ADAMƏ DWII TƏ YOO
Dwíí tə kʋ nə zɩgɩ Adamə kʋ va kʋ yí Nowe
5
1 Nə̀ń sagɩ tə, kʋ nə bɩrɩ Adamə dwíí tə. Dɩɩn tə Yɩɩ nə fwa ləzoni, ʋ fwa ba, ʋ ma nyɩn də ʋ mʋ̀ Yɩɩ. 2 Ʋ fwa ba, bɛɛ də kan. Ʋ fwa zəni ba yɩra, ʋ ga dɩ ba yɩrɩ ləzoni, máŋá tə wa, ʋ nə fwa ba. 3 Adamə nə twi ʋ jə bɩna bíí də fɩtwa, ʋ lɩrɩ bìú, ʋ nə yɩ ʋ nyɩnyɩga, ʋ nyɩn də wá, ʋ ga dɩ ʋ yɩrɩ Sɛtə. 4 Ba nə lɩrɩ Sɛtə kwa nə, Adamə tə fwa bɩna biənana, ʋ ga lɩrɩ bibara də bɩkana. 5 Adamə bɩna tə mama, ʋ nə fwa lʋʋ wa, yɩn bɩna biənʋgʋ də fɩtwa, yá ʋ ga zɩgɩ lá, ʋ tɩ. 6 Sɛtə nə twi ʋ jə bɩna bíí də bonu, ʋ lɩrɩ Enɔswə. 7 Ba nə lɩrɩ Enɔswə kwa nə, Sɛtə tə fwa bɩna biənana də barpɛ, ʋ ga lɩrɩ bibara də bɩkana. 8 Sɛtə bɩna tə mama, ʋ nə fwa lʋʋ wa, yɩn bɩna biənʋgʋ də fugə də bələ, yá ʋ ga zɩgɩ lá, ʋ tɩ. 9 Enɔswə nə twi ʋ jə bɩna sapwɩnɩa də fugə, ʋ lɩrɩ Kenan. 10 Ba nə lɩrɩ Kenan kwa nə, Enɔswə tə fwa bɩna biənana də fugə də bonu, ʋ ga lɩrɩ bibara də bɩkana. 11 Enɔswə bɩna tə mama, ʋ nə fwa lʋʋ wa, yɩn bɩna biənʋgʋ də bonu, yá ʋ ga zɩgɩ lá, ʋ tɩ. 12 Kenan nə twi ʋ jə bɩna sapwɩtwa də fugə, ʋ lɩrɩ Mahalaleyɛlə. 13 Ba nə lɩrɩ Mahalaleyɛlə kwa nə, Kenan tə fwa bɩna biənana də sapwɩlə, ʋ ga lɩrɩ bibara də bɩkana. 14 Kenan bɩna tə mama, ʋ nə fwa lʋʋ wa, yɩn bɩna biənʋgʋ də fugə, yá ʋ ga zɩgɩ lá, ʋ tɩ. 15 Mahalaleyɛlə nə twi ʋ jə bɩna sapwɩtwa də bonu, ʋ lɩrɩ Yeredə. 16 Ba nə lɩrɩ Yeredə kwa nə, Mahalaleyɛlə tə fwa bɩna biənana də fɩtwa, ʋ ga lɩrɩ bibara də bɩkana. 17 Mahalaleyɛlə bɩna tə mama, ʋ nə fwa lʋʋ wa, yɩn bɩna biənana də sapwɩnɩa də fugə də bonu, yá ʋ ga zɩgɩ lá, ʋ tɩ. 18 Yeredə nə twi ʋ jə bɩna bíí də sapwɩtwa də bələ, ʋ lɩrɩ Enɔkə. 19 Ba nə lɩrɩ Enɔkə kwa nə, Yeredə tə fwa bɩna biənana, ʋ ga lɩrɩ bibara də bɩkana. 20 Yeredə bɩna tə mama, ʋ nə fwa lʋʋ wa, yɩn bɩna biənʋgʋ də sapwɩtwa də bələ, yá ʋ ga zɩgɩ lá, ʋ tɩ. 21 Enɔkə nə twi ʋ jə bɩna sapwɩtwa də bonu, ʋ lɩrɩ Matisalɛmə. 22 Ba nə lɩrɩ Matisalɛmə kwa nə, Enɔkə tə vəli də Yɩɩ bɩna biətwa, ʋ ga lɩrɩ bibara də bɩkana. 23 Enɔkə bɩna tə mama, ʋ nə fwa lʋʋ wa, yɩn bɩna biətwa də sapwɩtwa də bonu. 24 Enɔkə vəli də Yɩɩ, kʋ va kʋ yí máŋá don, ʋ nə tə̀lə́, Yɩɩ yà nə tì wá, ʋ kə ʋ con yɩrɩ. 25 Matisalɛmə nə twi ʋ jə bɩna bíí də sapwɩnɩa də barpɛ, ʋ lɩrɩ Lemɛkə. 26 Ba nə lɩrɩ Lemɛkə kwa nə, Matisalɛmə tə fwa bɩna biəyarpɛ də sapwɩnɩa də bələ, ʋ ga lɩrɩ bibara də bɩkana. 27 Matisalɛmə bɩna tə mama, ʋ nə fwa lʋʋ wa, yɩn bɩna biənʋgʋ də sapwɩtwa də nʋgʋ, yá ʋ ga zɩgɩ lá, ʋ tɩ. 28 Lemɛkə nə twi ʋ jə bɩna bíí də sapwɩnɩa də bələ, ʋ lɩrɩ bìú. 29 Ʋ dɩga bìú tə yɩrɩ Nowe. Ʋ pɩ̀à, sə ʋ twá kʋ nətʋ nə, ʋ ma swɩ̀n, ʋ wʋ́: «Ba-Yígúrə́-Jə-Tiu yàlà tɩa ka tə, nə nə wulə ka yuu wa. Yá bìú wà tə nə wá zuri nə bɩcanɩ wʋwalʋ tə yɩrɩ, nə tʋtʋncaran nə ken nəba kʋ wa, tɩa ka tə yuu wa.» 30 Ba nə lɩrɩ Nowe kwa nə, Lemɛkə tə fwa bɩna biənu də sapwɩnɩa də fugə də bonu, ʋ ga lɩrɩ bibara də bɩkana. 31 Lemɛkə bɩna tə mama, ʋ nə fwa lʋʋ wa, yɩn bɩna biəyarpɛ də sapwɩtwa də fugə də barpɛ, yá ʋ ga zɩgɩ lá, ʋ tɩ. 32 Nowe nə twi ʋ jə bɩna biənu, ʋ lɩrɩ Sɛmə, də Swamə, də Zwafe.