Lʋʋ Dəkuu 47

1 Kʋ kwa nə, Zʋzɛfə dàń yá ʋ nyɩna tə də ʋ nubɩa tə Goswɛn nə, ʋ ga va ʋ swɩ̀n pɩ̀ʋ́ Farawon con, ʋ wʋ́: «À nyɩna də à nubɩa nan Kanaan lʋʋ nii, ba bà. Ba twi də ba vanmɩnɩ, də ba vanfaran, də won tə mama, ba nə jə. Ba wulə Goswɛn nagwanaa tə wa.» 2 Yá Zʋzɛfə dàń lɩ ʋ nubɩa tə wa lɩ̀à bonu, ʋ ja bà, ʋ bɩrɩ pɩ̀ʋ́ Farawon nə. 3 Pɩ̀ʋ́ Farawon ma bwe ba, ʋ wʋ́: «Bɛ̀ɛ̀ nə yɩ á tʋtʋŋɩ?» Ba le wá, ba wʋ́: «Nə mʋ̀, n tʋ̀tʋ̀nà tə yɩ vàná nə, nə kʋ̀nɩ̀. Kʋ mʋ̀ nə yɩn nə nɩbara-ba tʋtʋŋɩ.» 4 Ba tə swɩ̀n pɩ̀ʋ́ Farawon con, ba súrí lá, ba wʋ́: «Nə yɩ nə twi, sə nə twá nə jə̀ń, n lʋʋ nii tə wa. Cɩ́gá, niən tə yà yɩ fìú, Kanaan lʋʋ nii tə wa. Kʋ pɩn gaʋ kʋ́ʋ̀ tə̀lə́, sə nə vàná tə də́. Sɩ́ʋ́n nə, nə dàń lòrì mʋ́, sə n pa cwəŋə, nə mʋ̀ n tʋ̀tʋ̀nà tə nə, sə nə jə̀ń Goswɛn nagwanaa tə wa.» 5 Pɩ̀ʋ́ Farawon ma swɩ̀n Zʋzɛfə con, ʋ wʋ́: «N nyɩna tə də n nubɩa tə yɩ ba twi, sə ba jə̀ń n con! 6 Ezwipətə lʋʋ nii tə də yɩ kʋ wulə n jɩɩn wa. Sɩ́ʋ́n nə, n dàń pɩa bwálɩ́, kʋ nə ziən lʋʋ nii tə wa, n pa ba jə̀ń. Ba wàá Goswɛn nagwanaa tə wa, ba jəni. Yá n nə yə̀ə́ lɩ̀à ba wa, ba nə yə̀ə́ tʋtʋŋɩ yáá zəni, sə n lɩ ba, n tún, sə ba ywàń à də vàná tə yuu. 7 Kʋ kwa nə, Zʋzɛfə ja ʋ nyɩna Zwakɔbə də, ʋ bà, ʋ bɩrɩ pɩ̀ʋ́ Farawon nə. Yá Zwakɔbə dàń lòrì, sə Yɩɩ fwa zəni pɩ̀ʋ́ Farawon yɩra. 8 Pɩ̀ʋ́ Farawon bwe Zwakɔbə, ʋ wʋ́: «N jə bɩna bagalɩ?» 9 Zwakɔbə le wá, ʋ wʋ́: «Kʋ jə bɩna bíí də fɩtwa, à nə wulə lʋʋ wa, à jírí, à jəni bwálá nə, də à zaŋa. À bɩna ba dáá, yá tə ga wà ywánɩ́ yɩn tə pa nə də. Tə wà à nyɩna-ba bɩna yí, ba nə yɩn lʋʋ wa ba jírí, ba jəni bwálá nə, də ba zaŋa.» 10 Zwakɔbə kʋ́ʋ̀ lòrì, sə Yɩɩ fwa zəni pɩ̀ʋ́ Farawon yɩra, ʋ ga zàn pɩ̀ʋ́ Farawon yáá con, ʋ nan. 11 Yá Zʋzɛfə dàń pɩn ʋ nyɩna tə, də ʋ nubɩa tə jə̀ń Raməsɛsə nagwanaa tə wa, ndə pɩ̀ʋ́ Farawon yà nə pɩn nii, sə ʋ fwa nətʋ. Kʋ bwálɩ́ təntə yà nə ziən, kʋ doni bwálá tə mama, Ezwipətə lʋʋ nii tə wa. 12 Zʋzɛfə pɩn wodiu ʋ nyɩna tə, də ʋ nubɩa tə, də ba dìə̀ lɩ̀à tə mama nə, kʋ yí ba də ba bɩ̀á mɛ diŋə.

