Lʋʋ dəkuu
LƲƲ DƏKUU YOO
Lʋʋ fwaŋʋ yoo
1
1 Máŋá tə Yɩɩ nə pɩ̀à, ʋ dɩ lʋʋ də̀ń, ʋ təntən ʋ fwa lanworu də tɩa. 2 Tɩa tə yà yɩ won, kʋ máŋá nə wàrɩ̀ kʋ maŋa, ka ga yɩ woru. Ka mama yà yɩ bʋʋ nəfarʋ kʋ də̀ń nə lu*, yá yikunu ga wulə woru təntə wa. Yá Yɩɩ Siŋu* tə ga yɩyarɩ nɩ́á tə yuu con.3 Yɩɩ swɩ̀n, ʋ wʋ́: «Poni ya lá!» Yá poni yɩn lá. 4 Yɩɩ nɩ də, poni tə ziən. Yɩɩ dàń ga pwɛ̀ poni də yikunu duən nə. 5 Yɩɩ dɩga poni yɩrɩ, tɩpʋrɩ, ʋ ga dɩ yikunu yɩrɩ, tɩtɩn. Didəni twi kʋ kɛ̀ń, jɩjʋ də ga bà. Kʋ nətʋ yɩn təntən dɩɩn.
6 Yɩɩ kʋ́ʋ̀ swɩ̀n, ʋ wʋ́: «Woru ya nɩ́á tə titəŋi wa, kʋ pwɛ̀ tə duən nə!» 7 Yá kʋ dàń yɩn nətʋ. Yɩɩ fwa woru təntə, ʋ ma pwɛ̀ nɩ́á tə, nə wulə tɩa, də tə tə, nə wulə yɩɩ nə, duən nə. 8 Yɩɩ dɩga woru tə yɩrɩ, lanworu. Didəni twi kʋ kɛ̀ń, jɩjʋ də ga bà. Kʋ nətʋ yɩn bələ nii dɩɩn.
9 Yɩɩ kʋ́ʋ̀ swɩ̀n, ʋ wʋ́: «Nɩ́á tə, nə wulə lanworu tə də̀ń, vəli tə pə̀ń bwálɩ́ nədʋ, sə bwálɩ́ nəkʋrʋ nan poni nə!» Yá kʋ dàń yɩn nətʋ. 10 Yɩɩ dɩga bwálɩ́ nəkʋrʋ tə yɩrɩ, tɩa, ʋ ga dɩ bwálɩ́ tə, nɩ́á tə nə tígə́ tə yɩrɩ, mʋʋ*. Yɩɩ nɩ də, kʋ nətʋ tə ziən.
11 Yá Yɩɩ dàń swɩ̀n, ʋ wʋ́: «Tɩa tə pa, garan yiri mama, tə nə zɩŋa bɩ̀á, tə ga jə dwíí, tə pìí tə pɛ́n, də tɩ̀án yiri mama, tə nə ləni bɩ̀á, tə ga jə dwíí, tə pìí tə pɛ́n, nan tə piri ka yuu nə!» Yá kʋ dàń yɩn nətʋ. 12 Tɩa tə pɩn garan yirə yirə, də tɩ̀án yirə yirə, tə nə ləni bɩ̀á, tə ga jə dwíí, tə pìí tə pɛ́n, dàń nan tə piri ka yuu nə. Yɩɩ nɩ də kʋ nətʋ tə ziən. 13 Didəni twi kʋ kɛ̀ń, jɩjʋ də ga bà. Kʋ nətʋ yɩn batwa nii dɩɩn.
14 Yɩɩ kʋ́ʋ̀ swɩ̀n, ʋ wʋ́: «Wiən tə nə jə poni* yana lanworu tə wa, sə tə pwɛ̀ tɩtɩn də tɩpʋrɩ duən nə. Sə tə ya mɩmɩnan, tə bɩrɩ máŋá, də dɩan, də bɩna. 15 Tə mʋ̀ wiən təntə, tə nə wulə lanworu tə wa, wá pɩ̀rɩ̀ tɩa tə də poni!» Yá kʋ dàń yɩn nətʋ. 16 Yɩɩ fwa wiən nəfaran bələ, tə nə jə poni. Tə bələ tə wa, Yɩɩ fwa kʋ don, kʋ poni nə dáá, sə kʋ ya lá tɩpʋrɩ wa. Ʋ ga fwa kʋ don tə, kʋ poni nə ba dáá, sə kʋ də ya lá tɩtɩn nə. Yɩɩ fwa kacɩlacɛɛ tə də. 17 Yɩɩ ken wiən təntə lanworu tə wa, sə tə pɩ̀rɩ̀ tɩa tə də poni. 18 Tə mʋ̀ nə wá ya lá tɩpʋrɩ wa, də tɩtɩn nə, tə ga wá pwɛ̀ poni də yikunu duən nə. Yɩɩ nɩ də, kʋ nətʋ tə ziən. 19 Didəni twi kʋ kɛ̀ń, jɩjʋ də ga bà. Kʋ nətʋ yɩn banɩa nii dɩɩn.
