Zwakɔbə lúə́
50
1 Zʋzɛfə nɩ də ʋ nyɩna tə mɩɩ zwɛ̀. Yá ʋ dàń tʋa ʋ nyɩna tə yuu wa. Ʋ pùrì wá, ʋ kə ʋ nyʋnɩ nə, ʋ ga kwi, ʋ yinɩa swɛ ʋ nyɩna tə yáá mama. 2 Kʋ kwa nə, Zʋzɛfə pɩn nii dɩmʋtʋra tə nə, ba yà nə tʋŋa ba pɩn wá, sə ba kə tɩ̀án ʋ nyɩna tə tɩgɩ tə yɩra, ʋ dàn ká pʋ. Yá dɩmʋtʋra tə dàń tʋn kʋ, ndə Zʋzɛfə nə pɩn nii, sə ba tʋn nətʋ. 3 Dɩmʋtʋra tə fwa dɩan sapwɩlə, ba ma kəni tɩ̀án tɩgɩ tə yɩra, ʋ dàn ká pʋ. Mə dɩan nii nə, ba nə yàá ma kəni tɩ̀án tɩgɩ yɩra, ʋ dàn ká pʋ. Yá Ezwipətə tɩ̀án kwi Zwakɔbə lúə́, dɩan sapwɩtwa də fugə.4 Máŋá tə, ba nə kwi Zwakɔbə lúə́ tə, ba zwɛ̀, Zʋzɛfə swɩ̀n pɩ̀ʋ́ Farawon sàń tʋ̀tʋ̀nán yun tɩ̀án tə con, ʋ wʋ́: «Də à cɩ́gá nə nɩ yuywaŋʋ á yáá con, à lòrì aba, sə á va á swɩ̀n pɩ̀ʋ́ Farawon con, 5 də à nyɩna tə pɩn à dù durə. Ʋ pɩn à dù, də ʋ nə tɩga, à wá tì ʋ tɩgɩ tə, à ja va à gùrì libəri tə wa, ʋ nə kʋa Kanaan lʋʋ nii wa. Sɩ́ʋ́n nə, à dàń lòrì cwəŋə, sə à ja à nyɩna tə tɩgɩ tə, à va à gùrì lá nə, à ga pìí à bà.» 6 Yá pɩ̀ʋ́ Farawon dàń pɩn cwəŋə Zʋzɛfə nə, sə ʋ va ʋ gùrì ʋ nyɩna tə tɩgɩ tə Kanaan lʋʋ nii wa, ndə ʋ nə dùə̀, sə ʋ tʋn kʋ nətʋ. 7 Zʋzɛfə dàń tì ʋ nyɩna tə tɩgɩ tə, ʋ ja va, sə ʋ gùrì Kanaan lʋʋ nii wa. Pɩ̀ʋ́ Farawon tʋ̀tʋ̀nà tə mama, ba nə yɩ ʋ sàń tʋ̀tʋ̀nán yun tɩ̀án nəkwɩna, də Ezwipətə lʋʋ nii tə yáá tɩ̀án nəkwɩna tə mama, nan ba kwé Zʋzɛfə. 8 Zʋzɛfə dìə̀ lɩ̀à tə mama, də ʋ nubɩa tə, də ʋ nyɩna dìə̀ lɩ̀à tə, də nan ba kwé wá. Ba bìsɩ́ná, də ba vàná cɩcɩ yà nə ga Goswɛn nagwanaa tə wa. 9 Səsen kòrə̀n də səsədɩra də yà kwé Zʋzɛfə. Kʋ dàń yà pɩn, ʋ kwa lɩ̀à tə dáá zənzən.
10 Ba nə vəli ba yí kanporu tə, ba nə boŋə Atadə tʋa, ba zɩgɩ lá. Kanporu təntə yà wulə Zʋrədɛn mʋnaa tə yɩɩ yipɩan con. Ba fwa lúə́ nəfarʋ lá, ka nə ba don jə. Yá Zʋzɛfə dàń kwi ʋ nyɩna tə nə, dɩan barpɛ. 11 Kanaan lʋʋ lɩ̀à tə, ba yà nə wulə kʋ bwálɩ́ təntə wa, nɩ Ezwipətə tɩ̀án tə nə kwi lúə́ tə nətʋ, Atadə tʋa tə wa. Yá ba dàń swɩ̀n duən con, ba wʋ́: «Ezwipətə tɩ̀án lúə́ ka tə yɩ lúə́ nəfarʋ tamʋ!» Kʋ mʋ̀ nə pɩn, ba dɩ bwálɩ́ təntə, kʋ nə wulə Zʋrədɛn mʋnaa tə yɩɩ yipɩan con, yɩrɩ Abɛlə-Misərayimə. Kʋ də̀ń nə yɩ, “Ezwipətə tɩ̀án lúə́.”
12 Mə kʋ zɩgɩ nətʋ, Zwakɔbə bɩ̀á tə ma tʋn yoo mama, kʋ twá ndə nətʋ nə, ba nyɩna tə nə pɩn ba nii, sə ba tʋn, də ʋ nə tɩga. 13 Ʋ bɩ̀á tə tì ʋ tɩgɩ tə, ba ja va Kanaan lʋʋ nii wa, ba gùrì paan bʋʋ tə wa, kʋ nə wulə kárá tə wa, Makəpela nə, Maməre nii nə. Kárá təntə yɩ Abərahamə yə̀ Efəron con, ʋ nə yɩ Ititə, sə ʋ ma fwa ʋ tɩga yikənə bwálɩ́. 14 Zʋzɛfə nə gùrì ʋ nyɩna tə ʋ zwɛ̀, kwa nə, ʋ mʋ̀ də ʋ nubɩa tə, də lɩ̀à tə mama ba nə kwé wá, dàń pìí ba va Ezwipətə.
