Zwakɔbə lòrì, sə Yɩɩ fwa zəni Zʋzɛfə bɩ̀á tə yɩra
48
1 Tə mʋ̀ yìə̀n təntə kwa nə, ba twi ba swɩ̀n Zʋzɛfə con, də ʋ nyɩna tə yɩra ba zurə. Zʋzɛfə dàń zàn, ʋ ja ʋ bɩ̀á bələ tə, Manase də Efərayimə, sə ba va, ba na Zwakɔbə. 2 Lɩ̀à dí yáá ba swɩ̀n Zwakɔbə con, də ʋ bìú Zʋzɛfə bɩ̀àn, sə ʋ na wá. Zwakɔbə, ʋ yɩrɩ don nə yɩ Yɩzərayɛlə, nə nì kʋ, ʋ wʋwalɩ ʋ zàn, ʋ jə̀ə́ ʋ gədo yuu. 3 Zʋzɛfə nə twi ʋ yí lá, Zwakɔbə swɩ̀n ʋ con, ʋ wʋ́: «Yɩɩ tə, ʋ nə wulə tə mɛ yuu wa, twi ʋ nan à nə, Luzə nə, Kanaan lʋʋ nii tə wa. Yá ʋ fwa zəni à yɩra. 4 Ʋ swɩ̀n à con də, ʋ wá pa nə dwíí, yá ʋ wá pa à dwíí təntə pùlì zənzən, sə à jì dwíə́ kapʋpʋ nɩbɛɛ. Ʋ swɩ̀n də, ʋ wá pa lʋʋ nii təntə, à dwíí tə nə, à tɩan kwa nə, sə ba mʋ̀ nə tɩnɩ kʋ, máŋá mama wuuu.» 5 Zwakɔbə swɩ̀n, ʋ súrí lá, ʋ wʋ́: «Sɩ́ʋ́n nə, à jələ n bɩ̀á bələ tə, n nə lɩrɩ Ezwipətə lʋʋ nii tə wa, də à tə wà n con twi, ndə à tətə bɩ̀á nə. N bɩ̀á Efərayimə də Manase dàń yɩ à mʋ̀ bɩ̀á, ndə Ribɛn də Simeyon nə yɩ à bɩ̀á nətʋ. 6 Yá n dàń nə lɩrɩ bɩ̀á duən, Efərayimə də Manase kwa nə, ba mʋ̀ wá ya n mʋ̀ bɩ̀á. Bɩ̀á təntə mʋ̀ tori yɩ kʋ wá nan ba zʋna tə con.» 7 Zwakɔbə kʋ́ʋ̀ swɩ̀n, ʋ súrí lá, ʋ wʋ́: «Máŋá tə wa, à nə pìí à nan Padan à vìrí, n nuu Raswɛlə fwa mɩɩ à jɩɩn wa, cwəŋə wa. Ʋ fwa mɩɩ Kanaan lʋʋ nii tə wa, də nə ga mancɩn, sə nə yí Efərata. Yá à dàń gùrì wá Efərata cwəŋə tə nii nə, kʋ yɩrɩ don nə yɩ Bɛtəleyɛmə.»8 Yɩzərayɛlə nə nɩ Zʋzɛfə bɩ̀á tə, ʋ bwe, ʋ wʋ́: «Ba tə yɩ bə̀rə́ nə?» 9 Zʋzɛfə ma le ʋ nyɩna tə, ʋ wʋ́: «Mə à bɩ̀á tə nə, Yɩɩ nə pɩn nə, yəbə.» Zʋzɛfə nyɩna tə ma swɩ̀n, ʋ wʋ́: «Pa ba yí à yɩra, sə à lòrì Yɩɩ, sə ʋ fwa zəni ba yɩra.»
10 Yɩzərayɛlə yà kwɩn zənzən. Ʋ yɩ́á yà bwànɩ̀, ʋ kʋ́ʋ̀ ba na zəni. Zʋzɛfə pɩn, ʋ bɩ̀á tə yí ʋ nyɩna tə yɩra. Yá Zwakɔbə dàń pùrì ba, ʋ kə ʋ nyʋnɩ nə. 11 Kʋ kwa nə, Yɩzərayɛlə swɩ̀n Zʋzɛfə con, ʋ wʋ́: «À yà ba bʋŋa də, à wá pìí à na mʋ́ à yii wa. Yá nə̀ń kʋ nə, Yɩɩ pɩn, à na n bɩ̀á də tətə.» 12 Zʋzɛfə dàń pìí ʋ lɩ ʋ bɩ̀á tə, ʋ nyɩna tə nɛɛ wa, ʋ ga tʋ ʋ nadwana yuu, ʋ nyɩna tə yáá con, ʋ pú ʋ yáá tɩa.