Zʋzɛfə nə tʋn nətʋ Ezwipətə nə, niən tə máŋá wa

13 Niən tə dàń yà yɩ fìú, kʋ pa wodiu yà kʋ́ʋ̀ tə̀lə́ lʋʋ nii tə mama wa. Tə yà gwàrɩ̀ Ezwipətə tɩ̀án, də Kanaan tɩ̀án mama. 14 Zʋzɛfə jon səbiu tə mama, kʋ yà nə wulə Ezwipətə də Kanaan tɩ̀án con, ba nə ja twi, ba ma yə̀ wodiu tə. Ʋ jon səbiu təntə, ʋ tún pɩ̀ʋ́ Farawon sàń nə. 15 Máŋá tə, Ezwipətə də Kanaan tìán səbiu nə zwɛ̀, Ezwipətə tɩ̀án mama twi, ba swɩ̀n Zʋzɛfə con, ba wʋ́: «Pa nəba wodiu! Kʋ wà mɛ, sə niən tə gʋ nəba, n ga jə̀ə́ n ywàŋá, nə səbiu nə zwɛ̀ yɩrɩ.» 16 Zʋzɛfə ma swɩ̀n ba con, ʋ wʋ́: «Á səbiu nə zwɛ̀, sə á ja á vàná, á ja bà, á ma lárɩ́ wodiu tə.» 17 Ba dàń jɩn ba vàná, ba ja bà, ba pa Zʋzɛfə nə, ʋ ga pa ba wodiu tə. Vàná təntə yà yɩ səsen, də pee, də nɩan, də bɩnɛ nə, ba ma lárɩ́ wodiu tə. Kʋ bɩnɩ təntə nə, Zʋzɛfə ja wodiu tə, ʋ ma lárɩ́ ba vàná tə mama.

18 Kʋ bɩnɩ təntə nə kɛ̀ń kwa nə, Ezwipətə tɩ̀án tə kʋ́ʋ̀ twi, ba swɩ̀n Zʋzɛfə con, bɩnɩ tə wa, kʋ nə dan lá, ba wʋ́: «Yuu-tiu, nə bá səgə mʋ́, də nə səbiu tə zwɛ̀. Yá nə vàná tə də mama dàń yɩ n mʋ̀ nyiən. Nə kʋ́ʋ̀ ba won mama jə, sə nə ma lárɩ́ wodiu, də kʋ nə tà nə tətə, də nə kárɩ́ tə. 19 Kʋ wà mɛ, sə niən tə gʋ nəba, tə yá nə kárɩ́ nə, n ga jə̀ə́ n ywàŋá. Pa nəba wodiu tə, sə nə ga ya pɩ̀ʋ́ Farawon ywə́ŋə́, nə vàrà nə kárɩ́ tə, nə pa wá. Pa nəba wodwii sə nə dù, sə kʋ jon nə mɩɩ, kʋ kə lʋʋ wa, nə dàn ká tɩ. Yá nə kárɩ́ tə də bá pə̀ń tʋtʋ. 20 Niən tə yà jə Ezwipətə tɩ̀án tə zənzən, kʋ pa ba lìù mama yoli ʋ kárá. Zʋzɛfə dàń yə̀ kárɩ́ tə mama, Ezwipətə lʋʋ nii wa, ʋ jon, ʋ pa pɩ̀ʋ́ Farawon nə. Kʋ nətʋ dàń pɩn, Ezwipətə lʋʋ nii tə mama, jì pɩ̀ʋ́ Farawon nyiən. 21 Zʋzɛfə pɩn lɩ̀à tə mama jì ywə́ŋə́, Ezwipətə lʋʋ nii tə mama wa. 22 Zʋzɛfə yà wà joŋwana tə mʋ̀ kárɩ́ tə jon, ʋ yə̀. Pɩ̀ʋ́ Farawon yà pɩn nii, sə joŋwana tə mʋ̀ ja nii wodiu, ʋ con. Yá pɩ̀ʋ́ Farawon dàń nə pɩn ba wodiu, ba də́. Kʋ mʋ̀ nə pɩn, ba mʋ̀ wà ba kárɩ́ yoli. 23 Zʋzɛfə swɩ̀n lɩ̀à tə con, ʋ wʋ́: «Zə̀n kʋ tə, á yɩ à yə̀ aba, á də á kárɩ́ mɛ, à jon à pa pɩ̀ʋ́ Farawon nə. Á dàń nəŋə wodwii nə, á joŋə, á ma dù kárɩ́ tə. 24 Woceri nə yí, á wá pwɛ̀ wodiu tə púlə́ bonu. Á wá lɩ púlí nədʋ, á pa pɩ̀ʋ́ Farawon nə, á də ga tì púlə́ banɩa tə, á də á bɩ̀á, də á dìə̀ lɩ̀à də́. Á wá lɩ tə wa, á ma pìí á dù kárɩ́ tə.» 25 Ezwipətə tɩ̀án tə swɩ̀n Zʋzɛfə con, ba wʋ́: «Yuu-tiu, nə sɛ̀, sə nə ya pɩ̀ʋ́ Farawon ywə́ŋə́. Cɩ́gá, n fwa pubwanʋ nə yɩra, n ga jon nə mɩɩ n kə lʋʋ wa. 26 Mə kʋ zɩgɩ nətʋ, Zʋzɛfə ma pa yoo təntə jì nii, Ezwipətə tɩ̀án kárɩ́ tə yuu wa, kʋ nə zɩgɩ kʋ máŋá tə nə, kʋ bà kʋ yí zə̀n. Ba nə pwɛ̀ Ezwipətə lʋʋ nii kárɩ́ tə wodiu púlə́ bonu, púlí nədʋ yɩ pɩ̀ʋ́ Farawon nə tɩ. Joŋwana tə cɩcɩ kárɩ́ tə nə tà pɩ̀ʋ́ Farawon nyiən.

