Zwakɔbə də ʋ dìə̀ lɩ̀à vəli Ezwipətə
46
1 Zwakɔbə, ʋ yɩrɩ don nə yɩ Yɩzərayɛlə dàń zàn, ʋ vələ Ezwipətə, də wiən tə mama, ʋ nə jə. Ʋ nə vəli ʋ yí Bɛrə Sweba, ʋ fwa joŋi lá, ʋ pa ʋ nyɩna Yɩzakə Yɩɩ tə nə. 2 Yá kʋ tɩtɩn nə, ʋ nì də Yɩɩ boŋə wá, ndə nɩʋn wa nə, ʋ wʋ́: «Zwakɔbə! Zwakɔbə!» Ʋ ma sɛ̀, ʋ wʋ́: «Nə̀ń nə!» 3 Yá Yɩɩ dàń swɩ̀n ʋ con, ʋ wʋ́: «À mʋ̀ nə yɩ Yɩɩ! À yɩ n nyɩna tə Yɩɩ! Dàn ká pa fən ja mʋ́, sə n va Ezwipətə. Cɩ́gá, mə lʋʋ nii təntə wa nə, à wá pa n dwíí tə jì lʋʋ nii nəfarʋ. 4 À mʋ̀ nə wá ja mʋ́, à va Ezwipətə. Yá n tɩan dɩɩn nə, Zʋzɛfə tətə jɩɩn wa nə, n wá tɩ. À mʋ̀ ga nə wá pìí, à ja n dwíí tə, à nan Ezwipətə, à bà yəbə.»5 Kʋ kwa nə, Zwakɔbə dàń nan Bɛrə Sweba, ʋ vìí. Ʋ bɩ̀á tə pɩn, ʋ də ba kana, də ba bɩ̀á zʋ səsen kòrə̀n tə, pɩ̀ʋ́ Farawon nə pɩn tə bà, sə tə tì ba. 6 Ba jɩn ba vàná tə, də ba jɩjə wiən tə də mama, ba nə nɩ Kanaan lʋʋ nii tə wa, ba kə lá, ba vìí. Mə kʋ zɩgɩ nətʋ, Zwakɔbə də ʋ dìə̀ lɩ̀à mama, ma va Ezwipətə. 7 Ʋ lɩ ʋ bɩ̀á, də ʋ bwɩ̀ɩ́, də ʋ nɩ̀án, də ʋ dwíí tə mama, ʋ kə lá, ʋ ja vìí.
8 Nə̀ń Yɩzərayɛlə dìə̀ lɩ̀à tə yɩra, ba də wá nə twi Ezwipətə. Ba mʋ̀ nə yɩ Ribɛn, ʋ nə yɩ Zwakɔbə bikwɩa. 9 Ribɛn bɩ̀á nə yɩ Enɔkə, də Palu, də Ɛsəron, də Karəmi.
10 Kʋ súrí Simeyon də ʋ bɩ̀á Yemuwɛlə, də Yamɛn, də Ohadə, də Yakɛn, də Soharə, də Sayulə. Sayulə nuu yɩ Kanaan tɩ̀án bʋ̀á.
11 Kʋ súrí Levi də ʋ bɩ̀á Gɛrəswon, də Kehatə, də Merari.
12 Kʋ súrí Zwida də ʋ bɩ̀á Swela, də Perɛsə, də Zera. Zwida bɩ̀á Ɛrə də Onan mʋ̀ tɩga, Kanaan lʋʋ nii tə wa. Zwida bìú Perɛsə yà jə bɩ̀á bələ. Ba mʋ̀ nə yɩ Ɛsəron, də Amulə.
13 Kʋ súrí Yɩsakarə də ʋ bɩ̀á Tola, də Puva, də Yakubə, də Swiməron.
14 Kʋ súrí Zabulon də ʋ bɩ̀á Serɛdə, də Elon, də Yaleyɛlə.
15 Mə ba mʋ̀ nə yɩ Leya bibara ʋ nə lɩrɩ də Zwakɔbə, Padan-Aramə nə, kʋ súrí ba bʋ̀á Dina nə. Zwakɔbə də ʋ kan Leya bɩ̀á təntə də lɩrɩ bɩ̀á. Yá ba mɛ nə ken duən nə, ba yɩ lɩ̀à fɩtwa də batwa.
16 Kʋ súrí Gadə də ʋ bɩ̀á Sefon, də Agi, də Swuni, də Ɛsəbon, də Eri, də Arodi, də Areli.
17 Kʋ súrí Aswɛrə də ʋ bɩ̀á Yɩməna, də Yɩswəva, də Yiswəvi, də Berɩya, də ba nakʋa Sera. Berɩya yà jə bɩ̀á bələ. Ba mʋ̀ nə yɩ Ebɛrə, də Maləkɩyɛlə.
18 Mə ba mʋ̀ nə yɩ Zwakɔbə də Ziləpa dwíí. Ziləpa yà yɩ Leya tʋtʋnbʋa, ʋ nyɩna Laban nə pɩn wá. Ba dwíí tə mɛ nə ken duən nə, ba yɩ lɩ̀à fugə də bardʋ.
