Bɛɛ tə də ʋ kan tə dí tɩ̀ʋ́ tə lənə, Yɩɩ nə dùə̀ súú ba nii nə, sə ba dàń ká də́ tə
3
1 Dən yà nə jə swɩan, kʋ doni ganaŋa tə mama, Ba-Yígúrə́-Jə-Tiu Yɩɩ* nə fwa. Dɩɩn don nə, dən tə swɩ̀n kan tə con, kʋ wʋ́: «Yɩɩ cɩ́gá swɩ̀n á con, ʋ wʋ́, á dànà ká də́ tɩ̀án tə mama lənə, tə nə wulə tɩ̀án kárá* tə wa, naaa?» 2 Kan tə ma le dən tə, ʋ wʋ́: «Nə də́ tɩ̀án tə lənə, tə nə wulə tɩ̀án kárá tə wa. 3 Yá tɩ̀ʋ́ tə mʋ̀, kʋ nə wulə tɩ̀án kárá tə titəŋi wa, Yɩɩ swɩ̀n kʋ yoo nə con, ʋ wʋ́, nə dànà ká də́ kʋ lənə. Yá nə dànà ká dwen kʋ yɩra də tətə. Kʋ nə tà nətʋ, nə wá tɩ.» 4 Yá dən tə dàń swɩ̀n kan tə con, kʋ wʋ́: «Kʋ tà cɩ́gá, á bá tɩ də mama. 5 Yɩɩ dàń nə yə̀ə́ də dɩɩn tə, á nə dí kʋ bìú, á yɩ́á wá pori. Yá á ga wá ya ndə yɩa nə, á yəni zəni də lwanɩ swɩ́án.»6 Kan tə nɩ də tɩ̀ʋ́ tə lənə ziən yii wa, tə ga mɛ də diŋə. Tə ga jə fɩra, sə tə pa, ʋ ja yənu. Kʋ nətʋ tə dàń pɩn, kan tə kwə tɩ̀ʋ́ tə ləni, ʋ də́, ʋ ga pa, ʋ barɩ tə də nə, ʋ yà nə wulə də wá, ʋ də jon ʋ də́.
7 Ba mɛ bələ yɩ́á dàń pori. Ba dàń lwarɩ ba pubʋŋa wa, də ba yɩ yaswələ. Ba kɛ́n tɩ̀án vʋran, ba sʋ ba kə duən nə, ba vwa ba tàŋɩ́ nə.
Yɩɩ yàlà* bɛɛ tə, də ʋ kan tə, də dən tə
8 Máŋá tə yɩɩ nə zuri, bɛɛ tə də ʋ kan tə nì Ba-Yígúrə́-Jə-Tiu Yɩɩ* nɛɛ dwana, də ʋ twi, ʋ wulə ʋ jírí tɩ̀án kárá* tə wa. Ba dàń dəri ba səgə, Ba-Yígúrə́-Jə-Tiu Yɩɩ yáá nə, tɩ̀án kárá tə wa. 9 Ba-Yígúrə́-Jə-Tiu Yɩɩ bon bɛɛ tə, ʋ ga bwe wá, ʋ wʋ́: «Yə̀n nə n wulə?» 10 Bɛɛ tə le, ʋ wʋ́: «À nì n nɛɛ dwana tɩ̀án kárá tə wa. Yá fən zʋa nə, à nə yɩ yaswələ yɩrɩ. Kʋ mʋ̀ nə pɩn, à ma səgə.» 11 Ba-Yígúrə́-Jə-Tiu Yɩɩ swɩ̀n, ʋ wʋ́: «Wàà nə bɩrɩ mʋ́, də n yɩ yaswələ? N dí tɩ̀ʋ́ tə lənə, à nə dùə̀ súú n nii nə, sə n dàn ká də́ tə. Kʋ tà nətʋ?» 12 Bɛɛ tə ma le, ʋ wʋ́: «Kʋ yɩ kan tə, n nə ken à səpuni nə tə, nə pɩn nə tɩ̀ʋ́ tə ləni, à ma jon à də́.» 13 Ba-Yígúrə́-Jə-Tiu Yɩɩ ma bwe kan tə, ʋ wʋ́: «Bɛ̀ɛ̀ nə pɩn, n ma tʋn kʋ yoo təntə?» Kan tə le, ʋ wʋ́: «Dən nə gɩgarɩ nə, kʋ kə yoo təntə wa, kʋ pa à də́ tɩ̀ʋ́ tə ləni.»
