2
1 Mə kʋ zɩgɩ nətʋ, Yɩɩ ma fwa lanworu də tɩa, də tə wa wiən tə mama, ʋ zwɛ̀. 2 Yɩɩ nə tʋn tʋ̀tʋ̀nán tə mama, ʋ zwɛ̀, ʋ dàń sìí barpɛ nii dɩɩn tə nə, tʋ̀tʋ̀nán tə mama yɩrɩ, ʋ nə tʋn. 3 Yɩɩ fwa zəni barpɛ nii dɩɩn tə yuu wa, ʋ ga lɩ kʋ, ʋ tún vàn nə. Cɩ́gá, kʋ dɩɩn tə nə, Yɩɩ sìí tʋ̀tʋ̀nán tə mama yɩrɩ, ʋ nə tʋn, ʋ ma fwa lʋʋ.Bɛɛ də kan nə yɩn Edɛnə tɩ̀án kárá tə wa nətʋ
4 Nə̀ń lanworu də tɩa yà nə yɩ nətʋ, máŋá tə wa Yɩɩ nə fwa tə. Máŋá tə wa, Ba-Yígúrə́-Jə-Tiu Yɩɩ* nə fwa lanworu də tɩa, 5 tɩ̀ʋ́ mama yà tə tə̀lə́ tɩa yuu wa. Gaʋ də mama yà tə wà pɛ́n, Ba-Yígúrə́-Jə-Tiu Yɩɩ yà tə nə wà pɩn, dwà nɩ̀ tɩa yuu wa yɩrɩ. Yá ləzwənə də yà tə tə̀lə́, sə ʋ vàrà tɩa tə. 6 Nɩ́á yà bùlì tə naŋa tɩa, tə gàrɩ̀ tɩa tə yuu mama.
7 Ba-Yígúrə́-Jə-Tiu Yɩɩ dàń fwa tɩa pùrú*, ʋ ma ma bɛɛ. Ʋ fwi vʋʋ, kʋ nə pɩn mɩɩ*, ʋ kə bɛɛ mɩbʋran wa, yá bɛɛ dàń jìgə̀ ləzwənəŋu. 8 Kʋ kwa nə, Ba-Yígúrə́-Jə-Tiu Yɩɩ cwɛn tɩ̀án kárá* Edɛn* nə, yɩɩ yipɩan con. Yá ʋ dàń tì bɛɛ tə, ʋ nə fwa, ʋ kə kʋ bwálɩ́ təntə wa. 9 Ba-Yígúrə́-Jə-Tiu Yɩɩ pɩn tɩ̀án yiri mama, tə nə ziən, tə lənə diŋə də ga ywán, pɛ́n tɩa yuu wa. Ʋ pɩn tɩ̀ʋ́ tə, kʋ lənə nə pɩn mɩɩ, də tɩ̀ʋ́ tə, kʋ lənə nə pɩn zəni də lwanɩ yənu, pɛ́n tɩ̀án kárá tə titəŋi wa. 10 Mʋnaa yà naŋa Edɛnə wa, ka gàrɩ̀ tɩ̀án kárá tə nə. Yá mʋnaa tə zɩgɩ lá nə, ka pwɛ̀ nacoŋi banɩa. 11 Təntən nacwəŋə tə yɩrɩ nə yɩ Piswon. Ka mʋ̀ nə kɩkarɩ Havɩla lʋʋ nii tə, sɩ́án yà nə wulə lá, 12 tə yiri nə ziən zənzən. Tɩralɩ, ba nə fwa də tɩ̀ʋ́ don mala, də kapan cɩ́nʋ́ cɩcɩlʋ nəsɩan don, kʋ nə jə funə, də yà wulə lá. 13 Bələ nii nacwəŋə tə yɩrɩ nə yɩ Giyon. Ka mʋ̀ nə kɩkarɩ Kuswə lʋʋ nii tə. 14 Batwa nii nacwəŋə tə yɩrɩ nə yɩ Tigərə. Ka mʋ̀ nɩ́á nə dəri, tə twá Asiiri lʋʋ nii, yɩɩ yipɩan con. Banɩa nii nacwəŋə tə nə yɩ Əfəratə. 15 Ba-Yígúrə́-Jə-Tiu Yɩɩ tì bɛɛ, ʋ kə Edɛnə tɩ̀án kárá tə wa, sə ʋ vàrà ka, də ʋ ywàŋá ka yuu. 16 Ʋ pɩn nii bɛɛ nə, yoo kʋ tə yuu wa, ʋ wʋ́: «N wàá tɩ̀án kárá tə tɩ̀án tə mama lənə, n də́. 17 Yá n dàń nə dàn ká də́ tɩ̀ʋ́ tə, kʋ lənə nə pɩn zəni də lwanɩ yənu tə mʋ̀. Cɩ́gá, dɩɩn tə nə, n nə dí kʋ, n wá tɩ.»
18 Kʋ kwa nə,Ba-Yígúrə́-Jə-Tiu Yɩɩ swɩ̀n, ʋ wʋ́: «Kʋ ba ziən, sə bɛɛ ya ʋ cɩcɩ. Kʋ mʋ̀ yɩrɩ, à wá fwa sáŋʋ́, kʋ nə wá ya ʋ twadon*, à pa wá.» 19 Ba-Yígúrə́-Jə-Tiu Yɩɩ yà fwa tɩa pùrú, ʋ ma ma tɩa yuu vàná tə mama, də lanworu zuŋi tə mama. Ʋ pɩn tə bà bɛɛ con, sə ʋ jə́n nətʋ tə, bɛɛ nə wá bon tə, sə kʋ pa won tə mama, kʋ nə siŋə, ja yɩrɩ, bɛɛ nə wá pa kʋ. 20 Bɛɛ pɩn yɩra sàń vàná tə mama nə, də lanworu zuŋi tə mama nə, də ganaŋa tə mama nə. Yá bɛɛ tətə wà sáŋʋ́ nɩ tə wa, ʋ pa ʋ tɩ̀àn nə, kʋ nə wá ya ʋ twadon. 21 Ba-Yígúrə́-Jə-Tiu Yɩɩ dàń pɩn bɛɛ dwɛ̀ lɩ́gɩ́, ndə ʋ tɩga. Ʋ lɩ bɛɛ sadanworu kuu nədʋ, ʋ ga ja nàŋʋ́ tə, ʋ ma sun kʋ bʋʋ tə. 22 Ba-Yígúrə́-Jə-Tiu Yɩɩ tì kuu tə, ʋ nə lɩ bɛɛ yɩra, ʋ ma fwa kan, ʋ ja bà, ʋ pa bɛɛ nə. 23 Bɛɛ dàń swɩ̀n, ʋ wʋ́:
«Sɩ́ʋ́n nə, kʋ tə yɩ à kurən tə wa kuu.
Kʋ yɩ à yɩra tə wa nàŋʋ́.
Mə ʋ mʋ̀ nə, ba wá bon kan,
ʋ nə yɩ ʋ nan bɛɛ yɩra tə yɩrɩ.a»