19 Zwakɔbə kan Raswɛlə də bɩ̀á nə yɩ Zʋzɛfə də Bɛnzwamɛn. 20 Zʋzɛfə də ʋ kan Asənatə lɩrɩ Manase, də Efərayimə, Ezwipətə lʋʋ nii tə wa. Asənatə yɩ Potifera bʋ̀á. Potifera yɩ tɩʋ tə, ba nə boŋə Onə, joŋwanʋ. 21 Bɛnzwamɛn bɩ̀á nə yɩ Bela, də Bekɛrə, də Aswəbɛlə, də Gera, də Naaman, də Ehi, də Roswə, də Mupimə, də Upimə, də Arədə.
22 Mə ba mʋ̀ nə yɩ Zwakɔbə də ʋ kan Raswɛlə dwíí. Ba mɛ nə ken duən nə, ba yɩ lɩ̀à fugə də banɩa.
23 Kʋ súrí Dan də ʋ bìú Uswimə.
24 Kʋ súrí Nɛfətali də ʋ bɩ̀á Yasɩyɛlə, də Gumi, də Yesɛrə, də Swilɛmə.
25 Mə ba mʋ̀ nə yɩ Zwakɔbə də Bila dwíí. Ba mɛ nə ken duən nə, ba yɩ lɩ̀à barpɛ. Bila yà yɩ Raswɛlə tʋtʋnbʋa, ʋ nyɩna Laban nə pɩn wá.
26 Zwakɔbə dwíí tə mama, ba nə yɩ ʋ bɩ̀á də ʋ nɩ̀án, ba nə vəli Ezwipətə, yà yɩ lɩ̀à sapwɩtwa də bardʋ. Ʋ bikɩna tə nii ba lá də́. 27 Zʋzɛfə lɩrɩ bɩ̀á bələ Ezwipətə nə. Ba nə súrí lá, də Zwakɔbə dwíí tə mama, ba nə twi Ezwipətə, yɩ lɩ̀à sapwɩtwa də fugə.
28 Máŋá tə, Zwakɔbə də ʋ lɩ̀à tə nə bwə́lə́ Goswɛn, ʋ tʋn Zwida, sə ʋ dí yáá, ʋ va ʋ swɩ̀n Zʋzɛfə con, sə ba jəri duən, Goswɛn nagwanaa tə wa. 29 Zʋzɛfə nə nì kʋ, ʋ pɩn ba tanɩ ʋ səsen koru. Ʋ nan ʋ zʋ kʋ wa, ʋ vələ Goswɛn, sə ʋ jəri ʋ nyɩna Yɩzərayɛlə. Máŋá tə, ba nə jəri duən, Zʋzɛfə pùrì ʋ nyɩna tə, ʋ kə ʋ nyʋnɩ nə, ʋ ga kwi. Ʋ kwi kʋ dɩ́án, ʋ nyɩna tə nyʋnɩ nə. 30 Yɩzərayɛlə, swɩ̀n Zʋzɛfə con, ʋ wʋ́: «À pìí à na mʋ́ à yii wa, də n tə wà tɩ! Sɩ́ʋ́n nə, à dàń nə tɩga də, kʋ ba yoo jə!» 31 Zʋzɛfə dàń swɩ̀n ʋ nubɩa tə, də ʋ nyɩna dìə̀ lɩ̀à tə con, ʋ wʋ́: «À wá pìí à va, à swɩ̀n pɩ̀ʋ́ Farawon con, sə ʋ yəni də, à nubɩa, də à nyɩna dìə̀ lɩ̀à tə, ba yà nə wulə Kanaan lʋʋ nii tə wa, twi à con. 32 À wá pa ʋ lwarɩ də á yɩ nayɩra, á yɩ vàná nə, á kʋ̀nɩ̀. Yá á dàń twi də á vanmɩnɩ, də á vanfaran, də won tə mama á nə jə. 33 Máŋá tə wa, pɩ̀ʋ́ Farawon nə bon aba, ʋ wá bwe aba ʋ jə́n, bɛ̀ɛ̀ nə yɩ á tʋtʋŋɩ. 34 Yá á dàń wá le wá, də á mʋ̀, ʋ tʋ̀tʋ̀nà tə yɩ vàná nə, á kʋ̀nɩ̀, kʋ nə zɩgɩ á zandʋan mama, kʋ bà kʋ yí zə̀n. Kʋ mʋ̀ nə yɩn á nɩbara-ba tʋtʋŋɩ. Də á nə swɩ̀n nətʋ, pɩ̀ʋ́ Farawon wá pa aba cwəŋə, sə á jə̀ń Goswɛn nagwanaa tə wa. Cɩ́gá, Ezwipətə tɩ̀án ba lɩ̀à tə mama, ba nə kʋ̀nɩ̀ vàná swə, mɩ́ámɩ́án.»