7
1 Ba-Yígúrə́-Jə-Tiu swɩ̀n Nowe con, ʋ wʋ́: «Zʋ nɩ́á yuu bori tə wa, n mʋ̀ də n dìə̀ lɩ̀à tə mama. Cɩ́gá, à nɩ də, n yɩ cɩ́gá tíú à yáá con, n súrú duən tə wa. 2 Tì vàná tə, tə nə ba durən jə, kan də kʋ bɛɛ, dəkurən barpɛ, də vàná tə, tə nə jə durən, kan də kʋ bɛɛ, 3 də lanworu zuŋi tə də yiri mama kan də kʋ bɛɛ, dəkurən barpɛ, sə tə dwíí wànɩ́ kʋ twá n nə, kʋ na mɩɩ tɩa yuu, bwálɩ́ mama wa. 4 Cɩ́gá, dɩan barpɛ nii nə, à mʋ̀ wá pa dwà bà tɩa yuu wa. Ka wá nɩ dɩan sapwɩlə də tɩtɩan sapwɩlə. Yá à dàń wá twá nətʋ, à ma pa ləzoni tə, də wonəŋə tə mama, à nə fwa, nyʋn tɩa yuu. 5 Nowe tʋn yoo mama, kʋ twá ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ. 6 Nowe yà jə bɩna biəyardʋ, máŋá tə wa dwafarʋ tə nə twi tɩa yuu wa. 7 Nowe, də ʋ kan, də ʋ bɩ̀á, də ʋ bikɩna, zʋa nɩ́á yuu bori tə wa, sə ba wànɩ́ ba jon ba tɩ̀àn, dwafarʋ tə nɩ́á tə jɩɩn wa. 8 Vàná tə, tə nə ba durən jə, də vàná tə, tə nə jə durən, də zuŋi tə, də wiən tə mama, tə nə vəli tə pùə́ baan, 9 kʋ nədʋ mama kan də kʋ bɛɛ twi, tə zʋ nɩ́á yuu bori tə wa, Nowe con, kʋ twá ndə Yɩɩ yà nə pɩn wá nii, sə kʋ tʋn nətʋ.10 Dɩan barpɛ nii nə, dwafarʋ tə nɩ́á twi tɩa yuu wa. 11 Nowe bɩna biəyardʋ bɩnɩ tə, cànɩ̀ bələ nii cànà tə, dɩan fugə də barpɛ dɩɩn tə nə, bʋʋ nəfarʋ tə kʋ də̀ń nə lu* nabuliyɩa tə mama súrí tə pàlɩ̀, yá lanworu mimien tə də ga súrí. 12 Dwà tə nɩŋa tɩa tə yuu wa, dɩan sapwɩlə də tɩtɩan sapwɩlə. 13 Yá dwà tə təntən dɩɩn tə nə, Nowe, də ʋ kan, də ʋ bɩ̀á Sɛmə, də Swamə, də Zwafe, də ʋ bikɩna batwa zʋa nɩ́á yuu bori tə wa. 14 Ba mʋ̀, də ganaŋa yiri mama, də sàń vàná yiri mama, də wiən yiri mama, tə nə vəli tə pùə́ baan, də zuŋi yiri mama, də wopərən yiri mama, nə zʋa nɩ́á yuu bori tə wa. 15 Wiən tə mama, tə nə jə mɩɩ tə siŋə, kan də kʋ bɛɛ zʋa nɩ́á yuu bori tə wa, Nowe con. 16 Wonəŋə tə nədʋ mama, kan də kʋ bɛɛ, twi tə zʋ Nowe con, nɩ́á yuu bori tə wa, ndə Yɩɩ yà nə pɩn nii Nowe nə, sə kʋ tʋn nətʋ. Kʋ kwa nə, Ba-Yígúrə́-Jə-Tiu, tagʋ nɩ́á yuu bori tə mimii, Nowe nii nə.
17 Dwafarʋ tə nɩŋa tɩa yuu wa, dɩan sapwɩlə. Nɩ́á tə dɩga yɩɩ nə, tə ga tì nɩ́á yuu bori tə, kʋ zàn kʋ sa nɩ́á tə yuu wa, tɩa tə yuu con. 18 Nɩ́á tə pùlì tə dɩ yɩɩ nə zənzən tɩa yuu wa, nɩ́á yuu bori tə dàń ga wulə tə yuu wa, kʋ vəli. 19 Nɩ́á tə, tə pùlì zənzən, tə súrí tɩa yuu wa. Tə piri pɛɛn tə mama, tə yun nə dara yuu nə, tə nə wulə tɩa yuu wa. 20 Nɩ́á tə piri tə yuu nə, tə kɛ̀ń tə dɩ̀ tə yí jɩvaŋɩ yiə fugə də bonu. 21 Ləzoni tə, də wiən tə mama, tə yà nə dwanɩ tə yɩra wa, tɩa yuu wa, tɩga mɩ́ámɩ́án. Tə wiən təntə nə yɩ Zuŋi tə mama, də sàń vàná tə mama, də ganaŋa tə mama, də wiən tə mama, tə yà nə jírí tɩa yuu wa. 22 Won tə mama, kʋ yà nə jə mɩɩ, kʋ siŋə tɩa yuu wa, tɩga. 23 Yɩɩ pɩn ləzoni tə, də wonəŋə tə mama tə yà nə wulə tɩa yuu wa, tɩ. Tə nyʋan tɩa yuu wa. Kʋ dàń ga Nowe də ʋ dìə̀ lɩ̀à, də vàná tə, də wonəŋə tə duən tə mama, tə nə yɩn də wá, nɩ́á yuu bori tə wa. 24 Nɩ́á tə pùlì tɩa tə yuu wa, kʋ yí dɩan bíí də finu.