Zwakɔbə bɩrɩ ʋ bɩ̀á tə, yìə̀n tə nə wá tʋn, máŋá tə wa, kʋ nə bɩ̀àn
49
1 Kʋ kwa nə, Zwakɔbə bon ʋ bɩ̀á tə, ʋ swɩ̀n ba con, ʋ wʋ́: «Á bɩ̀àn duən yáá, sə à swɩ̀n yìə̀n tə nə wá tʋn, máŋá tə wa, kʋ nə bɩ̀àn, à bɩrɩ aba.2 Á bɩ̀án duən yáá, Zwakɔbə bɩ̀á ba.
Á bɩ̀án á cʋgʋ.
Á cʋga à mʋ̀, á nyɩna Yɩzərayɛlə sʋgʋ.
3 Ribɛn, n yɩ à bikwɩa.
N mʋ̀ nə yɩ à bikwɩa, à nə lɩrɩ à dɩ̀àn máŋá wa.
N mʋ̀ nə jə dun də dɩ̀àn, n doni n nubɩa tə.
4 Yá n dàń nə yɩ ndə nɩ́á nə,
tə nə dəri nacwəŋə wa.
N wàrɩ̀ n tɩ̀àn n janɩ.
Kʋ mʋ̀ nə pɩn, n kʋ́ʋ̀ bá na bikwɩa tori tə.
Cɩ́gá, n cʋgʋ culu.
À yɩ n nyɩna,
yá n ga pə̀ń à kan tə don, à gədo yuu.
5 Simeyon də Levi yɩ nubɩa.
Ba nimarʋ tə yɩ ba ma tʋŋa wʋlʋŋʋ.
6 Ba lɩŋa tə pɩn, ba gʋ ləzoni.
Yá ba wʋlʋŋʋ tə də pɩn, ba za nɩan naŋʋnan, ba karɩ.
Kʋ mʋ̀ yɩrɩ, à pubʋŋa bá twá ka ya, ba nimarʋ yoo mama wa.
À pubʋŋa bá ya də ba, də ba nə jə̀ə́ duən nə.
7 Yɩɩ wá cʋ̀gʋ̀ ba lɩŋa tə,
tə nə yɩ ba ma tʋŋa wʋlʋŋʋ yɩrɩ!
À wá laga ba dwíí tə duən yáá nə, à mʋ̀ Zwakɔbə dwíí tə wa.
Á wá laga ba dwíí tə duən yáá nə, Yɩzərayɛlə lʋʋ nii tə wa.
8 Zwida, n wá kàŋà n dʋŋa bɩan nə.
Yá n nubɩa tə wá siən mʋ́.
Ba wá tʋ ba nadwana yuu, n yáá con, ba pa mʋ́ dun.
9 À bìú Zwida, n dà ndə gəbala nə.
N yɩ ndə gəbɩa nə, kʋ nə nan kʋ ja nàŋá, kʋ pìí kʋ bà,
kʋ kwɩ̀án kʋ tɩ̀àn,
kʋ ga tígə́.
Gəkan nə tígə́, wàà nə wá dídə́n sə ʋ zɩ̀n kʋ?
10 Zwida dwíí tə wá də́ pàrɩ̀, máŋá mama.
Yá pɩ̀ʋ́ dadɩlʋ tə wá ya ʋ dwíí tə jɩɩn wa, máŋá mama.
Yá kʋ dàń wá ya nətʋ wuuu,
kʋ jə vələ máŋá tə, kʋ tíú nə wá bà.
Yá dwíə́ tə mama dàń wá zìlí ʋ nii.
11 Divɛn tɩ̀án wá sú tɩa mama.
Yá ʋ bɩ̀nà yɩ ʋ wá vwe divɛn tɩ̀án nə,
ʋ ga vwe ʋ bɩnabiə divɛn tɩ̀án nɛɛ nəzəŋə nə.
Divɛn nə, ʋ wá ma sɩ̀n ʋ gànàn,
ʋ ga ja divɛn tɩ̀án bɩ̀á nɩ́á, ʋ ma sɩ̀n ʋ gànfarʋ.
12 Divɛn wá pa ʋ yɩ́á sɩ̀àn,
Nayɩla də ga pa ʋ yelə pɩ̀rɩ̀.
13 Zabulon wá lwà ʋ sàń mʋʋ nii nə,
bwálɩ́ tə nə, nɩ́á yuu bwərə nə twi tə zɩga.
Ʋ nagwanaa tə nii wá va ka nan Sidon tɩʋ tə nə.
14 Yɩsakarə yɩ ndə bɩna nə,
ka nə bɩga ka sú,
ka ga tígə́ tɩa, də ka tàŋá zɩla.
15 Ʋ nɩ də bwálɩ́ tə,
ʋ nə tígə́ ʋ sìí tə ywàń,
lʋʋ nii tə də ga jə fɩra.
Yá ʋ dàń viviri ʋ pàrà, sə ʋ ma zɩ̀n zɩla.
Yá ʋ dàń sɛ̀, ʋ tʋŋa yontʋtʋnan.
16 Dan də wá bʋ̀rɩ̀ ʋ dwíí tə bʋra,
ndə Yɩzərayɛlə dwíə́ tə duən də nə bʋ̀rɩ̀ ba lɩ̀à bʋra nətʋ.
17 Dan wá ya ndə dən nə,
kʋ nə tígə́ cwəŋə wa.