20 Yɩɩ kʋ́ʋ̀ swɩ̀n, ʋ wʋ́: «Nɩ́á tə pɩan wonəŋə kapʋpʋ mɩmɩlɩ tə wa. Zuŋi də yana lanworu tə, də tɩa tə pwə́rə́ wa, tə piri!» 21 Yɩɩ fwa wonəŋə nəfaran* yiri mama, tə nə wulə mʋʋ wa, də wonəŋə tə mama, tə nə ye nɩ́á wa, nɩ́á tə nə pɩn, tə mɩmɩlɩ tə wa. Ʋ fwa zuŋi yiri mama, tə nə jə vànà, tə piri. Yɩɩ nɩ də, kʋ nətʋ tə ziən. 22 Yɩɩ fwa zəni* tə yɩra, ʋ swɩ̀n tə con, sə tə lɩra bɩ̀á, tə pùlì zənzən, tə sú mʋʋ nɩ́á tə nii. Sə zuŋi tə də pùlì, tə sú tɩa yuu! 23 Didəni twi kʋ kɛ̀ń, jɩjʋ də ga bà. Kʋ nətʋ yɩn bonu nii dɩɩn.
24 Yɩɩ kʋ́ʋ̀ swɩ̀n, ʋ wʋ́: «Tɩa tə pa wonəŋə yiri mama ya ka yuu wa: Kʋ mʋ̀ nə yɩ sàń vàná, də wonəŋə tə nə vəli tə pùə́ baan, də ganaŋa yiri mama!» Yá kʋ dàń yɩn nətʋ. 25 Yɩɩ fwa ganaŋa yiri mama. Ʋ fwa sàń vàná yiri mama, də tɩa yuu wonəŋə yiri mama, tə nə vəli tə pùə́ baan. Yɩɩ nɩ də, kʋ nətʋ tə ziən.
26 Yá Yɩɩ dàń swɩ̀n, ʋ wʋ́: «Nə fwagaa ləzwənə, sə ʋ ya nə nyɩnyɩga*, ʋ nyɩn də nəba. Sə ʋ tɩnɩ mʋʋ wa filə tə, də lanworu zuŋi tə, də vàná tə nə vəli nɛɛ banɩa yuu, də tɩa tə mama, də wonəŋə tə mama, tə nə vəli tə pùə́ baan, tɩa yuu wa!»
27 Yá Yɩɩ dàń fwa ləzwənə, ndə ʋ tətə nyɩnyɩga nə.
Ʋ cɩ́gá fwa wá, ndə ʋ mʋ̀ Yɩɩ nyɩnyɩga nə.
Bɛɛ də kan nə, ʋ fwa.
28 Yɩɩ fwa zəni ba yɩra, ʋ swɩ̀n ba con, ʋ wʋ́: «Á lɩra bɩ̀á, sə á pùlì zənzən, á sú tɩa yuu mama, sə á pa ka sɛ̀ á nii. Á yana mʋʋ wa filə tə yuu wa, də lanworu zuŋi tə yuu wa, də wiən tə mama yuu wa, tə nə vəli tə pùə́ baan, tɩa yuu wa.»
29 Yɩɩ swɩ̀n, ʋ wʋ́: «Á nəŋə, à pɩn aba garan yiri mama, tə nə zɩŋa bɩ̀á, tə ga jə dwíí, tə pìí tə pɛ́n tɩa yuu wa, bwálɩ́ mama nə, də tɩ̀án yiri mama, tə nə ləni bɩ̀á, tə ga jə dwíí, tə pìí tə pɛ́n. Tə mʋ̀ nə wá ya á wodirən. 30 À pɩn garan yiri mama, tɩa yuu vàná tə mama nə, də lanworu zuŋi tə mama nə, də wiən tə mama nə, tə nə vəli tə pùə́ baan, də wiən tə mama nə, tə nə siŋə tɩa yuu wa, sə tə ya tə wodirən.» Yá kʋ dàń yɩn nətʋ. 31 Yɩɩ nɩ wiən tə mama, ʋ nə fwa. Yá ʋ dàń nɩ də, tə ziən zənzən. Didəni twi kʋ kɛ̀ń, jɩjʋ də ga bà. Kʋ nətʋ yɩn bardʋ nii dɩɩn.