Kayɛn də Abɛlə yoo
4
1 Adamə də ʋ kan Ɛvə yəni duən. Ɛvə jɩn pùə́, ʋ lɩrɩ bìú, ʋ dɩ ʋ yɩrɩ Kayɛn. Ɛvə swɩ̀n, ʋ wʋ́: «À lɩrɩ bɛɛ, à kə lʋʋ wa, kʋ twá də Ba-Yígúrə́-Jə-Tiu sáŋʋ́.» 2 Kʋ kwa nə, Ɛvə kʋ́ʋ̀ jɩn pùə́, ʋ lɩrɩ Kayɛn nyánʋ́ Abɛlə. Nubɩa bələ təntə nə bori, Abɛlə yɩ vanmɩnɩ, ʋ kʋ̀nɩ̀, yá Kayɛn ga yɩ valʋ. 3 Kʋ vəli kʋ yí máŋá don wa, Kayɛn jɩn wiən tə, ʋ nə vàrɩ̀ tɩa, ʋ na, ʋ ja bà, sə ʋ ma fwa zìlə́ wiən, ʋ pa Ba-Yígúrə́-Jə-Tiu nə. 4 Abɛlə də jɩn ʋ vanmɩnɩ tə təntən bɩ̀á duən, ʋ gʋ. Ʋ lɩ tə bwálá tə nə jə nʋga, ʋ ma fwa zìlə́ wiən, ʋ pa Yɩɩ nə. Ba-Yígúrə́-Jə-Tiu fwa wʋywaŋʋ Abɛlə yɩra, ʋ ga sɛ̀, ʋ jon ʋ zìlə́ wiən tə. 5 Yá Yɩɩ wà wʋywaŋʋ Kayɛn mʋ̀ yɩra fwa, kʋ pa, ʋ wà sɛ̀, ʋ jon ʋ zìlə́ wiən tə. Kayɛn lɩŋa dàń zàn zənzən, ʋ yáá mama ga cʋ̀gʋ̀. 6 Ba-Yígúrə́-Jə-Tiu bwe Kayɛn, ʋ wʋ́: «Bɛ̀ɛ̀ nə pɩn, n lɩŋa ma zaŋa? Bɛ̀ɛ̀ nə pɩn, n yáá ma cʋ̀gʋ̀? 7 Də n nə tʋŋa zəni, n wá pìí n zɩ̀n n yuu yɩɩ nə. Yá n dàń nə ba zəni tʋŋa, lwanɩ tígə́ n mimii nə, ndə wojandiu nə, tə pɩ̀à, sə tə cʋ̀gʋ̀ mʋ́. Yá n mʋ̀ dàń nə mɛ, sə n də́ dɩ̀àn tə yuu wa.» 8 Kʋ kwa nə, Kayɛn dàń swɩ̀n ʋ nyánʋ́ Abɛlə con, ʋ wʋ́: «Nə vələ gaʋ!»a Yá ba dàń nə vəli ba yí gaʋ tə wa, Kayɛn zɩ̀n jara də Abɛlə, ʋ mà wá ʋ gʋ. 9 Kʋ kwa nə, Ba-Yígúrə́-Jə-Tiu bwe Kayɛn, ʋ wʋ́: «N nyánʋ́ Abɛlə wulə yə̀n nə?» Ʋ pìí ʋ le, ʋ wʋ́: «À yəri! À mʋ̀ nə ywàŋá à nyánʋ́ tə yuu nə naaa?» 10 Yɩɩ dàń ma bwe wá, ʋ wʋ́: «Kʋ yɩ bɛ̀ɛ̀ nə, n tʋn nətən? Máŋá tə wa, n nə wulə n gwɩ n nyánʋ́ tə, à nì ʋ kori, də ʋ bubwi, ʋ kəni à nə, sə à jon wá. 11 Sɩ́ʋ́n nə, n dàń yɩ à wá yàlà mʋ́, à pa n va yiŋʋnɩ tɩa ka tə yuu wa, ka nə nyʋan n nyánʋ́ tə jana tə, kʋ nə twá də n jɩɩn, tə ma lwá. 12 N nə vàrɩ̀ tɩa tə, ka də kʋ́ʋ̀ bá pa n wiən lənə, tə pa mʋ́. N bá ja dəkuu bwálɩ́. N wá ya lìù tə, n twá lá n ywaŋa.» 13 Kayɛn swɩ̀n Ba-Yígúrə́-Jə-Tiu con, ʋ wʋ́: «Càn tə, tə nə wá yí nə, à yolwan tə yɩrɩ à nə tʋn, dáá zənzən. À wàrɩ̀ tə à zɩga à dànɩ̀. 