Dwafarʋ tə zwɛ̀
8
1 Yɩɩ dàń bʋ́n Nowe də ʋ dìə̀ lɩ̀à, də ganaŋa tə, də sàń vàná tə mama yoo, ba də tə yà nə wulə nɩ́á yuu bori tə wa. Yɩɩ dàń pɩn vʋʋ fuli tɩa tə yuu wa, yá nɩ́á tə pìí tə cwi. 2 Bʋʋ nəfarʋ* tə nabuliyɩa tə sun. Lanworu tə də mimien tə sun, yá dwà tə dàń zɩgɩ, ka kʋ́ʋ̀ ba nɩ. 3 Nɩ́á tə cúə́ tə yá tɩa tə, mancɩn mancɩn. Nɩ́á tə fwa dɩan bíí də finu, tə ma zɩgɩ lá tə mun. 4 Cànɩ̀ barpɛ nii cànà tə, dɩan fugə də barpɛ dɩɩn nə, nɩ́á yuu bori tə zɩgɩ Araratə paan tə don yuu. 5 Nɩ́á tə mun wuuu, kʋ va kʋ yí cànɩ̀ fugə nii cànà tə. Cànɩ̀ fugə nii cànà tə, təntən dɩɩn tə nə, pɛɛn tə yun nan poni nə, nɩ́á tə wa. 6 Dɩan sapwɩlə nii nə, Nowe súrí cəliri tə, ʋ yà nə fwa nɩ́á yuu bori tə yɩra. 7 Ʋ lɩ batɩankanʋ ʋ dʋgʋ kàrá wa. Batɩankanʋ tə pìí kʋ bà ʋ con, nɛɛ kapʋpʋ, kʋ va kʋ yí máŋá tə, nɩ́á tə nə zwɛ̀ mɩ́ámɩ́án, tɩa yuu wa. 8 Kʋ kwa nə, Nowe lɩ gunpwənə də, ʋ dʋgʋ kàrá wa, sə ʋ ma jə́n, də nɩ́á tə nə zwɛ̀ tɩa yuu wa. 9 Yá gunpwənə tə dàń wà won nɩ, sə ka jə̀ń kʋ yuu wa. Ka dàń ma pìí ka bà ʋ con, nɩ́á yuu bori tə wa. Cɩ́gá, nɩ́á tə yà tə dáá tɩa tə yuu mama wa. Ʋ te ʋ jɩɩn, ʋ ja ka, ʋ kə ʋ con, nɩ́á yuu bori tə wa. 10 Nowe kʋ́ʋ̀ dàn dɩan barpɛ, ʋ ga kʋ́ʋ̀ pìí ʋ lɩ gunpwənə tə, nɩ́á yuu bori tə wa, ʋ dʋgʋ kàrá wa. 11 Gunpwənə tə nə pìí ka bà ʋ con, didəni nə, ka yà jə olivə tɩ̀ʋ́ vʋbwalʋ ka nii nə. Nowe dàń twá kʋ nətʋ nə, ʋ ma lwarɩ də nɩ́á tə zwɛ̀, tɩa tə yuu wa. 12 Ʋ kʋ́ʋ̀ pɩ́án dɩan barpɛ duən, ʋ ga kʋ́ʋ̀ lɩ gunpwənə tə, ʋ dʋgʋ kàrá wa. Yá ka kʋ́ʋ̀ wà pìí ka bà ʋ con. 13 Bɩna biəyardʋ də nədʋ bɩnɩ tə, təntən cànà tə, təntən dɩɩn tə nə, nɩ́á tə zwɛ̀ tɩa tə yuu wa, mɩ́ámɩ́án. Nowe súrí nɩ́á yuu bori tə yuu tə, ʋ ywàń, də nə̀ń tɩa tə yuu mama nə, kʋ kʋa. 14 Bələ nii cànà tə, dɩan sapʋa də barpɛ dɩɩn nə nə, tɩa tə kʋa.15 Yɩɩ dàń swɩ̀n sʋ̀ràn tə tə Nowe con, ʋ wʋ́: 16 «Nan nɩ́á yuu bori tə wa, n mʋ̀ də n kan tə, də n bɩ̀á tə, də n bikɩna tə. 17 Pa vàná yiri tə mama, tə nə wulə də mʋ́, twá tə nan. Kʋ mʋ̀ nə yɩ zuŋi tə mama, də vàná tə mama, də wiən tə nə vəli tə pùə́ baan, tɩa yuu wa. Pa sə tə nan tə jírí tɩa yuu wa, sə tə lɩra bɩ̀á, tə pùlì zənzən tɩa yuu wa.» 18 Nowe dàń nan nɩ́á yuu bori tə wa, də ʋ kan, də ʋ bɩ̀á, də ʋ bikɩna. 19 Vàná tə mama, də wiən tə mama, tə nə vəli tə pùə́ baan, də zuŋi tə mama, wiən tə nə vəli tɩa yuu wa yiri mama, nan nɩ́á yuu bori tə wa. 20 Yá Nowe lwə̀ Yɩɩ joŋi bwálɩ́ lá nə, ʋ pa Ba-Yígúrə́-Jə-Tiu nə. Ʋ jɩn vàná, vàná tə wa tə nə ba durən jə, də zuŋi, zuŋi tə wa, tə nə ba durən jə, ʋ ma fwa joŋi Yɩɩ joŋi bwálɩ́ tə yuu wa, ʋ pa Yɩɩ nə. 21 Yá kʋ joŋi təntə yɩn ywánɩ́ zənzən, kʋ pa Ba-Yígúrə́-Jə-Tiu nə. Yá Yɩɩ dàń swɩ̀n ʋ waa con, ʋ wʋ́: «Ləzwənə bɩcan sóní lwanɩ, ʋ zandʋan mama. Kʋ mʋ̀ yɩrɩ nə, à kʋ́ʋ̀ bá pìí à cʋ̀gʋ̀ lʋʋ, ləzwənə yɩrɩ. Á ga kʋ́ʋ̀ bá pìí à cʋ̀gʋ̀ wonəŋə tə mama, ndə à nə tʋn kʋ nətʋ.
22 Máŋá tə mama lʋʋ nə wá ya lá,
woduri də woceri,
waran də tɩlʋŋʋ,
tɩpwən də yɩdɩɩn,
yɩcaʋ də tɩtɩn,
kʋ́ʋ̀ bá kwɛ̀.»