Yɩɩ də Nowe nimarʋ tə
9
1 Yɩɩ fwa zəni Nowe də ʋ bɩ̀á tə yɩra, ʋ ga swɩ̀n ba con, ʋ wʋ́: «Á lɩra bɩ̀á, sə á pùlì zənzən, á sú tɩa yuu mama. 2 Á wá ya lɩ̀à tə, á nə jə fən zənzən, á pa vàná tə mama nə, də lanworu zuŋi tə mama nə, də wiən tə mama nə, tə nə vəli tə pùə́ baan, tɩa yuu wa, də mʋʋ wa filə tə mama nə, á ga wá pa tə vɩvaga. À ken tə mʋ̀ wiən təntə mama, á jɩɩn wa. 3 Wonəŋə tə mama, tə nə vəli tɩa yuu, wá ya á nii wodiu. À pɩn tə aba, ndə à nə pɩn aba tɩ̀án tə də garan tə də nətʋ. 4 Yá á dàń nə wà mɛ, sə á də́ tə, də tə mɩɩ tə mɛ. Kʋ də̀ń nə yɩ, á wà mɛ, sə á də́ tə, də tə jana mɛ nətʋ. 5 Yá vànɩ́ nə lɩ á lìù mama mɩɩ, à wá bwe kʋ tíú mɩɩ tə bwiə, kʋ mʋ̀ vànɩ́ tə con. À ga wá bwe ləzwənə də mama mɩɩ bwiə, ləzwənə tə con, ʋ nə yɩ ʋ nubiu. 6 Cɩ́gá, Yɩɩ fwa ləzwənə ndə ʋ tətə nyɩnyɩga nə. Kʋ mʋ̀ nə pɩn, lìù tə ʋ nə lɩ ləzwənə mɩɩ, ləzwənə don nə wá lɩ ʋ də mɩɩ. 7 Yá á mʋ̀, á lɩra bɩ̀á, sə á pùlì zənzən, á sú tɩa yuu mama. Á pùlə́ zənzən, á ya ka yuu wa.»8 Yɩɩ tə kʋ́ʋ̀ swɩ̀n Nowe də ʋ bɩ̀á tə con, ba yà nə wulə də wá, ʋ wʋ́: 9 «À mʋ̀ con nə, sɩ́ʋ́n nə, à nimarʋ tə yɩ à túŋə́, à də aba, də á dwíí tə, á nə wá kə lʋʋ wa, pwə́rə́ wa. 10 À túŋə́ kʋ, à mʋ̀ də wonəŋə tə mama pwə́rə́ wa, tə nə wulə də aba. Kʋ mʋ̀ nə yɩ, zuŋi tə mama, də sàń vàná tə mama, də ganaŋa tə mama tɩa yuu wa, tə nə nan nɩ́á yuu bori tə wa, də tə dwíə́ mama, tə nə wá kə lʋʋ wa. 11 Nəŋə à nimarʋ tə, à nə túŋə́ à də aba pwə́rə́ wa, nə yɩ nətʋ. À kʋ́ʋ̀ ba pìí, à twá də dwafarʋ nɩ́á, à ma cʋ̀gʋ̀ tɩa yuu wonəŋə tə mama. Yá à ga kʋ́ʋ̀ ba pa dwafarʋ nɩ, kʋ cʋ̀gʋ̀ lʋʋ tə.» 12 Yɩɩ swɩ̀n, ʋ wʋ́: «Nə̀ń mɩmɩnʋ tə, kʋ nə bɩrɩ nimarʋ tə, à nə túŋə́ à də aba pwə́rə́ wa, də wonəŋə tə mama, tə nə wulə də aba, kʋ ja vələ máŋá tə mama, ka nə bɩan. 13 À ken à dwasɩʋ bakwan tə wa. Yá kʋ mʋ̀ dàń nə wá ya nimarʋ tə