Zwakɔbə talɩkwa yìə̀n tə, ʋ nə pɩ̀à, sə tə tʋn

27 Yɩzərayɛlə lɩ̀à tə yà jə̀ə́ Ezwipətə lʋʋ nii tə wa, Goswɛn nagwanaa tə wa. Ba mʋ̀ dàń yà nə tɩ nagwanaa təntə. Ba lɩrɩ bɩ̀á, ba dwíí ga pùlì zənzən. 28 Zwakɔbə fwa bɩna fugə də barpɛ, Ezwipətə lʋʋ nii wa. Yá Zwakɔbə bɩna tə mama, ʋ nə fwa lʋʋ wa, yɩn bɩna bíí də sapwɩlə də barpɛ. 29 Máŋá tə wa, Zwakɔbə, ʋ yɩrɩ don nə yɩ Yɩzərayɛlə mɩɩ nə bwələ, sə kʋ zwɛ̀, ʋ bon ʋ bìú Zʋzɛfə, ʋ swɩ̀n ʋ con, ʋ wʋ́: «Də n cɩ́gá nə swə nə, à lòrì mʋ́, sə n kə n jɩɩn à ciin də̀ń, n ma bɩrɩ, də n jə nə də wʋywaŋʋ*, də pùə́ nədʋ. Yá à nə tɩga, n bá gùrì nə, Ezwipətə lʋʋ nii tə wa. 30 Dɩɩn tə, à nə tɩga, n wá tì à tɩgɩ tə, n ja nan Ezwipətə lʋʋ nii tə wa, n va n gùrì, à nyɩna-ba libəri tə wa.» Zʋzɛfə sɛ̀, ʋ wʋ́: «À wá tʋn kʋ, ndə n nə swɩ̀n nətʋ.» 31 Yɩzərayɛlə tə swɩ̀n, ʋ súrí lá, ʋ wʋ́: «Du də n cɩ́gá wá tʋn kʋ yoo təntə.» Yá Zʋzɛfə dàń dùə̀. Kʋ kwa nə, Yɩzərayɛlə dàń vàlɩ̀ ʋ gədo tə yuu con, ʋ kə Yɩɩ lɛ̀ɛ̀.