13 Kʋ kwa nə, Zʋzɛfə kʋ́ʋ̀ pɩn ʋ bɩ̀á bələ tə mɛ yí Yɩzərayɛlə yɩra. Ʋ jɩn Efərayimə də ʋ jɩzən, ʋ zɩgɩ Yɩzərayɛlə jɩgwiə nə, ʋ ga ja Manase də ʋ jɩgwiə, ʋ zɩgɩ Yɩzərayɛlə jɩzən nə. 14 Yá Yɩzərayɛlə zɩ̀n ʋ jɩzən tə, ʋ tún Efərayimə yuu wa, ʋ nə yɩ nyánʋ́, ʋ ga tún ʋ jɩgwiə tə Manase yuu wa, ʋ nə yɩ zʋnʋ. Yɩzərayɛlə lwàń ʋ jɩ̀àn tə, ʋ pìí ʋ tì ʋ jɩgwiə, ʋ tún Manase yuu wa, yá Manase ga nə yɩ bikwɩa.a 15 Yɩzərayɛlə lòrì, sə Yɩɩ fwa zəni Zʋzɛfə yɩra. Ʋ swɩ̀n, ʋ wʋ́:
«Yuu-Tiu, n mʋ̀ nə yɩ Yɩɩ tə, à nɩbɛɛ Abərahamə, də à nyɩna Yɩzakə nə twá n nə.
N mʋ̀ nə ywàń à yuu, kʋ nə zɩgɩ à lɩrɩ dɩɩn, kʋ bà, kʋ yí zə̀n.
16 Yá n mʋ̀ nə yɩn malɩka tə, ka nə jon nə, yolwan yiri mama wa.
À dàń lòrì mʋ́, sə n fwa zəni bìsɩ́ná ba tə yɩra!
Yɩɩ wá pa ba dwíí, sə kʋ bon à yɩrɩ,
sə kʋ bon à nɩbɛɛ Abərahamə, də à nyɩna Yɩzakə yɩrɩ.
Yɩɩ wá pa ba pùlì zənzən, ba sú lʋʋ nii kʋ tə.
17 Zʋzɛfə nɩ də, ʋ nyɩna tə tún ʋ jɩzən, Efərayimə yuu wa, ʋ nə yɩ nyánʋ́. Yá Zʋzɛfə wà kʋ nətʋ tə sóní. Ʋ dàń ma tì ʋ nyɩna tə jɩzən tə, Efərayimə yuu wa, sə ʋ lwàń ʋ tún Manase yuu wa. 18 Yá Zʋzɛfə dàń swɩ̀n ʋ nyɩna tə con, ʋ wʋ́: «Ɔn ɔn, baba! Kʋ tà nətʋ. Bisɩmaa wa tə, nə yɩ bikwɩa. Tún n jɩzən tə, ʋ mʋ̀ yuu wa.» 19 Yá ʋ nyɩna tə vɩga, ʋ ga swɩ̀n ʋ con, ʋ wʋ́: «À yə̀ə́, à bìú! À yə̀ə́ də, ʋ də wá jì dwíí don nɩbɛɛ. Ʋ də wá ya ləzwənfarʋ. Yá ʋ nyánʋ́ tə dàń nə wá ya ləzwənfarʋ, ʋ doni wá. Ʋ mʋ̀ dwíí tə wá jì dwíə́ kapʋpʋ.»
20 Kʋ dɩɩn tə nə, Yɩzərayɛlə lòrì, sə Yɩɩ fwa zəni Zʋzɛfə bɩ̀á tə yɩra, ʋ ga swɩ̀n, ʋ wʋ́:
«Yɩzərayɛlə dwíí tə wá bon á yɩra, ba ma lòrì Yɩɩ, sə ʋ fwa zəni. Ba wá swɩ̀n, ba wʋ́:
“Yɩɩ wá fwa zəni n yɩra, ndə ʋ nə fwa zəni, Efərayimə də Manase yɩra, nətʋ.” »
Mə kʋ zɩgɩ nətʋ, Yɩzərayɛlə ma kə Efərayimə Manase yáá.
21 Kʋ kwa nə, Yɩzərayɛlə swɩ̀n Zʋzɛfə con, ʋ súrí lá, ʋ wʋ́: «Nə̀ń, à kʋ́ʋ̀ bá dán, à ma tɩ! Yá Yɩɩ wá ya də aba, ʋ ga wá pa, á pìí á va á nɩbara-ba, lʋʋ nii tə wa. 22 À pɩn mʋ́ Siswɛmə nagwanaa tə, sə kʋ ya n tori. Kʋ mʋ̀ tori təntə dwə n nubɩa tə nyiən tə. Nagwanaa təntə yɩ à kwatara sɩ̀ʋ́ də à twan nə, à ma ta à jon, Amɔrə dwíí tə con.»