Lʋʋ dəkuu
Lʋʋ dəkuu sagɩ tə yuu wa sʋgʋ
Yɩɩ sagɩ tə təntən sagɩ tə yɩrɩ nə yɩ Lʋʋ dəkuu sagɩ. Mə kʋ sagɩ təntə nə bɩrɩ kʋ nə zɩgɩ nətʋ, lʋʋ də ləzoni də Yɩzərayɛlə dwíí tə ma wulə.
Swapitərə 1, kʋ va kʋ yí 11 wa, kʋ bɩrɩ nə nə wá fwa nətʋ, nə ma lwarɩ lʋʋ tə, nə nə wulə kʋ wa. Ləzwənə yɩ bɛ̀ɛ̀ won? Ʋ bwálɩ́ yɩ kʋ wulə yə̀n lʋʋ wa? Bɛ̀ɛ̀ nə pɩn ləzoni yàá ba duən yuu kəni lʋʋ wa? Yìə̀n təntə mama jə tɩ̀ʋ́ naaa? Bwiə təntə tə nə wulə də zə̀n mama jə tə liu lʋʋ dəkuu sagɩ tə wa. Kʋ swapitərə 1 də 2 tə wa, kʋ bɩrɩ Yɩɩ nə fwa bɛɛ də kan nətʋ. Kʋ swapitərə 3 wa, kʋ bɩrɩ Yɩɩ də ləzoni nə cʋ̀gʋ̀ duən nə nətʋ. Kʋ swapitərə 4 wa, kʋ swɩ̀n Kayɛn də Abɛlə yoo. Kʋ swapitərə 6, kʋ va kʋ yí 9 wa, kʋ swɩ̀n Nowe máŋá dwafarʋ tə yoo. Kʋ swapitərə 11 wa, kʋ swɩ̀n Babɛlə dəyuu dìə̀ nədarʋ tə yoo. Yìə̀n tə sagɩ tə nə swɩ̀n tə yoo, ləzwənə wàrɩ̀ máŋá tə, tə nə tʋn ʋ bɩrɩ.
Kʋ swapitərə 12, kʋ va kʋ yí 50 wa, kʋ bɩrɩ nətʋ Yɩɩ nə pɩn mɩɩ ləzoni nə, ʋ ga bon Yɩzərayɛlə lɩ̀à nɩbara-ba, sə ba tʋn ba pa wá. Kʋ swapitərə 12 vɛrəse 1, kʋ va kʋ yí swapitərə 25 vɛrəse 18 wa, kʋ swɩ̀n Abərahamə yoo. Kʋ bɩrɩ Abərahamə nə ken ʋ waa Yɩɩ nə, də ʋ nə zìlí Yɩɩ nii nətʋ. Kʋ swapitərə 25 vɛrəse 19, kʋ va kʋ yí swapitərə 36 vɛrəse 43 wa, kʋ swɩ̀n Abərahamə bìú Yizakə, də ʋ naʋ Zwakɔbə ʋ yɩrɩ don nə yɩ Yɩzərayɛlə yoo. Kʋ swapitərə 37 vɛrəse 1, kʋ va kʋ yí swapitərə 50 vɛrəse 26 wa, kʋ swɩ̀n Zʋzɛfə yoo, ʋ nə yɩ Zwakɔbə bìú don, ʋ ga yɩ dwíə́ bələ nɩbɛɛ. Mə kʋ twá də ʋ mʋ̀ Zʋzɛfə, Zwakɔbə də ʋ bɩ̀á tə duən tə, də ba dwíə́ tə ma va ba jə̀ń Ezwipətə nə.
Lʋʋ dəkuu sagɩ tə yɩ kʋ təntən kʋ bɩrɩ won tə Yɩɩ nə fwa. Kʋ mʋ̀ nə sinti kʋ swɩ̀n də Yɩɩ fwa lʋʋ. Kʋ nətʋ bɩrɩ Yɩɩ dɩ̀àn nə dáá nətʋ. Sagɩ tə yígúrə́ wa kʋ, bɩrɩ nikanɩ tə, kʋ nə bɩrɩ də Yɩɩ wá ywàń ʋ lɩ̀à tə yuu nə. Ba yoo mama wa, kʋ yɩ Yɩɩ nə wulə ba yáá. Ʋ pɩn ba lwarɩ wá, ʋ bʋ̀rɩ̀ ba bʋra, ʋ kəni ba cwəŋə wa, ʋ ga saŋa ba. Ʋ mʋ̀ nə pɩn ba yoo mama tʋŋa.
Yɩɩ pɩ̀à sə ba jələ ʋ yuu wa, də ʋ nɩkana tə yuu wa. Ʋ pɩ̀à sə ba zìlí yìə̀n tə, ʋ nə pɩn nii, sə ba tʋn. Ʋ pɩ̀à sə ba twá ʋ nii tə nə. Sagɩ kʋ tə bɩrɩ nətʋ Yɩzərayɛlə lɩ̀à nəkwɩna tə nə ken ba wa Yɩɩ nə, kʋ ga saŋa kʋ pɩn ba waa tə wulə wuuu.