Lʋʋ Dəkuu 6

Lʋʋ ləzoni nə zʋa yolwan fwaŋʋ wa yoo

1 Máŋá tə wa, ləzoni nə twi ba pùlì zənzən tɩa yuu wa, ba ga lɩrɩ bikana də, 2 Yɩɩ sàń lɩ̀à tə nɩ də, ləzoni tə bwɩ̀ɩ́ tə ziən. Yá kʋ dàń yɩ bwɩ̀ɩ́ təntə wa nə ba kúrí, ba ma fwa ba kana. 3 Ba-Yígúrə́-Jə-Tiu dàń ma swɩ̀n, ʋ wʋ́: «À Siŋu tə ba ya də ləzwənə máŋá mama wuuu. Cɩ́gá, ləzwənə yɩ yatanaŋʋ, yá ʋ bɩna nii də ga wá ya bíí də sapʋa.» 4 Ləzwəndaran yɩn fuən lʋʋ tə wa. Ba yɩn dɩ̀àn tɩ̀án, ba yɩrɩ nə nan zənzən. Kʋ yɩn Yɩɩ sàń lɩ̀à tə nə swe ləzoni bwɩ̀ɩ́, ba ga lɩrɩ bɩ̀á duən nə tə, máŋá wa, də kʋ kwa nə. 5 Ba-Yígúrə́-Jə-Tiu nɩ də, ləzwənə wʋlʋŋʋ tə dáá tɩa yuu wa. Yá ləzwənə bɩcan yɩ pubʋnkʋkwɩnan nə wulə lá, dɩɩn mama wuuu. 6 Ba-Yígúrə́-Jə-Tiu yà kʋ́ʋ̀ ba swə, də ʋ nə fwa ləzwənə tɩa yuu wa. Yá kʋ dàń pɩn, ʋ pùə́ cʋ̀gʋ̀ zənzən. 7 Ba-Yígúrə́-Jə-Tiu swɩ̀n, ʋ wʋ́: «À wá pa ləzwənə tə, à nə fwa nyʋn tɩa yuu. Kʋ nə zɩgɩ ləzwənə, kʋ ja vàná kʋ súrí, kʋ ja wiən tə nə vəli tə pùə́ baan kʋ súrí, kʋ ja lanworu zuŋi tə kʋ súrí. Cɩ́gá, à kʋ́ʋ̀ ba swə, də à nə fwa ləzwənə, də tə wiən təntə tɩa yuu wa. 8 Yá Nowe mʋ̀ dàń nɩ yuywáŋʋ́ Ba-Yígúrə́-Jə-Tiu con.

NOWE YOO

Nowe dwíí tə, də dwafarʋ tə kʋ nə cʋ̀gʋ̀ lʋʋ yoo

9 Nə̀ń Nowe dwíí dəkuu. Nowe yà yɩ bɛɛ tə, ʋ nə yɩ cɩ́gá tíú, ʋ ga tʋŋa ʋ yoo mama mənəmənə, ʋ súrú duən tə wa. Nowe yà vəli də Yɩɩ. 10 Nowe lɩrɩ bɩ̀á batwa. Kʋ mʋ̀ nə yɩ Sɛmə, də Swamə, də Zwafe.

11 Lʋʋ tə yà zʋa tʋtʋnkʋkwɩnan wa, Yɩɩ yáá con. Ka cʋ̀gʋ̀ duən yà nə wulə bwálɩ́ mama nə. 12 Yɩɩ nɩ də, lʋʋ tə zʋa tʋtʋnkʋkwɩnan wa. Cɩ́gá, ləzoni tə, də wonəŋə tə mama lʋʋ wa, yà zʋa tʋtʋnkʋkwɩnan wa. 13 Yɩɩ dàń ma swɩ̀n Nowe con, ʋ wʋ: «À ken à sírí à waa con, sə à cʋ̀gʋ̀ ləzoni tə, də wonəŋə tə mama. Cɩ́gá, ba mʋ̀ də wonəŋə təntə nə pɩn, lʋʋ sú də ka cʋ̀gʋ̀ duən. À dàń wá cʋ̀gʋ̀ ba də tə, də tɩa tə mɛ, à kə duən nə. 14 N mʋ̀ dàń pɩa tɩ̀án tə, ba nə boŋə gofɛrə, n ma fwa nɩ́á yuu bori, n tətə yɩrɩ. N nə fwa nɩ́á yuu bori təntə, sə n pwɛ̀ kʋ wa tə, dibɩa dibɩa. N wá tà kʋ wa tə, də kʋ kwa tə mama də gudəron, sə nɩ́á dàn ká zʋ kʋ wa. 15 Nə̀ń nətʋ tə, n nə mɛ, sə n fwa kʋ: Nɩ́á yuu bori tə danɩ wá ya jɩvaŋɩ yiə biətwa. Kʋ wanɩ wá ya jɩvaŋɩ yiə finu. Kʋ yuu tɩa zɩgʋ wá ya jɩvaŋɩ yiə fɩtwa. 16 N wá pori bʋʋ, kʋ mɛ jɩvaŋɩ yii nədʋ, nɩ́á yuu bori tə baan con. N wá kə kʋ mimii tə, kʋ səpuni nə, n ga fwa kʋ təntən dìì tə, də bələ nii dìì tə, də batwa nii dìì tə, duən yuu wa. 17 À mʋ̀ con nə, à dàń wá pa dwafarʋ bà tɩa yuu wa, sə kʋ cʋ̀gʋ̀ ləzoni tə, də wiən tə mama, tə nə jə mɩɩ, tə siŋə tɩa yuu wa. Ləzoni tə, də wiən tə mama, tə nə wulə tɩa yuu wa, wá tɩ. 18 Yá à dàń wá tún à nimarʋ tə, à mʋ̀ də mʋ́ pwə́rə́ wa. N wá zʋ nɩ́á yuu bori tə wa, n mʋ̀ də n bɩ̀á, də n kan, də n bɩ̀á tə kana. 19 N tə wá pa vàná yiri mama bələ bələ, zʋ nɩ́á yuu bori tə wa, sə tə twá n nə, tə na mɩɩ. N wá ja vàná yiri mama bɛɛ də kan. 20 Vàná yiri mama bɛɛ də kʋ kan wá bà n con, sə tə twá n nə, tə na mɩɩ. Kʋ mʋ̀ nə yɩ zuŋi, də vàná, də wiən tə, tə nə vəli tə pùə́ baan, tɩa yuu wa. 21 Yá n mʋ̀, tì wiən tə mama, tə nə yɩ wodirən, ba də́, n kə n con, sə tə ya n də vàná təntə mɛ nii wodiu. 22 Mə kʋ mʋ̀ yoo təntə nə, Nowe tʋn. Ʋ tʋn yoo mama, kʋ twá ndə Yɩɩ yà nə pɩn wá nii, sə ʋ tʋn nətʋ.