̀ʋ́ tə pɩn ba jì ywə́ŋə́. Yɩɩ wà Yɩzərayɛlə lɩ̀à tə yá ba càn tə wa. Ʋ kúrí Moyizə, ʋ nə yɩ ba wa lìù, sə ʋ ya ba yáá tíú. Yɩɩ tʋn dɩ̀àn yìə̀n kapʋpʋ, ʋ ma kalɩ Ezwipətə tɩ̀án, ʋ pa ba yá Yɩzərayɛlə lɩ̀à tə, sə ba va ba tɩnɩ ba tɩ̀àn. Swapitərə 15 vɛrəse 22, kʋ va kʋ yí swapitərə 18 vɛrəse 27 wa, kʋ swɩ̀n də Yɩɩ nə ywàń ba yuu, ʋ ga bɩrɩ ba cwəŋə, máŋá tə wa, ba nə wulə Sinayi kasɔɔ lanworu tə wa. Swapitərə 19 vɛrəse 1, kʋ va kʋ yí swapitərə 24 vɛrəse 18 wa, kʋ swɩ̀n də Yɩɩ pɩn Yɩzərayɛlə lɩ̀à tə jí ʋ mʋ̀ Yɩɩ lɩ̀à, ʋ ga tún nimarʋ də ba, Sinayi paan tə yuu wa. Yá ʋ dàń pɩn ba lwarɩ ʋ nii yìə̀n tə. Swapitərə 25, kʋ va kʋ yí swapitərə 31 wa, kʋ swɩ̀n də Moyizə yà wulə ʋ cʋga nətʋ, ba nə mɛ sə ba fwa Yɩɩ wulu bwálɩ́ tə. Swapitərə 32, kʋ va kʋ yí swapitərə 34 wa, kʋ swɩ̀n də Yɩzərayɛlə lɩ̀à tə fwa yɩɩ don də sɩ́án, kʋ nə yɩ ndə nabiə nə. Yá kʋ dàń pɩn, Yɩɩ lɩŋa zàn zənzən. Swapitərə 35, kʋ va kʋ yí swapitərə 40 wa, kʋ swɩ̀n Yɩɩ wulu bwálɩ́ tə, ʋ nə twi ʋ bɩrɩ ʋ tɩ̀àn kʋ wa fwaŋʋ yoo.