14 Ba-Yígúrə́-Jə-Tiu Yɩɩ swɩ̀n dən tə con, ʋ wʋ́:
«N nə tʋn kʋ yoo təntə yɩrɩ,
à wá yàlà mʋ́ sàń vàná tə mama,
də ganaŋa tə mama wa.
N pùə́ baan nə n wá va,
tɩa pùrú* ga nə wá ya n wodiu dɩɩn mama,
n lʋʋ wúlú wa.
15 À wá kə dʋŋɩ n mʋ̀, də kan pwə́rə́ wa.
Kʋ dʋŋɩ tə wá ya n dwíí* tə,
də ʋ dwíí tə pwə́rə́ wa.
Kan tə dwíí wá tɩtaga n yuu,
yá n də ga wá dɩŋɩ ʋ natəli nə.»
16 Ʋ swɩ̀n kan tə con, ʋ wʋ́:
«À wá pa, n də́ càn zənzən, n pùə́ janʋ wa.
Kʋ wá twá də wʋwalʋ, n ma lʋrɩ.
N fɩra yìə̀n* mama yɩ tə wá twá də n barɩ,
tə ma tʋn.
Yá ʋ wá yà n yuu tíú*,
ʋ tɩnɩ mʋ́.
17 Ʋ swɩ̀n bɛɛ tə con, ʋ wʋ́: «N nə cʋgʋ n kan tə sʋgʋ, n ga də́ tɩ̀ʋ́ tə ləni, à nə dùə̀ súú n nii nə, sə n dàn ká də́ kʋ tə yɩrɩ,
À wá yàlà tɩa tə, n mʋ̀ yɩrɩ.
Yá kʋ dàń wá twá də wʋwalʋ,
n ma na n nii wodiu,
tɩa ka tə yuu wa,
dɩɩn mama, n lʋʋ wúlú wa.
18 Səni də casʋran wá pɛ́n tɩa tə yuu wa.
Yá gaʋ, də tɩ̀án vʋran, də tə lənə
dàń nə wá ya n wodiu.
19 N wá tʋn n tɩlʋŋʋ pɛ́n,
sə n ma na n nii wodiu,
kʋ ja vələ máŋá tə,
n nə wá pìí, n zʋ tɩa,
bwálɩ́ tə, n nə nan.
Tɩa pùrú nə ba fʋ́á, ba ma ma mʋ́.
Yá n dàń wá pìí, n zʋ ka wa,
n jì pùrú.»
Yɩɩ dɩŋɩ bɛɛ tə də ʋ kan tə, ʋ lɩ Edɛnə tɩ̀án kárá* tə wa
20 Adamə dɩga ʋ kan tə yɩrɩ, Ɛvə,a ʋ mʋ̀ nə nə yɩ ləzoni tə mama nuu yɩrɩ.
21 Ba-Yígúrə́-Jə-Tiu Yɩɩ fwa tanan gànàn, ʋ ma zʋ Adamə də ʋ kan tə. 22 Ba-Yígúrə́-Jə-Tiu Yɩɩ swɩ̀n, ʋ wʋ́: «Sɩ́ʋ́n nə, ləzwənə də dàń jìgə̀ ndə nə də nə. Ʋ jə zəni də lwanɩ yənu. Nə dàń cɩa ʋ nə, sə ʋ dàn ká kwa tɩ̀ʋ́ tə, kʋ lənə nə pɩn mɩɩ tə də, ʋ də́. Ʋ nə dí kʋ, kʋ wá pa, ʋ ya mɩɩ tə wa, kʋ nə ba zwɛ̀.»
23 Ba-Yígúrə́-Jə-Tiu Yɩɩ dàń dɩŋɩ ləzwənə, ʋ lɩ Edɛnə tɩ̀án kárá tə wa, sə ʋ va, ʋ vàrà tɩa tə, Yɩɩ nə fʋ́á, ʋ ma ma wá. 24 Yɩɩ nə dɩŋɩ ləzwənə kwa nə, ʋ ken Yɩɩ sàń wonəŋə, ba nə boŋə kerubimə* Edɛnə tɩ̀án kárá tə, yɩɩ yipɩan con, də kwatara sɩ̀ʋ́, kʋ nə jə mənvwə, kʋ viviri. Yɩɩ ken tə lá, sə tə cɩ̀ cwəŋə tə nə, ka nə vəli tɩ̀ʋ́ tə, kʋ lənə nə pɩn mɩɩ tə con.