14 N dɩŋɩ nə zə̀n kʋ tə, n lɩ tɩa ka tə yuu wa. À wá ya lìù tə, à nə twá lá à ywaŋa, à ba yoyuu jə tɩa yuu wa. Yá lìù də dàń nə nɩ nə, ʋ wá gʋ nə.» 15 Ba-Yígúrə́-Jə-Tiu swɩ̀n Kayɛn con, ʋ pa nii kʋ tə, ʋ wʋ́: «Də lìù nə gʋa Kayɛn, ba wá ŋwɩ́n kʋ jɩŋɩ kʋ tíú yɩra, nɛɛ barpɛ.» Ba-Yígúrə́-Jə-Tiu, dàń ken mɩmɩnʋ Kayɛn yɩra, sə kʋ pa lìù mama nə nɩ wá, ʋ dàn ká gʋ wá. 16 Kʋ kwa nə, Kayɛn nan Ba-Yígúrə́-Jə-Tiu yáá con, ʋ va ʋ wulə Nɔdəb tɩa tə yuu, kʋ nə wulə Edɛnə tɩ̀án kárá* tə yɩɩ yipɩan con.Kayɛn dwíí tə
17 Kayɛn də ʋ kan yəni duən. Ʋ kan tə jɩn pùə́ ʋ lɩrɩ Enɔkə. Kʋ kwa nə, Kayɛn lwə̀ tɩʋ, ʋ dɩ ʋ bìú Enɔkə yɩrɩ tə, kʋ tɩʋ tə nə. 18 Enɔkə də lɩrɩ Yiradə, Yiradə lɩrɩ Mehuyayɛlə, Mehuyayɛlə lɩrɩ Metukayɛlə, Metukayɛlə lɩrɩ Lemɛkə. 19 Lemɛkə swe kana bələ. Ba boŋə ʋ don Ada, ba ga boŋə ʋ don tə də Sila. 20 Ada lɩrɩ Yabalə. Mə Yabalə nə yɩ lɩ̀à tə, ba dìì nə yɩ gansilə, ba ga kʋ̀nɩ̀ vàná tə nɩbɛɛ. 21 Ʋ nyánʋ́ yɩrɩ nə yɩ Yubalə. Mə ʋ də nə yɩ lɩ̀à tə mama, ba nə dwí kwanan, də ba tə nə wúrí wii nɩbɛɛ. 22 Sila də lɩrɩ Tubalə-Kayɛn, ʋ nə ja cɩnɩan də lurən, ʋ ma lwì tʋtʋnzɩla yiri mama. Tubalə-Kayɛn nakʋa yɩrɩ nə yɩ Naama.
23 Lemɛkə swɩ̀n ʋ kana tə con, ʋ wʋ́:
«N mʋ̀ Ada, də n mʋ̀ Sila, á cʋga à kori!
À mʋ̀ lemɛkə kana ba,
á surə á zɩan, á cʋgʋ à sʋgʋ zəni.
À gʋa bɛɛ, nʋʋ yɩrɩ,
ʋ nə tún à yɩra.
À ga gʋ balandʋrʋ càn yɩrɩ,
ʋ nə ken à nə.
24 Ba nə ŋwɩ́n Kayɛn jɩŋɩ nɛɛ barpɛ,
ba wá ŋwɩ́n à mʋ̀ Lemɛkə jɩŋɩ
nɛɛ sapwɩtwa də fugə də barpɛ.»
25 Adamə də ʋ kan tə kʋ́ʋ̀ yəni duən, ʋ kan tə ga ja pùə́, ʋ lɩrɩ bìú, ʋ dɩ ʋ yɩrɩ Sɛtə. Ʋ pɩ̀à, sə ʋ twá kʋ nətʋ nə, ʋ ma swɩ̀n, ʋ wʋ́: «Yɩɩ kʋ́ʋ̀ pɩn nə bìú don, Abɛlə bʋʋ wa, Kayɛn nə gʋa.» 26 Sɛtə də lɩrɩ bìú, ʋ dɩ ʋ yɩrɩ Enɔswə. Mə kʋ zɩgɩ kʋ máŋá təntə wa, ba dàń ma boŋə ba kəni Yɩɩ nə, ba boŋə wá Ba-Yígúrə́-Jə-Tiu.