Fən zʋa Zʋzɛfə nubɩa tə
15 Zwakɔbə lúə́ tə nə fwa ka kɛ̀ń kwa nə, Zʋzɛfə nubɩa tə swɩ̀n duən con, ba wʋ́: «Kʋ wàá də Zʋzɛfə dʋŋa nəba, ʋ waa con, lwanɩ tə yɩrɩ, nə nə tʋn ʋ yɩra. Yá sɩ́ʋ́n nə, nə nyɩna nə kʋ́ʋ̀ tə̀lə́, Zʋzɛfə dàń wàá tə mama, ʋ pìí ʋ ŋwɩ́n nə yɩra.» 16 Yá ba dàń tʋn, ba swɩ̀n Zʋzɛfə con, ba wʋ́: «N nyɩna tə nə pɩn nii kʋ tə, də ʋ tə wà tɩ. 17 Ʋ wʋ́ nə swɩ̀án n con, də ʋ lòrì mʋ́, sə n sɛ̀ n yá n nubɩa tə yolwan tə, də ba cʋna tə, ba nə tʋn n yɩra, n pa tə zwɛ̀. Ba cɩ́gá tʋn lwanɩ n yɩra! N dàń nə yá, n pa kʋ zwɛ̀. Sɩ́ʋ́n nə, nə dàń lòrì mʋ́, sə n sɛ̀ nə lwɩa tə. Nə yɩ Yɩɩ tə, n nyɩna tə nə jʋnɩ, tʋ̀tʋ̀nà.» Zʋzɛfə nə nì tə sʋ̀ràn təntə, ʋ kwi.
18 Sʋ̀ràn təntə kwa nə, Zʋzɛfə nubɩa tə tətə twi, ba tʋ ba nadwana yuu, ʋ yáá con, ba ga swɩ̀n, ba wʋ́: «Nə̀ń nəba, nə yɩ n tʋ̀tʋ̀nà!» 19 Yá Zʋzɛfə dàń swɩ̀n ba con, ʋ wʋ́: «Á dànà ká pa fən ja aba. Cɩ́gá, à tà Yɩɩ! 20 Á mʋ̀ yà yɩ á bʋ́n, sə á tʋn lwanɩ à yɩra. Yá Yɩɩ dàń pìí ʋ lwàń kʋ, ʋ pa kʋ jì zəni. Yɩɩ pɩn kʋ ya nətʋ, sə ʋ ma jon lɩ̀à kapʋpʋ mɩɩ, ʋ kə lʋʋ, ndə á tətə zə̀n nə na kʋ, nətʋ.
21 Kʋ mʋ̀ yɩrɩ, á dàń dʋga fən. À wá ywàń á də á bɩ̀á tə yuu, à pa aba won tə mɛ, á nə pɩ̀à.» Yá Zʋzɛfə dàń swɩ̀n sʋ̀ràn ʋ nubɩa tə con, tə nə pɩn, ba bɩcan zuri.
Zʋzɛfə talɩkwa sʋ̀ràn, də ʋ tɩan yoo
22 Mə kʋ zɩgɩ nətʋ, Zʋzɛfə də ʋ nyɩna dìə̀ lɩ̀à tə dàń ma mɛn Ezwipətə nə. Zʋzɛfə fwa bɩna bíí də fugə lʋʋ wa, ʋ ga zɩgɩ lá, ʋ tɩ. 23 Zʋzɛfə bìú Efərayimə lɩrɩ bɩ̀á də nɩ̀án, ʋ pa wá, də ʋ tə wà tɩ. Zʋzɛfə bìú Manase də lɩrɩ bɩ̀á də nɩ̀án, ʋ pa wá. Yá Manase bìú Makirə bɩ̀á tə yɩ ba lɩrɩ, ba tún Zʋzɛfə nɛɛ wa.
24 Dɩɩn don nə, Zʋzɛfə swɩ̀n ʋ nubɩa tə con, ʋ wʋ́: «À tɩan máŋá bwələ! Yá à dàń nə yə̀ə́ də, Yɩɩ wá ya də aba. Máŋá bɩ̀àn, ʋ nə wá pìí ʋ lɩ aba, lʋʋ nii kʋ tə wa, ʋ ja va lʋʋ nii tə wa, ʋ nə kàn nii, də ʋ wá pa Abərahamə, də Yɩzakə, də Zwakɔbə nə.» 25 Yá Zʋzɛfə dàń pɩn Yɩzərayɛlə lɩ̀à tə dù, də Yɩɩ nə pɩn ba viru máŋá nə yí, ba wá tì ʋ kurən tə, ba ja kə lá ba vìí. 26 Zʋzɛfə tɩga, də ʋ jə bɩna bíí də fugə. Ba ken tɩ̀án ʋ tɩgɩ tə nə, sə ʋ dàn ká pʋ. Yá ba dàń tì wá, ba kə tɩga daka wa, Ezwipətə nə.