mɩmɩnʋ, à də tɩa, də ka yuu wonəŋə tə mama pwə́rə́ wa. 14 Máŋá tə, à nə pɩn bakwan va duən yáá, tɩa tə yuu con, máŋá tə dwasɩʋ tə nə pɛ́n kʋ nan, 15 à wá pìí à bʋ́n à nimarʋ tə yoo, à də aba pwə́rə́ wa, də wonəŋə tə mama pwə́rə́ wa. Yá nɩ́á tə kʋ́ʋ̀ bá jì dwafarʋ, sə tə cʋ̀gʋ̀ wonəŋə tə mama. 16 Máŋá mama, dwasɩʋ tə nə pɛ́n bakwan tə wa, à wá ywàń kʋ, à ga pìí à bʋ́n nimarʋ tə yoo, kʋ nə ba zwɛ̀, à mʋ̀ Yɩɩ də, wonəŋə tə mama pwə́rə́ wa, tə nə wulə tɩa yuu wa.» 17 Yɩɩ swɩ̀n Nowe con, ʋ wʋ́: «Mə mɩmɩnʋ tə, kʋ nə bɩrɩ nimarʋ tə à nə tún, à də wonəŋə tə mama pwə́rə́ wa, tə nə wulə tɩa yuu wa, yɩ nətʋ.»
Nowe də ʋ bɩ̀á tə
18 Nowe bɩ̀á tə ba nə nan nɩ́á yuu bori tə wa, yà yɩ Sɛmə, də Swamə, də Zwafe. Swamə nə yɩn Kanaan nyɩna. 19 Nowe bɩ̀á batwa tə pìí ba pùlì ba sú tɩa tə yuu. 20 Nowe zàn ʋ wulə ʋ varɩ tɩa tə, ʋ ma cwɛn divɛn tɩ̀án. 21 Dɩɩn don nə, Nowe nyʋan divɛn tə, ʋ bʋbʋnɩ, ʋ lɩ ʋ gànàn ʋ dʋgʋ, ʋ ga yá ʋ tɩ̀àn yaswələ, ʋ tígə́ ʋ gansili wa. 22 Swamə ʋ nə yɩ Kanaan nyɩna, nɩ ʋ nyɩna Nowe də ʋ tígə́ yaswələ, ʋ ga nan ʋ man kʋ, ʋ bɩrɩ ʋ nubɩa bələ tə nə, kàrá wa. 23 Sɛmə də Zwafe dàń tì ganzwɩdarʋ, ba kə ba bələ tə mɛ vaparan nə, ba ga va də ba kwa, ba ja bà, ba ma piri ba nyɩna tə yaswələ tə nə. Ba yáá yà wà ba nyɩna tə con te. Yá kʋ dàń pɩn, ba wà ʋ yaswələ tə nɩ. 24 Máŋá tə, Nowe divɛn tə nə nan ʋ yɩ́á wa, ʋ nì kʋ tə, ʋ bələ nii bìú tə nə tʋn ʋ yɩra. 25 Ʋ dàń ma swɩ̀n, ʋ wʋ́: «Zɩra wulə Kanaan yuu wa! Ʋ wá ya ywə́ŋə́ yoŋu, ʋ pa ʋ nubɩa nə!» 26 Nowe tə swɩ̀n, ʋ wʋ́: «À bwɩ Ba-Yígúrə́-Jə-Tiu nə, ʋ nə yɩ Sɛmə Yɩɩ. Yɩɩ wá pa Kanaan ya Sɛmə yoŋu. 27 Yɩɩ wá pa dwíí nəfarʋ Zwafe nə. Yɩɩ wá pa ʋ də Sɛmə ya duən nə, sə Kanaan ya ba yoŋu. 28 Nowe tə fwa bɩna biətwa də finu, dwafarʋ tə kwa nə. 29 Ʋ bɩna tə mama, ʋ nə fwa lʋʋ wa yɩn bɩna biənʋgʋ də finu, yá ʋ ga zɩgɩ lá ʋ tɩ.