Ʋ wá ya ndə dəkwa nə, ka nə tígə́ cwəŋə wa,
ka dɩŋɩ səsen nɛɛ nə,
ka pɩn səsədɩra naŋa ba twɩ, ba kwa yàrà.
18 Ba-Yígúrə́-Jə-Tiu,
à jə yala də n wá jon nə!
19 Kwatara wá kɩkarɩ Gadə.
Yá ʋ mʋ̀ nə wá pìí ʋ ta ba, ʋ də́,
ʋ ga pú ba kwa, ʋ dɩŋa ba.
20 Wodiywáŋá wá ya nagwanaa tə wa,
Aswɛrə nə wá tɩnɩ.
Ʋ wá vàrà wodizəŋə, tə nə mɛ də pɛ̀gá diŋə.
21 Nɛfətali yɩ ndə nàŋà nə,
ka nə jírí ka fɩra,
ka ga lɩrɩ bɩ̀á, tə jə fɩra.
22 Zʋzɛfə yɩ ndə tɩ̀ʋ́ kʋ nə ləni, dəkuu nə,
kʋ nə pìí kʋ twà,
kʋ zɩga nɩ́á nii nə.
Ba zɩ̀n kʋ̀ʋ̀ də wá, ba ga ta wá.
24 Yá Zwakɔbə Yɩɩ tə ʋ dɩ̀àn nə dwə tə mɛ pɩn ʋ vànà ja dɩ̀àn.
Yá ʋ dàń jɩn ʋ twan də barɩ.
Mə kʋ zɩgɩ nətʋ, ba boŋə Yɩɩ, Yɩɩ tə, ʋ nə ywàŋá Yɩzərayɛlə lɩ̀à yuu nə,
ʋ cɩ̀ ba nə.
25 Yɩɩ tə, n nyɩna tə nə jʋnɩ, wá san mʋ́.
Ʋ mʋ̀ Yɩɩ tə, ʋ nə wulə tə mɛ yuu wa, wá fwa zəni n yɩra.
Ʋ wá fwa zəni n yɩra, də lanworu dwà nɩ́á nəzəŋu.
Ʋ wá fwa zəni n yɩra,
də nazəŋə tə nə bùlì tə naŋa
bʋʋ nəfarʋ tə wa kʋ də̀ń nə lu*.
Ʋ wá fwa zəni n yɩra,
ʋ pa n dwíí də n vàná pùlì zənzən.
26 Zəni tə, à nə lòrì Yɩɩ
sə ʋ fwa n yɩra,
dánɩ́ dwə zəni tə, à mʋ̀ nyɩna-ba nə lòrì Yɩɩ, sə ʋ fwa à tətə yɩra.
Kʋ dánɩ́ dwə pɛɛn nədaran tə mama yuu.
Yɩɩ wá pa zəni təntə ya Zʋzɛfə yuu wa.
Yɩɩ wá pa zəni təntə ya ʋ mʋ̀ lìù tə yuu wa,
ʋ nə yɩ ʋ nubɩa tə pɩ̀ʋ́.
27 Bɛnzwamɛn yɩ ndə gaʋ kukurə nə,
ka nə janɩ ka vaŋa ka cɩrɩ.
Ʋ nə ta jɩjʋ nə,
didəni nə, ʋ yàá tara kʋ tə, ʋ nə ta ʋ jon.»
28 Mə Zwakɔbə bɩ̀á təntə mama nə ken duən nə, ba jì Yɩzərayɛlə dwíə́ fugə də bələ tə. Yá mə sʋ̀ràn təntə nə, ba nyɩna swɩ̀n ba con, máŋá tə wa, ʋ nə lòrì, sə Yɩɩ fwa zəni ba yɩra. Zəni tə ʋ nə lòrì, sə Yɩɩ fwa ba lìù mama yɩra, də ʋ don nyiən tà nədʋ.
Zwakɔbə tɩan
29 Kʋ kwa nə, Zawkɔbə pɩn nii kʋ tə, ʋ bɩ̀á tə nə, ʋ wʋ́: «Máŋá yí, sə à va à nyɩna-ba jon, ba nə dí yáá ba tɩ. Yá à nə tɩga, sə á gùrì nə, à nyɩna-ba paan bʋʋ tə wa, kʋ nə wulə Efəron kárá tə wa. Efəron yà yɩ Ititə. 30 Paan bʋʋ tə wulə kárá tə wa, Makəpela nə, Maməre nii nə, Kanaan lʋʋ nii tə wa. Kárá təntə yɩ Abərahamə yə̀ Efəron con, ʋ nə yɩ Ititə, sə ʋ ma fwa ʋ tɩga yikənə bwálɩ́. 31 Mə paan bʋʋ təntə wa nə, ba gùrì Abərahamə, də ʋ kan Sara. Mə lá nə, ba gùrì Yɩzakə, də ʋ kan Rebɛka. Yá mə lá nə, à gùrì Leya də. 32 Kárá təntə, də ka wa paan bʋʋ tə, yɩ Abərahamə yə̀ Ɛtə dwíí tə con. 33 Máŋá tə, Zwakɔbə nə swɩ̀n yìə̀n təntə ʋ bɩ̀á tə con, ʋ zwɛ̀, ʋ pìí ʋ mɛ gədo tə yuu, ʋ tígə́. Yá ʋ mɩɩ dàń zwɛ̀. Ʋ tɩga, ʋ va ʋ nɩbara-ba con, ba nə dí yáá ba tɩ.